Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana



Download 499.51 Kb.
Page3/11
Date conversion29.03.2017
Size499.51 Kb.
1   2   3   4   5   6   7   8   9   10   11

Chang 9: Chutia an kal lai chuan Isua chuan a rawn hmakhalh a, anni chu a bia a: “Ka Hming chuan chhandam che u rawh se” a ti a. An rawn pan hnai a, a hmaah kunin chibai an buk ta a.

10: Tichuan Isuan an hnenah : “Hlau suh u khai; kal ta ula, ka unaute kha Galileeah kal sela, chutah chuan min hmu ang tih va hrilh rawh u” a ti a.

11: Chutia an kallai chuan vengtu sipai thenkhatte chu khawpuiah chuan an lut a, chung thil lo thleng zawng zawng chu puithiam lalte hnenah chuan an hrilh a.

12: Mipui aiawh upahote nen chuan inrawnkhawm turin an kalkhawm a; sipai sakawr chungchuang mite hnenah chuan pawisa tamtham tak an pe ta a;

13: an hnenah chuan: “ ’Zanah Azirtirte an lokal a, kan muthilh hlanin an ru bo ta a ni’ ti ang che u.

14. Tin, he mi chungchang hi Pilatan a lo hria a nih chuan, keimahnin kan lo hrilhfiah anga, a ngaimawh zui lovang che u” an ti a.

15: Pawisa chu an la ta a, an hrilh ang chuan an sawichhawng ta zel a. He thu hi Judate zingah chuan vawiin thlengin an la inrawlruk chhawng ta zel a ni.

16. Chung thil hnuah chuan A zirtir sawmpahnihte chu Galilee ramah chuan an kal ta a, tlangah an tawngtaina hmunah chuan Isua chu a lokal ta a.

17: Amah an lo hmuh chuan chibai an buk a; an zinga thenkhat chuan an ringhlel a.

18: Isua chuan a rawn pan hnai a, an hnenah: “Lei leh Vana thuneihna zawng zawng ka hnenah pek a ni tawh

19: Kal ula

20: thu ka pek zawng zawng che u kha kumkhuaa zawm turin zirtir rawh u,{ kumkhuain in hnenah ka awm zel ang}” a ti a.

Saptawng khi han en la, kan lehlin aia mawi zawkin I letling thiang em em a ni. Chang 19-na thu pawh khi Hebrai tawng enin ‘Go’ tih rikngawt ni lovin, ‘go to them’ ti pawhin a dah theih tih ziak lang an awm bawk a.

Anih leh Mathaia 28:19 thu hi “Kal ula” tih mai anih chuan Isua Krista Hming baptisma chu Isua thupek a nilo em ni? a pawimawh ta lo em ni? Bible-ah baptisma thupek a awm lo tihna em ni? tih chu zawhna lopiang thei nghal a ni ang. Chu zawhna siamchawp chu tlemin han chhang nghal ila.


Isua Zirtirte’n Baptisma An Chantir:
Kan sawi chhan ber zawk chu Trinity innghahna hi a awm lo tih mai kha a ni phawt a. Baptisma chu Isua thupek ngei a ni ang. Petera hian Chanchin Tha hi ziak ve sela chuan Tirhkohte Thiltih Bung hnih chang sawmthum pariata a thusawi ang ngei hian Isua thusawi chu a ziak chhawng ngei ang. Tirhkohte Thiltih bung 2 chang 36 atanga chang 38 hi Petera Chanchin Tha ziak angah kan pawm thei ang. Petera thusawi a nisi a. Petera hian Isua thupek a nih loh chuan, ama phuah chawpin “Isua Krista Hmingin baptisma chang theuh rawh u” a ti lo vang. An hnenah Isua a awm ve reng lai atang tawh khan Isua mithmuh lai ngeiin zirtirte chuan baptisma an chantir a, Isuan a khak ngai si lova.

Isuan Johana baptisma a chan zawh khan, Pentecost Ni thlen hma siin a zirtirten baptisma an chantir thin a: “Johana aiin Isuan zirtir tam zawk a siam tih leh, a baptis tih Pharisai ten an hria” tih a ni a. (Johana 4:1-2). Isua meuh chuan a baptis lova, a zirtirten an baptis a. Isua zirtirte khan Johana an kalsan hnu hian Johana baptisma kha an la chantir chhunzawm zel em ni ang? Chu ai chuan Isua hnena lo pakai ta an nih avang hian Isua hmingin baptisma an chantir tan tawh zawk mai awm mang e a tih theih. Mahse chu chu rin thu a ni. Baptisma an chantir tih erawh chu Isua hian a hre chiang hle a, a khap lova, thu a pe zawk a ni ang.

Baptisma hi Isua hian pawimawh a ti em em a. Amah ngei pawh Galili bial atangin baptisma chang turin kawng thui tak mel 70 vel kein a lokal a, Johana hnenah a lokal vang vang a, Jordan luiah baptisma kha a chang ta kha a ni a. “Johana baptisma kha Vana mi thu nge mihring thu?” tiin Lehkhaziaktute pawh kha a chhuahchhalh phah hial a (Luka 20:4). Heng thute atang hian Isuan baptisma chantir turin thu a pe ngei ang tih ziak langlo mahse rinloh theih a nilo. Mathaia hian Bung 28: 19-ah hian baptisma thu hi ziak lang zauhlo pawh nise, a hmaih palh a niang tih a rinawm zawk. A chhan chu:

1. Mathaia hian Isua sawi laitakin pen nen Isua thusawi hi a lo ziak nghal zel a nisi lova. A hnuah a ziak si a.

2. Tun laia thu sawi angang kan record ang hian Isua thusawi hi an record si lova.

3. Isua thusawi zawng zawng hi hmun zaa thena hmun engzat nge an ziah ang? Zaa sawmnga pawh an ziak awm kher si lova. An ziak loh zingah hian Baptisma thupek a awm ngei ang tih zaah zain a rin ngam a ni. A chhan chu “Sim ula in sual ngaihdam nan Isua Krista Hmingin baptisma chang theuh rawh u” Petera’n a ti miau si a. Isua Thu ang lovin a phuah chawp ngam dawn si lova.

4. Isua thusawi hnuah a benga cham a hriat ang angin Mathaia hian a ziak hnuhnawh mai a ni dawn si a. Mathaia hian hriatna a khawlkhawm tam thei zawk ngawt mai. Baptisma kher chu Petera’n a sawi tawh angin ataka an hman lai mek a ni thova, ziak lan kher tul a tilo a ni ang.

5. Petera hian Chanchin Tha hi ziak ve sela chuan Mathaia ziak lan loh a ziak lang teuh ngei ang. Chutah chuan Isua thupek baptisma chu a ziak lang ngei ang.

Petera hian Isua thuchah hi a ngaithla hnai ber a. Petera hnenah chauh thusawi bik pawh a nei a. “Nang Petera I ni tih ka hrilh a che… Vanram chabite ka pe ang che” tih thu angte kha. Petera hnenah hian Baptisma chantirturin Isua hian thu a pe ang tih hi tunge ringlo awm? Ama phuah chawpin baptisma Isua hminga chang turin mite hnenah thu a pek ngam tunge ring? Tumah an awm lovang tih a lang thei.

A chhan chu Vanram chabi hmanga misualte Vanram kawng khar a hawnsak lai khan, Thlarau Thianghlima khat liamin, loh-theih-loh tulna ang chiah hian, Isua thupek a nih vangin Peteran: “Sim ula, in sual ngaihdam nan Isua Krista hmingin baptisma chang theuh rawh u” tiin ringtakin a puang a nih kha. Petera hian Isua thupek ang lovin thu a sawi theilo tih hi tunge pawm theilo awm angle?. Chuvangin Mathaia hian baptisma hi ziak lang lo mahse, Mathaia hi hrethiama ngaidam thei awm tak chu kan ni zawk. Tul a tihloh vanga baptisma ziak langlo niin a lang thei si lova. A hmaih palh a niang Petera’n a sawi ring em mai.

Marka 16:16 thua mi:-“A ringa baptisma chang chu chhandamin an awm ang” tih thu hian “Isua Krista hming” a sawi ri tel lova; sawi langlo mahse thu petu chu Isua a nih avangin: Isua hminga baptis tur tih chu an hriatthiam avangin Isua Krista hming hlirin Zirtirten baptisma an chantir thin a ni. “Ka hmingin ramhuaite an hnawt chhuak anga…” tih thu hian a zui a. Ramhuai hnawh chhuah dawna an ngawihreng dawn loh chuan Isua hming chu lamrik tur tih an hrethiam mai a. Baptisma pawh an chantir dawnin an ngawi reng dawnlo a nih chuan Isua hming chu an lam rik tur awmchhun chu a ni tih an hrethiam leh mai bawk a.`

“A ringa baptisma chang chu chhandamin an awm ang” tih laitak hi kutziak bu hlui ber bera ngaih: “Old Syriac Version te, Codex Vaticanus te, Codex Siniticus-ahte chuan a awm lova. Hengahte hian Marka 16 thu hi chang 1-8 thleng chauh hi a awm a. Chang 9-20 hi chu AD 170 velah a lolang tan chauh” tiin Revd Chuauthuama chuan Mizo Tawng Bible Dictionary-ah a ziak a.

Kut ziak bu an ziak chhawn leh thinnaah hian Bible thu an ti danglam nasa hle thin tih chu mi zawng zawng hriat nihiala mawi a ni. Chutiang chuan heng Versionte hi Kutziak Original kha ni lovin Kutziak bu hrang hrang ziak thata phuah khawm an ni mai zawk tih kan hriat tel a tha. Mahse Kut ziak bu hluiah Marka 16:9-20 hi a awm avangin Bibleah an la lut ta a ni. Tichuan “A ringa baptisma chang chu chhandamin an awm ang” tih hi Isua Krista sawi ngei a ni tih kan pawm ngam a ni. Chumi la pawm ngam lo tan pawh Tirhkohte 2:38 thua “Isua Krista Hmingin Baptisma chang theuh rawh u” tih hi chu pawmloh theih a ni tawh lo.

Ziak dang Luka ziak atangin Isua Krista Hming Baptisma chu tlemin lo chhui zui ta ila:- “Ama hmingin, { Isua Krista hmingin tihna}, simna thu leh, sual ngaihdamna thu {sual ngaihdamna Baptisma thu tihna} Jerusalem khuaa tanin hnamtin hnenah an hril ang” tiin a ziak a. (Luka 24:47). Heihi Zawlneite thu tanchhanin Isuan a sawi a ni a; Zawlneite hnena Pathian thu sawi zawng zawng hi Bibleah kan hmu kim lova. Tichuan he thu-ah hian Isua hminga tui Baptisma chu Isua thupek ngei a ni tih a lang thei ta bawk a ni. Sual ngaihdamna baptisma leh Isua Krista hming chu thil inzawm tlat, lang chiangsa, a nih avangin.

He hrilhlawkna thu ang ngei hian Jerusalem khua atang ngeiin “Sim ula” tih thupek chu Petera’n a puang chhuak ta phawt a; “In sual ngaihdam nan Isua Krista hmingin baptisma chang theuh rawh u!” a ti zui leh a. Isua Hming Baptisma chu Isua thupek ngei a ni tih a chiang ta a ni. (Tirhkohte 2:38). Tin, heng Pathian thu dangte hian Isua Krista Hming baptisma an keng tel tih hnial ngam tunge awm?

1. “Amaha mite (Israelte) hnenah a lokal a; Amaha mitten an lo lawm si lova; nimahsela Amah lawm apiang chu an hnenah Pathian fate nih theihna tur a pe, a hming (Isua hming) ringtute chu” (Johana 1:12).

2. “Tupawh amah chu ring apiang a hming avangin an sualte ngaihdamin (Isua hming sual ngaihdamna baptisma avangin tihna) an awm ang tih heng a chanchin hi zawlnei zawng zawngin an hriattir thin kha” (Tirhkohte 10:43.)

3. “Pathianin ama hming pu atan an zing ata mite la chhuak turin Jentailte a kan tantirh dan thu chu Sumeon hian a sawi ta a” (Tirhkohte 15:14). Isua hminga baptisma kan chanin Isua Krista hming chu kan pu nghal tih Paulan min hrilh a (Galatia 3:27). Isua Hming baptisma chang lovin Isua hming put mai theih dan tur kawng dang Biblein min hrilh miah lova.

4. “Mi dang tuma hnenah chhandamna a awm lova; Van hnuaia mihring (hming) sak zingan, min chhandam thei hming dang reng (Isua Krista hming chauh lo chu) a awm lo” (Tirhkohte 4:12.) Hemi thu atang hian “Pa leh Fapa lehThlarau Thianghlim hmingin” tih chham hian min chhandam theilo tih a lang thei bawk a.

5. “In tih apiang chu thusawiah emaw, thiltihah emaw, ama zarah Pa Pathian hnena lawmthu hril chungin, ‘Lalpa Isua hmingin’ ti vek rawh u” {Kolossa 3:17}. He thu hian, Isua hming hmanna pawimawh tamtak zingah a pawimawh laitak sual ngaihdamna baptisma chan nan Isua Krista hming hman tur tih a sawitel bawk a.

“Pa leh Fapa leh Thlarau Thianghlim hmingin ka baptis a che” han tihna tur awm-ang reng reng hi erawhchu Bibleah thupek a awm lova, a awmlo takzet a ni. A awma ngaih theihna ber tur Mathaia 28: 19 thu lah Mathaia ziakah a awm si lova. Isua sawi nilo, Isua sawi anga min ngaihtirtu hi a chung a pik khawp ang. Mathaia ziak nilo, Mathaia ziak anga min chhiartirtu pawh hi a chhelamin Lalpan a hrereng ang tih alang thei. Chutiang han ngaihtuah chuan Pa leh Fapa leh Thlarau Thianghlim hminga baptisma changte dinhmun chu engangtak ni ang maw le?

Mitthite pawh Isua hmingin an lo tho leh dawn a. Pa leh Fapa leh Thlarau Thianghlim hmingin an tho dawn lo. Damlote pawh Isua hming kan lam sak a, anlo dam thin a; ramhuaite pawh Isua hming lamin kan hnawtbo thin bawk a, Baptisma pawh : “Sim ula in sual ngaihdam nan Isua Krista hmingin baptisma chang theuh rawh u” tih thu angin Pentecost Niah Isua Krista hmingin mi 3000 laiin baptisma an changa,(Tirhkohte2:38-41); Samari khuaa mite pawhin Isua hmingin Baptisma an chang a (Tirhkohte 8:16); Kaisari khuaa mi Kornelia leh midangte pawh khan Isua Krista hmingin Baptisma an chang bawk a; (Tirhkohte 10:1,48); rinna avanga khawngaihnaa chhandamna changtu Ephesi khuaa mite pawhin Isua Krista hmingin baptisma an chang bawk a (tirhkohte 19:1-7); Tirhkoh Paula ngei pawh hian Isua hmingin baptisma a chang bawk a (Tirhkohte 9:18; 22:16). Eng aiah nge baptisma chu Isua Krista hming ngeia I chan ve loh ang le? Isua hminga I chanlohna tur hian eng thilin nge dal che? Isua Krista hi I hmangaihber a nih chuan engmahin a dal zo lovang che. Pentecost Nia mite ang khan Isua Krista Hmingin baptisma chang la engtikahmah I inchhir ngai lovanga, I eng a thawl kumkhua zawk ang.

Bumtu Setana bumna kan hriatlohna avangin Trinity hmingin baptisma kan lo chang tawh hlawm a; Bibleah chuan Isua Krista hmingin Baptisma an chang thin tih kan hriat veleh Ephesi khuaa mite ang mai khan Isua Krista hming ngeiin baptisma kan chang nawn leh ta mai a ni. Isua Krista ringtute tan Isua Krista hminga baptisma chanlohna tur chhan reng reng a awm love.

EUSEBIUS-A ZIAK DAN VE THUNG:

Eusebius-a thu ziak tello chuan Mathaia 28 chang 19 thu hi kan sawifiah tawk thei lovang. Mathaia 28:19 thuah hian Shem tob’s Hebrew Bible leh Eusebius-a ziak dan a inchen lova, a insei hleih a ni. Kan finfiah duhlai tak chu Trinity tanchhan hi Hebrai Bible Original-ah a awmlo tih kha a ni.



Nicaean Council AD 325 Hmalama A Thu Ziak:

Eusebius of Caesarea in Palestine (Palestina rama Kaisari khuaa mi Eusebius-a) hi, Eusebius Pamphili an ti bawk a, A.D.260-ah a pianga, A.D. 340-ah a thi a. A hunlaia Pathian thu lam thiamber leh hre bera ngaih a ni. A.D. 310-ah Pamphilus-a chu martarin a thi a. Pamphilus leh Origen-a te hian lehkhabu tamtak an fawmkhawm a, chutih hunlaia Christian Library ropuiber chu Caesurae khuaah hian an din a ni. He Library hi Eusebius-a hian a rochung a ni. He Library ropuitakah hian Mathaia’n Hebrai tawnga Chanchin Tha a ziak pawh hi a awm ngeiah ngaih a ni a. He Library-a lehkhabute hi Eusebius-a chuan nasa takin a chhiar a, chuvangin a hun laia mithiambera ngaih a nih phah ta a ni. Mathaia Chanchin Tha ziak, Hebrai Original, tihdanglam loh pawh hi Eusebius-a hian a chhiar ngei ngei turah ngaih a ni. Chuta a chhiar ang chuan Mathaia Bung 28 chang 19 thu kan tih thin pawh hi a sawi thina, a ziak thin bawk a ni. Nicean Council A.D. 325 hmalama a thu ziak leh 325 hnulama a thu ziakah danglamna a awm bawk a. A.D. 325 hmalama a thu ziak hi kan chhui duh lai chu a ni.

Dr. Clinton D. Willis-a thuziak hi lachhuak ila:- Eusebius-a lehkhabu ziah pakhat The Demonstratio Evangelica tih buah chuan phek 152-naah Mathaia’n Hebrai Tawnga Chanchin Tha a ziak tihdanglamloh ami chu a la chhuak a. Hei hi Caesarea khuaa Library ami kha a ni. Mathaia 28:19 thu Isua thusawi a ziak chhawn dan chu hei hi a ni:- “With one word and voice He said to His disciples: “Go, and make disciples of all nations In My Name, teaching them to observe all things whatsoever I have commanded you” tiin. “Ama thu leh aw phawi pangngai ngei khan A zirtirte hnenah he thu hi a sawi a: “Kal ula, hnam tina mite Ka Hmingin zirtirahte siam ula, thu ka pek apiang che u kha pawm turin zirtir rawh u” tiin. (Countering Trinitarian arguments, with Historical References By Dr. Clinton D.Willis & Pastor Valton Lom Elms M.A. Theology, page 50.) Eusebius-a hian Caesarea-ah hian Mathaia ziak original ngei kha a chhiar a ni tih Willisa’n a ziak a ni.

Conybeare-a chuan Mathaia 28:19 thu Eusebius-a ziak dan chu a chhui chiam a. Eusebius-a lehkhabu ziak hrang hrang:- Sam leh Isaia hrilhfiahna te, Demonstratio Evangelica te, Theophany te, Kohhran chanchin te, Constantine-a chanchin te a chhiar chhuak a. Chungah chuan Mathaia bung 28 chang 19 thu hi vawi 18 a ziak a hmu a, a lakhawm ta a.

Hetiang hi a ziak dan chu a ni: “Go and make disciples of all the nations in My Name, teaching them to observe all things, whatsoever I have commanded you” tih bawk hi a ni a hmuh chhuah chu. Chu chu Mizo tawngin hetiang hi a ni: “Kal ula, hnam tina mite Ka Hmingin zirtirahte siam ula, thu ka pek apiang che u kha pawm turin zirtir rawh u” tihna tho a ni, a danglam lo.

Demonstratio Evangelica-ah hian Eusebius-a chuan “Ka hmingin” tih lai hi a sawifiah leh a, “hnam zawng zawngte chu mawlmang tak leh awmze nei lova zirtirah siam theih a ni ngawt lova, thu belh ngai pawimawh tak a awm a “Ama hmingin” tih hi a ni. Apostle khan “ Van leh Lei leh Leihnuaia mite pawh Isua Hmingin an la thingthi vek dawn” a tih kha. A hmingah chuan thiltihtheihna a awm reng a, chuvangin Apostle-te hnenah “Kal ula, hnam zawng zawng te chu Ka Hmingin zirtirah siam rawh u” a ti reng a ni” tiin a thuziak chu a nemnghet a ni. Encyclopedia of Religion and Ethics chuan “Eusebius-a chuan Mathaia 28: 19 thu hi a thu ziakah vawi 21 a sawilang a, “hnam tinte Ka Hmingin zirtirahte siam ula” tih tel hian a ziak hnem ber” tiin a ziak ve bawk thung.


F.C. Conybeare- chuan “Council of Nicaea hmalamah chuan Eusebius-a hian Mathaia Bung 28 chang 19 thu a, Pa leh Fapa leh ThlarauThianghlim hmingah chuan baptis ula tih hi a hre lo reng reng a ni” a ti a ni.

Das Evangelium Des Matthaus tih lehkhabu ziaktu E.Lohmeyer chuan Eusebius-a thu ziak dan hi a dikah ngai thlapin a ziak chhawng thin bawk a ni. Baptism In The New Testament tih lehkhabu ziaktu G.R.Beasely Murray-a chuan Mathaia 28 chang 19 thu, mi hrang hrangin an ziak chu a khaikhawmna a siam ta a: “Sakhaw thil thupui thlanbik zirbing thin (exegetes) ho zawng zawng leh a rinhlelhawmna lai thlenga chhui peih ho (critics) ho meuh pawhin Mathaia bung 28 chang 19 thu Eusebius-a ziak dan kalhmang hi thu dikah an pawm tlang thei tawh a ni” a ti phawt a.

Krista thusawi dan kalhmang:- “Lei leh Vana thuneihna zawng zawng ka hnenah pek a ni tawh a” tih thu hian a thu dawt leh chiaha thil awmdan tur chu a hril lawk a, “Go and make disciples unto me, among all the Nations, baptizing them in My Name, teaching them to observe all I commanded you” tih hi thu kalhmang tur chu a ni tih hi chang 18-na thu hian a rawn phut lawk a, min kawh hmuh a ni tih chu an pawm thei ta vek a ni” tiin thu hmawrbawkna a siam ta a ni.

Chu thu chu Mizo tawngin han dah veleh ila :-“Kal ula hnam tina mite ka tan zirtirahte siam ula Ka Hmingin baptis rawh u, thu ka pek apiang che u pawm turin zirtir rawh u” tihna a ni . Chung thute chu Tirhkohte 2 :38 thu, Pentecost Ni-a Petera thusawi “Sim ula in sualte ngaihdam nan Isua Krista hmingin baptisma chang theuh rawh u” tih thute nen khan mam takin a inmil thei ta thlap a ni.

Heng thute hi Nicean Council A.D. 325 hmalama Eusebius-a thu ziak thin dan lakkhawm chu a ni ta a ni. Nicean Council A.D. 325 hnulamah chuan Eusebius-a hi Trinity ringtuah a inleh tak avangin a thu ziak pawh a danglam ta a ni.

Eusebius-a Trinity Ringtu-ah A Inlet:
Lon Martin-a ziak dan chuan Eusebius-a chu Council of Nicaea-ah khan Emperor Constantine-a dinglamchiah-ah a thu a, Constantine-a Councilah a lokala, a thut chiah khan Constantine-a lo lawmna thu pawh kha Eusebius-a hian a sawi a ni.

Nicean Council-ah khatia mipui lo pungkhawm khan a rilru a hneh em em a, mipuiah thlamuanna hmuin Trinity lamah a awn ve ta a, a thurinte chu tlemin Trinity mil turin a phatsan ve ta hret hret (compromised) a, Trinity chu a pawm ve ta a, nawrna a nasat bawk avangin Nicean Resolution-ah pawh chuan hreh takin a hming a ziak ve ta zel a ni. Nicean Council hnulama a thu ziak pawh a lo danglam ta a, Mathaia 28 chang 19 thu pawh a ziak dan mumal a awm thei tawh lo. Chihnihin a ziak tawh a, a changin Trinity milin a ziak a, a changin Council neih hmaa a thuziak thin dan “Ka hmingin” tih ang khan.



Nicean Council hnuah chuan Mathaia 28:19 thu hi Trinity angin vawi thum a ziak hmuh tur a awm a, Eusebius-a a lo danglam ta a, a lo dal ve ta a ni. Kaisari khaw Kohhran hnenah chuan lehkha a thawn ta a: “Pa leh Fapa leh Thlarau Thianghlim hmingah chuan baptis ula” tih a ziak tel ta tlat mai. (Mathew 28:19, A Text Critical investigation, Tim Hegg). Mipui avangin thudik tanin a dingnghet ngam ta lova; a rinna a sawh sawn ta a, a awl khawp ang. Chu chu thlemna do thiam har tak pawh a ni mahna. Nicean Councilin Trinity passed mahse thudik chu a danglam chaung lo.
Eusebius-a Thu Ziak Khaikhawmna:

Baptism In The New Testament by G.R.Beasey – Murray te lehkhabu phek 83-na ami, Lindblom leh Bultman te thuziak an lakchhuah hmang hian Eusebius-a thuziak khaikhawmna lo siam tawh ila: “Mathaia 28:19 thu hi Eusebiusa ziak hmasak dan ang khan a dik thei hmel em le? Aw, a dik thei ang. Bible thu zirbing thin rualho [exegetes] leh a diklo lai a awm em tia chiktaka chhiar thin [critics] te pawhin chang 18-na thu:-- “Lei leh Vana thuneihna zawng zawng ka hnenah pek a ni tawh” tih thu hian a chang dawt leh chiah chang 19 thu kal hmang tur chu min kawhhmuh lawk ran mai a, thu inlalawn mar nalh takin “Chutichuan kal ula, hnam tina mite zirtirahte siam ula, Ka Hmingin Baptis ula, thu ka pek apiang che u kha pawm turin zirtir rawh u. Tin, ngai teh u kei kumkhuain khawvel tawp thleng pawhin in hnenah ka awm zel ang” tih thu hian a chhunzawm ta a ni” tiin an khaikhawm ta a ni.

Bible Thar A Piang:
Thil thar lopiang pawimawh tak a awm ta a; Nicean Council AD 325 hmalama Eusebius-a thuziak thin dan kha Original Bible-a a inziak dan chu a ni tih pawmin, thudik-ah an chhal ngam ta a, A.D.1960-ah khan The British and Foreign Bible Society chuan Mathaia bung 28 chang 19 thu-ah “Pa leh Fapa leh Thlarau Thianghlim” tih kha paihin, “Ka Hmingin” tih hi an dah ta zawk a ni. Greek tawng chuan “en to onomati mou” tiin an dah a ni. Saptawng chuan “in my Name” tih a ni. Mizo tawng chuan “Ka Hmingin” tihna a ni. Chuta bul tumtu [Author] atan chuan Eusebius-a dah a ni bawk.(Lon Martin).
1 Johana 5: 7 Thu:
Mathaia 28:19 thu “Pa leh Fapa leh Thlarau Thianghlim hmingah chuan baptis ula” tih kha Trinity lo pian hnuah, A.D. 382-ah Vulgate-ah an thun lut ta tih kan sawi tawh a. Chu mi kawppui atan chuan 1 Johan 5:7 thu tuna King James Version-a awm ang hi Catholic Kohhran bawkin nawrluihna avang bawkin A.D. 1522 kumah Erusmus-a an thun luh tir leh ta bawk a ni.
1 Johana 5:Chang 7-na thu KJV Bible-a a lo luh dan :

1 Johana 5:7 thu King James Version-a awm hi Mizo Bible kan hman laiah hian a awm ve lova. Revised Standard Version anga lehlin a ni a. New King James Version, Mizo tawnga lehlin thar Parallel Bible kan tih Bibles For The World-in an chhuah tharah hian an rawn letling tel veleh hnuhnawh a; a tul lemlo. Hei hi Trinity a awm ngei a ni tih tanchhan atan Roman Catholic nawrna avanga thun luh a ni tih kan sawi dawn a ni. Mizo tawngah hian letling lo sela a dik zawk ni mai tur. Mizo tawnga an lehlin thar chu hetiang hi a ni:- “Vanah hriatpuitu pathum an awm: Pa leh Thu leh Thlarau Thianghlimte an ni a; heng pathumte hi pumkhat an ni a” tiin. Hei leh Mathaia 28:19 thu hi Trinity innghahna Bible chang pahnihte an ni. Heng pahnihte hi Original Bible-ah an awmlo ve-ve tih kan sawi duh a ni.

King James Version AD 1611-a alo chhuah hma hian chang 7-na thu hi Erasmus-an hrehtakin Catholic Church nawrluihna avangin Greek Bible-ah a thun tel a ni. Chu chu A.D. 1522 kum a ni. Erasmus-a hian AD 1516 leh 1519 kumah hian Bible a lo chhuah tawh a, chutah chuan chang 7-na thu tuna King James Version-a awm ang hi a la telh bik lova. Greek Bible kutziak 5000 lai pawhin chang 7-na thu hi an telh heklo. Greek Bible pawm tlan theih ber Nestle’s Text an tih pawh hian a pai tel lova. Chungte avang chuan chang 7-na thu hi Bible Scholarte chuan Bible-a tel ve lovah an ngai a. Erasmus-an AD1522-a Bible a ziah lai khan chang 7-na thu hi Catholic Church-in thun lut turin an nawr a; “Greek kutziak pakhat talah in hmuh chuan ka lo thun tel ange” a tita a. AD 1520 kuma tharlamtaka ziak (ziak chawp thar) an rawn keng ta si a, Bible-ah chuan hrehtakin a telh ta mai a ni. Chumi tak chu King James Version hian AD 1611-ah hian a la chhawng ta a ni. Chuta tang chuan Bible Version thenkhatin an la chhawng ve ta zel a ni. Amaherawhchu Bible lehlin tamtakin Bible pawn lam ami nia an ngaih avangin Bibleah an lalut duh ta lova, chungte chu : Revised Standard Version, Amplified Bible, American Standard Version, Contemporary English Version, English Majority Text Version, English Standard Version, New International Version te an ni. New International Version chuan foot note-ah tihian a ziak a: “Kum zabi 16-na [1500-1600] hma lamah Greek tawng kut ziak engahmah hmuh a nilo” tiin a dah bawk. Chutiang thil avang chuan chang 7-na thu hi keini pawhin Bible pawn lam thilah kan ngai ta a ni. (Source: Norman Geisler and William Nix, A General Introduction to the Bible, Chicago: Moody Press, p.370).

1 Johana 5: 7 thu leh Mathaia 28: 19 thu chiah hi Trinity ni awm ang awm chhunte an ni a. Amaherawhchu hengte hi Catholic Kohhranin Bible-ah Trinity a awm anga a lan theih nan nawrluihna hmanga an thun luh chawp a ni tih finfiah a lo nita a, chuvangin, heng Bible chang pahnihte hi Biblea awmloah kan ngai thei tawh ang. Chutichuan Trinity innghahna lung phum chu Bible-ah a awm reng reng lo tih hi kan sawi nawn leh a ni.

Heng Bible chang pahnih bak hi chu, Trinity pui thei awm sawilan awm bawk thin mahse, Pathian pahnih awma rinna Ditheismah a lut leh thin a, Trinity sawifiah tum nan a remlo leh mai thin. Tunah chuan Trinity innghahna lungphum pawimawh ber pahnih chu Bible Original-ah an awmlo tih kan finfiah tawhah ngaiin kan chhawlchhin thei tawh ang. 1Johana 5:7 thu hi Septuagint-ah a awm an tih pawhin, Septuagint thar lam Trinity lo pian hnulama ziak belh thar a ni tih a hriat theih a, a tira mi a ni lo.






1   2   3   4   5   6   7   8   9   10   11


The database is protected by copyright ©hestories.info 2017
send message

    Main page