Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana


(Picture: Pathian pakhat ringtu Michael Servetus an halhlum lai. Ban phar hi John Calvina a ni)

:)


Download 499.51 Kb.
Page2/11
Date conversion29.03.2017
Size499.51 Kb.
1   2   3   4   5   6   7   8   9   10   11

(Picture: Pathian pakhat ringtu Michael Servetus an halhlum lai. Ban phar hi John Calvina a ni).

A dikna takah chuan Trinity thurin leh Pathian pakhat chauh Isua Krista rinna hi indona ropui tak a ni a; Setana leh Pathian pakhat Isua Krista indona a ni. “Pathian pakhat chauh a awm” tih hi Pathian atanga lo chhuak a ni a, Pathianin a tan tlat a. Genesis atanga Thupuan thleng hian Pathian chuan pakhat chauh a nihzia hi amah ringtute hriattir a tum tlat a ni. Chutih lai chuan Setana’n Pathian rinna kawng dik ata mite hruaibo turin a finna theihpatawp hmangin a lo bei reng bawk a. Mihringten Pathian an biak fuhloh hram theih nan, Pathian chu phir thum ang a thlirtir theih nan Trinity chu a duang chhuak ta a, mihring rilru a hruaibo ta a ni.

“Pathianah minung pathum an awm” tiin Pathian thupek “Keimahlo chu Pathian dang I nei tur a nilo” tih thu kalh ranin Trinity chu mihring thinlungah a piantir ve thei ta tlat a, mi tamtak a hruaibo thei ta a ni. Chutichuan “Pathian chu pakhat chauh a awm” tih leh “Pathianah mi pathum an awm” tih thurin hi thurin inang miahlo, inkalh, inhmelma Pathian leh Setana indona khirh khan tak a ni.

Indona tak meuh a ni tih kan hriat theih nan sawi tur tamtak a awm a, chung zingah chuan Michael Servetus-a thih dan hi lo thlang chhuak ila a fiah thei ang. A thih chhan bulpui ber chu Trinity a sawichhiat vang leh Nausen baptisma a sawi chhiat vang a ni.

Servetus hi Spain-ah 1509 ah a piang a. Mi danglam tak a ni. 1522-ah University of Zaragoza-ah kum 13 lek a nih laiin a kal a, kum 16-ah Law (Dan) zirin University of Toulouse-ah a kal a, 1534 kumah Paris-ah Medicine a zir leh a, Doctor thiam tak a ni a, lehkhabu, Christianismi Restitutio a ziak a, chutah chuan Pulmonary circulation of the blood chanchin (Lungin thisen a semkual dan hi) 1546-ah a ziak a, ziak hmasatuah ngaih a ni. Mathematics a thiam hle a, Professor of Mathematics a ni bawk a; Kohhran a luhchilh hma bawk a, mi thiam chungchuang ropui tak a ni.

Tawng hrang hrang, Latin leh Greek leh Hebrai te a zir thiam vek bawk a. Kum 15 a nihin Bible a luh chilh tan a. Kum 20 a nih chuan tawng bul Hebrai leh Greek tawng hmangin Kohhran pateho thu ziak chu a endikin a khaikhin hneh em em tawh a ni. Chutiang a zirnaah chuan Trinity diklohna a hmuchhuak ta tlat mai a, Pathian chu pakhat chauh a nih zia a hmu chiang bawk a, 1531-ah lehkhabuah a ziak ta a “De Trinitatis Erroribus = On The Errors of Trinity = Trinity Dik Theihlohna” tih chu a ziak ta a. Trinity ringtuten an haw hle mai a, kalsual heretics-ah ngaiin October ni 27, 1553-ah khan Geneva khawpui daiah John Calvina remtihnain an hal hlum a a ni. John Calvina chu Presbyterian Church dintu hi a ni a, Mizorama Presbyterian Kohhran pawh hi John Calvina zirtirnaah a innghat thui hle a ni. John Calvina duhdan tak phei chuan a lu tan tur a ni a; mahse Geneva Council chuan halhlum tha an tita zawk a ni.

John Calvinaten Michael Servetus an hal hlum hi tihpalh thil a ni lova; Calvina hi a inchhir hek lo. An halhlum hma kum 7-a a lehkhathawn atang hian a chiang a; February Ni 13, 1546 kuma Farel-a hnena a lehkha thawn atang hian a hriat a ni:- “Servetus chu Geneva-ah a lokal phawt chuan, ka thuneihna buk a rit tawk a niha ka theih phawt chuan nungdamin ka chhuahtir hauh lovang” a lo ti lawk daih tawh a ni.

Servetus chu Geneva-ah a lokal ta a; an lo man ta a, chutih laia Farela hnena Calvina lehkha thawn, August Ni 20, 1553-a a ziak chu hei hi a ni: “ Servetus kan kawl ta, hrenbeh thain ka hria. Ka thian Nicolas-a chuan capital punishment [tihhlum atan tihna] pek atan a kova; a te berah thi tura a chungthu rel thluk a nih ngei ka beisei” tiin Farela hnenah lehkha a thawn a ni..

Banah phuar betin Servetus chu an hal hlum ta a; Calvina a inchhir lo; “Kha mi ka tihhlum tak kha … tihhlum nawn leh ka la duh hial zawk a ni” a la ti cheu mai a ni. {The Murder of Michael Servetus; The Berean Christian Bible Study Resources}. Michael Servetus chunga John Calvina-te thiltih duhdan hi Zoram Christiante hian dik kan tihpui thei hlawm ange maw tak chu le? Calvina-te thil tih hi tha kan tihpui chuan tawk mai sela; thalo kan tihpui chuan an zirtirna pawm Kohhranah hian zirtirna himlo inphum ru hmuchhuah tur a awm kan ringlo em ni ang le?

Servetus-a thih chhan:- a thusawi leh ziak chu hei hi a ni: “Isua Kristaah hian Pa Pathianna zawng zawng chu a awmkim vek a ni” tiin a ziak a. Trinity thurin:-“Pathianah mi nung hrang pathum an awm” tih hi a hnawl a; “Fapa hi Chatuan Fapa a ni” tihte hi a hnawl fithla vek a. Thu, Logos mihringa a lo chan Ni atang chauhvin Fapa chu a awm a ti a ni. Lei leh Vana thil engkim hi Kristaah a inthlungkhawm vek a ni a ti bawk. Nausen baptisma [paedobaptism] a hnawl bawk a. Christianity pumpui tichhetu tur ramhuai atanga lo chhuak a ni a ti bawk a.

Trinity chu :- Ramsa tihbaiawm tak, taksa pakhata lu pathum nei angin a ziak bawk a. Trinity chuan Pathian tamtak awm ngeia rinna Polytheism-ah a la hruai lut ngei dawn a ni a ti bawk a. An huat zual lai ber chu hei hi a ni:- “Trinity chu Setana [Demon] atanga zirtirna diklo lo chhuak a ni” a tibawk a. Kohhranhoten (Protestanthoten) Catholic thurin siam chawp Trinity an lo pawm thei chu mak a ti a, Pope thuhnuaiah an kun Pathianin [ lungnihloh vang zawkin] a phalsak taah a ngai bawk a.

Bible thudik nena inmil theilo, Trinity pawm tlat chung si a, Protestant hovin Catholic an chhuahsan pawh a hrethiam theilo bawk a. Heng a rin dante hian Catholic leh Protestantho te chu inangkhat rengin a ti lungawilo vek a ni.

Tichuan a chungchang thu chu Genevan City Council chuan a ngaihtuah ta a. Servetus chu hnawhchhuah emaw tihhlum emaw turin an rel ta a. John Calvina’n Farela hnena lehkha a thawn kha I la hre reng anga, Servetus chu Heretic-ah ngaiin thi tura tih a ni ta. Khawpui dang, Berne, Zurich, Schaffhausen, Basle, te remtihpuina an zawng leh te te a; an thu rawn thawn chu hei hi a ni: execute the heretic = kalsual chu tihlum rawh u tih a ni . Halhlum an thlang ta a, John Calvina’n a lu tan a rawtna chu an pawm ta lova; an hal hlum ta a ni.

John Calvina hi Mizoramah phei chuan ngaihsan hlawh tak a ni a, Presbyterian Kohhran meuh dintu ringtu ropuia ngaih a ni a, Servetus an hal hlum duh hi a mak kan ti mai thei; mahse a maklo, Isuan : “Tupawh a tihlum tur che u apiangin Pathian chungah thil tha tiin an inhria ang, chutiang hun chu a thleng dawn. Chung thil chu an ti ang, Pa leh Kei min hriatloh avangin” a lo tih diim diam tawh kha (Johana 16:2-3). Chutiang hun chu a lo thleng leh ngei ngei dawn a ni. “Kei min hria ni ula, ka Pa pawh in hre tawh tur, tun achinah Amah in hria e, Amah inhmu tawh bawk” a tih lai khan Isua lo chu Pa dang hmuh leh hriat an nei silo. Mahse Isua chauh an hmuh hian, Pa leh Isua chu an hmu a, Isua chu Pa a ni nghal bawk tih hi an hrethiam tawh a, a tawk e.(Johana 14:7). Isua leh Pa hrefiahtu chuan heihi a hrethiam ang:- Isua chu “Alpha leh Omega, a Hmasaber leh a Hnuhnungber, a Bul leh a Tawp, Lalpa Pathian Awmtawha leh Awmmeka leh Lolaawmtura, Pathian pakhat awmchhun Minunga chu a ni” tih hi. (Thupuan 1:8,18; 22:13).

Servetus an tihhlum hian Calvina-te chuan Pathian duhzawng tiah an inngai a, Calvina chuan tihhlum nawn leh a la duh cheu a nih kha. Chu chu martarna awmzia chu a ni. Chuvangin “Pathian pakhat chauh a awm a, chu chu Isua Krista hi a ni” tih rin tlat hi martara thihna tham a ni. Pathian pakhat chauh rin leh “Pathianah minung pathum an awm” tih thurin Trinity hi, thurin unau an ni lova, thurin indo:- Pathian leh Setana indona dik tak a ni. { Source: 1. Walter Nigg. The Heretics -New York: Alfred A. knof, 1962, ]pp. 324-328]. 2. “Michael Servetus” Encyclopedia Britanica, xx, [371-372.]. 3. “Unitarianism” Encyclopedia of Religion and Ethics X11, 520. 4. Michael Servetus International Society} Michael Servetus hi Unitarian angin an puh a, mahse a nilo, Christian Monotheist diktak a ni zawk.


Trinity Innghahna Lungphum Mathaia 28:19
Mathaia 28:19 thu:-“Pa leh Fapa leh Thlarau Thianghlim hmingah chuan baptis ula” tih thu hi Biblea Trinity innghahna lung phum pawimawh ber chu a ni. Mahse hei hi Original Bibleah a awm lo tih finfiah kan tum a ni. Chumi hma chuan tuna a awm anga sawifiah thin dan kan sawi hmasa lawk ang.

Bible-ah Trinity a awm ngei a ni tih sawifiah nan Saptawnga an ziak dan Trinity ringtuten an sawifiah bawk thin a:- “In the name of the Father, and of the Son, and of the Holy Ghost” tih thuah hian Pa chu Fapa leh Thlarau Thianghlim lak atangin mihrang nalh a ni tih tilangfiahtu chu, Pa (Father) tih hmaah definite article ‘the’ hman a ni a, chutiang zelin ‘Son’ tih leh ‘Holy Ghost’ tih hmaah pawh definite article ‘the’ a awm a; chuvangin mihrang theuh an ni a, an pathum hian Pathian an nih theuh bawk si avangin, Pathian pathum ni lovin “An pathum hian Pathian pakhat an ni” an ti thin a ni.

‘The’ hi thil nihna chiangtaka tihlan duh hmaah dah thin a ni a, thil hrang daidanna anga hman pawh a ni reng a ni. Nimahsela chu chu thu tawpna ala ni thei mai chuang lova. Chumi tlukpui chu hei hi a ni a, Thupuan 22:13 thuah hian Isua mi pakhat nihna hrang hmaah ‘the’ chu Biblein a hmang leh tho mai a:- “I am Alpha and Omega, the Beginning and the End, the First and the Last” tih hi. A Bul leh a Tawp, Hmasaber leh Hnuhnungber tih hmaah hian definite article ‘the’ chu a awm vek a. Isua chu Hmasaber leh Hnuhnungber, a Bul leh a Tawp a ni thei a, a nihna hming hrang sawi nan ‘the’ chu hman a ni mai a, ‘the’ chuan Isua chu mi pahnihah a siam chuang lo. ISUA chu Hmasaber leh Hnuhnungber, a ni a, a Bul leh a Tawp a ni bawk a; a nihna hming hrang hmaah ‘the’ chu a dah theih mai a ni. Chu chu hnial theih a ni lo.

Chutiang bawkin Pa, Fapa, Thlarau Thianghlim tih hmaa ‘the’ awm hian mihrang an ni tih sawi lovin, ISUA nihna hrang a sawifiah mai zawk a ni. “In the name” tih hi hming pakhat sawina a ni a, chu hming pakhat chu mi pathumin an intawm ni lovin, Pathian pakhat chauh chuan nihna hming lar tak pathum, inlarna hming lian pui pui pathum a nei tihna mai a ni. ‘ISUA’ tih hi Pa hming a ni a, Fapa hming pawh a ni a, Thlarau Thianghlim hming pawh a ni nghal tihna a ni.

Pa, Fapa, Thlarau Thianghlim tih hi mihrang theuh pathum nise chuan “In the Name of” tih ni lovin “In the Names of” tih ngei ngei tur a ni. Chu chu Saptawng kalhmang pangngai a ni. “In the Name of” tih a nih avangin Pa leh Fapa leh, Thlarau Thianghlim chu, Pathian pakhat Isua nihna leh a inpuanchhuahna hming pathum mai a ni tih a lang fiah kelh kawlh hle a ni.

Chumi sawifiah dan chu a dik a ni tih nemngheh nan Petera chuan: “Sim ula in sual ngaihdam nan Isua Krista hmingin baptisma chang theuh rawh u” tiin huaitakin Pentecost Niah khan thu a pe nalh mai a ni. (Tirhkohte 2:38). Mi sang thum laiin Isua Krista Hmingin baptisma an chang ta a nih kha. Baptisma inchantir nan Isua hian ama hming hmang turin Petera hi a lo hrilh tawh a nih loh chuan engtin nge Petera hian “Isua Krista Hmingin baptisma chang theuh rawh u” a tih ngam teh lul ang le?

Baptisma inchantir Kohhrante hian Petera tihdan ang khian baptisma chu Isua Krista hmingin in chantir thei vek ila Isua ava lawm dawn em! Baptisma chu Isua Hminga kan inchantir chuan, Apostlete nen baptisma pakhat (one baptism) inang tlangin kan chantir tihna a ni anga, Lapa pakhat Isua (one Lord) kan be tlang tihna a ni bawk anga, rinna pakhat (one faith) kan vuan tlang tihna a ni bawk ang. (Ephesi 4:5).

Isua chu Ama hming hmang duhtute chungah chuan a lawm thin a. Ramhuai hnawhchhuah nan Isua hming kan hmang duh vek a, Isuan a phal reng a. Damlo tihdam nan Isua hming kan hmang bawk thin. Chu chu Isuan Ama hming hman min phalsak vang a ni. Eng vang ber hian nge Isua hming chu baptisma inchantir nan kan hman duhloh ang??. Mathaia 28:19 thu tanchhana Trinity thurin vang hi a ni nawn lehfo thin. Chuvangin Trinity thurin hi a diklo tih sawifiah ngei a ngai a ni. Tin, Mathaia 28:19 thu:- “Pa leh Fapa leh Thlarau Thianghlim hmingah chuan baptis ula” tih hi Isua Krista sawi a nilo tih leh Bible Original, Mathaia’n Hebrai tawnga a ziak ngei-ah chuan a awmlo tih leh, Bible Original chhiar thin Eusebiusa pawhin Trinity hminga baptisma a sawi lang ngailo tih tlem kan sawi bawk dawn a ni. Tichuan Trinity innghahna lung phum chu Bibleah a awm lo tih kan hrefiah thei dawn a ni.


MATHAIA’N HEBRAI TAWNGIN CHANCHIN THA A ZIAK:

Thuthlung Thar Bible hi Greek tawnga ziak a ni tih kan chhiar thin a. Mathaia hi chuan Hebrai tawngin Chanchin Tha hi a ziak tih kan sawi dawn a, tunge awih leh hnuhnawh thei tawh ang?

Neil Altman-an “Hebrew Gospel of Matthew” tih a ziak ami hi la chhuak ta ila: “Mathaia hian Chanchin Tha hi Hebrai tawngin a ziak a, Greek tawng ni lovin, Isua zirtir hriat hlawhlo tak Bartholomaia (Nathanaela) khan a copy pakhat chu India Ramah a keng a ni” a ti a.

Lehkhabu pakhat “A History of Christianity in Asia” tih ziaktu Samuel Moffet-a thuziak lachhuak leh ila: “Pantaenus-a, Kohhran chanchin chhuitu leh Missionary nibawk chu AD 180-ah India Ramah a kal a, Chanchin Tha, Hebrai tawnga Mathaia ziak copy Bartholomaia ken chu a han hmuchhuak a” a ti bawk a.

Thoma India ramah a kal thu chauh kan hre thin a; mahse Isua khan a zirtirte kha pahnih, thiandun inkawpin a tir thin thova, chutiang chuan Thoma leh Nathanaela ( Bartholomaia) hi India ramah an kaldun tih kan pawm angai tawh ang. Synoptic Gospel pathum Mathaia, Marka Luka te pathum zingah hian Marka hi a hmasaberah sawi a nithin a, tunah chuan Matthaia hi a hmasaberah kan pawm a ngai tawh bawk ang. Bartholomaia leh Thoma ten India ramah an ken hman tura ziak a nih chuan AD 50 hmalamah ziak a ni tih kan pawm a ngai bawk ang. Catholic Dictionary chuan: “Chanchin Tha palite zingah Mathaia hi ziak hmasakber chu a ni” tih a ziak bawk a.

Pantaenus-a hi Juda mi a ni a, Hebrai tawnga Chanchin Tha Mathaia ziak a hmu chu a lawm hle a, India mite hnen atang chuan Hebrai tawnga Chanchin Tha Mathaia ziak chu Alexandria khuaah a hawn ta nghe nghe a ni. Hebrai tawnga Mathaia ziak Chanchin Tha a hmuhchhuah hian Pathian thu belhchianna kawngah kawngro a su thei dawn a ni.

Eusebius-a chuan tihian a ziak bawk a: “Pantaenus chu India ramah a kal a, Isua ringtute zingah chuan amah aia kum za hmalama lo thleng hmasa tawh Chanchin Tha Mathaia ziak Bartholomaia ken chu a han hmuchhuak a. Bartholomaia chuan India mite chu Christian rinna thu a zirtira, an hnenah chuan Chanchin Tha Hebrai tawnga Mathaia ziak chu a hnutchhiah ta a, an ni chuan an lo vawng tha reng a ni” tiin.

Jerome-a Vulgate ziaktu pawh hian chu thu bawk chu a ziak a: “Pantaenusa chu India ramah a han kal a, Hebrai tawnga Mathaia Chanchin Tha ziak, Bartholomaia hnutchhiah chu a hmu chhuak a, a rawn hawn let leh a ni” tiin.


Rev. Dr.Cohen G. Reckart, Apostolic Theological Bible College ami chuan : “Hebrai tawnga Mathaia Chanchin Tha ziak copy hi Judaten an kawl reng thin a ni tih hi Roman Catholic Kohhran pawh hian an hre ru reng a ni” tiin a sawi bawk.

Papias-a, A.D. 60-130, Asia Minor (Turkey) rama Hierapolis khaw bishop pawh chuan “Isua thusawite chu Mathaia chuan Hebrai tawngin a ziak a” a lo tive bawk. Iranaeus-a, kum zabi 2-na ami pawh hian “Mathaia chuan Hebrai mite tan Hebrai tawngin Chanchin Tha chu a ziak a” a ti bawk. Hengte hi Hebrai tawng ngeiin Mathaia hian Chanchin Tha hi a ziak a ni tih finfiah nan chuan a tawk tawh hle a ni.


MATHAIA 28:19-AH: “PA LEH FAPA LEH THLARAU THIANGHLIM hmingah chuan baptis ula” TIH HI A AWM LO:

“The Original Matthew 28:19” tih thu hmanga Cliff Besson-a thu ziak sawifiah pahin kan la chhuak anga: “Jerusalem khuaa Archbishop, Apa Cyril (AD315-386) lehkhathawn ziakah chuan Mathaia 28:19 thu, tuna Bible kan hman lai meka chuang: “Pa leh Fapa leh Thlarau Thianghlim hmingah chuan baptis ula” tih hi AD 370 hmalamah a awm lo. Kut ziak bu, tawng hrang hrang:- Greek, Aramaic, Latin, Hebrai tawnga ziak chhawnahah pawh a awm lo. Mathaia ziak hi AD 370 hmalamah hian tawng hrang tlemte chuan lehlin a ni tawh a, chungah pawh chuan Mathaia 28:19-20 thu tuna mi ang hian a awm lo” tih thu a ziak a ni.

Christiante dodalna a nasat avangin lehkhabu tamtak tihchhiat a ni a. Jerusalem Archbishop pawh hian puithiam Annarikhus chu, sakhaw lehkhabu (scroll) te chu tichhe turin a nawra, Hebrai tawnga ziak Chanchin Tha Mathaia, a tira mi tih danglamloh erawh chu a him a ni. Lalpan a veng him a ni. Kum zabi 14-na, AD1300-1400 inkarah hian Spain ramah Hebrai tawnga Mathaia ziak chu an hmu chhuak ve leh a. Jerusalema awm nen chuan an inang chiah a ni. Chu chu ziak chhawn tura chhiar theih ala nih lai ngeiin Shem-tob ben-Isaac ben-Shaprut (Ibn Shaprut) hian a ziak chhawng ta a; Juda tawng (Hebrai tawng)-a a lehkhabu ziak Even Bohan (The Touchstone)-ah chuan a ziak chhawng ta a ni. Chu lehkhabu chu Shem Tov emaw Shem tob’s Mathew Hebrew Gospel an tih chu a ni. Hei hi Internetah hmuh theih a ni. Chutah chuan a ni “Pa leh Fapa leh Thlarau Thianghlim hmingah chuan baptis ula” tih hi a awm lo kan tih ni.

Chu lehkhabu chu Baptist Scholar, Hebrai tawng thiam Dr. George Howard-an 1995 kum khan Saptawngin a letling tawh a ni. George Howard-a chuan “Kum zabi khatna hun lai (A.D.1-100)-a ziak a ni” tih tanchhan neiin a ringngam a ni. Rev. Dr. G. Reckarta sawi danin hmun hrang hrangah lei theihin a awm. Internet-ah pawh I hmu thei ang. Hebrai tawng leh Saptawnga lehlin chu Rev. Dr. G. Reckarta’n Interneta a rawn pho chhuah hi la chhuak ila. Chutah chuan “Pa leh Fapa leh Thlarau Thianghlim hmingah chuan baptis ula” tih hi a lo awmlo reng a ni. Interneta a rawn pholan chin chu Mathaia bung 28 chang 9 atanga chang 20 thu a ni. Chumi copy chu tihdanglamlohvin kan pholang ve reng reng duh a ni. Pastor Reckhart-a hi a insawi danin Interneta phochhuaktu hmasaber a ni. Ani hi Isua Krista Hminga Baptisma chang, Isua Krista chauh hi Pathian awmchhun chu a ni tih ringtu a ni.
A nih leh tuna kan hman mek lai Bible-a mi “Pa leh Fapa leh Thlarau Thianghlim hmingah chuan baptis ula” tih hi engtin nge Bible-ah a lo luh mai?

Roman Catholic Kohhranin Vulgate-ah Jerome-a hmangin an thun lut a ni. (Rev. Dr. G. Reckart). Vulgate Bible hi Rome tawng Latina ziak a ni a, chu chu 4th Century, A.D. 300-400 inkarah a ni. Biblea thun luttu Jerome-a hi a hming tak chu Eusebius Hieronymus a ni a, A.D.331ah a pianga, A.D. 420ah a thi a. Mithiam tak a nih avangin Bible ziaktu atan Popein a ringa. Revd Chuauthuama Mizo Tawng Bible Dictionary sawi dan chuan A.D. 382 kumah Pope Damasas-a thupekin Bethlehem khuaa Isua pianna Biak In hnuaia puk pakhatah Vulgate chu a ziak a ni.

Vulgate Bible a lochhuah hma hian Trinity thurin hi a piang fel hman chiah a ni. AD 325-a Nicean Council-ah khan Trinity hi a piang tawh a, Thlarau Thianghlim dinhmun hi AD 381-ah an sawifel a, Trinity chu a piang fel ta chiah a ni. A kum leh chiahah chu thurin thar Trinity chu, Roman Catholic Kohhran chuan Bible-ah thun luh an duh ta a. AD 382-ah hian Pope Damasas-a thupekin Bible ziak phuah khawm a lo ni ta a, chu chu Vulgate Bible chu a ni. Chutah chuan “Pa leh Fapa leh Thlarau Thianghlim hmingah chuan baptis ula” tih hi a lo lut ta a ni. Thurin thar, Trinity chu Bible-ah thunluh a duh avangin Pope chuan Vulgate hi a siamtir ta niah ngaih loh theih a nilo. Jerusalem Archbishop khan lehkhathawn a ziakah khan AD 370 hmalamah Pa leh Fapa leh Thlarau Thianghlim hmingah chuan baptis ula tih ang chi kha eng tawngah mah ziak a awmlo tih a tilang tawh a ni. Bible pawn lam sawi tel lovin Bible chhungah chuan “Pa leh Fapa leh Thlarau Thianghlim hmingah chuan baptis ula” tih chu Vulgate lo pian atang chauhvin hmuh tur a lo awm ta a ni. Chu chu AD 382 kum a ni.

Bible pawn lamah chuan Vulgate lo pian hma hian Trinity chu thlai chi (seed) angin a to tawh a. Tuna Trinity ringtute rindan nen hi chuan a la inang hauh lova. Lei leh Van Pa, tih te, Fapa tih te, Thlarau Thianghlim tih tawngkamte chu a lo awm tan tawh a ni. Chutih hun lai chuan Chatuan Fapa tih tawngkamte hi a la piang lova. Thlarau Thianghlim chu Pa chu a nilo tih tawngkam pawh a la piang hek lo. Nimahsela Pa , Fapa, Thlarau Thianghlim han sawizawm maina tawngkam chu an ching tan a ni. Chung mite chu:


  1. Ignatius A.D. 35 – 107. A.D. 100 bawr velah hian Philadelphia Kohhran hnenah lehkha a thawnnaah chuan Pa leh Fapa leh Thlarau Thianghlim hmingin baptis ula tih tawngkam a ziak lang tan a. Hei hi a dik a nih chuan Pa, FAPA, Thlarau Thianghlim tih sawizawm hmasabertu a ni mai thei. A thuziak dang atanga enin, a sawi dan rilru chu tuna Trinity Pathian pathum ang hi ni lovin Isuaah a bel vek a ang zawk.

  2. Justin Martyr A.D.100 – 165. Ani hian: Lei leh van Pa leh kan chhandamtu Isua Krista leh Thlarau Thianghlim hmingin an inbual tih a ziak a. [1 Apol.63.3]. Hei hi 1Petera 1:1-2 thu ang vel hi a ni mai thei. Trinity a sawinaah an puh mai pawh a, Apostlete tawngkam hman ang chi tho kha a hnaih hle a ni. Trinity pian hmadaih a mi a ni. Trinity nia ngaih ziak hmasabertu chu Catholic Encyclopedia sawi dan chuan Antiokei khaw mi Theophilus a ni a, A.D. 180 velah TPIAS tiin a ziak hmasaber a ni. Tertulliana A.D.160-225 a a lo lan hian TPIAS chu Trinitas tiin a rawn ziak tan ta a; chu chu Trinity an tihsak ta a ni. Tertulliana hi Trinity hming phuah hmasabertu chu a ni ta a ni. Tichuan Trinity hi Biblea awmlo phuah thar a ni.
  3. Irenaeus A.D. 130 – 200. Irenaeus hian ‘Against Heresies, section xvii ah chuan Pa leh Fapa leh Thlarau Thianghlim hmingah chuan baptis ula tih a ziak bawk. Irenaeus hian Pa leh Fapa leh Thlarau Thianghlim hmingah chuan tih hi sawi mahse, tunlaia Trinity ringtute rindan leh Irenaeus-a sawi dan hi chu inpersan tak a ni. Ani hi chuan Christocentric Theology a pawm a. Isuaah hian Pathian famkimna chu taksa neiin a awm kim vek a ni tih a ring a ni. Isua kha Chatuan Pa mihringa lo chang a ni tih a pawm a. Logos pawh Pa mihringa lo chang a ni tih a pawm bawk. [Oneness of God, David K.Bernard]. Irenaeus-a hi Trinity ringtuah an ngai mai pawh a, nitheiin a lang lo. Tunlaia Oneness Group ten Isua chu Pa a ni a, Fapa a ni bawk a, Thlarau Thianghlim a ni bawk kan tihthin dan nen hian thuhmun tho niin a lang zawk.


  4. Tertullian A.D.160 – 225. The Prescription Against Heretics xx-ah chuan “Hnam tinte chu Paah (into the Father) leh Fapaah (into the Son) leh Thlarau Thianghlimah (into the Holy Spirit) chuan baptis tur an ni a” tiin a ziak a. Tertulliana ziak hian tunlaia Trinity chu a ang ta ber a; Trinity hmuchhuaktuah ngaih a ni.

  5. Didache 7:1-3 ah chuan “Pa leh Fapa leh Thlarau Thianghlim hmingin tui luang laiah baptis ula, tui luang a awm loh chuan tui tlingah, tui vawtah a theih loh chuan tui lumah. Heng hi in neihloh chuan Pa leh Fapa leh Thlarau Thianghlim hmingin an lu chungah vawi thum tui leih tur” tih a ni. Didache hmasaber hi A.D. 90 – 120 vela ziakah an chhal a. Mahse Didache hi Chanchinbu pakhat ve mai a ni a, Bible anga ngaih loh tur a ni. Bible-a awmlo Trinity pawh Bible nen a inkalh tih hrereng mahse, Bible ami aiin diktir an tum talh talh a ni a, enge dik ber hriat a har. Bible thu pawh thlak danglam ngam mi huaisen an ni hlawm a. Didache upatlam hi inhnialna siamtu a ni reng a. Didache hmasaber hi A.D. 1056 kum daiha ziak a ni tih a ni ve tho bawk a; khawii zawk nge rin tur?. Pa leh Fapa leh Thlarau Thianghlim hminga thlawr nemngheh nan Didache ziak hun hi an dah hma maiah ngaih a ni. [Klosche, E.H. The History of Christian Doctrine (Grand Rapids:Baker Book House, 1979.p.18. by David K. Bernard, Oneness of God) . Eng pawh ni rawhse, kan hriat reng tur chu hei hi a ni: “Didache hi Bible a nilo” tih hi. Trinity lo pian hnua Trinity ringtute thil tihchhuah thar tarlanna a ni tlangpui. Bible nena inmillo thil tamtak Didache hian a pai teuh a ni. Hengte hi Bible pawn lam ami vek an ni. Kan innghahna nghing ngailo tur chu Bible hi a ni. Bibleah chuan Isua Krista hmingin tuiah an inhnimpil thin a ni.

Bible pawn lamah hian rinna nghah tak tak a har thina; Bible pawn lamah rinna kan nghat dawn a nih pawhin Kohhran ding hmasate khan Isua Krista Hming lamin hnim phumin baptisma an chantir thin tih chu Kohhran chanchin chhuitu zawng zawngin an hmu vek a ni.

Kan sawilan duh chu Trinity leh Trinity hminga baptisma chantir hi Bible pawn lam ami a ni tih mai hi a ni. Tertulliana te hun lai atang khan Trinity hminga baptisma chu khawimawlaiah an lo ching tan taah kan ngai thei ang. Chu mi mil chiah chuan tuna (A.D.2011) Roman Catholic Pope ni lai mek Benedict XVI, Joseph Ratzinger-a khuan thu a sawia: “Mathaia bung 28 chang 19 thu, Pa leh Fapa leh Thlarau Thianghlim, baptisma thu chham atana kan hman thin hi kum zabi hnihna leh thumna (A.D. 150- 300) chhung khan a rawn zi chhuak tan a. Mathaia 28:19 thu, ‘Pa leh Fapa leh Thlarau Thianghlim hmingah chuan baptis ula’ tih tak hi, a lo pianna hmun diktak, a lo chhuahna chu Rome khawpui atangin [Roman Catholic Kohhran tihna] a ni” a titawp mai a ni.

Pope hian dawt a sawi kan ring lo. Trinity siamchhuaktu Kohhran lu berin “Pa leh Fapa leh Thlarau Thianghlim hmingah chuan baptis ula, tih thu hi, a tira Mathaia ziak a nilo, Roman Catholic Kohhranin kan siam chawp a ni” a tihna chiah a ni. (http://www.apostolic.net/biblicalstudies/matt2819-willis.htm).

Roman Catholic Kohhran chuan Mathaia ziak aiin emaw Isua thusawi aiin Pope thusawi chu an lo ring a nih pawhin a la awm thei viau mai. Mahse Roman Catholic Kohhran ni lovin, Roman Catholic siam chawp Trinity leh Trinity hminga baptisma an ring zui zel thei chu a mak a ni. Eng hian nge mawlh a, eng thiltihtheihna hian nge phuar bet tlat thei mai nile?

Catholic diklohna Theses point 95 Martin Luthera’n a ziakah khan Bible nena inmil theilo Trinity hi hnawl lo ta pawh nise, tuna harh fim tawh tal hi chuan hmuh chhuah theih tawh awm tak a ni. Trinity hi kan pawm zel dawn anih chuan Protestant ni kher lovin Catholic Kohhranah let leh theihlohna tur chhan a awmin a langlo. Hei aia thil tih sual lian zawk dang Catholic Kohlic Kohhran hian a nei reng reng lo. Catholic thiltih sual pawi Pathian mithmuha pawiber mai chu Trinity an hmu chhuak hi a ni.



The Catholic Encyclopedia,11, 1911, phek 263-naah chuan tihian an ziak a: “Baptisma chantir nana hman thin Isua Krista Hming chu kum zabi hnihnaah khan Catholic Kohhranin Pa leh Fapa leh Thlarau Thianghlim hmingin a thlak a ni” tiin chiang tawk takin a ziak a ni. Trinity hminga baptisma chantir hi Biblea Isua zirtirte chantir dan a nilo tih hi Catholic leh Protestant Kohhrante hian an hre chiang em em a, chuti chunga Isua Krista hming aia Trinity hming an duh zawk reng mai chu, Isua Krista thinlung a va na dawn teh lul em !

Chutiang chu ni mahse, Mathaia kutchhuak ngei kan hmuh hmaloh chuan hnawl tum neisa rana thusawiah miin min la ngai thei tho bawk a. Mahni mawina zawng lovin thudik kan zawng a ni tih miin min hria sela chuan kan thusawi an ring thei tur. Tunah erawh chuan Original Bible, Mathaia ziak ngei chu hmuh theihin kan lo nei taah kan ngai a, diklotheiloah erawh chuan kan inngai lo. Lehkhabua kan hmuh bakchu engmah kan hmu bik si lova. Nimahsela Isua leh a zirtirte leh an lehkhabute chuan tawrhna nasatak an hma chhawn tih chu kan hria.

Mathaia ziak lai kha sawi chunzawm leh ila, George Haward-a khan, kum zabi pakhatna laia ziak ngei a ni tih finfiaha inhriain, Saptawngin a letling ta kha a ni a. Mathaia 28:19 thua mi “Trinity” innghahna lungphum chu Bibleah a awmlo tih hi kan sawi ngam ta a ni. Thudik chu boral hlen thei a nih ngai dawnloh avangin kum za tamtak hnuah pawh Pathianin mihring hmang bawkin a rawn pho lang leh a ni.

Trinity thurin innghahna lungphum Mathaia 28: 19 thu hi Original Bibleah a awmlo a nihsi chuan lungphum nghet tak, Isua Krista chunga inrem chho Kohhran a awm renga, chu chu zawn hmuh a har lo. Apostle-te kha chutiang mi chu an ni. Mihring pawl din chawp leh dan siam chawp chu chhe thin mahse, Tirhkohte 2:1-41 thu anga Isua Kristaa innghat Kohhran chu a chhe thei lo tawp mai a ni. Apostle-te tih ang khan I tihve theih chuan Lungpui chunga innghat Kohhran chu I ni nghal ang.

Hebrai tawng leh Saptawng, George Howard-a kutchhuak chu a ngai angaiin chhiar har deuh mahse a pawimawh em avangin tihlan talh kan duh a ni. Mizo tawng hi vei lam atangin dinglam zawngin kan chhiar phei thin a, Hebrai hi ding lam atangin veilam zawnga chhiar phei a ni. Tin, Mizo tawnga lehlin pawh Dynamic equivalent translation an tih ang dungzuiin tawi hle mahse han letling ve reng reng ila. Mathaia 28: 9-20 :-




1   2   3   4   5   6   7   8   9   10   11
:)


The database is protected by copyright ©hestories.info 2017
send message

    Main page

:)