Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana


Baptisma Hi Nova Lawng Anga Chhandamna A Ni



Download 499.51 Kb.
Page10/11
Date conversion29.03.2017
Size499.51 Kb.
1   2   3   4   5   6   7   8   9   10   11

Baptisma Hi Nova Lawng Anga Chhandamna A Ni:
“Sim ula in sual ngaihdam nan Isua Krista hmingin baptisma chang theuh rawh u” titu Petera khan Isua hming baptisma chu Nova lawng nen khan a inang a ti a ni. [1Petera 3:20-21]. Hun liam tawha thil thleng chu kan hmufiah thei a; tun hun erawh chu kan hmufiah vek hauh lo mai. Nakin hun phei chu kan hmufiah lo leh zual. Nimahsela, mit var nei tan chuan Isua Krista hming baptisma hi Nova lawng anga chhandamna a ni dawn tih a langfiah thei a ni. Nova lawng chhunga awm velo tan chuan tui haka thihna pumpelh theih a nilo tih a lang fiah a. Nova lawng thar ang leh tun Thuthlung Thar huna Nova lawng chhung ang chu Isua Krista hming baptisma hi a ni tlat mai tih Petera hian a sawi a ni. Isua Krista hminga baptisma chang lo tan Nova lawng chhungah luh ve dan a awm lo. Chhungkaw chhandamna zawngtu apiang chu Nova lawng chhungah lut thuai mai rawh se.

“Tin, Nova damlai ang bawk kha Mihring Fapa lokal lehna chu a ni ang. Chu ng ni tuilet hmate chuan, Nova lawnga a luh ni thlengin an eiin an bar a, nupui pasal an innei thin; tui a lo let a, an zaa a lakbo vek hma loh chuan engmah an hre lova; Mihring Fapa lo kal lehna chu chutiang bawk a ni ang” tih a ni a.[Mathaia :37-39]. Thil mak tak chu hei hi a ni: “An zaa tuiletin a lakbo vek hma loh chu engmah an hre lo” tih hi. Chutiangbawk chu a lo ni leh dawn a nih chuan Nova lawng anpui baptisma pawh hi mi tamtakte hian an ngaipawimawh dawn chuanglo tihna a ni ve ang.

                  Chutichuan baptisma hi chhandamna hmanraw pawimawh tak a ni tih miten an hriat theihlohna chhan leh an awih theihlohna chhan chu Nova lawng anpui a nih tlat vang a ni. [1Petera 3:21-22].

                  Anih leh engtik Ni-ah nge mite chuan chu thuruk chu an hriatchhuah theih ang? Tin, a changtute ngei pawhin engtik Ni-ah nge a hlutna kan kan tel ang tih zawhna chhanna chu “Lalpa Isua lokal hunah” tih a ni tawp mai.  

A Koh Apiangte Tan A Ni:
Pentecost Ni-ah pawh khan mi 3000 laiin Isua Krista hmingin baptisma chang mahse, Isua Krista hminga baptisma chang duhlo kha an tam zawk daih a ni. A koh apiangte tan a nih avangin mi sang tam tak zingah khan mi 3000 chauhvin baptisma an chang a. Tunah pawh hian sawi sawi mah ila, Isuan a hnena a koh apiangte chauhvin Isua Krista hmingin baptisma an chang dawn a ni. Isua Krista koh ni vea inhria apiangte chuan hmanhmawh takin Isua Krista hminga baptisma chan a hun ta hle mai.
 

                  Baptisma Khaikhawmna:

 

1.     Isua Krista Hminga tuia hnim phuma baptisma chan hi sual ngaihdamna a ni [Tirhkohte 2:38].

2.     Kristaa serhtanna a ni a; Thuthlung Thar huna serhtan dan thar a ni bawk [Kolossa 2:11-12].

3.     Isua Krista ringtu chauhvin chan tur a ni a  [Marka 16:16].

4.     Nova lawng anpui chhandamna lawng thar a ni {1Petera 3:21-22].

5.     Isua Krista Kross-a kan thih vena leh thlana phumna kan tawmpuina a ni bawk [Rom 6:4].

6.     Chhandam nana chan tur a ni bawk [Marka 16:15-16]

7.     Kristaa kan inthuamna, Isua Krista hming chu thuamhnaw puan anga kan inthuamna leh Isua Krista hming kan putna a ni bawk [ Galati a 3:27]

8.     Tui hrin kan nihna Tui atanga kan piantharna a ni bawk [Johana 3:5].

9.     Thuamhnaw bal kan suk fai anga sual bawlhhlawh kan sukfaina leh silfaina a ni [Tirhkohte 22:16].


10.                                       Lei leh Vana min chhandam thei hming awmchhun Isua Krista hming kan kan put theihna awmchhun a ni [Tirhkohte 4:12; Galatia 3:27].

11.                                       Baptisma chan mamawh ve miahlo Isua Krista khan baptisma chu chu a ngaipawimawh hle. “Felna zawng zawng hlenchhuah kan tan a mawi a ni” tiin Chhandamtu ngei pawh khan baptisma chanloh a duh hauh lo mai a, Johana hnenah Jordan luiah hnimphumin baptisma a chang a ni.[Mathaia 3:15].

 


HUTHLUNG BAWM

BUNG 5
THLARAU THIANGHLIM BAPTISMA
Isuan hrehawm zawng zawng a tawrh zawh hnua, Vana a lawn dawn khan Ama nunna Thlarau chu mihringte hnenah a pek dawn avangin he thu hi a sawi ta a:- “Thlarau Thianghlim nei rawh u; tu sual pawh in ngaihdam apiang ngaihdam a ni ang; tu sual pawh in ngaihdam loh apiang ngaihdam loh a ni ang” tih thu hi. (Johana 20:22-23). “In hnena ka sawi hi mi zawng zawng hnena sawi ka ni” a ti bawk a. [Marka 13:37]. Mi zawng zawng zingah chuan nang leh kei hi kan tel ve a, Isuan:- “Thlarau Thianghlim nei rawh” a ti che a nih chu. Chuvangin Isua chungah lawm hle phawt mai rawh.{Marka 13:37}.
Thlarau Thianghlim Baptisma

Hi Zawlneite’n An Lo Hrilh Lawk A::

Zawlnei Zakaria thusawi dan hi a lunglen thlak mang e:- “Ruah hnuhnung hunah hian LALPA chu ruah dil rawh u, LALPA kawl tiphetu ngei chu; tin, Anin lova hlobet tinrengte tan Ruahpui Vanawn {Thlarau Thianghlim} a surtir ang” tiin zawlnei Zakaria kha ram ruakah a lo au rawng rawng mai a nih chu. {Zakaria 10:1}.

Hosea’n “Kan hnenah ruah hmasa leh ruah hnuhnung, lei tihuhtu ang maiin {Thlarau Thianghlim} a lo thleng ang” a lo tilawk bawk a {Hosea 6:3}.

Thuthlung Hlui hunah chuan mibik tlemte chungah Thlarau Thianghlim a thleng thin a ang hle mai a; Thuthlung Thar hunah erawh chuan “Mi zawng zawng chungah ka Thlarau ka leih ang” tiin Joela ka hmangin Lalpan a lo puang lawk a {Joela 2:28}. Mi zawng zawng zingah chuan nang pawh I tel ve avangin I chungah ngei Thlarau Thianghlim chu leih a ni ang.

Heng hrilhlawkna thute hi thihna hneha Isua thlan atanga a thawhleh hnu Pentecost Ni atang khan ruahpui Vanawn ang maiin a lo sur tan ta a; vawiin Ruah hnuhnung hun thleng hian chu ruah chu a la sur reng a; a la han lo deuh chu a ni phawt mai. Unau duh tak, engahnge Thlarau Thianghlim chu I chan loh bik ang? Chang ngei tura ruat I ni tih hi huaitakin kan hrilh ngam che a ni. Duhsak bik pawh I ni nghe nghe tih hi Isua Hming meuh chhalin huaitakin kan hrilh duh hmasa che a ni. Thlarau Thianghlim chang turin I rilru buatsaih la, I thinlung leh I taksa pawh kumkhuaa Thlarau Thianghlim chenna In nuam tak niturin inbuatsaih nghal mai rawh khai. Enganga nasa pawhin Thlarau Thianghlim chuan nangmahah hna thawk dawn pawh nise eng aiah nge I inhuam loh teh lul ang le?


Thlarau Thianghlim chu Tunge Ni?
Pathian chu Thlarau a ni a (Johana 4:24); Thlarau bawlhhlawh a nih loh avang leh a thianghlim avangin PATHIAN chu Thlarau Thianghlim a ni nghal a ni. “Engkim fang chhuakin, engkim chhungah a awm bawk a” [Ephesi 4:6]. Tawpchin neilova zau Van hian Pathian chu a chhungkhung zo lova. [1 Lalte 8:27]. Pathian ngeiin: “Lei leh vanah hian ka khat a ni lawm ni” a ti a (Jeremia 23:24). Chu chu mihring tetakte hian a hrefiahkim zo seng ngai lovang. Ruh leh tisa neilo PATHIAN chuan taksa a insiamchawp ta a: “Ka tan taksa mi buatsaih sak ta zawk a” tih a ni.(Hebrai 10:5). Chu chu Isua Krista hi a ni.(Mathaia 1:20-25; 1Timothea 3:16; Hebrai10:5. KJV).

Mihring anga Khawvelah hun a hman zawh hnuah pawh “Fahrahin ka kalsan lovang che u; in hnenah ka lo kir leh ang” a ti a. Thlarau a nihna hmangin Amah ringtute kawchhungah, kan hnenah, Thlamuantu atan, Khawvel tawp thleng pawhin a lo awm zui zel dawn tih Isuan Amah leh Amah a in sawilawk hmasa vek bawk a (Johana 14:15-21; Mathaia 28:20).

Amah ringtute hnenah chuan a lo awm ta a:- “Rinnaah chuan in awm emaw, nangmahni ngei inchhin thin ula, nangmahni ngei infiah thin rawh u. A nihlohleh nangmahniah Isua Krista (Thlarau Thianghlim) chu a awm tih inhrefiah lo em ni?” tiin Korinth khuaa mite Thlarau Thianghlim chan chu Isua Krista kha a ni tih Paulan a sawifiah sak a. (2Korinth 13:5).

Pathian rawngbawltu ni tur leh chhandamna kim chang tur chuan Thlarau Thianghlim chan hmasak ngei a ngai a ni. Thlarau Thianghlim I la chan loh avangin Lalpa rawng bawl suh tihna erawh chu a nilo. La changlo mahla Lalpa rawng bawl rawh. Thlarau Thianghlim chan I duh avang zawkin Lalpa rawng bawl zel zawk rawh. Amaherawhchu Thlarau Thianghlim I chan loh chuan Lalpa rawngbawltu tak tak I tling phaklo tih hre reng rawh. Chuvangin Thlarau Thianghlim chan beiseitakin Lalpa rawng bawl ang che; tichuan Lalpa’n Thlarauvin a chhungkhat ngei ang che.

Rawngbawlna ropuiber chu sual ngaihdamna thu puan a ni ngei ang. Pathian aiawha “I sualte ngaihdam a ni ta e” kan tih theih nan Pathian ngei chu kan taksa chhungah a lo awm a ngai a, chu tak chu Isuan “Thlarau Thianghlim nei rawh u” a tih chu a ni. Dil nachang kan hriat hmain “Nei rawh u” min ti daih tawh zawk a, kan dil hunah phei chuan min va pe dawn chiang em!. Thlarau Thianghlim neitu chuan sual ngaihdam theihna a nei dawn a. Mihring hmangin Pathianin sual a ngaidam thin dawn a nih chu. Chu chu Pathian remruat dan a ni.

Thlarau Thianghlim I Mamawh:
“Tupawh Krista Thlarau neilo chu Amaha mi a nilo”. {Rom 8:9}. I thih hunah I taksa chu leiah phum a ni anga, I thlarau erawh chu phum theih a ni lova, I taksa atangin a chhuak ang. I thlarau chu khawnge a kal zel ang? Thlarau Thianghlim I neih loh chuan I thih hunah I thlarau chu a vakvai mai dawn a ni tih I ngaihtuah ngai em le? I thlarau chu Vanramah kal duh mahse amahin engtinnge Vanramah a kal ang? Vanram kawng a hria em ni?

I thih huna I thlarau Vanrama hruai nghal nalh thei tur chuan Vanram siamtu leh neitu, Van atanga lokal Isua Thlarau chu I neih ngei ngei a ngai a ni. I thlarau leh Isua Thlarau chu I damlai ngei hian an inzawmsa a ngai a, an in pumkhat anga, an in belhbawm sa thlap a ngai a ni. Chu chu Thlarau Thianghlim I mamawh em emna chhan chu a ni. Isua Thlarau chuan I thlarau chu Vanram Paradis-ah chuan a lo han mut hahchawlhtir dawn a ni. Isua lokal hunah I thlarau chu “Isuan ama rualin a rawn hruai thla ang a”,(1Thessalonika 4:13-18); I taksaah khan I thlarau chu a lut leh anga, thlarau leh taksa tawihthei tawhlo neiin Isua thawhleh ang khan kaihthawh I ni anga; Vanramah kumkhuain I awm tawh ang. Chuvangin Thlarau Thianghlim chu I chang ngei ngei tur a ni. Chu aia mamawh reng reng khawvelah hian I nei hauh lo a ni.


Thlarau Thianghlim I Chang Tawh Em?

“Thinlung thar ka pe ang che u a, in chhungah Thlarau thar ka dah ang. Tin, in chhungah ka Thlarau ka dah anga, ka dan siamah ka lentir ang che u a; ka thupekte chu in vawng anga, in zawm ang” Lalpan a ti a. {Ezekiela 36:26-27.} Thinlung thar leh Thlarau thar Pathian pek chu I lo neih hunah chuan, mi danglam daih I lo ni anga, mihring thar, thilsiam thar i lo ni dawn a ni.

Thlarau Thianghlim chu I bulah a awm chuan hnaih tawh hle mahla, I kawchhungah, I thinlungah a la awm loh avangin I la chang lo a ni. Tin, Thlarau Thianghlim chuan a rawn tlawh zawk thin che anih a, a chhuak leh mai thin a nih bawk chuan Thlarau chuan a la chenchilhloh che avangin, Thlarau changlo I la ni. I kawchhungah, I thinlungah reilote chauh nilovin I damchhungin, I thih Ni thlengin, mithi zing ata I thawh leh hnuah pawh chatuan thleng pawhin I taksa tawih thei lova kaih thawh taksaah chuan a awm reng tur a ni ang.

Isua Zirtirte dinhmun atang hian Thlarau Thianghlim kan chan tawh leh tawhloh in endik ila a fiah ber ang. Isua Zirtirte khan Thlarau Thianghlim an chan hmain Isua kohna an chhang phawt a; an In leh lo, an eizawnna leh Khawvel thil zawng zawng kalsanin Isua an zui phawt a. Nang leh kei hian Khawvel kalsana Isua kan zui ve chu a ngai phawt mai.

Kum thum lai Isua an zui lai khan Thlarau Thianghlim chu an la chang hauh lo mai a. Thlarau Thianghlim an chan hmain Isua Hming thiltihtheihna an hmang hmasa te te a; ramhuai an hnawt chhuak a, damlo an tidam a, mithi an kaithova, Pathian thu hriatfiah nan an thinlung chu tihfin sakin an awm bawk a, an tawngtaina chhanin a awm a, Isua inlarna an hmu bawk a; nimahsela chutih lai chuan Thlarau Thianghlim baptisma kher chu an la chang lova: Isua hnung zuiin, Isua rawngbawlin, Isua ke bula awm rengsiin Thlarau Thianghlim Baptisma an la chang tlatlo mai a ni. Chutiang dinhmunah chuan Thlarau baptisma chang lovin nang leh kei hi kan awm ve reng thei a ni.

Pentecost Ni, Thlarau Thianghlim baptisma an chan tak meuh Ni a lo thlen chuan:- An zavaiin Thlarau Thianghlimin an khat ta vek mai a; Thlarau Thianghlimin a tawngtir ang zelin, tawng dangin, tawnghriatlohvin an lo tawng ta vek a ni. Chu tak chu nang leh kei hian kan neive thei a, kan nei ngei tur pawh a, kan beisei tlat tur pawh a ni alawm. Pentecost Ni a liam fe hnuah pawh Thlarau baptisma an channa hmunah reng reng chuan Thlarauvin a tawngtir ang zelin tawngdangin an lo tawng zel thin a; vawiin thleng hian chu chu a la dik reng a; a la danglam lo a ni.

Thlarau Thianghlim I la chan loh avang khan lungngaih phah suh. I lungngaih chuan Thlarau Thianghlim I chanhar phah zawk ang. Lawm phawt zawk rawh. La changlo mahla, I chang ngei dawn tih hriain hlim hmasa rawh. Chu chu rinna dik awm dan a ni. Pathian chungah lawm la, mihring chungah pawh lawm rawh. Tu chungahmah lungawilohna nei reng reng suh. Pathian chungah vui lola; mihring chungah pawh vui hauh suh. Isuan a hmangaih che a, chu chu a tawk em em a ni. Chuvangin Pathian chungah leh mihring chungah lawmna thinlung nei hmasa rawh. Chu chu Thlarau Thianghlim dawng tura thinlung inbuatsaihna tha ber leh dik ber chu a ni.. Lalpa chunga I hlimna leh I lawmna chuan Lalpa a tilawm anga; A Nunna Thlarau pek thuai che a chak a ni.

Thlarau Thianghlim I la chanloh vang khan Pathianin a hrelo che tihna a ni reng reng lo; a hawisan che tihna a ni heklo. A hnena I tlukluh beiseitakin A en reng thin zawk che a ni. Amah I mamawhzia I hriat theih nan, natna te, lungngaihna te, harsatna te, manganna te I chungah a thlen a phal thina, chutiang thil chu Pathian remruat dan a nifo zawk bawk a; manganna leh natna leh tawrhna I hmachhawn loh chuan Pathian hnen atangin I kalbo hla tial tial thin zawk a ni. Mihring ngaiha vanduaina hmangin a hnenah tlukluhtir che a tum fo thin tih hria la, I hrehawmna leh retheihna leh tawrhna avangin Isua pan hnai sauh sauh zawk ang che.

Thlarau Thianghlim Thuro Nun Nem:
Thuro Sava hi Thlarau Thianghlim chu a ni lova; mei alh leh chhumdinga inlar thin kha- Thuro angin a inlar, a inlantir mai a ni. Thuro anga a inlar hian chhan a nei ang. Thuro hian mit [gall bladder] thil kha hi a nei lova; mit- thil kha chu Bible tawngkamah chuan: huatna, thinchhiatna, thinurna, thikna te a ni a, ‘khakna’ tih a ni. Chutiang chu Thlarau Thianghlimah chuan a awm ve lova, Thlarau Thianghlim changtute chuan chutiang khakna zungzam chu an neih Lalpan a phalsak ve dawnlo tihna a ni. Thuro chu Sava nun nem, ngilnei zaidam a ni. Thlarau Thianghlim changtute chu Thuro anga nunnem leh zaidam, ngilnei leh khawngaihna nei mi an lo ni ang tihna a ninghal bawk a.

Thlarau Thianghlim chu kan chang ringawt thei a; A hruaina chu zui lovin kan awm thei. Chu chu thil hlauhawm tak a ni. Thlarau hruaia awm apiangte chauh chuan Pathian fate nihna an nei hlen thei dawn a ni. Chu chu Thlarau Thianghlim I chan hma ngeiin hre chiang hmasa la; Thlarau I chan hunah Thlarau hruaina chu I zui thei dawn zuk nia. Thlarau Thianghlim hruaia awmte nunah chuan hengte hi kan lo hmu dawn a ni: Hmangaihna te, Hlimna te, Remna te, Dawhtheihna te, Ngilneihna te, Thatna te, Rinawmna te, Thuhnuairawlhna leh Zaidamna te, Insumtheihna te; Pathian rinna beidawng ngailo te, tawp chin nei lova tlawmna te, Pathian beiseina tawp theilova sei te hi- Thlarau mite nunah chuan kan lo hmu dawn a ni. Tin, Pathian Thlarau hruaia awmte chuan tisa chu a sual ngaihtuahna leh a chaknate chawpin thinlungah an khengbet bawk ang. Thlarau mi diktakte bula awm chu a va nuam dawn teh lul em.[Galatia 5:22-24]. Miten chutiang mi nih chu an chak ve ngei ngei bawk ang.


Tawnghriatlohva Tawng Hi Chak Hle Rawh :

Tui leh Thlarauva pian tharna I lo neih hunah chuan tawnghriatloh hi I lo pian chhuah pui dawn a ni tih Johana 3: 5-6 thu hmang hian sawifiah han tum hmasa leh ila. “Tisaa piang apiang tisa a ni a, Thlarauva piang apiang thlarau a ni” tih awmzia chu: “Tisa hrin chu tisa a ni a; Thlarau hrin chu thlarau a ni” tihna a ni. {Johana 3:6}.

Entirna hmangin Thlarauva piangte pianken han sawi ila:- Zawhte chu ama pianpui tawngin a ngiau thin a; Bawng pawh ama pianpui tawngin a buu thin a; Beram pawh ama pianpui tawngin a bee thin a; American pawh ama pianpui Saptawngin a tawng thin a; Mizo pawh ama pianpui Mizo tawngin a tawng thin a; Thlarauva piang pawh ama pianpui tawng tawnghriatlohvin, Thlarauvin a tawngtir angzelin a lo tawng ngei dawn a ni. Bawng zawng zawng an buu vek ang leh Beram zawng zawng an bee vek ang hian Thlarauva piang zawng zawng chu Thlarauvin tawnghriatlohvin a tawngtir vek dawn a ni.

Chung thil chu a ni Isua hian a sawi ni. Amah ringtute chu “Tawng thar, tawnghriatlohvin an tawng ang” a tih bawk kha.(Marka 16:17). Heng Isua zirtirna thu ang hian tisaa ilo piang tawh hnu kha Tui (Isua Hming Baptisma) leh Thlarau hmanga hrinnawn I lo nih hunah chuan Pathian fa ilo ni tawh dawn a, I pianpui chu tawnghriatloh a ni dawn a ni. Tawnghriatlohva tawng I beisei tlat chu a dik a ni.

Tawnghriatloh hi Zawlnei Isaia khan heti hian a lo sawi lawk a: “A ni, nimahsela, hmui danglam {stammering lips} pu mi hmangin heng mite hnenah hian thu a sawi tawh zawk ang. Heihi a ni chawlhna chu ni, hahte chu chawlhtir rawh u, heihi a ni intihharhna chu ni” tiin{Isaia :11-12}. Tawnghriatlohva tawng hi thlarau leh taksa hahchawlhna leh intihharhna diktak a ni a; taksa natna tinreng tan pawh damna a ni. Chu chu Tawnghriatlohva I tawng hunah I hrethiam mai ang.

Tawnghriatloh kan mamawhna pawimawhber chu kan tawngna Lei thununtu a tan a ni. Mi hau hmang , mi rel hmang, dawt sawi hmang, anchhe lawh hmang, indona siamtu, inngeihlohna siamtu chu Lei hi a lo ni ngei mai. Lei hian taksa hi a hruai tlat mai a; thu a pe a, thil sual a tihtir thin. Chuvangin Pathianin Lei hi thunun a duh a ni.

Jacoba’n “Lei hi mei a ni, kan taksa pengte zinga khawlohna hlawm chu Lei hi a ni; chuchuan taksa chu a pumin a tibawlhhlawh a; pianpui tawlailir chu a tikanga, a mah chu hremhmun tihkan a ni” a lo ti daih tawh {Jacoba 3:5-6}.

I lei hmang khan I duh duh I sawi thin a; nangmahah Isua a lo awm anga, I Lei hmang khan Isua a tawng ve duh a, I duhdan ni lovin Ama duhdanin thu a sawi ve duh a, chu chu Tawnghriatloh a ni. Chuvangin I lei kha Isua Thlarauvin a tawngtir hmaloh chuan I Lei chu thil thalo sawi ching, lei bawlhhlawh a ni reng mai ang.

Tin, I Lei chu Thlarauvin a tawngtir hnuah I Lei atangin Isua duhloh zawng: anchhia te, dawt te, sawichhiatnate a chhuak nawn leh ngai tawh tur a nilo. Tui hna hmun khatah tui tui leh tuilo a chhuak kawp tur a nilo. Chu chu Jacoba sawi dan chu a ni. I Lei chu Thlarauvin a tawngtir hnua Isua duhloh zawng thu sawi I la simlo a nih chuan I Lei tihthianghlim dan tur Pathianin remruatna dang a nei tawh lo ania. Chuvangin Pathian duhloh zawnga tawng hlau rawh. I Lei leh I Ka chu Isua thununna hnuaiah kumkhuain kunin awm hlen tawh mai rawh se.

Tawnghriatloh hi mi danglama min siamtu a ni a; Pathian Tawng anih avangin thiltihtheihna mak tak a pai tel a ni. Samuelan Saula hriak a thih khan “Pathian tlang chu I va thleng anga…LALPA Thlarau nasatakin I chungah a lo thleng anga, nang pawh thu an sawi dual dualnaah chuan I tel ve anga; tin, mi danglam daihah I lo chang mai ang” a ti a. Chung thil chu Saula chungah chuan a lo thleng ta vek a ni.(1 Samuela:10:1-13). Tawnghriatlohva tawng tawhhnu Saula’n Pathian thu zawm lovin ama thuin thil a ti a; a kawchhungah ramhuai a lutthei ta tlat mai a; chutiang mi kan nih loh nan Isua zirna thutakah kan awm reng tur a ni ang; Isua zirtirna bak, zirtirna dang kan zawm tur a ni ngai lovang.

Saula kawchhungah ramhuai a luh tak avangin Davida a thik a, thah a tum a. Thah atan Davida hruai turin Saula’n vawi thum mi a tir a. A mitirhte chu Rama khuaa Naioth an thlen chuan tawnghriatlohvin thu an sawi bual bual zel a, mi danglam daihah an lo chang zel mai a, Davida thah atan hruai tumna reng reng an nei thei lo. Lal Saula ngei pawh a thawk chhuak ve ta a, tawnghriatlohvin a tawng ve leh ta bual bual a; mi danglam daihah a lo chang leh ta a, Davida thah tumna reng reng a nei leh ta lo mai a.(1 Samuela 19:1-24). Chu chu tawnghriatloh thiltihtheihna chu a ni. Khawvela mi zawng zawng hi tawnghriatlohvin tawng bual bual vek ila, Khawvelah hian tumah kan inhaw ngai lovanga, Pathian ram chu a lo thleng a ni mai ang. Tichuan inngeihlote kan inngeih ang a; inngaidam theilote kan inngaidam bawk anga; inpumkhatlote kan lo inpumkhat leh mai dawn a ni. Chu chu Vanramah kan chhawm chho vang a; Vanram chu hmun nuam tak a lo ni mai dawn a ni. Tawnghriatloh hi a va tha teh lul em. Mihring nun min siamthatu thiltithei tak a ni.

“Pathian chu Thlarau a ni a; a chibaibuktuten thlarau leh tihtakzetin chibai an buk tur a ni” tih pawh hi: “Pathian chu Thlarau a nih avangin, a chibaibuktuten Thlarauvin a tawngtir angzelin, tawnghriatlohvin chibai an buk tur a ni” tihna tluk a ni ang. [Johana 4:24].

Pathian chuan mihring tawnga kan biak hi a pawm ngei a, a hre bawk a; pindan phena mi kan biaka an hre tho ang vel hi a ni mai thei e. Thlarau tawnga kan biak erawh chuan Amahin min tawngtir anih avangin hmaichhana Pathian kan bia ang kan ni. Mihring tawnga sawifiah phakloh manganna leh buaina kan nei thei a, chutih lai chuan engtia tawngtai tur nge kan hre lova, chutah chuan Thlarauvin rum sawi hleih theih lohvin, Ama duhdanin tawnghriatlohvin min tawngtai tir thin a ni. Chutiang chu Thlarauva Pathian chibaibukna a ni a, rilru leh thlarau nunah a sawt em em thin a ni. Tichuan tawnghriatloh hi Thlarauva Pathian chibaibukna chu a ni.

Mihring tawngin hla kan phuah a, Thlarau atanga phuah te awm a, thahnemngaih hla phuahte a awm a; a tha vek mai. Solo leh a huhovin leh zaipawl pawhin Hla kan sak chu Lalpan a hria a, a pawm bawk a, mal a sawm thin a; kan thinlung a hneh a, Thlarau Thianghlim kan dawn phah thin. Nimahsela chu chu thil tawpna a la nilo; chung aia thuk chu Thlarauvin a zaitir ang zela Thlarau lam hla sak hi a ni. Chu chu Thlarauva Lalpa fakna chu a ni.

Mihring tawng hlate chu Thlarauva Lalpa fakna a tling lova, mihring nun chhungril a siam tha phak lova; chhungril thlarau nun tuihal a tulh reh phak thin lo. Thlarauvin a zaitir anga Thlarau lam hla, Thlarau atanga kan sak chuan: chu chu Thlarauva Lalpa fakna a ni a; chhungril thlarau nun a khawih phak a, a siam tha phak ta a; kan khawhar a reha, kan lung a awi ta a; kan thlarau nun tuihal a tireh ta a; kan hlimin kan lawm a; Thlarauvah awmin Vanram boruakah kan leng thin a ni. Chumi hlimna chuan Isua hminga tawrh chakna min pe a; sual nawmchenna aiin sual sim a nuam zawk tih min hriattir thin. Chuta tang chuan sual bawiha tangte chhanchhuah chakna kan lo nei a, Lalpa rawngbawl thei tura chakna kan lo nei ta thin a ni.

Chulo pawh chu thil dang a la awm a:- Thlarau Thianghlim chuan mihring tawng kan hman pangngai tho hmang hian mi a tawngtir thei tho bawk a, a zaitir thei tho bawk. Chu chu Thlarauvin a tawngtir angzela tawngna a nih tawh phawt chuan, tawnghriatloh nen a danglam chuang lova, thuhmun a ni. Chu chu kan duh thua kan tawng nen hian a inanglo hle a ni.

Chutiang chi chuan Thlarauva khatin thu a hril theih a ni. Entir nan:-Isua Krista mihrinna kha Thlarau Thianghlimin a khat reng a; mihring tawng hman pangngai hmangin Thlarauvin thu a sawi thin a ni. Isua thusawi chu thutak Thlarau a ni nghal zel mai a ni. Tawnghriatloh nen a danglamna a awm lo. Thlarauvin a tawngtir ang zela thusawi a nih tlat avangin. Petera pawh Thlarau Thianghlima a khah laikhan tawng danglam a dawn bakah mihring tawng a hman pangngai hmangin Pentecost Niah khan Thlarau Thianghlimin thu a sawitir a, mi 3000 laiin baptisma an chan kha. Stephana pawh tawnghriatloh a dawn bakah Thlarauvin mihring tawng hmangin a martar dawn khan thu a sawitir bawk a. Kan duh laitak chu Thlarauvin kan lei hi tidanglamin thunun sela tawngtir mawlh rawhse tih hi a ni.


Taksa Chetna Hi Thlarau Chettir A Ni:-

“Lalpa I Pathian chu I chakna zawng zawngin I hmangaih tur a ni” tih hi thupek ropuiber zinga mi kha a ni. {Marka 12:30}. Kan chakna thahrui hi thil sual tih nan, sual rawngbawl nan kan hmang thin. Chu chu Pathianin a phal lova, kan chakna ngei hi Pathianin dawl zawra zawr khawpa min hneh a duh a; Ama tan chauh hmang turin min duh a ni.

Pathian Chaka kha I kawchhungah a lo awm chuan I hneh dawn em ni? I ngam dawn em ni? Hla pakhatin “Mi zawng zawng tangrualin; Lalpa A malin, Chatuan pawhin a zam dawn lo Chatuan Pa” a tih kha. Pathian Chaka leh Chatuan Pa chu Isua a ni a {Isaia 9:6}; Isua chu nangmahah hna I thawhtir phal anga, I chakna a hneh anga, I kut leh ke, I taksa chu a rawn hneh vek anga, I taksa hmangin Thlarau chu a rawn che chhuak anga chu chu taksa chetna chu a ni. Thlarauvin a chettir ang zela chetna, Thlarauva tulna hi a ni. I taksa In chhungah Isua a lo awm anga, I ke a pentir che nga, a hruai ang che. Chu chu Thlarau hruaina awmzia chu a ni. Nangma duhna lama I pen chuan Thlarauvin a hruai thei lovang che.

Tisa chakna sual chi hrang hrang hnehna turin I taksaa chakna thahrui zawng zawng chu Thlarau inhnehtir vek rawh. Mithianghlim Lawr hunah taksa chetna pawimawhzia a lo lang ang. Tuna Thlarauvin a chettir theihsate hi boruakah an kang thei ang tih a rinawm bik. Tuna Thlarauvin a chettir theihloh taksa hi Mithianghlim Lawr hunah a rawn chettir thar thut dawn a nih loh phei chuan taksa chetna neihloh aiin tuna neih lawk diam hi a tha em em zawk a ni. Chuvangin taksa chetna hi hmuhsit loh tur a ni a, duh ngawih ngawih tur a ni. Nangmahah Thlarau Thianghlim a nung a nih chuan, I kawchhungah Thlarau Thianghlim chu hna i thawhtir phal bawk chuan, taksa chetna chu I taksaah a lolang chhuak mai ang. Chu chu Thlarauva piangte nungchang leh pianken diktak a ni.

Ephesi Khuaa Miten Thlarau Baptisma an chang:

Rinna avanga khawngaihnaa chhandamna changtu Ephesi khuaa mite hian a tirah chuan Thlarau Thianghlim an chang lova. Ephesi khaw paho 12 te hnenah tlang takin Paulan zawhna a zawt a: “In rintirh lai khan Thlarau Thianghlim in chang em?” tiin. Patling 12 te chuan an nihna diktak chu huaitakin an phawrh ngam a, “Chang lo, Thlarau Thianghlim a awm tih reng hriat pawh kan hre lo.” tiin an chhang bawl mai a. Isua Krista Hmingin baptisma an chang ta phawt a, chumi zawhah Thlarau Thianghlim baptisma pawh chu an lo chang leh ta nghal a, tawnghriatlohvin an lo tawng ta a ni.

Ze inthup an nei lova, Thlarau Thianghlim neilo na-na-na nei angin an awm lova, an nihna diktak an puang ngam a, mualphonaah ngai lovin dawta nun ai chuan an tlinlohna pholan an duh a, Thlarau Thianghlim an dawn awlsam phah ta a ni. Paulan an lu chungah a kut nghatin Thlarau Thianghlim a dil sak a, Paula kawchhungah chuan Thlarau Thianghlim a awm sa a, Paula atang chuan Thlarau Thianghlim chu a kut kaltlangin a kut nghahna mihringteah chuan a pakai ta a, pa tling 12 te chuan Thlarau Thianghlim chu an dawng ta a, Thlarau Thianghlim an dawng ta ngei a ni tih hriat theihna lo lang chhuak ta chu ‘tawnghriatlohtein thu an sawi ta a’ tih hi a ni. (Tirhkohte 19:1-7).


Pentecost Niah Thlarau Baptisma An Chang:

Zirtirten Thlarau an chan hmaa an rilru awmdan chu hetiang hi a ni: Isuan “Thlamuantu, Thlarau Thianghlim a lo thlen hunah thiltihtheihna in la nei ang” a tih te, “Thutakah a hruai lut ang che u” a tih te, “Engkim, in theihnghilh hnu nen lam a hriatchhuahtir leh ang che u” a tih te, “Thlarau Thianghlim nei rawh u” a tihte kha an hre reng a, an ringhlel miah lova, an beisei tlat a ni. Zirtirte hi kan entawn tlat zel tur a ni a. Khawvel thil dang ngaihtuah lovin, Engkim kalsanin Jerusalemah Thlarau Thianghlim nghakin ni sawm an awmkhawm a, an tawngtai thin a ni.

Pentecost Ni alo thleng ta a, an vaiin mi 120 an ni a; Thlarau Thianghlimin an lo khat ta vek a; Thlarau baptisma an lo chang ta a ni. Thlarau Thianghlim an lo chang ta a ni tih hriat theihna leh chhinchhiahna lo lang chhuak ta chu: “An zain Thlarau Thianghlimin an khat ta vek a, Thlarauvin a tawngtir ang zelin, tawng dangin (tawnghriatlohvin) an lo tawng ta a” tih hi a ni. (Tirhkohte 2:1-4). Pentecost Nia mite ang leh Ephesi khuaa mite ang hian Thlarau Thianghlim chu I chang ve thei e.


An Zain Tawnghriatlohtein Thu An Sawi Vek Em Ni?
1Korinth 12:28-30: He thu Paulan a sawi hian “Tawnghriatlohva tawng kher a tul lem love, tawnghriatlohva tawng kher lo pawhin Thlarau baptisma a chan theih thova, tawnghriatlohva tawng kher lovin Thlarauva piang a awm theih tho” a tihna a nih chuan a lawmawm e. Chutahchuan kan hahchawl thei ang. Chawlhna tlinglova chawl kan nih hlauh erawh chuan ‘bumin kan awm’ tihna a nive thung anga, kan rin aiin a pawi thei bawk ang. Hrefamkim angin thu kan sawi thei lova, zirchian erawh a ngai a ni.

Step 1: “Tawng chi hrang hranga thusawi theihna thilpek a awm a” a ti phawt a; chu thil pek chu an dawn vek loh avangin Step 2: “An zain tawnghriatlohtein thu an sawi vek em ni?” a tita a; tawnghriatlohva thu sawite pawh chuan a hrilhfiahna chu an dawng vek lo a niang, Step 3: “An zain thu {tawnghriatloh} an hrilhfiah vek em ni?” a ti ta a. Tichuan “An zain tawnghriatlohtein thu an sawi vek em ni?” tih chu, tihdam theihna thilpek ang bawka Thlarau thilpek zinga chikhat a ni phawt mai.

Pentecost Ni-a “An zain…Thlarauvin a tawngtir ang zelin tawng dangin an lo tawng ta a” tih nen khan a thuhmunlo niin a lang ta a ni. Pentecost Ni-a Thlarauvin a tawngtir leh Korinth khuaa tawnghriatlohva thusawi a tih hi thil inanglo a nih hmel a ni. Thil inang a nih chuan Thlarauva baptisma chang Thlarauvin a tawngtir siloh an awm thei tihna a ni anga, Pentecost Nia “an zain..Thlarauvin a tawngtir” tih nen a inkalh dawn si a.

Heti hian a fiah thei mahna, Korinth khuaa mite hi Pentecost Ni-a Marka Nu pindanah khan awm ve ta se, “An zain Thlarau Thianghlimin an khat ta vek a, Thlarauvin a tawngtir ang zelin tawng dangin an lo tawng ta a” tihte zingah khan awm ve ta vek se, Thlarauvin a tawngtir ang zela tawng hriatlohva tawnglo an awm thei lovang. Pentecost Nia mi 120-te chungchangah chuan “An zain tawnghriatlohvin thu an sawi vek em ni?” tih thu hi a dik ve thei si lova. Pentecost Ni-a Thlarau changtute chu Thlarauvin a tawngtir vek si a.

Nangmah ngei kha Pentecost Ni-ah khan awm ve ta la, Thlarau Thianghlim chu nangmahah khan lo khat liam ve ta se, Thlarauvin a tawngtir ang zelin tawnghriatlohvin I lo tawng ve ngei ang. A nih leh nangmah ngei kha Ephesi khaw paho 12 zinga mi kha nita la, tawnghriatlohvin I tawng ngeiin I inring em?

Paula hian engemaw a sawi le? Thlarauva khat, Thlarau baptisma chang, Thlarauvin a tawngtir ang zela tawnghriatlohva tawng lo pawh an awm thei tho a tihna em ni? Ni lo. A chhanna chu Pentecost Nia thil thleng hi a ni. Mi tupawhin Thlarau Thianghlim baptisma a chan a, Thlarau Thianghlim chu amahah a lo khah liam chuan; emaw, Nuin naute a hring anga Thlarauvin a hring a nih chuan; emaw, Thlarau Thianghlim chu a lo neih chuan: mathei lovin Pentecost Ni-a mite ang khan, leh Ephesi Kohhran leh Kornelia Ina mite ang khan: Thlarauvin a tawngtir ang zelin tawng dangin, tawnghriatlohvin a lo tawng lo thei lovang tih hi uar taka kan sawi duh lai chu a ni.

Tichuan Korinth Kohhranho, Thlarau baptisma changa Thlarauvin a tawngtir ang zela tawng danga tawng tawhte zingah Tawnghriatlohva thu hril theihna thilpek dawnglo an awm tihna a ni ang. A nihloh chuan, Korinth Kohhran mipuite zingah Thlarauva la pianglo, Thlarau baptisma la changlo an la awm thu Paula hian a sawi a ni ang. Entawn atan duh kan thlang thei tawh anga, Korinth Kohhran ang nih aiin Pentecost Kohhran ang leh Ephesi Kohhran ang nih chu kan thlang zawk tur a ni ang.
Ani Chuan Teh Kherin Thlarau A Pe Silo:

Johana 3:34 thua mi “Pathian tirh chuanin Pathian thu a sawi thin; Ani chuan teh kherin Thlarau a pe silo” tih thu hi “Thlarau Thianghlim pawlna tlemte, nasa lemlo, Thlarau baptisma tling kherlo, tawnghriatlohva tawngna tham kher lo dawn pawh hi Pathian pek dan a ni a, teh kherin Thlarau a pe silo, tlemte pawh a tawk e” tihna a nih chuan a hahdam thlak a, a tha e.

“Ani chuan teh kherin Thlarau a pe silo” tih hi Isuan Ama chungchang a sawina a ni a. THLARAU PATHIAN chuan A mihrinna Isua taksa chu a luahkhat tlat tih Amah A insawina a ni. “Thlarau chu tehsen ruallohvin a pe (ESV); Pathianin Thlarau chu a khatliamin a pe (God gives him the fullness of His Spirit) (GNB); Pathianin Thlarau chu teh tham lekin a pelo (ISV); Thlarau chu Pathianin teh tham lekin a pe silo (KJV)” tihna zawk a ni. Tehsen chi rual lohva tama pek a ni tihna a ni. Isuaah chuan Thlarau a nihna chu a khat liam reng a, chumi sawina chu a ni. “Thlarau pawlna tlemte kan dawn hi a tawk ve theitho a nia” tihna lam hawi a nilo.

Thlarauvin kan lei a tawngtir hmaloh chuan Pentecost Ni-a a khatliama an dawn ang ngei kha kan duh ngawih ngawih tur zawk a ni. Thlarau chu a khat liam zawih zawihin Pathianin min pek a duh a; chutiang chu kan duhna tur leh kan dawnna turin ani “Teh kherin a pelo” a tih ni. Tehsen chi rual a nih loh avangin Kg I, Kg 2, tih anga teh kher kher theih a nilo, tehsen chi ziazang a nilo tih hi Isua sawi awmzia chu a ni. Chuti a nih chuan, Thlarauva ruih kan mamawh a, Khawvel thil zawng zawng hi a lem vek an ni tih hmuhfiahna khawp Thlarauva khahna kan mamawh a, Zupui ruih ang maia Thlarauva ruihpui, Thlarauva ruih bung bungna a ni kan mamawh ni. Chutah chuan Khawvel kalsan theihna thiltihtheihna chu a awm a ni.

ENGTIN NGE THLARAU THIANGHLIM CHU I LO I CHAN THEIH ANG?

Thlarau Thianghlim hi awlsam taka chan dan a awmtlat mai. Tehkhin thuin kan sawi ang a, a fiah mai ang:- Kan ril atam chuan ei tur chauh kan ngaihtuah a, chaw tak ni lemlo hmawmsawm pawh kan ei a, chutih lai chuan Mahni Inah buhchangrum chaw tak leh sa chitin eitura peihsa diam a awm tih min hrilh kan hre ta a. Nu leh Pa ten lo haw thuai thuai se, rawn ei ve thuai thuai se min ti rilru tih kan hre lawk bawk a. “In kan thlen hunah chuan chaw kan ei dawn” tih kan hre lawk a. In kan thlen hmain kan ei ngei dawn tih kan hre lawk a, kan mitthla pawhin kan hmu lawk a; kan ei tura siam a nih tlat avangin inthlahrunna leh inthiamlohna nei miah lovin, chaw ei turin kan rilru pawh a inpeih sa diam thin a ni. In kan han thleng ta a, inthlahrung lek lovin mahni chaw na na na chu kan ei ta tawk mai a. Ei loh aiin eiin an lawm zawk. Inthlahrunna chi a nilo. Chutiang chiah chu Thlarau Thianghlim dawn dan tur hi a lo ni.

Entirna pakhat sawi leh ila:- Ril tam ai chuan tuihal hi a na zawk leh pek a. Nipui sen sat laitakin ramro phul hmun Nikang chhimchhawngah tui awmlohnaah kan awm laiin kan tui a hal a, changel kawr kan sawra, kan in dawk dawk a. Tui chauh lo chu thildang ngaihtuah theih a nilo. Tuihal chu a zual zel a; kan kal tawk tawk a, mit a vai a, chil kan lem a, kan kal zel a, Lung lianpui atanga put chhuak tui a lo luang a, a fim si a, kan duh tawkin kan in ta khawlh khawlh mai a. In zawh sen chi rual a nilo. Chutiang bawk chu Thlarau Thianghlim chaka tuihal awm dan chu a ni. I tui a hal tak tak chuan tui awmna I pan a, I in ngei ngei thin bawk a. Chutiang chiah chu Thlarau Thianghlim chan dan tur chu a ni. I tui a halloh chuan tui intir I harsa thin a, Thlarau chaka I tuihal loh chuan Thlarau Thianghlim Tui Nung lui chu intir I harsa a ni. I tui a hal tak tak chuan tirh ngai lovin nangmahin tui in tur I zawng mai ang.

Chung thil chu a ni Zawlnei Isaia hian a lo sawi ni:-“Hawh u, tui hal apiangte u, Tuiahte hian lokal rawh u, tangka neilote pawh lokal ula, lei ula ei rawh u, a ni lokal ula, uain leh hnute tui tangka pe lovin, a man pawh pe lovin lei rawh u. Chaw nisi lovah engvangin nge tangka in sen? Puar leh fanna nisi lovah engvanginnge in tha in sen? Ka thu nguntakin ngaithla ula, thil tha {Thlarau Thianghlim} chu ei rawh u, in nunna chu thil thauvah chuan hlim rawh se” tiin theihpatawpin Isaia hi a au chiam mai a lo ni. (Isaia 55:1-3).

Chutiang bawk chu Isua pawh khan a sawi a. Thu chunga thu sawi thin kha, a thahnemngaihna a lo nasa ta em em a, a lo ding chhuak ta hial a, ringtakin a au va:-“Tu pawh a tui hal chuan ka hnenah lokal sela in rawh se. Tupawh mi ring chu Pathian Lehkha thu sawi angin Tui Nung Luite a pum-ah alo luang chhuak ang” a ti a. Chung thu chu Amah ringtuten Thlarau Thianghlim an neihtur thu a sawina a ni.” (Johana 7:37-39). Hmangaihnaa khat Johana pawh hian chutiang thu chu a ni a sawi ni: “Thlarau (Isua) leh Mo (Kohhran) chuan “Lokal rawh!” an ti a. A hria apiangin “Lokal rawh!” tirawh se. Tuihal apiang lokal rawh se; a duh apiangin Nunna Tui (Thlarau Thianghlim) hi a thlawnin in rawh se”tiin.(Thupuan 22:17).

Nimahsela Thlarau Thianghlim hi chan harsat em em dan a awm leh a; Thlarau Thianghlim chaka kan ril a tam tak tak loh chuan Thlarau Thianghlim chu chan harsa tak a ni a; kan nunna chu Lalpa chauh chaka a tuihal tak tak loh chuan Thlarau Thianghlim chu chan harsa tak a ni bawk. Amaherawhchu, thil engkim aiin Thlarau Thianghlim chu I duh zawk tak zet a nih chuan I chang ngei ngei dawn tih hrechiangsa mai rawh. Hriatchiansana hi Pathian rinna dik awmdan a ni.


1. Rinhlelhna nei lovin Isua hnenah dil rawh.
Pathian rinna chu a hahdam thlak em em a ni. I tawngtai hmain I rinhlelhna paihbo phawt rawh. Ringhlel chunga I tawngtai chuan a pe dawn chuang silo che a. Ringhlel chunga I tawngtai chuan Isuan a hau che a, Jacoba pawhin “Rilru bulbal neilo, a thiltih zawng zawnga nghetlo mi chuan Lalpa hnenah engmah hmuh inring suh se” tiin a hau chiam mai che a nih hi. (Jacoba 1:5-8).

Rinhlelhna chu engtin nge I paihbo theih ang? Khawvela I tana mi rinawmber chu I Pa a ni ang. I Pa tak tak chu Isua a ni tih hria la I ring mai ang. [Mathaia 23:9]. I Pa Isua chuan A ngai em em thin che a, a thlahlel ngawih ngawih thin che a, I tello chuan a khua a har thin a, I tello chuan a hlimna a kim theilo tih hi hria la chuan Isua I rinhlelhna a bo mai ang.

I vahbosan laipawh khan Ani chuan a enzui reng che a, a ngaihsak che a, a umzui zel thin che a, amah I ngaihtuahloh laipawhin a lo veng zel thin che a, a thlakhlelh dan che hi amak zozai khawp mai. I sam zai zat pawh kha chhiar kher a tulloh hmel teh lul nen, a lo chhiarsak kilh kelh peih che a ni. I nu leh pa ngei pawh khan chutiang chu I chungah an ti hauhlo ania. Chutikhawpa nangmah buaipuitu che hi Khawvel mihring zingah an awm lova; an awm dawn bawk hek lo. Nangmah hmangaihbertu nia I hriat pawh khan I samzai zat a hre lo; Isua erawhchuan nangmaha awm zawng zawng I ngaihtuah zawng zawng leh I samzai zat chenin a hre kilhkelh che a; a ngai em em che a, a ngaina em em che che a; a hmangaih em em che a ni. [Luka 21:18]. Chuti khawpa nangmah hmangaihtu leh ngaihsaka buaipuitu chu rintlakah ngai la Isua hnenah I nihna ang angina inpumpek tawp mai rawh. Tichuan Thlarau Thianghlim chu I chang ngei ang.

Mihring I tana rinawmber pawh hian a muthilhsan thin che a, a kalsan thin che a, a theihnghilh fo thin che a, a phatsan thei bawk che. Isua erawhchuan a muthilhsan ngailo che a, a kalsan ngailo che a, a theihnghilh ngailo che a, a phatsan ngai reng reng lo che. I tana Isua rinawmzia chu ngaihtuah la, I damchhung leh chatuan atan pawh ringhlel ngai hauhlo turin Isua I rinna tinghet hmasa rawh le.

Nangmah ngei pawh kha mi rinawma ngaitu che chungah chuan I lawm thin a; nangmah ringhleltu chungah I lawm ngai lo. Isua pawh chutiang mi chu a ni ve. Rinhlelhna neilova Isua chu A Thlarau Thianghlim I dil chuan a pe nghal ang che.

Luka 11:5-13 thu kha han chhiar ila, mawi leh mawilo pawh dawn zo lova dil ngut ngut tur chu Thlarau Thianghlim a ni tih Isuan min zirtir a. Thlarau Thianghlim petu tur Isua chu dil buai hle mai rawh. Rinhlelhna tellova, dawng tawhsa diam anga dil hi Thlarau Thianghlim dawn dan awlsam ber a ni. Isua chuan rinna tak tak thinlung neia dilna chu a hre em em mai a ni. Isua chuan I dil hma daih khan “Thlarau Thianghlim nei rawh u” a lo ti daih tawh zawk che tih han ngaihtuah teh. “Engkim in tawngtaia in dil apiang chu hmutawhah inngai ula, tichuan in hmu ang” a ti min lo ti hmasa zawk leh nghal a. (Marka 11:24). Hmu tawhsa anga I thinlung a awm theih chuan Lalpa chu I chungah a lawm anga, a pe nghal ang che.

2. Fianrial tawngtaina nei rawh.
Hei hi tih hmaih hauh suh ang che :- “I pindan chhungrilah lut la, I kawng khar la, I Pa (Isua) a ruka awm hnenah chuan tawngtai rawh. I Pa a ruka hmu thintu che chuan a pe ang che. Jentailte angin sawi nawn mai mai suh, an tawngtam avangin hriain an ring a ni. Amah I dil hmain I Pa chuan enge I mamawh tih a hre reng a ni” (Mathaia 6:6-7).

Fianrialah kher lo pawh I thinlunga a lan hun hunah, I thinlung zawng zawnga I tawngtai theih hun apiang kha tawngtaina hun tha ber a ni. Damlo khuma mu chung pawhin, emaw, thu chung pawhin Thlarau Thianghlim an dawng lai kan hriatpui tawh a, kalkawnga kal lai te, motora chuan lai te, thlawhnaa chuan lai pawhin a dawn theih bawk. Fianrialah I tawngtai chuan thingthia tawngtai a tha ber. Ding chung, ban phar leh bawkkhupa tawngtai pawh a tha bawk.


3. I Sualna Zawng Zawng Simin Puang Rawh:

I sim tur sual chu enge ni? I thinlunga Isua duhloh zawng thil awm zawng zawng kha sual chu a ni a. I taksa pumpui Isua duhloh zawnga I hmanna zawng zawng nen khan sual a ni bawk. Isua duhloh zawnga I tawng chhuah reng reng pawh kha sual a ni vek bawk. Sual simna chu enge ni? Kawng engkimah Isua duhzawng angzela nung tura huaisen taka thutlukna siam hi sual simna chu a ni mai.

Sual sim chu hlimna a ni a, sual bawih atanga chhuah zalenna pawh sual simna hi a ni. Sual sim chu thlamuanna a ni a, Sual simloh I neih chuan Thlamuanna famkim I nei thei lovang. Isua thihnaa kan thih ve theih dan awm chhun pawh sual simna hi a ni. Biblea ringtute kha Thlarau Thianghlim an chan hmain, Thlarau Thianghlim an chan theih nan “sim rawh u” tih thu pek an ni hmasa a; sual zawng zawng sim chu matheilova Thlarau Thianghlim channa a ni.

Sual hi mihringin a sim vek theilo angin Setanan a ngaihtuahtir thin a; mihring hi tihbeidawn a tum thin a ni. Mihring siamtu Pathianin A mihring siamte hian sual an sim thei tih a hriat vangin “Sim rawh u” tiin thu a pe a; “In sim loh chuan in boral vek ang” tiin thu khauh tak a pe zui tlat mai. {Mathaia 4:17; Luka 13:5}.

Sual simna chuan hun liam tawha thiltih sual sima sual puanna leh ngaihdam dilna a keng tel a; hun lola thlenglo atana sim lawkna a keng tel bawk. Sual I sim lawkloh chuan thlemna chi hrang hrang I tawh hunah sualah I tlu awlsam hle dawn a ni; chuvangin sual chu sim lawk ngei a ngai a nia .

Sual vanga lungngai leh manganga I chauh laiin Isua chu sual sim ngaidam turin Khawngaihnain a khat tih theihnghilh suh la; Pathian beisei ang che. Simna tura I lungngaih laiin Pathianin a rawn en che a; Mi sual simten Isua hnen an panlai hi Vantirhkohten Van atangin an lo bih reng thin a ni.{1Petera1:10-12}.

“Pathian duh zawnga lungngaihna chuan chhandamna tura simna a thlen a, chu chu inchhir awmlo tak a ni. Khawvel lungngaihna erawh chuan thihna a thlen zawk a ni. Ngaiteh mah u: Pathian duhzawnga tihlungngaiha in awmna chuan:- thil lak urhsunna te, pawikhawih velo inni tih lantir duhna te, sual huatna leh, tih sual palh hlauhna te, min ngaihna leh thahnemngaihna te, sual titu thunun zel tura inpeihna te a neihtir tak che u hi” Paulan a tih hi sual simtu rilru awmdan tur chu a ni.{11 Korinth :8-11}.

Lal Davida pawh kha, a sual zepruk Pathianin a chhinchhiah vek a ni tih Zawlnei Nathanan a han hrilh meuh chuan, a mangang hle a, a sual inhriatna chu atuarna em em a: “I ruh tihtliahte hi a hlim theih nan” tiin a ruh chu tliaklo mahse, ruh tliak ang hiala nain a tuar a ni{Sam 51:8}; “Ka sualna chu I hnenah ka puanga, Ka khawlohna chu ka zep ta lova; Ka bawhchhiatna chu Lalpa hnenah thupha ka chawi tawh ang ka ti a; Tichuan ka sual khawlohna chu I lo ngaihdam tak kha” tiin Khawvel pumpui hriat turin a sualna chu a puang mualpho ta zawk a, mi zawng zawng chhiar turin lehkhabuah ziaksak a ni {Sam 32:5}. A sim miau avangin Davida sualna chhinchhiahtute chu Lalpan a khinsak tawh zawk dawn a ni. Davida ang hian sual kan sim thei e.

Miin sual a sim loh chuan Thlarau Thianghlim a chan hnuah pawh thil sual a tilui nawn leh fo thin a ni. Sual simna kalkanin Vanramah kan lut theilo vang tih hre reng ang che. Sual langsar thenkhat sim chu a harsa lo; sual zawng zawng simna kher erawhchu thihna rapthlak tak ang hi a ni a, nunna kawngka zim tak a nibawk. Khawvel thihsanna a ni a, Isua Kross-a kan thih vena a ni. “Buhfang leiah a tlak lohva a thih phawt loh chuan a mal chauhvin a awm reng thin a; a thih erawh chuan tamtakin a rah thin” tih kha mihring hlui thihna ram, sual simna a ni alawm.[Johana 12:24].

I fianrial tawngtainaah hian I sualna zawng zawng, a hming mal tetein I sim a ni tih Isua hrilh vek rawh. “Bawhchhiatna zeptute chu an hmui ngil lovanga, zep lova inpuanga hawisantute chuan zahngaihna an hmu ang” tih a nih kha {Thufingte 28:13}. Midang sual chu puansak duh suh, anmahnin puang zawk mai rawh se. Mihring hmaa mahni sual sim vanga puang ngam chu mi huaisen an ni. Mihring hmaa sual puang ngamlo, Pathian hmaa puang ngam kan nih chuan Pathian aiin mihring kan zah zawk tihna a ni a, Pathian hmaa mualpho aiin mihring hmaa mualpho kan hlau zawk tihna a ni bawk. Nimahsela Isua hnena sual puan chu a tawk e; Lalpan tul a ti anih chauhvin mihring hmaah chuan kan puang thei ang.
Sual puan hi mualphona a ni a, thil zahthlak ber a ni. Mahse Isuan Samari hmeichhe leplerh tak kha a sual thuhruk a puan sak a:-“Pasal panga I nei tawh” a ti hmiah mai. [Johana 4:18]. Kha hmeichhia kha a zak khawp ang. Mahse Isuan a hmangaiha, sual zep ruk a phalsak lo a ni.
Pathian Thlarau chuan Vanrama kaitlak tura mihring a tihthianghlim duhte chu, Thlarauvin, tawnghriatlohvin, thurukin, mihringte hriatthiam veloh turin, an sual a puantir thin bawk. Chu chu mihring hnena sual puanna a ni lova, Pathian hnena sual puanna a ni. Thlarauvin sual a puantir thinna chhan chu:-A hmangaih mithianghlim ni tura a kohte nunah sual thuhruk awm a phalloh vang a ni. Vanrama kai theiturte chuan sual thuhruk an neih a thiang lova. Nimahsela tawnghriatlohva tawng zawng zawng hi sual puanna a ni vek lova, Thlarauva Pathian biakna leh chawimawina a ni bawk. Tawnghriatlohva thuhril a awm thei bawk. Tawnghriatloh hian thianho a inkawm tlan theih bawk a; ro a rel theih bawk. Ramhuai leh Setana beih nan tawnghriatloh hi khandaih angin kan ka atangin a lo chhuak thin anga, kan ralthuam thaber tur a ni; Thlarau ngunhnam a ni bawk.

Isua hnenah erawh chuan I sual zawng zawng chu puang ngei la; tuna I puan loh chuan Rorelna Niah I sual chu mi zawng zawng hriat turin nangma lei ngei hmang khan Pathianin a puan luihtir dawn tho tho che a, chumi hunah chuan ngaihdamna chu I chang thei tawh chuang lovang. Tunah I sual I sim tak meuhva I puan erawh chuan ngaihdamna chu I chang dawn a, Rorelna Niah I sual puan tur a awm tawh dawn lo.

Sual hi avaiin 100 nise, 99 sim ta la, 99 chu a ngaidam ang che nga, pakhat I sim hmaih chu a ngaidam lovang che. Chuvangin Sual chu avai law lawa sim tur a ni. Sual kan sim vek chuan Pathian mithmuhah kan lo thafamkim mai dawn a ni. “In Pa Vana mi a thafamkim angin in thafamkim tur a ni” Isuan a tih kha “Kan thafamkim theilo” tiin Isua chu kan hnial tur a nilo. (Mathaia 5:48). Pathian khawngaihna hi sual thup nan hman chi a nilova; sim duhloh nei chungin khawngaihna I beisei palh anga, I beisei sual hlauh dah ang e. Simnaah hian Pathian khawngaihna chu a awm a, Sual simte tan, sual ngaidam turin Pathian khawngaihna chu Tuifinriat ai pawhin a thuk a ni zawk e.

Thlarau Thianghlim dilin nasatakin I tawngtai tawh thin a, I la changlo a nih chuan sual simloh I la nei a ni ngei ang. Mihring chunga thil sual I tih kha Pathian chunga thil sual ti I ni tlat. I thil tihsual chu a pawi a ni. “Tupawh Lalpa Hming lam apiang chuan sual kalsan rawh se!” tih kha hre reng la { 2 Timothea 2:19}. Dawt sawi hmang I nih chuan I dawt sawi ngei chu Isua hrilh rawh. I sim tih hrilh bawk ang che. Dawt tellova thudik sawia nun chu huaisen ngaitak a ni. Chutiang zelin I sual zawng zawng, eng sual pawh, Isua hnenah chuan a hming mal te tea lamin puang vek la, Isua chu I tihder theilo tih hria la, I sim tak zet a ni tih hrilh la, Davida ang khan Lalpa hmaah tap ngawih ngawih rawh khai; tichuan a ngaidam ang che. I sual I simloh chuan Pathianin a ngaidam ngai lovang che; mihring pawhin an ngaidam bawk heklo vang che. I sim takmeuh erawh chuan Pathianin khawlohna neilo ang hialin a ngaidam dawn che a ni.(Sam 32:1-2).

Midang pawhin an ngai dam ang che. Simna tak tak I neih chuan hmelma lakah pawh Isuan a humhim zel ang che. Hmelma ilo neih pawhin I hmelma pawhin a ngaidam ang che. “Mi, a awmdanin Lalpa a tihlawm chuan a hmelma nen lam pawh inremin a awm tir thin” tih kha thil maktak a ni asin. (Thufingte 16:7).

I thil tihsualah mahni inhaw mahla, Pathian hnenah I tlulut tawh a, tunah chuan nangmah leh nangmah kha inngaidam ve rawh. Pathian pawhin a ngaidam thei che a, mihring pawhin an ngaidam thei che a, engahnge nangmah leh nangmah pawh I inngaihdam theih loh ang le? Isua chu sual sim ngaidam turin Khawngaihnain a khat tih hrereng rawh. Chumi hnuah chuan Isua tana thih huamin Isua anga tuar ve tawh zawk turin nunnemna leh ngilneihna I lo nei tawh ang. Hlimtak leh lawmtak leh thlamuangtakin awm tawh rawh; tichuanThlarauvin a rawn bual fai ang che.




1   2   3   4   5   6   7   8   9   10   11


The database is protected by copyright ©hestories.info 2017
send message

    Main page