Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana



Download 499.51 Kb.
Page1/11
Date conversion29.03.2017
Size499.51 Kb.
  1   2   3   4   5   6   7   8   9   10   11










THUTHLUNG BAWM
THUTHLUNG BAWM

CONTENTS


  1. BUNGKHATNA – TRINITY

    • TRINITY A AWM LO

    • TRINITY THURIN HMANG HIAN ISUA KRISTA HMING SUAL NGAIHDAMNA BAPTISMA CHU SETANA HIAN A CHHUHSAK CHIANG HLE A NI

    • TRINITY AWMZIA – MIHRING TEHKHIN THU- NI TEHKHIN THU

    • TRINITY AWMZE DIKTAK CHU HEI HI A NI

    • PATHIAN LEH SETANA INDONA

    • TRINITY INNGHAHNA LUMPHUM MATHAIA 28:19

    • MATHAIA’N HEBRAI TAWNGIN CHANCHIN THA A ZIAK

    • ANIH LEH TUNA KAN HMANLAI MEK BIBLE-A MI ‘PA LEH FAPA LEH THLARAU THIANGHLIM HMINGAH CHUAN BAPTIS ULA’ TIH HI ENGTIN NGE BIBLE-AH A LO LUH MAI?

    • ISUA ZIRTIRTE’N BAPTISMA AN CHANTIR

    • EUSEBIUS-A ZIAK DAN VE THUNG

      1. NICEAN COUNCIL AD 325 HMALAMA A THU ZIAK

      2. EUSEBIUS TRINITY RINGTU AH A INLET

      3. EUSEBIUS-A THU ZIAK KHAIKHAWMNA

  • BIBLE THAR A PIANG

  • I JOHANA 5:7 THU

  • I JOHANA 5:7-NA KJV BIBLE-A A LO LUH DAN

  1. BUNG HNIHNA – PATHIAN PAKHAT THU

  • PATHIAN PAKHAT CHAUH A AWM

  • PATHIAN TAM LAM CHU NANGMAH ZAT CHIAH KHA A NI
  • MOSIA KHAN PATHIAN PAKHAT CHAUH A HMU THIN


  • THUPEK ZAWNG ZAWNG ZINGA PAWIMAWH BER

  • PAKHAT SAWINA ‘ECHAD’ LEH ‘YACHIYD’ LEH ‘HEIS’

  • PAKHAT CHAUH A NI TIH PATHIAN A INSAWIFIAH

  • PATHIAN CHU THLARAU A NI

  • PA, PATHIAN MIHRINGAH ALO CHANG

  • PATHIANIN A FAPA MAL NEIH CHHUN A PE

    1. ARTUI TEHKHIN THU

  • KA FAPA’ TIH LEH ‘KA PA’ TIH HI

  • KA PA I KUTAH KA THLARAU KA KAWLTIR A CHE’

  • MAHNI IN-PALAI CHAWP PATHIAN

  • A BUL LEH A TAWP ISUA KRISTA

  • ISUA KRISTA HNENAH TAWNGTAI RAWH

3. BUNG THUMNA – ISUA KRISTA THISEN

  1. BUNG LI NA – TUI BAPTISMA

  • ISUA KRISTA HMING TUI BAPTISMA

  • TUI ATANGA PIANG AWMZIA

  • BAPTISMA AWMZIA CHU PHUM TIHNA A NI

    1. GREEK TAWNG ‘SUNTHAPTO’ HMAN DAN

    2. BAPTISZO HMANNA DANG TE

  • KROSS THLAN-AH ISUAN BAPTISMA A CHANG

  • TRINITY HMINGA BAPTISMA HI A PAWIMAWH LO

  • ISUA KRISTA HMING BAPTISMA HI SUAL NGAIHDAMNA A NI

  • JOHANA BAPTISMA KHA SUAL NGAIHDAMNA A NI

  • ISUA HMING BAPTISMA HI TAKSA THILTIH SUAL TLANFAINA A NI

  • TAKSAIN VANRAM KAN KAI DAWN

  • BAPTISMA CHAN DAWNIN SUAL SIM A NGAI

  • EDEN SUAL CHU THINLUNGA SUAL AWM HI A NI
  • NITIN SUAL (DAILY SINS) CHU EDEN SUAL HI A NI


  • THINGKUNG TEHKHIN THU HMANGIN SIMNA SAWIFIAH A NI

    1. THING CHHIA A RAH THA THEI LO

    2. THING THA A RAH CHHE THEI LO

      • KROSS-A KAN THIHVE DAN CHU SUAL SIM HI A NI

        1. THIHNA KHAWP SUAL

        2. THIHNA KHAWP SUAL CHU ENGNGE NI?

        3. THIHNA KHAWP NILO SUAL

          • SIMNA TURA ‘THUNUNNA’ ISUA DUHDAN

            1. KUT HI SIM TURA THUPEK A NI

            2. KE HI SIM TURA THUPEK A NI A SIN!

            3. MIT HIAN SIMTUR A NGAH HLE

            4. BENG HIAN SUAL SIM TUR A NEI VE LO EM NI?

            5. KAN TAWNGNA LEI HIAN SUAL SIM TUR A NGAH

            6. THINLUNG HIAN SUAL SIM RAWH SE

              • SUAL SIMNA CHUAN HMALAM HUN ATAN SIM LAWKNA A KENGTEL

              • KRISTA ISUA-A BAPTISMA CHANG AWMZIA

                1. THLARAU BAPTISMA HI KRISTA ISUA-A BAPTISMA A NI LO

                2. ISUA-AH KAN AWM RENG DAN TUR CHU TUI BAPTISMA HMANG THO HIAN A NI

                3. ISUA KEIMAHNI-AH A AWM RENG THEIH DAN VE THUNG CHU THLARAU THIANGHLIM BAPTISMA HI A NI

                4. BAPTISMA HMANGIN THILSIAM THAR KAN NI

                5. ISUA HMING BAPTISMA HI SERHTAN DAN THAR A NI

                6. NAUSEN BAPTISMA LEH SERHTAN IN AN LOHNA

                7. BAPTISMA HI NOVA LAWNG ANGA CHHANDAMNA A NI

                8. A KOH APIANGTE TAN A NI

  1. BUNG NGA NA – THLARAU THIANGHLIM BAPTISMA

    • THLARAU THINGHLIM BAPTISMA

    • THLARAU THIANGHLIM CHU TUNGE NI?

    • THLARAU THIANGHLIM I MAMAWH

    • THLARAU THIANGHLIM I CHANG TAWH EM?
    • THLARAU THIANGHLIM THURO NUNNEM


    • TAWNGHRIATLOH-A TAWNG HI CHAK HLE RAWH

    • TAKSA CHETNA HI THLARAU CHET TIR A NI

    • EPHESI KHUAA MITEN THLARAU BAPTISMA AN CHANG

    • PENTECOST NI-AH THLARAU BAPTISMA AN CHANG

    • AN ZAVAIIN TAWNGHRIATLOHTEIN THU AN SAWI VEK EM NI?

    • ANI CHUAN TEHKHER IN THLARAU A PE SILO

    • ENGTIN NGE THLARAU THIANGHLIM CHU ILO CHAN THEIH ANG?

  1. RINHLEHNA NEI LOVIN ISUA HNENAH DIL RAWH

  2. FIANRIALAH TAWNGTAINA NEI RAWH

  3. I SUALNA ZAWNG ZAWNG SIMIN PUANG RAWH

  4. I THINLUNG ZAWNG ZAWNGIN THLARAU THIANGHLIM CHU DUH RAWH

  5. ENGKIM HUAM RAWH

  6. MAHNI INPHATSANIN ISUA HNENAH INPUMPEK RAWH

  7. ISUA KRISTA HMINGIN BAPTISMA CHANG RAWH

  8. ISUA TAKSA LEH THISEN

  9. KUTNGHAH TAWNGTAINA

10. RING TAKIN ‘HALLELUIAH’ TIIN AU

RAWH


THUTHLUNG BAWM
BUNG KHAT-NA
TRINITY A AWM LO - Trinity Hi Bible-ah A Awmlo:

Trinity hming nia ngaih ziak hmasabertu chu Catholic Encyclopedia sawi dan chuan Antiokei khaw mi Theophilus a ni a, A.D. 180 velah TPIAS tiin a ziak hmasaber a ni. Tertulliana A.D.160-225 a a lo lan hian TPIAS chu Trinitas tiin Latin tawngin a rawn ziak tan ta a; chu chu Triad emaw, Triune Gods emaw TRINITY tiin an sawi ta a ni. Tertulliana hi Trinity hming phuah hmasabertu chu a ni ta a ni. Tichuan Trinity hi Biblea awmlo siam thar a ni a; Roman Catholic Kohhranin thurin thar atan a lalut ta a. A hmasaber atan Council of Arles, August Ni 1, A.D.314-ah an ngaihtuah tan a; Nicean Council, A.D. 325-ah an ngaihtuah leh a; Trinity chu an pawm ta a; Thlarau Thianghlim hi Pathian hrang angin A.D. 381, Council of Constantinople-ah an pawm leh ta bawk a; tichuan Trinity chu a lo piang fel ta a ni. [Countering Trinitarian Arguments; D.Willis].

Pathian Thupek pawimawhber Deuteronomy 6:4 thu leh Trinity hrilhfiahna hi han dah dun ila, Trinity leh Pathian thu chu an inkalh tlat a ni tih kan hmu thei ang, hetiang hian:-

1. “Aw Israel hote u, ngai teh u, Lalpa kan Pathian chu Lalpa pakhat chauh a ni a; Lalpa I Pathian chu I thinlung zawng zawngin, I rilru zawng zawngin, I thlarau zawng zawngn, I chakna zawng zawngin I hmangaihtur a ni” tih thu leh,

2. “Pathian pakhat chauh a awm a; Pathian pakhatah chuan minung [Pathian pathum]:- Pa leh Fapa leh Thlarau Thianghlim te an awm a; an pathum hian Pathian pakhat an ni” tih thu hi.

Heng thute hi kan dah duna kan khaikhin chuan, thu awmze inanglo tak an ni tih kan hmu nghal a, pakhatna khi Deuteronomy 6:4 leh Marka 12:29-ah Bibleah an awm a; a hnuhnung zawk Trinity khi a inziakna lai sawi lan tur Bible bung leh chang a awm velo. Marka 12:29 thu leh Deuteronomy 6:4 thu-ah khian Trinity hrilhfiahna khi dah lutin han hungrem dawn ta ila hetiang hian kan chhiar ang :- “Aw Israel hote u, ngai teh u, Lalpa kan Pathianah chuan minung pathum [Pathian nung pathum] an awm a, an pathum hian Pathian pakhat chauh an ni” tih tur a ni ang a, Bible thu kan tidanglam tihna a ni nghal anga, Bible zirtirna atangin kan rilru chuan kawng peng dang a zawh tan ta chiah tihna a ni ang.

Kawng ngil tak chu hei hi a ni:- Pathian mihringah a lo chan hma Thuthlung Hlui hunah leh Pathian mihringah a lo chan hnu Thuthlung Thar hunah hian, chatuan thlengin Pathian chu pakhat chauh a ni reng mai dawn a ni tih hi a ni.

Bible pumpuiah hian Trinity tih thumal hi a awm lova, a thu-in awmlo mahse a tak chu a awm thei tho lawm ni? a la tih theih a; a thu mai pawha awmlo na-na-na chu, engtinnge a tak phei chu a awm theih ang? Trinity hi, Bible-ah thu pawh-a awmlo, a tak pawh-a awmlo a ni.

Trinity hi thil awm nita sela chuan Pathian hian vawi khat chauh tal a sawi lang ngei tur a ni. Vawikhat chauh tal sawi sela chuan kan ring nghal ang. “An pathum hian Pathian pakhat an ni” tih chu Pathianin insawifiah nan a hmang bawk anga; “Kan pathum hian Pathian pakhat kan ni” an ti ngei bawk ang. Tichuan Pathian pakhat a nihzia a inpuanna leh zawlneite kaa a inpuanna zawng zawng pawh tih danglam vek a ngai ang. “Kei mah chauh” a tih pawh kha “Kei mahni chauh” tih angai anga; “Keimah lo chu Pathian dang reng reng an awm lo” tih pawh kha “Keimahni pathum chauh lo hi chu Pathian dang reng reng an awm lo” tih a ngai ang. Trinity chu “An pathum hian Pathian pakhat an ni” tih a ni tlat si a.

Pathianin vawikhat zeuh pawh a sawi siloh avangin Trinity hi Pathian atanga lochhuak a nilo a ni ang. Mihring finna mai atanga lo chhuak a nih chuan “ A maksak apiang leh hriatthiam harsa apiang hi amak em avangin mi hipna a ngah a, a awihawm a, a ropui a ni ” tihna rilru atanga lo chhuak a ni ang. “A awihawm loh apiang leh ni theilo awm anga lang apiang hian mi hipna a ngah a; a mak pouh leh a ropui a, a awihawm loh pouh leh a tak a ni” tih rilru atanga lo chhuak a ni thei ang.

Mahse, dilchhut tak leh fimkhur theih-pa-tawpa Trinity awmzia leh a lo pian chhuah dan kum tamtak chhung kan han zir chian hnuah, mihring rilru mai atanga piang chhuak niin a lang thei lova, mihring aia fing, Pathian ni bawksilo, Pathian hnialtu tu-emaw hnen atanga lo chhuak a ang ber mai a ni. Setana’n mihring rilru-ah hna thawkin mihring hmangin Trinity zeldinthu a siam ni berin a lang tlat mai a. Setana’n Isua a dodalna hmanrua a ang ber a; Setana hian Isua hi a thik a, a haw em em si a. Isua ringtute chu Isua hming a chhuhsak ta a; Trinity ringtu zawng zawngte chu :- Isua Krista Hminga chhandamna kha Trinity hmang hian Setana’n a chhuhsak thei ta tlat mai a ni.

Setana’n Trinity hmanga Isua Krista hming a lak bosak chian zia tihlan nan entirna pakhat han tarlang lawk ila:- Petera, Isua Krista zirtirte zinga hmatawngber khan:-“Sim ula, in sual ngaihdam nan Isua Krista Hmingin baptisma chang theuh rawh u, tichuan Thlarau Thianghlim pek in hmu ang” a ti a. (Tirhkohte 2:38). Trinity ringtu chuan Isua Krista hminga sual ngaihdamna baptisma chu a chang ve thei ta lova, Baptisma chantir laia Isua Krista hming chauh lamrik chu Setana thik laiber chu a ni a; Trinity-a Pathian pathumte hming a kim loh avangin Trinity ringtu tan “Isua Krista hming chauh” chu lam rik theih a ni ta lova; Isua Krista hming chu Trinity thurin hmangin hnawlbo a ni a ta a ni. Hei hi Trinity pawina ber chu a ni.


Trinity ringtu puithiamin baptisma a chantir laiin Petera sawi angin a sawi ve lova:- “Sim ula” a ti ngai lova, “In sual ngaihdam nan” a ti lo leh a, “Isua Krista hmingin baptisma chang theuh rawh u” a tilo leh bawk a. Petera sawi dan ang lovin a sawi ta zawk a, “Pa leh Fapa leh Thlarau Thianghlim hmingin ka baptis a che” a tita daih mai a; Petera tih dan nen a inang ta lova: Isua Krista hming chu a hnawlbo ta a ni. Chuvangin Trinity thurin hi, Isua Krista hminga chhandamna hlutak tihbona tura Setana remruatna leh finna thuk tak atanga lo chhuak a ni ngei ang.

Trinity thurin hmang hian Isua Krista hming sual ngaihdamna baptisma chu Setana hian a chhuhsak chiang hle a ni.

Isua Krista hminga baptisma an chang ve thei lo chu Setana bumna a ni ang tih an la ring phallo leh zela, hei hi Setana bumna nghehzia tilang tu chu a ni. Nimahsela, Setana phuarna phelh nan chuan Tirhkohte 2: 38 thu chauh pawh hi a tawk e.

Chhandamna tur atan ni lemlo thil dangah chuan Trinity ringtute’n Isua Krista hming an lam ve leh tho bawk a:- damlo tihdam nan, ramhuai hnawh chhuah nan, mitthi kaih thawh nan, thil mak tih nan Isua hming chu an hmang ve leh tho bawk thin. Chung thil mak tihte chu a ropui em em a; mahse chungte chu chhandamna tura thupek an nilo. Isua Hminga damlo a lo dam hian chhandamna a chang ta nghal tihna a ni silo. Chandamna chu sual ngaihdamnaah a innghat a, “sim ula in sual ngaihdam nan Isua Krista hmingin baptisma chang theuh rawh u” tih hi erawh chu sual ngaihdam nana pek anih bakah taksa natna tinreng tan damna a ni a, chu aia pawimawh zawk chatuana chhandamna a keng tel bawk si a, pawisa neilo tan hlei hlei a that teh lul nen Isua Krista hminga damna kim chu Setana bumna avangin an an chang thei ta lo.

Trinity Awmzia:

Trinity hi entirna hmangin an sawifiah bawk thin. Mihring taksa pakhata lu pathum emaw hmel pathum awm ang leh; thil bial pathum inbat kual leh; rin kilthum nei triangle leh; putar pakhat hmeichhe pakhat mipa naupang pakhat inhnaih taka awm khawm; putar pakhat, mipa naupang pakhat chunga sava thuro fu; Sana a chhunga dar zat kawktu leh minute zat kawktu leh second zat kawktu hi minung hrang pathum entir nan an hmang bawk thin a; mihring puitling pathum: patling pakhat nutling pakhat tlangval pakhat awm khawm hi Trinity entir nan an hmang bawk thin. Hindu Trinity-ah chuan Brahma Vishnu Shiva mi pathum lem chiang takin an ziak thin. Heng zawng zawngte hian Trinity chu Pathian pathum awmkhawm an nihzia tihlan an tum vek a ni.

Trinity ring Kohhran memberte zingah hian, Trinity hrethiam lova pawm tamtak an awm a; chutiang mite chu Thlarau Thianghlim hriattirna atanga Pathian pakhat chauh a nihzia hrefiahtute an ni fo thin a ni. Hetiang mite hian Isua Krista chu a Bul leh a Tawp, Hmasabera leh Hnuhnungbera a ni an tive mai thin a; Isua Krista hming pu tura Isua hminga baptisma chang thei an ni. An rindan chu Trinity emaw an tive mai thin a; Pathian pakhat chauh ringtu diktak an ni thin. Trinity Kohhranah an awm avangin Isua Krista hming an pu theilo mai chauh a ni; Trinity ring Kohhranah an awm reng chuan Isua Krista hming pu lovin thlanah an liam ve mai dawn a, chu chu Trinity Kohhrana awm a pawina ber tur chu a ni. An tehkhin thu hman thinte chu hengte hi an ni:-


1.Mihring Tehkhin Thu:

Mi pakhat hi thil pathum: taksa, rilru, thlarau neia siam a ni. Kan rilru hi Pa Pathian chu nise, kan taksa hi Chatuan Fapa chu nise, kan thlarau hi Thlarau Thianghlim chu nise, chutiang chu Trinity hi a ni an ti thin. Tichuan mi pakhat hi Trinity a ni an ti thin.

Mihring hi Trinity tehkhin nan kan hmang dawn a nih chuan mihring pakhat chauh hmang lovin mihring pathum, mifamkim mi pathum, mihring puitling pathum hman ngei ngei tur a ni. Chung mi pathumte chuan rilru an nei theuhva, rilru pathum an awm phawt a; thlarau an nei leh theuh bawk a, thlarau pathum an awm leh a, taksa an nei theuh bawk a, taksa pathum an awm bawk a ni. Tichuan mi famkim pathumte chu an pathum chuan Trinity an ni thei chauh a ni. Chu chu Trinity awmze dik tak chu a ni.

Mi pakhat chauh hi Pathian anpui chu a ni ti sela chuan Genesis 1: 27 thu nen a inmil chiah anga, a dik a ni mai tur. Mihringin taksa, rilru, thlarau kan nei ang hian Pathian mihringah a lo chanin taksa, rilru, thlarau a rawn nei ta chiah a ni. Mi pakhat hi Pathian pakhat entirna diktak a ni. He tehkhin thu hi Trinity ringtu zawng zawngte hian pawm thei sela chuan a lawmawm hle ang. Mi pakhat hi Pathian anpui diktak a nisi a.





  1. Ni Tehkhin Thu:

Ni [Sun] khi Trinity sawifaih nan an hmang bawk thin. Ni khian taksa fang a neia, enna a nei leh a, lumna a nei leh a. A taksa Ni fang khi Pa chu nise, a enna chu Fapa nise, a lumna chu Thlarau Thianghlim nise, chutiang chu Trinity chu a ni an ti thin. Trinity sawifiah nana Ni hmang thinte hian Pathian chu pakhat a ni tih an pawm a ang zawk. Thlarau Thianghlimin Pathian chu pakhat a ni tih a hriattir anga, Trinity pawm Kohhranah awm siin an rindan ang ang chu Trinity an ti ve mai niin a lang. Mihring pakhat hi Trinity chu a ni mai tithinte nen khan an inang a ni.

Ni khi Trinity sawifiahna entir nan kan hmang dawn a nih chuan Ni pakhat chauh hmang lovin Ni [Sun] pathum a ngai a ni. Trinity chu mi famkim inang theuh pathum awmkhawm sawina a nih avangin. Ni pakhat khian taksa leh enna leh lumna a nei a, Ni famkim a nita a, Pathian famkim pathum entir nan chuan Ni pathum enna nei theuh, lumna nei theuh, Ni fang famkim pathum a ngai a ni.

Ni pakhat chauh chu engtikawngmahin Trinity a ni thei lo. A chhan chu Ni fang ringawt chu enna leh lumna a neih loh chuan Ni a tling lova, Pa entir nan a hman theih loh. Enna ringawt chu amahin a awm theilo leh a, lumna pawh amahin a awm ringawt theilo; enna leh lumna petu Ni fang an mamawh ve ve a, Pathian famkim pathum entir nan hman theih an ni lo.

Ni pakhat chauh hi chu Pathian pakhat chauh a awm tih entirna tur zawk a ni. Engkimtithei Pathian chu pakhat chauh a awm tih entirna a ni. Trinity ni tur chuan Ni pathum a ngai.

Trinity Awmze Diktak Chu Hei Hi A Ni:-

Pathian chu mimal pakhat chauh tak tak ni lovin, minung hrang theuh, Pathian famkim theuh pathum an ni a, an pathum hian pakhat anga rin tur tih hi a ni. Trinity thurinin a sawi chu hei hi a ni:- “Pathian pakhat chauh a awm a, Pathian pakhatah chuan mi nung [Pathian] pathum :-

(1) Pa leh

(2) Fapa leh

(3)Thlarau Thianghlim te an awm a,

An pathum hian Pathian pakhat an ni” tih hi a ni.

Chung Pathian pathumte chu, an zinga pakhat Pa chauh be lovin, an zinga pahnih Pa leh Fapa chauh be hek lovin, an pathum Thlarau Thianghlim tel ngeiin biakkim vek tur an ni tih thuchah an telh nghal a:- “Pathian pakhata minung pathumte chu a tu-a-mah thlei bik nei lova biak leh rin tur a ni” tiin. Pa, Fapa, Thlarau chu Pathian hrang theuhah ngaiin an pathum ngeiin biak tur an ti thlap a ni.

Trinity thurin hi Pathian pathum an awm tih thurin chiang tak a ni. “An pathum hian Pathian pakhat an ni” an ti mai reng a ni. Trinity zirtirtute hian, Pathian chu pakhat chauh tak tak angin miin an ring mai palh ang tih an hlau em em a; pathum ngei an ni tih miin an rin ngei theih nan, pathum an nih chian zia, a chiang thei angbera sawifiah kalh hi an tum tlat a ni. Chumi sawi chian nan chuan lehkhabu pakhat : Rose Book Of Bible Charts, Maps & Time Lines, Rose Publishing, phek 180-na ami hi lachhuak ila:

1. “The Father is not the Son :- Pa chu Fapa a nilo”, an tiphawt a;

2. “The Son is not the Holy Spirit :- Fapa chu Thlarau Thianghlim a nilo”, an ti leh a;

3. “The Holy Spirit is not the Father :- Thlarau Thianghlim chu Pa chu a nilo”, an tita kalh mai a; tichuan Trinity chu Pathian pathum an awm tih thurin a ni tih I theihnghilh ngai tawh lovang.

Pathian chu pathum an ni tih I rin tlat theih nan a chiang thei angberin pathum an ni tih an hrilh che a ni. Pathian tamlam chu chhiar tala pathum an ni tih I hmuh chhuah ngei theih nan, thahnemngaitakin leh duh thawhtakin, heti hian an sawifiah nawn leh hram hram a, hetiang hian:-

1. “Pa chu Pathian a ni :- Trinity-a Mi Pakhatna chu”.

2. “Fapa chu Pathian a ni:- Trinity-a Mi Pahnihna chu”.

3. “Thlarau Thianghlim chu Pathian a ni:- Trinity-a Mi Pathumna chu” tiin.

Trinity-a Pathian tam lam chu I chhiar thei tawh anga:- Pakhatna, Pahnihna, Pathumna, tiin. Chutichuan Trinity hi Pathian pathum an awm tih thurin Tritheism nen danglamna a awm lova, an tawngkam hman tlemin an tidanglam mai a ni.

Trinity-a Pathian pathumte :-“An pathum hian Pathian pakhat an ni” tih thu chu I thinlung zawng zawngin theih-pa-tawpin pakhat angin rin tum lui talh talh mahla, engtikahmah pakhat tak tak angin I thinlung chhungrilah I ring thei ngai dawn lova, pathum pakhat anga ngai lui mai I ni tih nangmah ngei kha I inhrechiang tial tial mai ang.

Chutichuan Trinity hi thil awmlo a ni a, thil awm thei lah a ni hek lo. Pathum chu pakhat angin hriat tumlui talh talh mah la, engtikahmah pakhat angin I hre thei ngai dawn lo, I tawngkain pakhat anni ti mahla, I thinlung chhungrilah pathum an ni tih hi fiahtakin hrilh I ni tawh a; I thinlungah “Pathum” chiangtakin a inziak reng a ni. Chutichuan Trinity awmzia hi I hriatchian hnuah I ring a nih chuan:- Pathian pakhat chauh bia I ni lova, Pathian pathum bia I ni tih I inhre chiang thei tawh ang.

Chuvangin Pathian pathum chu Pathian pakhat angin sawifiah tum ngai suh, Pathum chu pathum ti mai zawk rawh. Trinity-a Pathian pathumte chu pakhat an ni tiin Khawvela mihring lo piang tawh zawng zawng leh lo la piang tur zawng zawng pawhin engtik-khawtik-ah mah an sawi fiah thei ngai dawn lo. Thil awmlo, sawifiah tur awm lo a nih avangin. Trinity hi tumahin an la hrefiah ngai lova, hriatfiah tur awm lo a nih avangin. Trinity ringtu zawng zawngte zingah hian Trinity hrefiaha ring pakhat mah an awm hauh lo. Pakhat te mah an awm lo. Hriatthiam tur awm lo, thil tak nei lo, thil awmlo, a ni. Hriatthiam theih leh thil awm nita se, Trinity ringtu zinga mi ropuia ngaih Dr. Billy Graham tal hian a hrethiam ang Thuhriltu ropui a ni si a. Mahse a lehkhabu ziak The Holy Spirit-ah chuan, beidawngtakin:- “ Vawiin thleng hian Trinity hi ka la hrethiam lo, thil mak mystery angin ka pawm” a ti thlawt mai.

Thil awmlo sawi nan “Boruak mai a ni” kan tithin. Trinity chu boruak ai pawha ruak zawk a ni a, leiah leh vanah pawh zawng zawng mah la, kumkhua pawha hmuh chhuah tur awm theilo tur thil a ni. Chu thu chu Thupuan bung 1:8; 1:18 leh 22:13 thu tanchhanin, Pathian pakhat awmchhun:- Lalpa Pathian Awmtawha leh Awmmeka leh Lolaawmtura, Thia Tholeha, Minunga, Alpha leh Omega, a Hmasaber leh a Hnuhnungber, a Bul leh a Tawp, Nazaret Isua Krista Hming chhalin kan sawi ngam a ni.

Pathum chu pakhat anga sawifiah an tum apiangin a theih loh tih rangtakin an hmu a, pathum an nihna a lo langfiah thuai thin a; pakhat nihtir tumin mihring finnain an sawi thiam ta lova, pakhat anga sawi talh an duh bawk si a, a theih bawk si lohva, thilmak chhui chhuah phakloh mystery an vuah ta mai thin a ni.

Trinity-ah hian Finna mak inphumru engmah a awm lo. Hriatthiam phakloh khawpa ril- thilmak mystery pawh a ni hek lo, thil awmlo hrim hrim a ni zawk. Chuvangin Trinity ringtu chuan a ring thlawn a ni. Setana thil thuk, Setana bumna a ni a, Trinity aia Setana bumna thuk zawk thil dang sawi tur kan hre lo. Pathian chu kan la hmu dawn a, pakhat chauh kan hmu hmu dawn ni. Trinity erawh chu engtikahmah tumahin an hmu ngai dawn lo a ni. Hmuh tur awm lo, Bible-a awmlo phuahchawp a nih avangin.

Mi tupawhin Trinity awmzia a hriatchian hnua a ring tak tak a nih chuan, thil awm lovah a rinna a nghat a; a thinlungin Pathian pathum hmuh beiseiin a zawng reng dawn a ni. Trinity ringtu chuan:- Pathian pathum, taksa pathum, lu pathum, Thlarau pathum, Lalthutthleng pathum hmuh a beisei reng anga; nimahsela a beisei chu a thlawn vek dawn a ni tih Hmasabera leh Hnuhnungbera, a Bul leh a Tawp, Nazaret Isua Krista hming chhalin kan sawi nawn leh a ni.

Engtikawngmahin Trinity ringtu chu Pathian pakhat chauh ringtu a nithei ngai lovang a, Pathian pathum ringtu a ni. Chuvangin Trinity rin hi I bansan ngei ngei a ngai a ni. Pathianin Trinity rin a phal lova, Amah pakhat chauh chu ring turin a duh em em che a ni. Chu Pathian pakhat chauh chu Thlarau a nih avangin I hmu thiam lovanga, fiah tak leh mumal taka I hmuh thiam theih nan mihringah a lo chang tawh a, I Pathian chu I thian angin I mitthlain I hmu thiam tawh ang, chu chu Isua Krista ngei kha a ni. Thupuan 1:8 leh 1:18 leh 22:13 thu chauh tal hi han chhiar hram la I hrethiam mai ang.


Pathian Leh Setana Indona:-





  1   2   3   4   5   6   7   8   9   10   11


The database is protected by copyright ©hestories.info 2017
send message

    Main page