Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana



Download 499.51 Kb.
Page5/11
Date conversion29.03.2017
Size499.51 Kb.
1   2   3   4   5   6   7   8   9   10   11

7. PA, PATHIAN Mihringah A Lo Chang:
Pa, Pathian chu Fapa-ah a lochang tih thu chu zawlnei Isaia’n a sawi hmasaber a. Isaia 9:6 thuah khan “Kan tan naupang a lo pianga, Fapa pekin kan awm ta…Pathian Chaka Chatuan Pa” a ti a. Pathian Fapa, Isua Krista chu, Pathian Chaka, Chatuan Pa kha a ni tih Isaian a sawi a ni. Isua chu Chatuan Pa mihringa insiam chawp a ni tihna a ni. Chumi thu awih theilo chuan zawlnei Isaia chu Pathian zawlnei-ah a pawmlo tihna a ni a; Pathian thu dang pawh a awih chuang lovang. Fimkhur rawh.

Israelte pawhin Isaia thusawi kha an ring lova, Isua chu ropuina Lalpa kha a ni tih an hriat loh avangin an kheng bet a, “Hria sela chuan ropuina Lalpa chu an kheng bet lovang” Paula’n a tih kha. [1Korinth 2:8].

Ropuina Lalpa chu Thuthlung Hlui huna Pa Pathian kha a ni. “Aw kulh kawngka te u, In luchungte kha chawi sang ula, Nangni kawng khar hlunte u, in khaisang rawh u, Tichuan Ropuina Lal hi a lo lut dawn nia. Chu Ropuina Lal chu tunge ni? Lalpa chaktak leh thiltithei tak, LALPA indonaa thiltithei tak chu a ni…Amah ngei hi Ropuina Lal chu a ni” an tih thin kha Isua Krista hi a ni. [Sam 24:7-10]. Ropuina Lal an tih thin chu PA, PATHIAN ngei kha a ni a, mihringah a rawn chan dan an hrethiam lova an kheng bet a ni.

Israelte kha I dem viau mai thei a; Isua Krista, Pathian Fapa ni bawk sihi Chatuan Pa ngei kha a ni tih I awih loh chuan Israelte tluknaah chiah khan I tlu ve tlat mai a ni. Trinity thurin hian Isua Krista chu Chatuan Pa mihringa lo chang a ni tih a pawm thei lova; Chatuan Fapa tih tawngkam chherchhuak chawpin Pa leh Fapa chu mi hrang pahnih angin a rintir tlat a; chuvangin Trinity I ring a nih chuan Isua Krista khenbehna tham Israelte tlukna sualah khan I rinna a tlu ve chiah a ni. Chumi tlukna ata kaitho theitu che chu zawlnei Isaia thu sawi hi a ni. Isaia’n Isua kha Chatuan Pa, Pathian Chaka a ni a tih hi ring la I hahdam anga Trinity erawhchu I phatsan ta tihna a ni nghal bawk ang.

Timothea hnenah khan Pathian chu tisaah a lo chang tih Paula’n a hrilh a. A tirah chuan Paula chuan Isua Krista kha an PATHIAN kha a ni tih a hre hauh lova; Isua Pathian atana neitute chu a tiduhdaha, Stephana an denhlum dawn lai pawh khan Isua chu Pa hmelmaah a ngai a; Isua ringtute chu tih rem a duh a.

Stephana denghlumtute thuamhnawte a lo ven saka, thahnem ngaitakin Isua ringtute chu mankhawma khungkhawma tihrem tumin man phalna lehkha puithiamte hnen atanga kengin Damaska khua a pan a, a kal mek laiin ISRAELte PATHIAN chuan engin a rawn chhun thlu a:- “LALPA tunge I nih?” a ti a. ISUA nihna hrechiang lova thilti a nih avangin ISUA’N a hrethiama, a hnenah a inpuang ta a:- “ISUA I tihduhdah ka ni” a rawn tita mai a. Paula hi a phu nasa hle ang, a harh kawk kawk ngei ang. Israelte PATHIAN kha tisaah lochangin ISUA kha a ni tih a hrefiah ta hle mai. Huaitakin “Pathian chu tisaah a lo chang” tih thu a ziak ta a ni. Chu chu thil mak tak, hriatfiah mai harsa, mahse hriatthiam ngei tur ni bawk si [mystery] a ni tih a sawi ta hial a ni. [1Timothea 3:16].

King James Version ziak dan hi a fiah deuh beiseiin han tarlang ila:- “And without controversy great is the mystery of godliness: God was manifest in the flesh, justified in the Spirit, seen of angels, preached unto the Gentiles, believed on in the world, received up into glory” tih a ni.

ISUA KRISTA hi PATHIAN tisaa lochang a lo ni reng mai tih Paula’n a hriat hian mak a tizual bik a, a hrefiah bik bawk. Isua a hriatfiah loh laia a thinlung thim zia kha a hre renga; PATHIAN Thlarau hriatfiahtirna atanglo chuan Isua Krista hi LALPA PATHIAN kha a ni tih hriatna nungin tuma’n an hre thei lovang a ti thlawt mai reng a ni. “Tuman, Thlarau Thianghlimah chauh lo chuan, “ISUA chu LALPA a ni” an tithei ngai lo tih ka hriattir a che u” a tih kha [1Korinth 12:3].

“LALPA chu PATHIAN a ni tih hre rawh u, min siamtu chu Amah chu a ni a; Ama ta kan ni” tih thu Sam Number 100-na chang 3 thu kha Thlarau Thianghlim diktak changtu I nih chuan hetiang hian hrilhfiah ta ila I pawm thei tawh ngei ang:- “ISUA KRISTA chu LALPA PATHIAN a ni tih hre rawh u, Min Siamtu chu ISUA KRISTA a ni, ISUA KRISTA ta kan ni” tih hi. Chu chu I la pawm theilo anih chuan Tirhkoh Paula sawi angin “Thlarau Thianghlim atangin Isua Krista chu LALPA PATHIAN kha a ni tih hriatfiahtirna I la dawng lo” tihna a ni. ISUA KRISTA chu LALPA PATHIAN kha a ni tih I hriatthiam theih nan Isua hnenah tanpuina dil a pawimawh hle mai. Thoma chuan “Ka Lalpa leh ka Pathian I ni” a ti hmiah mai a nih kha.[Johana 20:28].

Thuthlung Hlui leh Thuthlung Thar huna Lalpa tih leh Pathian tih zawng zawng kha Isua Krista nihna an ni vek a ni tih hi mawltein Thoma thusawi atang hian kan pawm thei ve mai dawn lawm ni le?

Mihring tawngin sawi thin mah ila, Lalpa hriattirna tello chuan ISUA chu LALPA leh PATHIAN a ni tih tumah kan hrilfiah zolo. Tumah reng hian Lalpa tanpuina tello chuan Isua Krista chauh hi PATHIAN chu a ni tih kan hre thei lo. Pathian thufing, thuruk mystery a ni a, Thufing inthup kan ropuina tura Pathianin khawvel awm hmaa a ruat lawk daih tawh chu a ni. Chu chu khawvel roreltute reng reng hian an hre lo, hria sela chuan Ropuina Lalpa, Isua chu an kheng bet lo vang [1Korinth 2:7-8].

Pathian chu mihringah a lo chan hma loh chuan Thlarau a nih avangin taksa a neilo a ni ngei ang. “Chutichuan khawvela a lo luh laiin:- Inthawina leh thil hlan I duh lova, Ka tan taksa mi buatsaih sak zawk a” tih a ni (Hebrai 10:5). “Thisen chhuah lovin sual ngaihdamna reng a awm lova” (Hebrai 9:22). Pathian chu Thlarau a nih avangin Thisen a nei si lova; sual ngaihdamna thisen min pek theih nan thisen nei turin mihring taksa Pathianin a rawn in siamchawp sak ta a, Pathian chu mihringah a lo chang ta a ni. Tichuan “Ka tan taksa mi buatsaih sak zawk a” tih awm zia chu “Ran thisen chu sualte tibo thei rual a nih loh avangin Sual tibo thei tur Thisen min pek theih nan Pa-Pathian chu mihringah a lo chang ta” tihna a ni. Chatuan Fapa mihringah a lochang tih erawh chu Pathian thuin khawi laiahmah a sawilo reng a ni. Chatuan PA PATHIAN mihringa rawn insiam a ni zawk e.

8.Pathianin A Fapa Mal Neih Chhun A Pe:
“Pathianin a Fapa mal neih chhun a pe” tih awmze diktak chu “Pa-Pathian chu Fapaah a lo chang” tihna tho a ni. Pathian mihringah a lo chan thu sawina kawng dang mai a ni. Chumi tifiah tur chuan Bible chang pahnih kan khaikhin a ngai ang.


  1. “Pathianin khawvel a hmangaih em em a, chutichuan a Fapamal neih chhun a pe a; amah chu tupawh a ring apiang an boral lohva chatuana nunna an neih zawk nan. Khawvel thiamloh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e” (Johana 3:16-17).

He thu hi eng angin nge I ngaih le? Vanah Pa leh Fapa an awm dun a, Pa chuan a bula a Fapa awm chu Khawvelah a tir thla ta angin I ngai mai thei. Chuti a nih chuan Pathian Fapa mihringah a lo chang tihna a ni ang. Nimahsela, Pathian Fapa mihringah a lo chan thu Bible pumpuiah hian I hmu hauh dawn si lo a ni. Trinity ringtuten Fapa Pathian tiin an vuah thara, Fapa Pathian mihringah a lo chang an ti a ni. Chatuan Pa Pathian ngei kha mihringah a lo chang a ni tih chu kan sawi zawh tawh kha le. Bible chang dang pakhat kan en leh anga:-


  1. “Mari chu Josefa nen an inhual laiin, an inpawl hmain, Thlarau Thianghlimin a raitir tih an lo hre ta a” tih thu kan chhiar leh ta a. [Mathaia 1:18]. “Pathianin a Fapa mal neih chhun a tir” tih nen kha chuan a inang tawh hauh lo a ni.”Josef, nang Davida fapa, I nupui hual Mari chu neih hlau suh; a nau pai chu Thlarau Thianghlim laka mi a ni asin! Fapa a hring anga a hmingah ISUA I sa ang” tih hi Isua Pa, Isua thlahtu chu Thlarau Thianghlim tihna diktak a ni.[Mathaia 1:20-21].

Hetah hi chuan Isua chu Thlarau Thianghlim fa a ni ta daih mai. Pa Fapa a ni hauh lo. Nimahsela, Thlarau Thianghlim chu Chatuan Pa kha a ni tih i pawm chuan Pa Fapa chu a ni bawk e. Chu chu I pawm theih chuan Trinity chu I phatsan nghal chiah a ni. Trinity thurin chuan Pa leh Thlarau Thianghlim chu Pathian hran veveah pawm turin a zirtir tlat si che a.

He thu atang hian Van atanga Fapa tirh thlak niin a lang thei tawh lo. Pa Pathian Thlarau Thianghlim ngei chu mihringah a rawn insiam ta a ni tih hi a langfiah ta hle mai a ni.

Hemi thu leh “Pathianin a Fapa mal neihchhun a tir” tih kha thu awmze thuhmun a ni ngei ngei tur a ni a; “Thlarau Thianghlim lak ami” tih thu thu atang hian “mihringa chang turin Pain Thlarau Thianghlim a tir” a ang zawk. Tichuan Isua Pa chu Thlarau Thianghlim niin a lang ta zawk a. Pa Famal ang pawhin a lang tawh lo, Thlarau Thianghlim Fa mal angin a lang tawh zawk a ni.

A awmzia enge nita ang le? Johana leh Mathaia an inhnial em ni ang le? Ni thei lovang, Thlarau Thianghlim chu Pa nihna hming pakhat a ni tih a lang zawk a ni. Trinity ringtuten Pa chu Thlarau Thianghlim a ni lo an tih thin chu a diklo tih a tilang nghal bawk a ni. Pa Pathian chu pakhat chauh a nih avangin, a nihna pangngai reng Thlarau Thianghlim a nihnain Mari kawchhungah tisaa chang turin a lolut a ni tih Mathaia hian a sawi mai a ni. Johana leh Mathaia sawi hi an inkalh thei lova, awmze thuhmun an ni a; thil pakhat an sawi a; thil sawilan tum pakhat chauh an nei a, “Pa-Pathian chu tisaah a lochang” tih hi tihlan an tum a ni. Bible thu kan tarlan pahnihte khi Pathian mihringa a lochan dan sawidan kawng hnih a ni a; a lan dan chi hnih a ni. A nihna tak chu Pathian mihringah a lo chan thu sawina mai an ni.

Johana 3:16-17 thu hi Trinity sawifiah nan hman a rem lo. Pathian pathum sawina ai chuan Pathian pahnih: “Pa leh Fapa a hrangin an awm” tih thurin Ditheism ringtuten an rinna sawifiah nan an hman thin zawk a ni. “A Fapa a tir” tih a nisi a. Nimahsela Pathian pahnih awm thu sawina a ni chuang lo. Pa chu Fapaah a lo chang a, chumi landan sawina mai chu a ni. “Pathianin a Fapa mal neih chhun a tir” tih awmzia chu mihringten kan awmdan phung mila Pathian mihringa a lo channa kan hriatthiam awlsam nan mawltein Pathian finna hmangin Johana’n a ziak ta a:- “ ‘Pathianin a Fapa mal neih chhun a tir’ tih chu kawng dangin, a tlukpui chiahin a sawi leh a:-‘Pain Fapa mal a nei ang hian kan lo hmu’ a ti mai a ni” ; chutianga sawi chu Pathianin pawi a tilo a ni.[Johana 1:14; 3:16].

Chatuan Fapa tih leh Fapa Pathian tih tawngkam hi Bibleah a awm loh avangin hman miah loh tur a ni. Trinity ringtuten, Chatuan Pa bula awm reng Chatuan Fapa Pathian chu mihringah chang tura khawvela tirh thlak anga sawifiah an duh vangin Chatuan Fapa tih leh Fapa Pathian tih tawngkam hi an phuahchawp thar a ni.



Chatuan Fapa tih tawngkam hmang hmasabertu chu Origen-a a ni, A.D. 254-ah a thi a. Pa chu Thlarau Thianghlim a ni lova, Thlarau Thianghlim chu Pa chu a ni heklo, Thlarau Thianghlim chu Trinity-a Pathian pathumna, mi pathumna a ni tih sawi hmasabertu chu Novatiana a ni. Heng an thusawite hi A.D. 381 kumah Council of Constantinople-ah an nem ngheta, Trinity chu a piang fel ta a ni. Chuta tang chauh chuan Fapa Pathian, Chatuan Fapa tih tawngkam hi a lo chhuak ta a ni.

Tawngkam dik Biblea awm chu hei hi a ni:- Pathian Fapa, Mihring Fapa tih hi. Fapa a nihna hi chatuan ata tawh Fapa nireng mai angin Biblein a sawi lova, Pa Pathian mihringah a lo chan Ni atang chauhvin Fapa nihna hi a nei a ni. “Nang zawng ka Fapa I ni vawiin hian ka hring a che” tih mai a ni.[Hebrai 5:5]. Vawiin tih hi chatuan sawina ni lovin Bethlehema mihringah a lo chan Ni, Nikhat chauh sawina kha a ni. Chumi Ni atang chauh chuan Fapa chu a awm a ni. Bethlehema mihringa a lochan hmaloh hi chuan Fapa hi a awmlo reng reng a ni. Pathian thinlungchhunga mihringa lochang tura Pathian remruatna Thu Logos chu Bethlehemah Fapaah a rawn chang ta a ni. Chu mi awmzia chu Pa-Pathian, Thlarau Thianghlim ni bawk kha mihringah a lo chang ta tihna chiah a ni.

Kan sawi chhan chu hei hi a ni:- Pathianin Pathian ve bawk a bula awm mihringah chang turin khawvelah a tir lova, Pa Pathian bulah Pathian dang tirh tur reng reng an awm loh avangin. Trinity chu dik nita se engtin nge Pathianin Amah tlukpui Pathian dang hrehawm tuar tur leh thi turin a tirh theih teh lul ang? Amah ngei chu mihringah a lo chang ta a; a mihrinna chu bawih anga thi turin a inbuatsaih lawk diama:- chu chu “Pathianin a Fapa mal neih chhun a tir” tiin a lan dan angin Johanan a sawi mai a ni.

Pa Pathian bulah Pathian dang Fapa Pathian emaw Thlarau Thianghlim Pathian emaw, Pathian dang reng reng tirh tur an awmlo tih chu he thu atang hian kan hrefiah thei ang:-


“Keimah lo chu Pathian dang reng an awm lo; Pathian fel leh Chhandamtu ka ni; keimah lo chu a dang reng reng an awm lo. Kawlkila mite u, ka lam lo hawi ula, chhandamin awm rawh u: kei hi Pathian ka ni, a dang reng reng an awm lo” (Isaia 45:21-22). He thu sawitu hi Pa-Pathian kan tih chu a ni.

Pathian chu pakhat chauh a nih avangin, A bul hnaiah Pathian dang tirhtur reng reng an awm lo. A bul hnaiah Pathian dang tirhtur awm anga lantir duh vanga Fapa Pathian tih hming chherchhuah thar mai vangin Pa-Pathian bulah Pathian dang an awm theih phah chuang lo. Mihringin Pathian an siam pung thei lovang. Pathian chu pakhat chauh a ni kumkhua dawn a ni.

Chuvangin “Pathianin a Fapa a tir” tih hi “Pathian chu Fapa-mihringah a lo chang” tih sawifiahna tawngkam dang mai a ni. Pa Pathian bulah Pathian dang tirhtur an lo awm mial a nih chuan Pathian chu pakhat chauh a nilo tawp anga; “Keimah lo chu Pathian dang reng reng an awmlo” tih Pathianin a sawi kha dawt a ni nghal ang. Nimahsela Pathian chuan dawt a sawi thei lo. Chatuanin pakhat chauh a ni tluan chhuak zak dawn a ni.

Pathian thinlung chu mihring boral tur hmangaihnain a khat tlat a. Mihringte hnena zuk kal turin engtin nge Pathianin a tih tak ang, Pathian ropui tak Thlarau a nisi a?

Mihring zingah zuk cheng ve tur chuan a ropuina zawng zawng hlipa dah thain, mihringah insiam ve mai chu Pathian chuan tha a tita a. “A tirin Thu ‘Logos’ a awm, Thu chu Pathian hnenah ‘pros’ a awm, Thu chu Pathian a ni. Thu chu tisaah a lo changa kan zingah a lo awm ta a. Pa Pathianin Fapa mal a nei ang mai hian {a landanin} kan lo hmu ta a ni. Khawngaihna leh thutakin a khat e” tih a ni a. [Johana 1:1-14}.

Nangmah kha han inngaihtuah chiang la, I thu chu I kiangah emaw I bulah emaw a awm thei lova, I hnenah, nangma thinlung chhungah I ‘thu’ chu a awm. Pathian ‘Thu’ pawh Pathian kiang hnai emaw, bul hnai emawa awm thei a ni lova, Pathian thinlung chhungah a awm. I ‘thu’ chu midang ni lovin ‘nangmah’ a ni mai bawk a; chutiang bawkin Pathian ngaihtuahna ‘Thu’ chu Pathian a ni. ‘Thu chu Pathian a ni’ tih a ni. Thu-Logos chu tisaah-mihringah a lo chang ta a:- Pathian chu mihringah a lochang ta a. Emmanuela ‘kan hnena Pathian awm’ a lo ni ta a. Pa-in fapa a nei ang mai hian a lolang ta a. “Pa-in, fapa mal a nei ang mai hian a lo lang a, ropuitakin kan lo hmu ta a ni, khawngaihna leh thutakin a khat bawk si a” tihna a ni (Johana1:14).

Thu ‘Logos’, Pathian ‘hnenah’ ‘pros’ a awm dan hi Pathian kiang emaw a bul hnai emawa awm angin Trinity ringtuten an sawi leh bawk a. Pa leh Fapa chu mihrang pahnih nih tir an tum vang mai a ni. Pa kianga Fapa awm khawvela tirh thlak anga sawi an duh vang a ni. ‘Hnenah’ tih hi Greek tawng chuan “Pros” a ni a; chu chu Saptawngin ‘with’ tia lehlin a ni. ‘Hnenah tihna ‘pros’ hi 1Johana 1:2 thuah pawh khan ‘pros’ hi hman a ni a. Chutah chuan chatuan nunna chu Pa hnenah ‘pros’ a awm thu a sawi a. Nunna chu Pa kiangah emaw bulah emaw chuan a awm lova, Pa thinlung chhungah chuan a awm a ni. Chutiang chi chuan ‘Thu’ pawh chu Pa thinlung chhungah a awm a ni. Pa Pathian thinlung chhunga remruatna ngaihtuahna chu Mihringah-Fapaah a lo chang ta a, Pathian chu mihringah a lo chang kan tithei ta a ni.
Artui Tehkhin Thu:
Isuan tehkhin thu hmangin thu a sawi fiah thin a, chutiang chu beiseiin Johana bung khat chang 1-14 thu leh bung 3:16-17 thu hi sawifiah nan Artui (egg) tehkhin thu atan kan hmang ve ang. Artui pakhat hi Pathian pakhat sawifiah nan kan hmang dawn a ni. Artui hi Trinity sawifiah nan kan hman dawn chuan Artui pum thum kan hmang ang. Nimahsela Pathian chu pakhat chauh a nih avangin Artui pum khat hmangin kan sawi thei a ni.

Helai thu hlawm Johana 1: 1-14 thua Pathian mihringa a lo chan thu sawina hi, Artui (egg) ni ta se, Artui chhung mu ang a ni. Bung 3:16-17 thu hi Artui kawr var ang chu a ni.

Artui I hmuhin a chhung mu [Pathian mihringa a lo chan lai tak] chu I hmu thei lova, a kawr var {mihringa a lo chan hnua a landan chauh chu} I hmu thin. Artui lan dan chu ‘a kawr var’ a nih thin hi. A kawr chhungah a chhung mu chu a awm a. Pathian mihringa a lochan thuah hian, a lai mu, Artui chhung mu ang chu Johana 1:1-14 thu hi a ni.

A dawt lehah chuan Artui chhung mu eng kha sawi tawh lovin Artui kawr var lai chu sawi leh ila. Johana vek hian Pathian mihringa a lo chan dan fiah taka a sawi zawh hnu-ah, a lan danin, Artui kawr var anga pawn lam atanga mihring hmuhdan leh hriat dana a lan dan, Pathian mihringa a lochanna lan dan chu, Bung 3:16-17-ah a sawi leh ta a: “Pathianin khawvel a hmangaih em em a, chutichuan a Fapa mal neih chhun a pe a…Pathianin a Fa khawvelah a tir a ni zawk e” tiin.

Johana hian thil pakhat kawng hnihin a sawi fiah a ni. Pakhatna chu Pathian mihringa a lo chan dan thulai mu, Bung 1:1-14 thu hi a ni a, pahnihna chu mihringte hriat thiam theih dan tur leh mihring thlir dana a lan dan anga a sawina Bung 3: 16-17 thu khi a ni. Tichuan “Pathianin a Fapa mal neih chhun a tir… a pe” tih awm zia chu “Pathian chu mihring Fapa-ah a lo chang” tihna mai a ni.

Pathianin a bula awm, A Fapa, mihringah chang turin khawvelah a tir angin ngaihtuah suh. Pathian Fapa mihringah a lo chang ta angin ngaihtuah suh. Pathian Fapa mihringah a lochan thu Biblein khawi laiah mah a ziak miah lo tih hre reng rawh. Pa-Pathian ngei chu mihringah a lochang a ni zawk e. Pathian chu Thlarau chauh ni tawh lovin, mihring nihna a neih belh tak avang chauhvin Pathian Fapa emaw mihring Fapa kan tita lo thei lo mai zawk a ni.

Pathian remruatnaah chuan mihringa lo chan hi Leilung pian hmain a ngaihtuah lawk vek tawh a. Chu chu Pathian thinlungah chiah a awm. Petera’n “A ni chu leilung pian hmain ruatlawkin a awm ngei mai” a tih pawh hian Pathian thinlung chhunga mihringa lo chan a tumna rilru chu a ni a sawi ni. (1Petera 1:20). Isuan “Khawvel awm hmaa I hnena mawina ka neih khan tunah nangma hnenah mi chawi mawi rawh” a tih pawh hi Khawvel awm hmaa Pathian rilru tho kha a ni a sawi ni. A taka lo lang ngei tur a nih avangin Thu mai a nihlai pawh khan Pathian rilruah chuan awmtawhsa ang chiah a ni.

Pathianin a Fapa a tirh hun pawh hi Dan awm daih tawh hnu, PA-PATHIAN mihringa a lo chan hun chiah hi a ni. “Hun bi a lokim khan fa nihna kan hmuh theih nan, Dan hnuaia awmte chu tlan turin, Pathianin a Fapa, hmeichhe hrin (made of woman) Dan hnuaia lopiangin a tir chhuak ta a” tih thuah hian Pathianin a Fapa a tirh hun chu Pathian mihringa a lo chan hun chiah hi a ni.(Galatia 4:4-5). Paula’an “A Fapa a tir” a tih leh Johana’n “A Fapa a tir” a tih hi Pathian mihringa a lo channa sawina an ni ve-ve tih kan hrethiam thei tawh ang.

9.‘Ka Fapa’ Tih Leh ‘Ka Pa’ Tih Hi:
Fapa a nihna taksa kha chu hmun tinah a awm thei lova; Thlarau a nihna chuan hmun tinah a awm a, “Ani chu engkim chungah a awm a, engkim fang chhuakin a awm bawk a; engkim chhungah a awm bawk a ni” [Ephesi 4:6]. A Pathian nihna atang chuan “Ka Fapa” ti turin a taksa mai nilo, van pawh a luah khat reng a, chumi dinhmun atang chuan “Ka Fapa” a ti thin tih alang reng a ni. Isuan “Ka Pa” a tih zawng zawng hi mihring a nihna anga Thlarau a nihna A taksa leh Van luah khat tlattu a kohna a ni. “Ka Fapa” tih zawng zawng hi Thlarau a nihnaa a tisa taksa a kohna a ni.

“Ka Pa” tih leh “Ka Fapa” tih thu hi nangmah atang bawk khan hriatthiam a awl ber ang. Damlai thla I nei tih han ngaihtuah phawt la, I thlarau chu nangmahah khan a awm renga; I thlarau kha lei leh Vanah khat ve tase chuan Isuan ka Pa a tih leh ka Fapa a tihtheihna chhan I hrefiah mai tur a. I thlarau lei leh Vana khat chu tawng ta se, I taksa leia awm kha be ta se “Ka fapa” ti tase; I taksa chuan I thlarau chu “Ka Pa” tilet ve ta bawk se- chutiang thil chuan a ni Isua hian “Ka Pa-Ka Fapa” a tih thin ni.

I thlarau leh I taksa chuan mifamkimah an siam che a, thlarau leh taksa I ni. Khawii zawk nge I nihna? Thlarau I ni a, taksa I ni bawk. I thlarau tello chuan I taksa chu thi a ni. I Thlarau pawh I taksa tello chuan mi famkim a nilo. An inbelhbawma engzat nge I nih tak? Pakhat I ni. Chutiang chiah chu Isua hi a ni. Amaha Thlarau awm chu Pa a nihna chu a ni.

Isua chu Chatuan Pa a ni kan tih hian mihring a nihna kan sawi ngai lova, Thlarau a nihna zawk kan sawi thin a ni. Isua chu mihring fam kim a ni a, a mihring taksaah chuan “Pathian famkimna tinreng chu taksa neiin a awmreng si” tih a nih avangin Pathian famkim a ni bawk a ni. (Kolossa 2:9). “Pathian famkimna tin reng Isuaah a awm” tih thu hian Chatuan Pa, Thlarau chu Isua-ah a awm tih a sawi tel a ni. “Pa chu keimahah a awm tih miring rawh u” a tih kha. Chumi avang chuan Isua Krista hi Fapa chauh ni lovin Pa a ni bawk a ni. Chumi avang chuan Alpha leh Omega a ni thei a; a Hmasaber leh a Hnuhnungber a Bul leh a Tawp a nithei a ni.[Thupuan 22:13].

Pathian mihringah a lo chan hian Hmuntina awm thei a nihna Thlarau kha a sawng te ta sawt lova, tihchhiatin a awm lova, Niminah nen Vawiinah nen Isua Pathian nihna Thlarau chu kumkhua pawhin a pangngaiin a awm reng fo dawn a, a danglam thei lo a ni. [Hebrai 13:8]. Mihringah a lo chan lai pawh hian Lei leh Vanah a la khat reng a, a mihring taksa tetakte nangmah ang tiat vel kha Pa nihna Thlarau chuan a luahkhat reng a, chumi avang chuan “Kei min hria ni ula, ka Pa pawh in hre tawh tur, tun achinah amah in hria e, amah in hmu tawh bawk” a ti a nih kha. (Johana 14:7-11). Thlarau a nihna chu Isua taksa In chhungah chauh a awm lova, Lei leh Van a la khah reng avangin Van atang pawhin “Ka Fapa” tiin Amah leh Amah a inko thei em em a ni.



Chumi dinhmun atang chuan Jordan luiah a taksain baptisma a chan lai khan “Ka Fapa” a ti a. Thlarau thuro anga rawn inlar pawh kha Thupuana Pathian Thlarau pasarih kha kan hriatthiam chuan hriatthiam mai awm a ni. Engkimtithei Pathian chu tum khatah, hmun tamtakah landan hrang sang tamtak pawhin a inlar thei tih ringlo tunge awm?


Lei leh Vana khat, Van leh Vante Vanah pawh lenglo, Thlarau-Pathian kha mihringah a lo chan hian, a tet phah sawt chuang lova, Hmuntinaawm thei a nihna tak kha tihchhiatin a awm lova, chhe thei lah a ni hek lova, danglam ngailo Thlarau a la ni reng a ni. Pa a nihna a bo thei lova, mihringah lo chang mahse Lei leh Van a la luah khat reng tho mai a ni. “Mihring Fapa Vana awm hi” a intih lai khan mihring a nihna a sawilo tih a lang chiang a, Thlarau-Pa a nihna zawk a sawi a ni [Johana 3:13]. Chumi avang chauh chuan a ni “Hmasabera leh Hnuhnungbera, a Bul leh a Tawp” a nih theih ni.

A taksa tetakteah khan Hmuntinaawm a nihna zawng zawng kha hnawhmuka khungkhawm theih a nilo. “Hei hi ka Fapa duh tak, ka lawm em em chu a ni, Ama thu ngai rawh u” rawn titur khan Thlarau danglam ngailo, Pa a nihna chuan Van hmun a la luahkhat tlat reng a ni. Van hmun luah khat chungin Isua taksa In mihringah khan a awm si.

A taksa chu Lei leh Vanah a khat bik lo, mihring taksa a nive miau va, mihring dangte ang bawka lungngai thei, mut chhuak, riltam tui hal chau thei thi thei a ni; chuvangin mihring a nihna chuan Thlarau a nihna chu “Ka Pa” a tilo theilo a ni.

Nang chuan I thlarau kha “Ka pa” I tive thei lova mihring thlah I nih avangin. Isuaah erawh chuan chu chu a dik ve thei lo. A chhan chu Isua chu mihring Josefa chi atanga lo piang a ni lova; mihring zingah “Ka Pa” tia koh tur a nei ve lo. Thlarau Thianghlim lak ami a nih avangin, Amaha awm Thlarau Thianghlim, Chatuan Pa lo kha chu “Ka Pa” tih tur reng reng a nei lo.

A tisaa a tawng pawh kha Thlarau atanga lo chhuak a ni bik a; chuvangin Isua thusawi chu Thutak hlang a ni. Isua thusawi chu Thlarau atanga lo chhuak a nih bik avangin “Ka thusawi hi Thlarau a ni” a ti mai reng a ni.

Chuvangin Isua thusawite kha sawi chhawngin thian inkawm khawm nan hmang ta ila, thil mak a lo lang thuai thin a. Isua thusawi sawi chhawn hi tawngtaina nen a intluk fo thin a. Tawngtaina ai pawhin thil a tithei zawk fo thin a ni. Chumi I hriatfiah theih nan chuan Isua zirtirna kha damlo bulah han sawi han sawi mah teh. Damlo chu a lo dam mai ang. Isua thusawi chu Thlarau a nih bik tlat avangin A Thu-ah khan Isua a awm nghal a, A Thu ringawt pawh hian damlo a tidam thei a ni. “Thu chauh sawi la, ka fa nu a dam ang” tih pawh kha a dik tlat a ni.

Isua chu Thlarau Thianghlim lak a mi a ni a, Thlarau Thianghlimin a raitir a ni tlat a; chumi avang chuan mihring taksa Isua chu Thlarau Thianghlim taksa neih chhun a ni a “A Fapa mal neih chhun” tih hi a dik chiah reng a ni. Johana’n “Pa Fapa mal neih chhun” a tih hian Thlarau Thianghlim chu Pa a ni tih kan lo hre thei ta a ni.

“Ka Pa” tih leh “Ka Fapa” tih tawngkam hian tawp Ni a la nei dawn a ni. He tawngkam hi kum khuain Pathianin a hmang reng dawn lo. Pathian mihringa a lo channa hna zawng zawng thawh zawh a nih hnu-ah leh Rorelna Ni hnuhnungber zawh hunah chuan “Ka Fapa” tih leh “Ka Pa” tih hi hmanna tur a awmtawh lovanga; Fapa nihna chu Pa Pathian a nihnaah a inhlang lut tawh anga, Fapa nihna chu Pathian ke hnuaiah thihna te nen rahbehin a awm anga [1Korinth 15:27-28], a tham ral hlen tawh anga, kumkhuain thihna a hnehna taksa kha nei hlenin Lalpa chu pakhat chauh a ni reng tawh ang.

“Fapa ngei pawh chu a ke hnuaia engkim dahtu ke hnuaiah , dahin a awm ve ang, Pathian chu engkima Engkim a nih theih na turin” tih thu kha Pa leh Fapa Pathian hran ve ve anga ngaih phahna tur a ni lo. Fapa nihna chu a ral tawh dawn a ni” tihna mai a ni. Chutiang ni lova, Pa-in a Fapa [mihring in-pafa anga mihrang] Pathian ve bawk rapbet turah kan ngaih mai chuan, Fapa chu Vanramah pawh a awm ve dawnlo tihna tluk daih a ni ang.

Engkim a ke hnuaia Pathianin a dah tur chu :- A hmelmate zawng zawng an ni phawt a; thihna a ni leh a; chumi zingah chuan Fapa a tel dawn a ni. Pathian hmelmate leh thihna chu hremhmunah an kal ang. Fapa chu hremhmunah a kal ve dawn em ni? Hemi thu hian a sawi chu, Fapa nihna hmanga a hnathawh zawng zawng a zo tawh dawn a; Fapa nihna chu a ral tawh dawn avangin, Pathian a nihna ke hnuaiah Fapa a nihna hnathawh chu thihnate nen khan an awm vek tawh dawn tihna chauh lo chu engmah a kawk lo. “Fapa sawisel chu ngaihdam an ni ang” tihte nen khan a thuhmun reng a ni.

Pa leh Fapa mihranga ngaitu tan chuan he thu hi hrilhfiah a harsa khawp ang. Fapa nihna mai kha a bo tawh dawn tihna mai a ni. Fapa bawih hna thawhna hmanrua mihring taksa kha a ral tawh anga, Pa Pathian a nihnaah a in hlang lut tawh dawn tihna a ni. Chutah chuan Isua chu, Engkima Engkim a nihna pangngaiah khan in hlanglutin, ngai a awh leh tawh ang tihna a ni. 1Korinth 15:25-28.



Chumi hunah chuan tumahin Pathian chu an hmu phir tawh lovanga, phir hnihin emaw phir thum Trinity angin an hmu ngai tawh lovang. Pathian chu kan hmu anga:- “Mi Nunga chu ka ni; Ka lo thi a, nimahsela ngai teh; kumkhua atan ka lo nung leh ta; thihna leh mitthi khaw chahbi pawh ka nei” titu Isua Krista chauh kha kum khuain Pathian hmel kan hmuh tur awm chhun chu a ni dawn a ni. [Thupuan 1:18].


1   2   3   4   5   6   7   8   9   10   11


The database is protected by copyright ©hestories.info 2017
send message

    Main page