Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana



Download 499.51 Kb.
Page4/11
Date conversion29.03.2017
Size499.51 Kb.
1   2   3   4   5   6   7   8   9   10   11

THUTHLUNG BAWM
BUNG 2-NA
PATHIAN DIKTAK PAKHAT CHAUH A AWM:-
“Ani chu ka ni tih in awih loh chuan in sual nei rengin in thi mawlh ang” [Johana 8:24; Exodus 3:14]. Israelte hruaichhuak tura tirtu PATHIAN, Awma, *Ehyeh asher Ehyeh* I- Jeh asher I- Jeh, ngei kha ka ni tih hi in awih loh chuan in sual nei rengin in thi mawlh ang ISUA’N a tih hi thil hlauhawm ber chu a ni. YHWH, JEHOVA tih te, Yod He Wau He tih te, Yashua tih te Jehoshua tih te YahWeh tih te YaHua tihte hi PATHIAN hming lam rik dan dik a ni chuang lo. A diktak hriat theih ni tawhlo mahse Mizo tawnga ISUA kan tih hian PATHIAN hming lam rik dan dik a phawk chhuak teuh em em zawk a ni. Tin, ISUA tih hi Van PATHIAN khian a pawm thlap a ni tih finfiahna kan neiah kan ngaibawk a; Van Ramah PATHIAN kan hmuh hunah pawh ISUA chauh kha kan hmu dawn a ni.

PATHIAN chu pakhat chauh a ni tih rinna vuan nghet hmasa chunga Bible kan chhiar chuan rinna mit tivai thei lek lek anga lang, entir nan:- ‘ka Pa’ tih te, ‘ka Fapa’ tih te, ‘Pathian Fapa’ tih te, ‘mihring Fapa’ tih ‘ A Chhiahhlawh’ tih te, ‘ A Bawih’ tih ang chite kan chhiar lai pawhin Pathian chu pakhat chauh a ni tih kan hrethiam thei zel anga; Pathian pakhat Engkimtitheia nihna leh hnathawh dan kawng hrang a ni tih kan hrethiam thei zel dawn a ni. PATHIAN chu hun Bul atanga hun Tawp chatuan thlengin pakhat chauh a ni tluan chhuak zak dawn a ni. Pathum pakhat anga rin luih hram thil ni lovin.


Israelte Pathian chauh kha Pathian dik awmchhun chu a ni tih ringtu tan chuan Pathian chu pakhat chauh, mahni chauh, amah chauh, mimal pakhat chauh a ni.

Amaherawhchu Thuthlung hlui hun laia milem biaknaah an tluk thin ang tho khan tunah pawh Israelte zinga kalsual Kaballah sakhua vuantute chuan Caballah Trinity an ring a. Chungte chu:- Kether, Binah, Chokma te an ni.

Mosia lehkhabu panga Pentateuch:- Genesis, Exodus, Leviticus, Number, Deuteronomy te-a innghat, Juda sakhua diktak vuantute khu chuan engtikahmah Trinity an ring thei lovang. Chutiang Israelte chuan Trinity chu Shema [Shamah] Deuteronomy 6:4-9 thu nen an inkalh tlat avangin milem biakna sakhuaah an ngai a ni. Pathian pakhat chauh be tura thupek an nih ang ngeiin Pathian pakhat chauh an nei a ni.

Israelte Pathian chu Khawvelah a lokal a, “Amaha mite hnenah a lokal a, Amaha miten an lo lawm silo; nimahsela Amah lawm apiang chu an hnenah Pathian fate nih theihna tur a pe; A Hming ringtute chu” tih a ni. (Joahana 1:11). Judaism sakhaw vuantute chuan Isua Krista kha Awma, *Ehyeh asher Ehyeh* kha a ni tih an hrethiam thei lova, Kross-ah an kheng bet ta a. Trinity thurin pawmtu tan pawh he thu hi Israelte ang tho khan pawm theih a ni lo. Isua Krista ngei kha Israelte Pathian chu a ni tih sawi pahin Pathian chu pakhat chauh a ni tih sawifiah kan tum dawn a ni.




  1. Pathian Tam Lam Chu Nangmah Zat Chiah Kha A Ni:

Nangmah mimal kha Pathian anpui I ni a, mi pakhat chauh I ni ang chiah khan Pathian chu mimal pakhat chauh a ni. Pathian anpui I ni miau va, nangmah pakhat, Pathian pawh pakhat. Nangmah aiin Pathian a tam bik chuanglo. Pathian tamlam chu nangmah zat chiah kha a ni.

“Pathianin Ama anpuiin mihring a siam a; Pathian anpui ngeiin a ni a siam ni” tih a ni. (Genesis 1:27). Anpui (image) tih hi sawifiah ila: Nangmah kha thutthlengah thu la, thlalakna-Camera-in fiahtakin I thla laktir la, I thlalak chu print la, han en la, pakhat chauh a ni ang, I hmel pawh nangmah ang chiah kha a ni ang, chu chu I anpui, I image chu a ni. Chutiang chuan Adama hi Pathian thlalak chu a ni a, Pathian anpui (image) a ni. Pathian anpui chu Adama a ni a, Adama chu mi pakhat chauh a ni. Adama chu mi pakhat chauh a nih avangin Ama anpuia siamtu Pathian chu pakhat chauh a ni. Chu thu chu I ring em? Chu chu I hrechiang tak meuh a nih chuan PATHIAN chu pakhat chauh a ni tih hi engtikahmah I ringhlel nawn leh thei ngai tawh lovang. Chutih rual chuan Pathian pathum awm ngeia rinna thurin Trinity chu Bible zirtirna a nilo tih I hrefiah thei nghal bawk anga; engtikahmah Trinity chu I ring thei ngai tawhlo bawk anga, Trinity thurin chu I bansan thei nghal bawk ang. Tichuan Isua Krista chauh hi Pathian pakhat chu a ni tih I ring nghal thei ang.

Pathian anpui Adama chu amah chauhvin hun reitak a awm renga, Amah chauhvin Pathian anpui a ni rei hle. Adama nakruh atangin Euvi chu siam a ni a. Euvi pawh chu Pathian anpui a ni. Euvi leh Adama thlah mihring mimal tin pakhat theuh hi Pathian anpui kan ni thliat thliat a ni. Pathian anpui I ni tih I inhriata, mi pakhat chuah I ni tih I inhriatchian bawk chuan:- Pathian chu pakhat chauh a ni tih I ringhlel nawn leh thei ngai tawh lovanga; kumkhuain Trinity I ring leh thei ngai tawh lovang.

Pathian Thu hrethiam thei tura, rilrua inngaitlawm tak mi, rilru ngil leh rilru tluang tak pu mi tan chuan, Pathianin mihring a siam dawn laia :- “Kan an puiin, keimahni angtakin mihring siam ila…thu I neihtir ang u” tih thu a sawi kha, Pathianin, thu zaizap tak hmanga, chhungkua anga a bula awm reng Vantirhkohte a biakna a ni tih a hriatthiam theih mai a.(Genesis 1:26).

Amaherawhchu, Pathian chu pakhat aia tam awma ringsatu, Trinity ringtu tan chuan Pathian pakhatin Pathian dang a be rawn a niang tih rinna a neih phah daih thung dawn a ni. Pathian chu pakhat chauh a ni tih ringtu diktak tan erawh chuan Pathianin Pathian dang rawn tur a nei lova, a bula awm Vantirhkohte bak biak tur an awm lo tih a hrethiam mai ang.

“Kan” tih te, “Keimahni ang takin” tih te, “Hawh u” tih te hi, Pathianin Pathian dangte a biakna tawngkam a nih ngat chuan Pathian chu pakhat chauh a nilo hul hual tihna a ni ang. Adama pawh Pathian anpui a nilo tihna a ninghal bawk ang. Nimahsela, Vantirhkohte a biakna tawngkam mai a nih avangin Pathian chuan Amah chauhvin Ama anpui chu a siam ta a ni. Pathian chu pakhat chauh a ni tih thil siam Adama-ah hian a lang fiah em em a ni. “A thil hmuh theihloh, a chatuan thiltihtheihna leh a Pathianzia (Godhead) chu Leilung piantirh ata fiah taka lantirin a awm a, thilsiam-ah, (Adama-ah) chuan a lang a ni” tih a nih reng kha.(Rom 1:20).

A chatuan thiltihtheihna chu Lei leh Vana thil awm zawng zawng a siam thiamna leh theihnaah hian a lang a; chu bakah Godhead pawh a inpho lang tel a ni. A thilsiam dang zawng zawngah khan Ama anpui pakhat mah a siam lova, Godhead chu a la lang lova, mihring a siamah chiah hian Godhead chu a langfiah a ni. Godhead awmzia chu: Pathian nihna pumhlum sawina a ni a, a awmhmang ruangam pawh a huap vek a, chutichuan Adama hian Pathian nihphung leh ruangam chu a tilang ta a ni. Genesis 1:27 thu hi mihringah a rawn chan huna Adama pahnihna Isua a rawn nih hun tur chu thlir lawkin, Pathian mithmuhah chuan thil lo la awmtur pawh awm tawhsa anga hmuh lawkna leh hriat lawkna a awm a; chumi tanchhan chuan Ama anpui hi a siam hmasa zawk a ni thei bawk.

“Kan anpuiin” tih thu-ah hian, Pathian hian Vantirhkohte hi a tihtur a hriattir ve mai a ni. Amah chauhvin mihring chu Ama anpui [image] chiahin a siam ta reng a. “Kan” a tihna chhan kha Vantirhkohte an nih avangin Adama chu Vantirhkoh pianzia leh ruangam nen pawh a inang nghal tho bawk. Adama siamtu pakhat, a anpui pakhat bawk a ni. Pathian anpui chauh kan ni lova, Vantirhkohte nen pawh kan inang reng a ni. Vantirhkohte leh mihringte chu kan pianzia taksa ruangamah kan inang chiah reng a, Abrahama leh Lota pawh khan mihring mipa puitling angin Vantirhkohte kha an lo be mawlh mawlh mai a nih kha. (Genesis 18;leh 19).

Pathian leh Vantirhkohte hi ngawi renga awmkhawm an ni lova, chhungkua anga awmkhawm an ni. Pathian ringtute pawh hi Pathian chhungkua tih tho kan ni. Chhungkua chu an inbe tawn thin. Chhungkua angin Pathianin Vantirhkohte kha a kilkawi a, a thiltih tur a hrilh mai a ni. Vantirhkohte pawh hian an chawimawi a; Pathian pawhin a be bawk a, a tir thin bawk a, zakhua rawina tawngkam mawitak, thu zaizap tak hmangin Pathianin Vantirhkohte a be thin. Chutichuan, “Kan anpuiin, keimahni angtakin, mihring siam ila” tih te, “Tunge ka tirh anga, tunge kan tan kal ang” [Isaia 6:8] tih te, “Hawh u, I zuk kal ang u khai” [Genesis 11:7] tih te hi Pathianin thian leh thawhpui anga Vantirhkohte a biakna tawngkam mawi tak a ni.



2. Mosia Khan Pathian Pakhat Chauh A Hmu Thin:
Mihringin thian kan bia ang mai hian Mosia khan Pathian chu inhmachhawnin a be thin tih a nih kha. Mosia khan Pathian pakhat bak a hmu ngai lova, pakhat bak a be ngai heklo. Chumi awmzia chu Trinity a hmu ngai lova, a be ngaihek lova, a hre ngai heklo tihna a ni. Mihring zawltawka Pathian intih danglamna hmel ‘Theophany’ emaw ‘Anthropomorphism’ a hmu thin a ni. Pathian chuan a ropuina hmel chu inthup (Theophany) thin mahse Pathian a nihna a bo chuang lova pakhat chauh a ni reng mai a ni.

Thing buk atanga Israel fate Aigupta ram ata hruai chhuak tura Pathianin Mosia a rawn tirh khan Mosian “Tunge ni a hming chu?” lo ti sela, engtin nge ka sawi ang? a ti a. Pathian chuan Ehyeh asher Ehyeh ka ni a ti a. Awma ka ni tia a lehlin a ni.[Exodus3:14]. Hei hi Isua Krista a ni. Mihringah a lo chan hma a ni. Mihringah a lo chan hnuah Awma, Ehyeh asher Ehyeh kha ka ni a, chu chu in awih loh chuan in sual nei rengin in thi mawlh ang a ti a. [Johana 8:24]. Good News Bible, Today’s English Version-ah chuan Exodus 3:14 leh Johana 8:24 thu-ah hian “I am who I am” ti ve ve-in a dah a. Thuthlung Hlui-a Israelte Pathian kha Isua Krista ngei kha a ni tih a lang fiah hle a ni. Isuan “Mosia in rin chuan kei pawh min ring tur a ni, ani chuan keima chanchin asin a ziak ni” tiin Israelte kha a hrilh bawk a. [Johana 5:46].

Mosian Pathian chu vawi tamtak a biak hnuah a ropuina hmel nen hmuh a chak ta tlat mai a, “I ropuina chu khawngaihtakin mi han entir teh” a ti a. “Ka ropuina hmel zawng I hmu thei lovang (tuman Pathian an hmu ngailo tih ang khan): mi hmua nung reng thei tumah reng reng an awm si lova…lungpui chungah hian I ding anga, ka ropuinain a rawn kal pelh chhung che chuan, lungpui khi chhungah hian ka dah ang che nga, ka kutin ka han khuh ang che nga, ka kut chu ka han la leh anga, tichuan ka hnunglam chu I hmu ang: ka ropuina hmel erawh chu hmuh tur a ni love” a ti a. (Exodus 33:17-23).

Hemi hmunah hian Mosia hian Pathian chu pakhat chauh a ni a hmuh ni. Pathian hnunglam a hmuh avangin Mosia hmel chu a eng ta a; a hmai a khuh loh chuan Israel faten an lo en ngam talo a nih kha. “Eng tak mitin tieng thin kha a awm a; Khawvelah a lokal mek a ni. Ani chu Khawvelah a awm; Khawvel ama siam a ni, Khawvelin amah a hre silo” tiin Mosian Sinai tlanga Pathian engtak a hmuh kha Isua Krista ngei kha a ni tih a sawi a. [Johana 1:9-10]. Johana chuan a sawi zel a, Khawvel hi Isua hmanga siam a ni tih a sawi lova; Khawvel hi Isua ngeiin a siam a ni tih a sawi zawk a ni. KJV angin “The world was made by Him” tih a ni. Chutichuan Isua Krista hi Genesis 1:1 thua Khawvel siamtu kha a ni a; Aigupta bawih ata Israel fate hruai chhuaktu Mosia biak thin Pathian kha a ni a; mihringah lo chang mahse pakhat chauh a ni reng a ni.

Pathian hmu thin Mosia kha Trinity a hmu thin em tih zawt ta ila:- “Kei chuan Pathian chu pakhat chauh a ni ka hmuh thin ni, pakhat aia tam ka hmu ngai lo” a ti ang. Mosia biak thin kha Isua ngei hi a ni tih Amah Isua ngeiin a sawi bawk kha. (Johana 5:46). Isua hian mihringa a rawn chan hma a Thlarau chauh a nihlai thu kha a sawi a ni.
3.Thupek Zawng Zawng Zinga Pawimawh Ber :
Pathian pakhat chauh chuan mihring tana pawimawh a tih zual sawm a thlang chhuak a; Thu Pek Sawm kan tih hi a ni. Chu chu Mosia hnenah a pe a. Chung zinga Pathian ngaih pawimawhber leh thu pek hmatawngber leh hmasaber, pakhatna chu: “Keimah lo chu Pathian dang reng reng I nei tur a nilo” tih hi a ni.(Exodus 20:1-3; Deuteronomy 5:7). Engkimtithei Pathian chuan pakhat chauh a ni tih mihringte hnenah hriattir a duh a, eng tawngkam nge a hman ang? “Keimah lo chu pathian dang reng reng I nei tur a nilo” tih thu aia pakhat a nihzia sawifiahna tawngkam fiah zawk Pathianin hman tur a hre bik lo. He thu hmang hian pakhat chauh a ni tih chu sawifiah tawkah Pathian chu a inngai tawh ang. He tawngkam hi a paukhauh hle a ni.

He thupek pawimawhber leh Trinity sawifiahna chu han dahdun ila, han khai khin bawk ila: Pakhat chauh sawina an ni ve-ve lo tih a lang mai a ni. “Pathian pakhatah minung pathum an awm, Pa, Fapa, Thlarau Thianghlim te chu, an pathum hian Pathian pakhat an ni” tih thu hi Pathian chu pakhat chauh a ni tih sawina a ni ngai lovanga; “An pathum hian” tih chu Pathian chu pathum an ni tihna a ni chatuan ang. Thu Sawm Pek pakhatna nen hian an awmzia an inmil ngai hek lovang. Khawii hi nge dik zawk ang?

Pathian thupek ngei chu a dik zawk zel ang. Chu Thupek pawimawhber chu Pathian hian a thlur bik ta a; a sawi nawn ta bik a ni. Chu chu Shema (Shamah) hi a ni. Shema chu hei hi a ni:-“Aw Israel mite u, ngaithla teh u, LALPA kan Pathian chauh chu LALPA pakhat a ni a; LALPA in Pathian chu in thinlung zawng zawngin, in thlarau zawng zawngin, in rilru zawng zawngin, in chakna zawng zawngin in hmangaih tur a ni…” tih thu hi. (Deuteronomy 6:4-9; Marka 12:28-31).

Pathian chu pakhat chauh a ni tih hriat chu Thupek tawpna a la ni lova; chu Pathian pakhat chauh chu: Thinlung zawng zawng leh thlarau zawng zawng leh rilru zawng zawng leh chakna thahrui zawng zawnga hmangaih tura thu pekin a zui a; chu chu a pawimawh laitak a ni. Hetianga Pathian kan hmangaih dawn chuan Pathian thupek chu zawm loh theih a ni tawh lovang.

Van atanga be tawh lovin Khawvelah Ama mite hnenah hmaichhana be turin Pathian chu Israelte hnen ngeiah chuan tisain a lokal a, hmaichhanah Israelte nen chuan an inbe ta a. Thupek zawng zawng zingah khan eng kha nge pawimawhber tih an lo zawt leh ngat a. Hmana Mosia hnena, mihringah a rawn chan hmaa a hrilh tawh hnu kha Isua hian a hrilh nawn leh mai a ni (Johana 5:46). Isua chhanna chu hei hi a ni:-“Israelhote u, ngai teh u, Lalpa kan Pathian chu Lalpa pakhat chauh a ni a, Lalpa I Pathian chu I thinlung zawng zawngin, I thlarau zawng zawngin, I rilru zawng zawngin, I chakna zawng zawngin I hmangaih tur a ni” tih thu bawk hi. (Marka 12:28-31).

He thupek pawimawhber anga Pathian kan hmangaih dawn chuan Isua zirtirna zawng zawng zawm loh theih a ni tawh lova, a sawitu leh thu petu chu Isua a nih tawh avangin. Thuthlung Hlui leh Thuthlung Thar leh kumkhua pawhin he thupek hi a danglam ngai tawh lovang. Pathian chu chatuan chatuanin pakhat chauh a ni reng dawn a ni.


Pakhat’ Sawina: ‘echad’ leh ‘yachiyd’ leh ‘heis’:
Deuteronomy 6:4 thu ami: “Lalpa kan Pathian chauh chu Lalpa pakhat a ni” (The LORD our God is One LORD,KJV) tih thua ‘pakhat’ tihna hi Hebrai tawngah chuan ‘echad’ a ni a. King James Version Bibleah hian ‘echad’ hi pakhat sawi nan vawi 885 hman a ni. Greek tawngah chuan ‘heis’ a ni. Hebrai tawnga ‘echad’ hmanna dang tlem kan en anga; tichuan Pathian tam lam chu pakhat chauh a ni tih kan ringnghet thei ang.

Pathianin Euvi a siam dawn khan Adama chu tuitakin a muthilhtir a; Adama nakruh pakhat chiah a la chhuak a, nakruh pakhat chiah hmangin Euvi chu a siam ta a ni. Adama nakruh lakchhuah kha pakhat chauh a ni tih sawi nan ‘echad’ chu hman a ni.(Genesis 2:21). Adama nakruh lakchhuah zat leh Pathian tam lam chu a in zat chiah a, pakhat chauh a ni.

Joshua khan Kanaan lalte kha 31 a hneh a, chungte chu a mal tetein an chhiar a, pakhat-pakhat-pakhat, tiin. Jeriko khaw lal ‘echad’ pakhat; Ai khaw lal ‘echad’ pakhat; Jerusalem khaw lal ‘echad’ pakhat; an chhiar zela pakhat-pakhat-pakhat, echad- echad- echad- tiin; lal pakhat kha, pakhat chauh a nih avangin pakhat tih nan ‘echad’ hman a ni. Pathian pawh pakhat chauh a ni tih sawfiah nan ‘echad’ hman a ni. (Deuteronomy6:4). Chutiang zelin mihring mimal pakhat, sawi nan ‘echad’ hman zel a ni. [Joshua 12:9-24].

Trinity ringtuten ‘echad’ hi pakhat aia tam sawina nihtir an tum nasa hle. Grape bawr leh nupa entirna an la chhuak thin. Pathian chu pathum nihtir an tum vang mai a ni. Grape rah bawr khat sawi nan ‘echad’ hman a ni a. Hetah hian Grape rah mal te te chhiar lovin a bawr chauh chhiar a ni. Bawr khat , bawr hnih tiin. Exam zawhnaah Grape rah bawr khat lem chuang se, “Grape rah bawr engzatnge I hmuh?” tiin Exam zawhna awm ta se. Bawr khat, pakhat, ti mai lovin, bawr khata a rah awm zat chu chhiar ta la, a rah zat chu chhannaah ziak ta la, Mark ‘O’ I hmu anga, I Failed tihna a ni ang. Grape rah bawr khat sawi nan ‘echad’ hman a nih avanga Pathian pathum Trinity sawina emaw I tih luih tlat chuan Pathian tam lam I hriat danah I Failed tihna a ni.

Nupa hi an inneih hma chuan tisa pahnih an ni a, mi pahnihah ‘echad’ hmanna reng reng a awm lo. Tisa pum hnih sawi nan ’echad’ a hman theih lohva; an inneih hnuah chuan tisa pahnih ni tawh lovin pakhat a ni tawh a ’echad’. hman tur a ni. Nupa an inneih hnuah tisa pum hnih anga ngaihtuah luih Lalpan a phallo a ni. Trinity ringtuten ‘echad’ hi pakhat aia tam sawina nihtir dan an zawnna kawngah, nupa hi an inneih hnuah pawh mi pahnih an ni an ti talh a. Tisa pumhnih angin an ngaihtuah lui talh thin a, an thinlungah pahnih an nihna an theihnghilh thei lova, Pathian erawh chuan tisa pakhat an ni tawh a ti a ni. Chutiang tisa pakhat sawi nan ‘echad chu hman a ni. Trinity ringtute hnialna hi Pathian pathum awm ngei anga lantir an tum vang mai a ni. Pathian hi pakhat chauh a ni tih inngaitlawmtakin pawm thei mai sela chuan thawkrim thlawn an nilo mai tur.

Nupa inneih hnuah tisa pahnih anga ngaih luih tlat chu Pathian hnialna a ni. Nupa an inneih hian pahnih an nihna chu theihnghilh hmiah a ni tawh a, thaibo a ni tawh a, tisa pakhat a ni tawh. Pakhat diktak a nih tawh vang chauhvin ‘echad’ a tling a ni. Pahnih anga a ruka la ngaih tlat mai chu sual a ni. Nupa tisa pakhat sawi nan ‘echad’ hman a ni. Nupa tuak khat ‘echad’, Grape bawr khat ‘echad’, Vantirhkoh Mikaela pakhat ’echad’. Pakhat theuh an ni. Engtikawngmahin ‘echad’ hi Pathian pathum Trinity sawi nan a hman theih loh.

Vantirhkoh chungnungber hi Mikaela a ni a, [Juda:9] Mikaela chu pakhat chauh a ni tih sawi nan ‘echad’ hman a ni. [Daniala 10: 13]. Abrahama chu mi pakhat chauh a ni tih sawi nan ‘echad’ hman a ni bawk.[Ezekiela 33:24]. Thil pakhat emaw mi mal pakhat sawi nan ‘echad’ hman a ni thin. Pathian tam lam chu kan hriat duh laitak chu a ni a, kan han chhiar ta a, ‘echad’ pakhat chauh a ni (Deuteronomy 6:4). Abrahama mi pakhat a ni ang bawkin Pathian chu mi pakhat chauh a ni tih kan ringhlel thei tawh lovang. Hetiang thu mawlte hmang hian Pathian chu pakhat chauh a ni tih kan hrefiah thei a ni.

‘ Echad ‘ hi Bible-ah vawi 962 a langa. Pakhat (One) tih nan vawi 903 hman a ni. A mal (alone) tih nan vawi 5. Chauh (only) tih nan vawi 1. Pathian hi pathum pakhat ni lovin pakhat mal chauh a ni tih sawi nan ‘ Echad ‘ hi rinngam a ni. (Echad by Kaeith G.Morehead).

Thuthlung Thar hunah Pathian chu tisaah lo chang mahse, Pathian chu a tambelh chuang lova, Pathian an lo punbelh ta lah a ni heklo. Pakhat a ni zuizel a ni. Greek tawnga pakhat sawina ‘heis’ hi Hebrai tawng ‘echad’ nen a inang chiah a ni. Marka 12:28-29 thuah khan, Lehkha ziaktute zinga mi pakhat (heis)-in Isua Krista chu Thupek pawimawh ber a lo zawt a. Isuan Deuteronomy 6:4 thu a la chhuak chat a: “Lalpa kan Pathian chu Lalpa pakhat chauh (heis=echad) a ni a, Lalpa I Pathian chu I thinlung zawng zawngin, I thlarau zawng zawngin, I rilru zawng zawngin, I chakna zawng zawngin I hmangaih tur a ni” tih thu kha.

Hebrai tawng ‘echad’ hmanna angchi-ah chiah khan Greek tawng ‘heis’ chu hman a ni. Thupek pawimawhber Isua rawn zawttu mi pakhat kha a tamlam sawi nan ‘heis’ hman a ni. Isua zawttu mi pakhat zat chiah kha Pathian tamlam chu a ni. Hemi hun hi Pathian mihringah a rawn chan tawh hnu a ni a, Pathian chu mihringah lo chang mahse Pathian chu a tambelh lova, a punbelh chuang hek lo. Pathian chu Pakhat diktak tho kha a la ni a; Thupek pawimawhber kha tihdanglamlohvin a la ding reng a, a la dik reng a ni tih a lanfiah theih nan Isuan a sawi nawn leh mai a ni.

Chutichuan ‘echad’ leh ‘heis’ te hian Pathian chu pakhat chauh a ni tih an sawifiah tawk hle a ni. ‘Echad’ leh ‘heis’ hmanna dang zawng zawng hi Bibleah a hmuh theih vek a, engti kawngmahin “Pathian chu mihrang pathum, Trinity an ni thei mai awm mang e” tih sawifiah nan hman theih pakhat mah a awm lo.

Pakhat chauh sawifiah nan ‘echad’ hmang lovin ‘yachiyd’ an hmang thin tiin Pathian pathum awm ngeia ringten an sawi thin. ‘yachiyd’ lo chhuahna bul chu ‘yachad’ a ni a; pakhat chauh tihna nilo mahse, a kawh chu pakhat chauh a nive mai chauh zawk a ni. Pakhat tihna pangngai chu ‘echad’ hi a ni.

A hmanna lo en ila: ‘yachiyd’ chu Genesis 22:2 thuah khan hman a ni a, Abrahama fapa mal neih chhun, tih sawi nan ‘yachiyd’ chu hman a ni a, Saptawng chuan only tihna a ni a, only chu pakhat tihna ni lovin malneihchhun tihna chi zawk a ni a, pakhat erawhchu a nive bawk chauh zawk a ni. Isaaka hlanna tur tlang pakhat sawi nan ‘echad’ hman a ni. ‘yachiyd’ chu uartaka ’echad’ sawifiahna mai a ni. Mal neih chhun tam lam chu pakhat chauh zawng a ni ngei a, thil tamlam chhiar laia pakhat chauh sawina chu ‘yachiyd’ ni lovin ‘echad’ zawk hi a ni. Chutichuan Pathian tamlam chu ‘yachiyd’ ni lovin pakhat chauh ‘echad’ a ni. Isaaka chu Moriah tlang pahnihah hlan lovin tlang pakhatah ‘echad’-ah hlan a ni. Isaaka hlanna tlang zat leh Pathian tam lam chu pakhat chauh ve-ve ‘echad’ a ni.

‘yachiyd’ awmzia Strong’s Greek Dictionary sawi dan chu hei hi a ni: Strong’s Number 3161: properly, united,i.e. sole, by implication, beloved, also lonely, (feminine) the life (as not to be replaced): darling, desolate, only (child, son), solitary. Heta tang hian ‘yachiyd’ chu pakhat tihna pangngai ni lovin hla thu anga uartaka pakhat sawi fiahna chi mai a ni.


5. Pakhat Chauh A Ni Tih Pathian A Insawi Fiah :
Nang chuan Pathian chu pakhat chauh a ni tih hriat chian kher chu tul I ti lo mai thei a; Pathian erawh chuan tul a ti em em a. Kawng hrang hrangin pakhat chauh a nihzia Amah ngei a insawifiah duh em em a ni. Pathianin a sawi laia a rilru tur chu ngaihtuah sak chungin uluktakin heng thute hi han chhiar la, pakhat chauh a nihzia insawifiah tura Pathian thahnemngaih zia chu I hmuchhuak thei ang:-


  1. “Kei hi Hmasabera chu ka ni a, Hnuhnungbera pawh ka ni; keimah lo chu PATHIAN dang reng reng an awm lo” (Isaia 44:6).

  2. “Kei hi LALPA, thil zawng zawng Siamtu, mahni chauhva Van kaipharhtu, Lei tizautu chu ka ni” (Isaia 44:24).

  3. “Keimah lo chu Pathian dang reng an awm lo; Pathian fel leh Chhandamtu ka ni; keimah lo chu a dang reng reng an awm lo. Kawlkila mite u, ka lam lo hawi ula, chhandamin awm rawh u: kei hi Pathian ka ni, a dang reng reng an awm lo” (Isaia 45:21-22).

  4. “Kei, LALPA I Pathian, Aigupta ram ata, bawih ata hruaichhuaktu che u ka ni: Keimah lo chu Pathian dang reng reng I nei tur a nilo” (Exodus 20:1-2).

Heng thute hi Pathian ngeiin pakhat chauh a nihzia a sawina thute an ni a. Kawng dang tamtakin a la insawifiah leh cheu bawk a; mahse heng thute hi Pathian tawngkam ngei hre duh tan chuan a tawk thei tawh ang. Zawlneite ka hmangin Lalpa chu a inpuang leh zel a, pakhat chauh a nihna tichiang turin tlema zawng lo en leh ila:
  1. “Chuvangin, vawiin hian hre rawh u, theihnghilh hauh suh ang che u: LALPA hi chunglam van leh hnuailam leia PATHIAN awmchhun a ni, PATHIAN dang reng an awm lo”(Deuteronomy 4:39 Mizo Study Bible).


  2. “Aw Israel mite u,ngaithla teh u, LALPA kan Pathian chauh chu LALPA pakhat a ni a, LALPA in Pathian chu in thinlung zawng zawngin, in rilru zawng zawngin, in chakna zawng zawngin inhmangaih tur a ni…in fate thahnem ngaitakin in zirtir anga…kawnga in kallai te, in mut laitein in sawi thin tur a ni..kawngka biangah te in ziak tur a ni”(Deuteronomy 6:4-9).

  3. “Lei chung zawng zawngah LALPA chu Lalber a lo ni ang: Chumi ni-ah chuan LALPA chu pakhat a ni anga, A hming pawh pakhat a ni ang” (Zakaria 14:9).




  1. Thoma’n Isua Krista chu “Ka Lalpa leh ka Pathian I ni” a ti a [Johana 20:28];

  2. Jakoba unaupa Juda khan “Kan Hotu leh kan LALPA neih chhun, Isua Krista an awih lo bawk a” a ti bawk a [Juda chang 4]. He bible chang pahnih chauh atang pawh hian Thuthlung Hlui huna LALPA tih zawng zawng leh PATHIAN tih zawng zawng kha Isua Krista a ni vek a ni tih kan hre thei a ni.




  1. PATHIAN Chu Thlarau A Ni:

Pathian Engkim Siamtu, mi pakhat chauh Awmrengmaia chu Thlarau a ni.(Johana 4:24). Thlarau chuan tisa leh ruh a nei lova.(Luka 24:39). Mihringah a rawn chan hma chuan Pathian chuan tisa leh ruh a nei lo a ni. Thlarau a nihna dinhmun chu kan hriatthiam phakbak a ni ang. Van zauzia chu tawpchin nei lova zau a ni anga, Solomona chuan “Ngai teh, van leh vante van pawh hian a chhungkhung zo lo che a ni a, he ka In sakah hian I va lenglo nasa lehzual awm em!” a ti rawng rawng mai a ni. Thlarau a nihna-ah chuan:- “Van leh vante vanah pawh a leng lo” a ni a, tunge hrethiam phak ang?(1Lalte 8:27).

Zawlnei Jeremia hnenah khan Thlarau a nihna chu a insawifiah a: “Hmun biruah ka hmuh theih loh tura biru thei an awm dawn em ni? Tih hi LALPA thu chhuak a ni. Lei leh Vanah hian ka khat a ni lawm ni? tih hi LALPA thu chhuak a ni” tiin. (Jeremia 23:24).

Heng thu tlemte kan lakchhuah atang hian mihringah a rawn chan hmaa PATHIAN, PA, a nihna dinhmun chu kan hrethiam thei ang. Chutianga Pathian ropui leh mak chu Ama thil siam ang mihringah a rawn chang thei a, hriatthiam a harsat em avangin thil mak mystery a ni tih Paula’n a sawi reng a ni.(1 Timothea 3:16).

PA, PATHIAN kan tih hian Thlarau a nihna dinhmun chu kan sawi a ni tih hi hriat reng tur a ni. PATHIAN chu mihring a ni hmasa lova, Thlarau a ni hmasa a; chumi hnuah tisa nihna kawr a ha a ni. Thlarau-PATHIAN chu mihringah a lo chang a ni tih Bible hian min hrilh ta kalh mai a ni.

Pathian chu tisaa a rawn chan hnuah pawh thuhretu rinawm Paula chuan Isua Thlarau nihna dinhmun a sawi zui leh zel a. “Ani chu engkim chungah a awm a, engkim fangchhuakin a awm a; engkim chhungah a awm bawk a” Paula’n a tih hi Isua Krista taksa nilo, Isua Thlarau nihna dinhmun zawk a sawi a ni. (Ephesi 4:6}. Paulan Isua Krista chanchin a sawi laiin “Ani chu thil zawng zawng chunga awm, chatuana fak tlak Pathian a ni. Amen” tiin a sawi bawk a. {Rom 9:5}. Tisa a nihna nilo zawk Thlarau a nihna zawk a sawi a ni.




1   2   3   4   5   6   7   8   9   10   11


The database is protected by copyright ©hestories.info 2017
send message

    Main page