Aqaid Chapter 01 khuda qadir o mukhtaar hai



Download 57.4 Kb.
Date conversion03.01.2017
Size57.4 Kb.
Aqaid Chapter 01

KHUDA QADIR O MUKHTAAR HAI.
Khuda qadir hai. Yaani har cheez par qudrat rakhta hai. Kisi kaam ke karne se aajiz nahi hai.

Khuda mukhtaar bhi hai. Yani kisi kaam ke karne par majboor nahi hai jis kaam ko chaahta hai karta hai aur jis kaam ko nahi chaahta nahi karta balki ek hi kaam ko jab chaahta hai karta hai aur jab chaahta hai nahi karta.

Jaise janaab e Ibrahim (as) ke liye aag thandi kar di thi aur janab e Moosa (as) ne jab angaara haath mein uthaya to aapka haath jal gaya kyunki aag ka jalana ya bujhana khuda ka maqsad na tha balki nabi ko bachana maqsood tha.

Janab e Ibrahim (as) tabhi bach sakte the jab aag thandi ho jaye aur janabe Moosa (a.s.) tabhi bach sakte the jab haath jal jaye kyunki firaun ko shuba tha ki who bachcha janab e moosa hi hai jo iski hukumat ko mita denga aur agar angaara aapke haath ko na jalata to firaun pehchaan leta aur aapko qatal kar daalta isliye aag ko thanda karna munasib na tha aur haath ka jal jana zaroori tha.

Khuda apne kissi kaam mein kisi ke mashware aur mada ka mohtaaj nahi hai, na koi isko kisis kaam se rok sakta hai.

Rasul e Khuda s.a.w.s nay farmaaya kay “ A… ka farmaan hai kay meray momin bando may aisay banday hai jin ka deen sarwat aur wusat e rizq aur jismaani sehat say qaaim rehta hai to mi unhay sarwat aur wust e rizq aur jismaani sehat day kar aazmaata hu aurmeary kuch aisay banday bhi hai jin ka deen fiqro faaqa aur jismaani beemari say qaem reh sakta hai to mai unhay gurbat o iflaas aur beemari say aazmaata hu taaqe un ka deen qaaem rahay aur mai bakhoobi jaanta hu kay momin bando ka deen kis cheez say qaaem reh sakta hai.”

Imam Mohd Baqir a.s. nay farmaaya : “ A… ki qaza ko tasleem karnay ka sab say ziyaada haqdaar woh hai jo A… ki maarefat rakhta ho aur jo qaza-e-Khudawandi par raazi rahega to qaza us par waarid hogi aur raza ki wajah say A.. us kay ajr may izaafa kardega aur jo qaza-e-Ilaahi par naaraaz hoga to qaza jaari ho kar rahegi magar A… us ka ajr zaaya kar dega.”

Insaan Majboor Hai Ya Mukhtaar


is dunya mein bohot se aise kaam hai jinka insaan se koi taaluk nahi hai. masalan sooraj ka nikalna aur doobna, mausam ka badalna waghaira. yeh kaam sirf khuda ke hai in kamon ko banda nahi kar sakta.

Kuch kaam aise hai jinke karne mein khuda aur bande dono ka hissa hota hai jaise khet jotna, bona, pani dena, khaad dalna hamara kaam hai aur darakht ka ugana aur ismein phool aur phal paida karna khuda ka kaam hai.

Bahut se kaam aise hai jinhe sirf hum karte hai. Inmein khuda shareek nahi hota. Jaise hum sach bolte hai ya jhoot, halaal khate hai ya haraam, namaz padhte hai ya nahi padhte, roza rakhte hai ya nahi rakhte waghaira. Ye khalis hamare kaam hai, Inko hum hi karte hai. Hamare in kamon mein khuda shareek nahi hota.

Yeh samjhna ghalat hai ki hamare sare kam asl mein khuda ke kaam hai jinko woh hamare zariye anjaam deta hai aur hum in kamon ke karne par majboor hai balki hum apne in kamon mein qadir aur mukhtar hai chahe kare chahe na kare.

Ek martaba Abu Hanifa ne hamare chatte Imam Hazrat Jjafar e Sadiq (as) se is masale par behes ki thi. Abu Hanifa ke khayal mein khuda insaan ke har achche aur bure kaam ka zimmedaar tha. Imam ne Abu Hanifa ko jawab diya ki agar insaan ke kaam ko sirf khuda karta hai to achche ya bure kaam ki jaza ya saza khuda hi ko milna chahiye (ma’azallah) aur agar insaan aur khuda milkar achche ya bure kaam karte hai to bhi insaan ke saath khuda ko bhi (ma’azallah) saza ya jaza milna chahiye. Lekin yeh dono baatein ghalat hai. Sahi baat yahi hai ki insaan apne kaam khud karta hai isiliye isko jaza ya saza milegi.Imam ki yeh baat sunkar Abu Hanifa sharminda hogaye aur koi jawab na de sake.

Gharz ye ki jis tarah yeh kehna ghalat hai ki hum kuch nahi kar sakte balki sab kuch khuda karta hai isi tarah yeh kehna bhi ghalat hai ki hum sab kaam karsakte hai.

Aik baar hamare maula Hazrat Ali (as) se kisi ne poocha tha ki insaan sab kaam kar sakta hai ya nahi to aapne farmaya ki aik pair uthakar khade ho jao, jab isne apna aik pair utha liya to aapne farmaya ki doosra pair bhi uthalo.

Isne kaha doosra pair uthane se majboor hun. Aapne farmaya ki jis tarah aik pair ke baad dosre pair ka utha lena na mumkin hai isi tarah dunya mein bohot se kaam aise hain jo hamare bus mein nahi hain lihaza yaad rakho ke jis tarah banda khuda ke kaam mein dakhal nahi de sakta isi tarah khuda bhi bando ke kaam mein shareek nahi hai.

Jo jaisa karega usko usi aitbaar se saza ya jaza milegi.



Islaam ye chahta hai kay asbaab (means) muhayya kiye jaein aur nateeje kay liye A.... per bharosa kia jaye. Islam nay tark e asbaab (means) ki ta’leem nahi di.

Quran e Majeed ne hamesha asbaab (means) muhayya karne par zor diya hai masalan Quran e Majeed Sura e Nisa, Ayat :102 main mujaahideen ko ye dars diya ke jab ain jang main namaz ka waqt aajaye to “wo apne hathiyaar aur bachao ka saman le kar namaz parhain. Is ke ilawa hukum aya “dushmanon ke muqable main apni quwwat amada karo aur ghodhe (horses) tayyar rakho” ya Hazrat Musa ko Allah ne hukum diya “Mere bandon ko le kar raat ke waqt safar karo take dushman tumhain dekhne na paye”. (Sura e Dukhan, Ayat:23)

Haan Islam ki ta’leem ye hai ke dushman ke muqable ke liye quwwat(taqat) amada rakho laikin nateeja khuda ke supurd kar diya jaye.

Yahi wajah hai ke Imam Ja’far e Sadiq ne farmaya “A.... ne apne bandon par farz kiya hai ke wo apni zaroraton ko in asbaab (means) ke zariye sey hasil karain jo A.... ne muqarrar kiye hain aur hukm diya hai ke in wasaail se istifada karain”.

Khuda Buraee Nahi Karta

Tumko maaloom hai ki khuda har cheez par qadir hai. Yani who jo chahe kar sakta hai. Isse baaz log yeh samajhte hai ki khuda buraee bhi karta hai. Jhoot bhi bolta hai, zulm bhi karta hai aur wada karke muqar bhi jata hai isliye ki who har cheez par qadir hai.

Tum khud socho ki kya aisa samajhne theek hai?

Qadir hone ke mana hai”karsakna” na ki karna. Is liye ki khuda ke qadir hone ka matlab yeh hai ki woh jo chahe kar sakta hai magar laazim nahi ki zaroor kare.

Jab buri baaton ko hum pasand nahi karte to khuda kaise pasand kar sakta hai.

Hum her paani se muu dhone par qadir hai chahe who pani najis ho ya pak ho, neher mein beh raha ho ya gandi nali mein

Lekin nali mein behne wale gande pani se sirf pagal hi muu dhota hai, hum nahi dhote.

Isi se samajhlo ki hum gande pani se muh dho sakte hai magar dhote nahi.

Khuda bhi jhoot bol sakta hai magar bolta nahi, zulm kar sakta hai magar karta nahi, wada karke mukar sakta hai magar mukarta nahi aur buraee kar sakta hai magar karta nahi.


(Ref : “Pande Taareekh” Vol 5 & “Imamia Diniyat” vol. 5-tanzeemul makatib)

green paras to delete -irrelivent

Aqaid chapter 2



MAQSAD E HAYAAT----Hum kyun paida huway?

Is dunya mei Allah ne koi cheez baikar nahi paida ki balke jo kuch is ne banaya hai kisi na kisi maqsad ke liye banaya hai.

Aur hum ne aasmaan aur zameen aur iske darmian ki makhluqaat ko bekar nahi paida kia hai”. (sure Saad:ayat 27)

Suraj roshni deta hai. Chaand raton ke andhere mei ujala bakhshta hai. Badal pani barsata hai. Pani se kheti hari bhari hoti hai,Janwar insaanon ke bohot se kaam karta hai. Sawari, kheti, seenchai, waghaira mei janwaron se kaam liya jata hai.(more eg. Story-Birds in China, shot-they ate worms…,in body-nose,saliva….).

To hum ne daikha ke khuda ne dunya ki choti say choti cheez bhi baghair maqsad ke nahi paida ki, to ye kaisay ho sakta hai ke insaan jo ashraful makhluqaat hai, baghair maqsad ke paida kia ho??.
Khaliq e kayenaat ne is baat ko quran mai yu bayan kia:

Kia tum ye khayal kartay ho ke hum ne tum ko bekar paida kia hai aur hamari taraf palta kar nahi laye jao ge.” (sure mominoon:ayat 115)


Khuda e mehraban ne insaan ko khalq karnay ke maqsad ko quran mai wazeh kia:

Aur mai ne jinnat aur insaan ko is liye paida kia hai ke meri ibadat karain”. (sure azzariyaat:ayat 56)

Insaan bhi baikar nahi paida huwa hai. Balke Allah ki ibadat ke liye paida huwa hai.

Allah ne is dunya ki har cheez insaan ke liye paida ki aur insaan ko apni ibadat ke liye paida kiya. Is dunya mei tum ko ye usool nazar aye ga ke har makhlooq apne se buland ke liye paida ki gaee hai. Ghaas(grass) is liye paida huwi hai ke ise janwar khaey. Janwar is liye paida huwa hai ke wo insaan ke kaam aye. Insaan se buland sirf khuda hai lehaza insaan khuda ke ehkam maanne aur iski ibadat karne ke liye paida huwa hai.

Jab ye baat sabit hai ke kayenaat ki har choti badhi cheez apni takhleeq(pedaish) ka maqsad pura karnay mai masroof hai to ashraful makhluqaat honay ke natay hum per ziada zimmedari hai ke hum bhi apni takhleeq ka maqsad pura karain.Aayain, ehed karain ke kabhi khuda ki nafarmani nahi karaingay aur apni zindagi ko khuda ke bataye huway ehkamaat ke mutabiq basar karain gay.

Imam Hasan Askari alayhis salaam aik din bachpan mei bachchon ke saath khare the sab bachche khel kood rahe the. Imam khelne ke bajae ro rahe the. Udhar se aik buzurg ka guzar huwa. Jo bohot aqalmand aur deendar aadmi the. Imam ko rota dekh kar ruk gae aur roney ka sabab poochney lagey. Tasalli dete huwe unhon ne kaha, “Main tumhare liye bazaar se khiloney kharidey lata hoon.” Hazrat ne kaha, “Hum khelne ke liye paida nahi huwe”. Unhon ne sawal kiya, “Phir kis liye paida kiye gaey hain” Hazrat ne farmaya, “Hum ko Allah ne ilm haasil karne aur ibadat karne ke liye paida kiya hai.” Aur Imam ne unko Quran mAjeed ki ayat bhi sunaee. Jis me khuda ne kaha hai ke hum ne insaan ko baikar nahi paida kiya hai. Wo buzurg Imam ki baat sun kar samajh gaey ke ye koi mamuli bachcha nahi hai balke zamane ka hadi aur imam hai.


Hamara farz hai ke apni zindagi ko khel kood mei barbaad na kary. Allah ke ehkaam ki khilaf warzi na karay. Har kam se pehle soch lein ke Allah is se khush hoga ya naraaz, jin kaamon se khuda naraaz hoga in ko na karein. Sirf wo kaam karein jis se khuda khush ho chahe namaz roza ho ya tijarat aur karobar.
Sawalaat:


  1. Dunya ki bazahir bemaqsad nazar aanay wali cheezain bhi insaan ke liye be-inteha mufeed(bohot faiday wali) hain; misal se wazeh kijiye.

  2. Hum ko Allah nay kion paida kia hai? Hamay is maqsad ko pura karne ke liye kia karna chahiye?


{Ref: Imamiya deniyaat # 5(chapter 1)+Talemaat e Ahlebayt# 7(chapter 2)} for above

Aik Waqe’a (ibadat ke hukm ki wajah)
Aik din, aik Naujavan ne, jo sabaq ke chand alfaz parh ke maghroor hogaya tha, mujh se kaha: Subh ki namaz do rakat kyun hai?

Main ne kaha ke main nahi janta laikin ye baat yaqini hai ke is ki koyi na koyi wajah zaroor hogi, albatta ye zaroori nahi hai ke ham par tamam ehkaam e khudawandi ki daleelain wazih ho jayain aur wo bhi aaj hi ke din aur phir kabhi kabhi bunyadi taur par hukm, mehaz ibaadat aur ita’at ka pehlu bhi rakhta hai ,

Is liye ye zaroori hai ke hum khuda ki farmabardari karain,
masalan quran kehta hai:
“Is (jahanam) par unnees (19) farishte muta’ayyan hain aur ham ne jahannam ka nigehban to bas farishton ko banaya hai aur in ki ye ginti bhi kaafiron ki aazmaish ke liye muqarrar ki hai”

(Sura e Mudassir, Ayat 30)


Yani ye daikhain ke koyi aitaraaz karta hai ya nahi ke unnees ki jaga bees (20) farishte kyun nahi hain.
Hum quran main doosri jaga parhte hai:
“(Ay rasool!) jis qible ki taraf tum pehle sajda karte the, hum ne usko sirf is wajah se qibla qaraar diya tha ke jab qibla badal jaye to hum in logon ko, jo rasool ki pairawi karte hain, un logon se alag dekhlain jo ulte paon phirte hain.”
(Sura e Baqara, Ayat 143)
Kya quran main ye nahi aya hai ke Hazrat Ismail (as) ke zabah karne ka hukm in ke waalid Hazrat Ibrahim (as) ko de diya gaya taake khuda dekh le ke wo is ki raah main kitni fidakaari karte hain?

(Sura e Saaffaat, Ayat 105)

Phir main ne is jaawan bhai se kaha ke jis tarah is maadi dunya main mukammal kulliye (formula) hain ke jab tak ghaur na kiya jaye, nateeja haath nahin aata isi tarah roohani dunya main bhi mumkin hai ke hamari zehni pukhtagi aur daemi naikbakhti ke liye aise kulliye maujood ho ke agar ham ghaur na karain to is nateeje par na pohonchain.

(Eg. 100 qadam par khazana aur aap 110 qadam chalay-khazana nahi milayga,ya Telephone ke aik number ko miss/wrong kardiya jaye-contact nahin hoga, ya chaabi(key)ki misal, jiska aik groove twist ho jaye to darwazaa nahin khule ga)

Us shakhs ko main ne jitni misalain deen aur jis qadr guftugu ki, main ne dekha ke woh kitaabain parhne aur taaleem hasil karne se itna maghroor ho gaya hai ke woh nahin chahta ke

ibaadat ke zimn me is masale ko tasleem kare aur woh ye bhi nahin manta ke

ham wahi ki hidayat ke baghair tamaam kamaalaat tak khud nahin pohonch sakte aur na yeh samajhta hai ke ham

is mehdood aql aur ilm ke sath is pur-asraar (mysterious world) dunya main waswase(doubt), ibham(confusion) aur hairani(amazement) ke siwa aur koyi chara nahin rakhte.
{Ref: Maktab e Rasool by Ustaab Muhsin Qaraaiti)} for above waqe’a

Aqaid chapter 3



IMAAMAT

Baara Imam

Hazrat Mohammad Mustafa (s.a.w.s.) ki bohot si hadisein darj hain jin mei aap ne farmaya hai ke maire khalifa aur ummat ke haadi bara honge. Bara ki qaid ka yehi matlab hai ke imam aur khalifa na bara se kam ho sakte hain aur na bara se zaed. Aaj musalmanon mei jitne firqe paae jaate hain un mei sirf Shia Isna-asheri hi aisa firqa hai jo bara imamon ko maanta hai. Warna doosre firqon ke imam aur khalifa ya bara se kam hain ya zyada hain.

Hum Shia Isna-asheri isi liye kehlate hain ke isna-asher ke ma’ni bara hain aur Isna-asheri shia sirf bara imamon ke maanne wale hain, is daleel se Shia Isna-asheri ka sachcha firqa hona sabit hota hai. Hum jin bara imamon ko maante hain inke imam hone ki bohot si daleelein hain.

Pehli Daleel- Hazrat Mohammad Mustafa (s.a.w.s) ne irshaad farmaya hai ke mere baad mere khalifa Ali (A.S.) honge, in ke baad Hasan (A.S.), in ke baad Husain (A.S.), phir Ali ibn-il Husain Zainul Addeen (A.S.). In ke baad Mohamammad ibn Ali al-Baqir (A.S.), phir Ja’far ibn Mohammad as-Sadiq (A.S.), in ke baad Musa ibne Ja’far al-Kazim (A.S.), phir Ali ibne Musa ar-Reza (A.S.), in ke baad Mohammad ibne Ali at-Taqi (A.S.), phir Ali ibne Mohammad an-Naqi (A.S.), in ke baad Hasan ibne Ali al-Askeri, phir Mohammad ibne Hasan al-Mehdi honge.

Maaloom huwa ke nabi apne bara imamon ke naam ma’a laqab aur baap ke naam ke batla gae hain. Lehaza har musalman ka farz hai ke jab nabi ka bataya huwa deen maana hai to in ke batae huwe imamon ka bhi iqraar kare.


Doosri Daleel- Paighambar-e-Islam ki mashhoor hadees hai- inni tarikun fikumus-saqalaini kitaballahi wa itrati ahla baiti maa in tamassaktum bihima lan tazillu ba’di wa inna-huma lainyyaftareta hatta yareda alayyal hawz- Main tum mein do ba azmat aur geraan-qadr cheezein chor kar ja raha hoon jin se wabasta raho ge to kabhi har-giz mere baad gumrah na hoge. Aik Allah ki kitab hai doosri meri itrat hai wahi mere Ahle Bayt hai. Quran Majeed aur mere Ahle Bayt aik doosre ke saath rahenge, kabhi juda na honge. Hawze Kausar par dono mere paas ayenge.

Imam isi liye hota hai ke wo gumrahi ko rok sake. Paighambar-e-Islam ke irshaad ke mutabiq Quran aur Ahle Bayt gumrahi se bachane wale hain is liye zaruri hai ke qayamat tak Quran ke saath koi Imam bhi rahe jo nabi ki itrat yani aap ki aulad mei se ho aur hamare bara imam sab ke sab nabi ke Ahle Bayt aur aap ki itrat hain. Is hadees se hamare bara imamon ka imam hona sabit hota hai kyunke bara imamon ke ilawa jitne logon ne khalifa ya imam hone ka dawa kiya wo nabi ke Ahle Bayt na the. Lehaza aimma Ahle Bayt (A.S) ko imam maanna har sahebe eimaan ke liye zaroori hai.


Hazrat Ali(as) ki khilafat

Hazrat Ali (AS) ki khilafat ke sabot main Quran majeed ki bohot si ayatain, Rasool e kareem ki bohot si hadeethain aur tareekh e islam ke bohot se waqi’aat paish kiye ja sakte hain. Yahan par in main se sirf do daleelain likhi jati hain. Hazrat Ali (AS) ko shia bhi khalifa mante hain aur sunnni bhi. Albatta shia bila fasl aur pehla khalifa mante hain. AUr sunni is liye chotha khalifa mante hain kyunke logon ne apne teesre khalifa ke qatl ke baad aap ko khalifa tasleem kar liya ha. Jabke shia is liye khalifa mante hain kyunke rasool e kareem apni zindagi main Hazrat Ali (AS) ko apna khalifa bahukm e khuda banae gaye the.

Pehli Daleel: Jab nabi e kareem(SAW) ko khuli tableegh karne ka hukm mila to aap ne hukm e khuada ke mutabiq Hazrat Ali (AS) bhaij ke sab se pehle apne khandaan ke logon ko bulaya. Khandan e Abdul Muttalib ke chalees admi jama’ huwe. Hazrat Ameer (AS) ne rasool ke irshad ke mutabiq aane wale mehmanon ki ziafat ka bhi intizaam kiya tha. Khane ki miqdaar kam thi aur khane wale ziyada, magar jab nabi e kareem ne doodh roti aur gosht ko zara zara sa chakhne ke baad majme se khane ko kaha to aap ki barkat se aur aap ki zuban se nikli huwi bismillah se thora khana bohot hogaya aur khane wale kha kar sair hogaye phir bhi khana bacha raha. Jab Huzoor (SAW) taqreer karne khare huwe to Abu Lahab ne aap ki taqreeer se pehle majme’ ko bharka diya ke unhon ne thore kahan eko jaadu ke zariye zyada kar diya hai. Agar taqreer suno ge to ye jaadu ke zariye tum ko tumhare mazhab se munharif kardega. Majma’ ye sun kar utha aur chala gaya. Rasoole Kareem ne phir Hazrat Ali (AS) ko bhaij kar doosre din ke liye bulwaya aur khane ka bhi intezaam kiya. Doosre din bhi sab loag aye aur nabi ki barkat se thora khana bohot ho gaya. Sab ke sair hone ke baad bhi bach raha. Aaj Abu Lahab ne phir taqreer main rukawat dalna chahi to Janaab e Abu Talib (AS) khare hogaye aur Abu Lahab ko sakhti ke sath danta aur rasool e kareem se arz ki ke ke ay mere sardar aap jo kuch kehna chahte hain, kahiye. Rasool ne islam paish kiya, khuda ki tawhid ka paigham sunaya apni nabuwwat ka ailaan kiya aur us ke bad farmaya “Jo shakhs hidayat ke kam main meri madad kare ga, main use apna bhai, wasi aur wazir muqarrar karoonga. Wo mere baad mera khalifa aur janasheen hoga – is ki ita’at logon par meri taraf se wajib hogi.” Nabi ki awaz par kisi ne awaz na di sirf kamsin Hazrat Ali (AS) ne khare ho kar ailaan kiya ke “main madad ka wa’da karta hoon.” Rasoole Akram ne Hazrat Ali (AS) ki pusht par hath rakh kar aap ko majme ke samne kiya aur ye ailaan farmay ke inhon ne mairi madad ka wa’da kiya hai, lihaza ye maire bhai, wasi aur vazir hain. Maire baad maire khalifa ur janasheen hain, main in ko apni taraf se hakim muqarrar krat hoon. In ki ita’at tum sab par wajib hai. Abu Lahab ne jal kar Janaab e Abu Talib (AS) ko ta’na diya – “Muhammad tum ko baite ki ita’at ka hukm dete hain.”

Janaab e Abu Talib (AS) ne jawab diya ke – “Maira bhateeja jo baat bhi kehta hai wo beherhaal khair hai.”

Is waqi’e ka naam da’wat e zul asheera hai. Hazrat Ali (AS) ne zindagi bhar apni jaan aur maal se Rasool allah (SAW) ki madad ki aur aap ke baad aap ki paak nasal yani 11 imamon ne deen ki madad main apni pakeeza zindagian sarf keen. Hazrat Ali (AS) ne apna wa’da poora kiya aur rasool allah neb hi apne wa’de ka aifa farmaya. Hazrat Ali (AS) ko aur in ke baad in ki nasl ke 11 imamon ko apna na’ib, janasheen aur khalifa muqarrar kiya.

Ye kehna ke huzoor intiqaal ke waqt kisi ko khalifa bana kar nahin gaye the balke ummat ko khalifa banana ka haq de gaye ghalat khayal hai aur rasool e a’zam (SAW) ki paak aur be daagh seerat par wa’da khilafi ka ilzaam bhi hai. Koyi sachha musalman apne nabi par wa’da khilafi ka ilzaam lagana pasand nahi kare ga. Lihaza rasool ke bad Hazrat Ali (AS) ko bila fasla khalifa manna har sachhe musalman ke liey zaroori hai.
Doosri daleel- Risaalat maab ne apne inteqaal se do mahine das din pehle athara (18) zilhaj, 10 Hijri ko ghadeer-e-khum kay maidaan mein Hazrat Ali (AS) ki khilafat ka mufassil aur mukammal aelaan farmaya. Aap is waqt aakhri haj ke liey makka-e-muazzama say wapas tashreef laa rahay thay aap ke saath sawa laakh haajion ka majma tha. Jalti dopehr mein qaafle ko rok kar majma jama kiya. Kajawon ka mimbar banwaya aur ba hukm-e-khuda Hazrat Ali (AS) ko le kar mimbar par taqreer ke liye tashreef lay gaey kyounke khuda ki taraf say rasool par aayat nazil huwi thi.

“Aay rasool is baat ka aelaan karo jis ke aelaan ka ham tum ko hukm de chuke hain. Aur agar ye aelaan na kiya to goya risalat ka koyi kaam anjaam nahi diya. Khuda dushmano se aapki hifaazat ka wa’da karta hai.”
Is hukum ke baad huzoor ne majme ke saamne aik toolani taqreer farmayi jis ke aakhir me har musalman se poocha ke tum apni jaan aur maal ke maalik ho ya main tumhari jaan aur maal ka malik hoon.
Is sawaal ka maqsad ye tha ke tum loag khud apne aap ko apna hakim samajhte ho ya mujhe apna hakim samajhte ho.
Sab ne kaha, “Huzoor (S)! Hamare jaan aur maal ke malik hain.” Nabi (S) ne iske baad hazrat Ali (AS) ko baazu pakar kar poore jism se utha liya aur farmaya:

“Jis ka main maula hoon uske ye Ali maula hain. Jis ka main hakim hoon ye Ali bhi iske hakim hain”

Phir aap ne khuda say du’a farmayi ke “tu ise dost rakh jo Ali (AS) se mohabbat kare aur Ali (AS) ke har dushman ko apna dushman qaraar de.” Mimbar se utar kar sab musalmano ko hukm diya ke jaa kar Ali (AS) ki bai’at karo aur unko mominon ka haakim keh kar salaam karo. Sab ne hukm-e-rasool(S) ki tameel ki . Hazrat Umar ne khusoosi mubarakbaad di ke aaj aap mere aur har momin aur momina ke hakim muqarrar ho gaey. Is waqeay ko waqea-e-ghadeer kehte hain. Is waqeay ke baad khuda ne aaya-e-Ikmaal nazil farmaee jis me irshaad hai: “Aaj ke din kaafir tumhare deen se mayoos ho gaya, ab tum uns e na darna. Balke sirf mujh se darna. Aaj ke din main ne tumhare deen ko kaamil kardiya tum par ne’matein tamaam kardee aur Islam ko tumhare liye ba-haisiyat deen ke pasand kar liya.”

Is waqaey se ma’loom huwa ke nabi (S) ne apni umar ke aakhir tak hazrat Ali (AS) ko apna janasheen rakha aur jo Hazrat Ali (AS) ko nabi ka khalifa bila fasl maane ga khuda is ko dost rakhe ga. Jo khilafat bila fasl mane ga khuda ka qael hoga isi ka deen kamil hoga khuda ki ne’matein isi ko milengi aur khuda isi ke islam ko qubool karega.


Sawalaat:


  1. Hadees e Saqalain kisay kehtay hain aur is say aap kia samajhtay hain?

  2. Aaya e Balligh aur Aaya e Ikmal mai khuda ne kia kaha hai?

  3. Waqiya e Ghadeer say khilafat sabit karain?

  4. Hazrat Ali (a.s.) ko shia aur sunni kis farq ke sath khalifa mantay hain?



Ref. Imamia Deenyat # 5- lesson 9,10


Aqaid chapter 4



QAYAAMAT
Qayamat ka doosra naam ma’ad hai. Qayamat wo din hai jab insaan dobara zinda kiye jaenge taake inke achche bure kaamon ka hisaab liya jaaey aur aamal ke mutabiq inko jannat ya dozakh mei jagah di jaegi.
Murdon ke zinda karne par ta’ajjub nahi karna chahiyye. Kyunke jo khuda apni qudrat se baghair kisi cheez ke sab kuch paida kar sakta hai wo is baat par bhi qadir hai ke tamaam insanon ko marne ke baad dobara zinda karde.
Aik martaba ka waqia hai ke Janabe Ibraheem (A.S) aik darya ke kinare se guzre. Aap ne dekha ke aik murdaar hai jis ka aadha hissa darya ke bahar hai aur aadha hissa darya ke andar. Aap ko ye dekh kar sakht ta’ajjub huwa aur aap ne Allah ki baargaah mei dua ki. Parwardegar mujhe ye dikha de ke aise murdon ko kaise zinda karega. Hukm huwa, Ibraheem, chaar janwaron ko pakad kar apne haath mai lo, phir is ke baad inhein zibah karke inke tukre alag alag pahaaron par rakh do aur sab ki minqaar (chonch) apne haath mei rakkho. Iske baad sab ko alag alag awaaz do. Ye saare tukre dor kar tumhare paas aajaenge.
Janabe Ibrahim ne aisa hi kia aur aap ne jo awaz di to har janwar ke tukre aane lage. Aap ne har aik ki chonch is ke jism mei laga di aur har janwar parwaz kargaya.

Is waqiye se saaf zahir hota hai ke khuda wande alam marne ke baad balke qeema qeema hone ke baad bhi zinda karne ki taqat rakhta hai. Iski taqat mai shak karna Qurane Kareem par eiman na lane aur khuda aur rasul ki baat ka inkar karne ke barabar hai.

Sawalat:


  1. Ma’ad se kya murad hai?

  2. Murdon ke dubara zinda hone par ta’ajub kyun na karna chahiye?

  3. Kaise pata chala ke Allah murdon ko reza reza karne ke baad bhi zinda karne ki taqaat rakhta hai?



Barzakh

Har insaan ke marne se qayamat tak ke darmeyani fasle ka naam barzakh hai. Jis ki maut jis qadr qayamat se qareeb hogi is ka barzah itna hi mukhtasar hoga aur jis qadr door hogi usi qadr arsa-e barzakh bhi toolani hoga.


Barzakh ki zarurat is liye hai ke insaan is dunya mei do qism ke amal anjaam deta hai. Aik zahiri amal jise kirdar ke naam se yaad kiya jata hai aur aik batini amal jise aitaqaad se tabeer kiya jata hai.
Qayamat ka din kirdar ke mukammal hisaab ke liye muayyan hai aur rooh ke amaal yani aqaed ke liye koi jagah nahi hai. Is liye zarurat thi ke jism ke rooh se alag hone ke baad aik jagah muqarrar kar di jaey jahan rooh ko is ke aqaed ka achcha ya bura badla diya ja sakey. Bus isi alam ka naam barzakh hai. Barzakh mei har shakhs ko is ke aqaed ke aitabaar se achchi ya buri jagah di jati hai.
Barzakh mei roohein apne jism ke bajaey aik doosre jism mei rehti hain jis tarah ham bistar par sote hain aur khwaab mei kisi jagah jate hain, khate peete aur daurte bhaagte hain. Khwab mei hum ko jo apna jism nazar aata hai barzakh mei khuda har insaan ko isi se milta julta aik jism de ga jis ko jisme misali kehte hain.
Hadison mei aya hai ke alam e barzakh mein momineen ki roohein wadi-us-salaam mein rehti hain aur kafiron, munafiqon aur ahle-bayt ke dushmanon ki roohein wadi-e-barhoot mein rehti hain.

Marne ke baad anbiya, aimma aur nabaaligh, kam aqal aur deewane logon ke ilawa sab ka fishar-e-qabr bhi hota hai. Jumma ki raat ya din ko marne wala ya jaware aimma mei dafn hone wala fishaar-e-qabr se mehfooz rehta hai. Fishaar ka matlab ye hai ke khuda se sarkashi karne walon ya apne ahl-o-ayal aur momineen se sakhti karne walon ko zameen dabati hai.

Qayamat ke din gunehgaar momineen ki shafa’at masoomeen farmaenge laikin barzakh mei koi shafa’at na hogi lehaza barzakh ke liye har momin ko apne oupar bharosa karna parega. Marne wale ke aaza-o-ahbaab ka fariza hai ke wo marne wale ke wajibat ko ada karein, is ke zimme jo huqooq khuda ya bandon ke baqi hon inhein bhi ada karein, is ke ilawa eisaal-e-sawab ke liye a’maal-e-khayr bhi karein taake momin ka barzakh aasani se guzar jaey.
Jo khaliq-e-kainaat dunya ko paida kar sakta hai wo marne ke baad dubara zinda bhi kar sakta hai aur dunya ke khatm honey ke baad ise dubara paida bhi kar sakta hai.
Wo khuda is par bhi qadir hai ke jin marne walon ki laashein zameen par pari rehti hain ya jala di jaati hain ya darya mei daal di jati hain ya jin laashon ko cheel, kawwe ya darende kha jate hain in sab ki roohon ko bhi barzakh mei rakhe agarche in ki takleef ya raahat humko nazar nahi aati.
Aik baar aik kafir ki khopri aik shakhs ne paanchwein imam ke saamne pesh ki aur poocha ke ye khopri thandi hai ise azaab kahan diya ja raha hai. . Imam(A) ne chaqmaq ke pathar mangwae aur poochnay wale se kaha ke dekho ye thande hain ya nahi, us ne chu ker kaha ke thande hain.Imam(A) ne farmaya ke inko aik doosre se ragdo.Ragadte hi pathar se chingarian nikalne lagi.Imam(A) ne farmaya jo khuda is thande pather ke ander aag rakh sakta hai wo is thandi khopri ko bhi aag ki saza de sakta hai, wo shakhs jawab sun ker Imam(A) ko dua deta huwa chala gaya.

Sawalat


  1. Barzakh kyun rakha gaya?

  2. Barzakh main jism kaisa hota hai? Iski misaal do.

  3. Barzakh main momin o ghair-e-momin ki roohain kahan rehti hain?

  4. Barzakh main marne wale ko aram pohochane ke tareeqe kya hain?

  5. Fishar-e-Qabr kya hai? Kin ko nahin hota aur kahan nahi hota?


Ref. Imamia Deenyat # 5- lesson 13,14








The database is protected by copyright ©hestories.info 2017
send message

    Main page