Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana


“Ka Pa I Kutah Ka Thlarau Ka Kawltir A Che”



Download 499.51 Kb.
Page6/11
Date conversion29.03.2017
Size499.51 Kb.
1   2   3   4   5   6   7   8   9   10   11

10.“Ka Pa I Kutah Ka Thlarau Ka Kawltir A Che”:
Pa Pathian chu mihringah a lo chang tih kan hriat thiam chuan he thu hi hriatthiam a har lo. Isua chu Hmeichhe hrin a nihve avang khan a mihrinna lam hi hmeichhia atang khan a lo insiam ve a; chuvangin mihring famkim a ni thei a ni. Mihring famkim ni tur chuan mihring thlarau ang a neih ve a ngai a. Mihring thlarau neive mahse nang leh keiin thlarau kan nei ang hi a ni velo, mihring thlah hlang a nih loh avangin.

Mihring a nihna thlarau chu Pathian a nihna Thlarau tho kha a ni lo thei lo. A chhan chu:- Thlarau Thianghlim tisaa insiam, Thlarau Thianghlim lak ami a nih tlat avangin. [Mathaia 1:20].

Isua Thlarau hi Thlarau Thianghlim, Pa Pathian kha a ni tih kan hriat theihna chhan chu “Thlarau Thianghlim lak ami a nih vang a ni” [Mathaia 1:20].

Chumi a nih loh chuan a nih leh Isua hian Thlarau hi khawi atangin nge a neih le? Thlarau Thianghlim lak ami tih anih avang hian, Thlarau Thianglim Pa ngei kha Isua mihrinna Thlarauah a insiam tihna a nilo thei lo.

Pathian chu mihring taksa neiin a insiam thei ta ang chiah khan Isua Krista mihrinna thlarau pawh hi Pa Pathian Thlarau kha mihring thlarauvah, Isua Thlarauah a insiam thei a ni lo thei lo. Chutiang a nihloh chuan nunna Thlarau petu tur dang an awm miah lo. Nunna Thlarau petu tur ber Pathian kha mihringah a lo chang a ni miau si a. Chuvangin Isua Krista Thlarau chu Chatuan Pa, Thlarau Thianghlim tho kha a ni a; Thlarau Thianghlim lak ami a nih avangin. A mihrinna Thlarau chu Chatuan Thlarau ngei kha a ni.

A mihrinna Thlarau hi Pa Pathian tho kha ni mahse, bawih anga a insiamna thlarau a ni a, thi khawp hiala tuar tura Pathian inngaihtlawmna Thlarau a nih avangin a lungngai thei a, a rum bawk a ni.

Pathian mihringa a lochannaah hian Thlarau Chatuan Pa kha Isua mihrinna thlarauvah a insiam lai tak hi hriatthiam har lai ber mystery a nihna tak chu a ni. [1Timothea 3:16].
Isua mihrinna thlarau hi Chatuan Pa Thlarau kha ni mahse, bawih angah a insiam miau avangin a tawrhna zawng zawng kha a lemin a tuar lova, mihring a nihna diktakin a ni a tawrh ni. Pa a nihna leh Fapa a nihna thlarau chu inzawm sa a ni a, thil pakhat a ni a, tui luang ang maia inzawm a ni. “Ka Pa I kutah ka thlarau ka kawltir a che” a tih pawh hian a mihrinna a thih theih nan Pa a nihnaah a inkawltir mai a ni. Nang leh keiin mihring thlarau kan nei ang hi a nive hauh lo a ni. Thihna hneha a thawhleh hunah, Fapaa a lo chan chhan hna zawng zawng a thawh zawh hunah chuan mihring a nihna thlarau chu Pa a nihna pangngaiah a awm leh mai dawn a ni.

“Eloi, Eloi, lama sabak thani” a tih khan “Pa chu keimahah a awm” a tih thin khan a mihrinna chu thi turin a kalsan ta a; chutiang a nihloh chuan a thi thei dawn si lova. “Ka Pa I kutah ka thlarau ka kawltir a che” a tih leh hian a mihrinna thlarau dinhmun tlawm tak leh tuartu nihna thlarau kha, a nihna ropui zawk Pa nihna kutah a inhlan tihna a ni. “Pa chu keimah [mihrinna bawiha a insiamna] aiin a ropui zawk” a tih ang khan “Pathian bawih anga a insiamna” mihring thlarau kha, danglam ngailo a nihna Thlarauah khan a inkhunglut ta a, a inchhunglut leh ta tihna a ni. Thihna a hneha a thawhleh hnuah chuan, a mihrinna thlarau leh Chatuan Pa nihna thlarau chu pahnih anga ngaih theih turin a awm leh thei ngai tawh lovang a; Thlarau pakhat chauh a awm a tih ka a dik reng dawn a ni; a hmel pawh Ni sat vanglai ang maiin a eng tawh bawk a ni.

11.Mahni In-Palai Chawp Pathian:

Kan sawi takte kha a fiah zolo a ni mahna. “Palai reng reng mi pakhat lakah palai a ni ngai lo, Pathian erawh chu pakhat a ni” tih hi chu a fiah thei tawh ang [Galatia 3:20]. Mipain Nupui a neih dawnin mi pahnih inkarah palai a kal tawn thin a; Pathian erawh chu Amah leh Amah a inpalai chawp a ni. Pathian ngei kha palai hnathawka a lokal avangin Pathian leh mihring inkara palai chu pakhat a ni a, Pathian a ni tihna a ni. Hei hi Pathian chu mihringah a lo chang a ni tih sawina kawng dang leh chu a ni. “Pathian pakhat chauh a awm a; Pathian leh mihring inkara palai pakhat chauh a awm bawk a, Amah chu mihring a ni; Krista Isua, mi zawng zawng tlan nana inpea chu: chu chu a huntak zela hriattirin a awm tur a ni” tih hian Pathian mihringa lochanga palai hna thawktua chu Isua Krista a ni tih a sawifiah hle lo em ni le? [1Timothea 2:5-6]. Mihring leh Pathian inkara palai hna thawktu chu Pathian Isua a ni a, Amah leh Amah a in palai chawp avangin mi pahnih inkara palai ang ni lovin pakhat [inkar neilo] a ni tih Pauala hian a sawi ta a ni. Hemi thuin a tihlan chu Isua Krista chauh hi Pathian chu a ni tih hi a ni.

12.A Bul Leh A Tawp : Isua Krista:

Pathian Fapa Isua, Mihring Fapa Isua Krista, Pa Pathian hnena “Ka Pa” titu kha, Pa Pathian pawhin “Ka Fapa” a tih ngei kha, Amah chauh hi PATHIAN pakhat awmchhun chu a ni. Chu chu hriatthiam a har em avangin kan hriatthiam theih dan tur kawng zawngin thu tam tak kan sawi ta. Tuna kan sawi turah hi chuan “Pathian bawih”, “Pathian chhiahhlawh” thuawih bawiha insiam khan Chatuan Pa nihna hming ropui zawng zawng kha a nei let leh ta vek mai a ni tih kan hmu tawh ang.

Zawlnei Isaia hnena “Kei hi Hmasabera chu ka ni a, Hnuhnungbera pawh ka ni; keimah lo chu PATHIAN dang reng reng an awm lo” titu kha Pa Pathian chu a ni a. (Isaia 44:6). Heng nihna hming leh chu aia famkim zawk nihna hming zawng zawng hi Isua Krista chuan a pu hlen kumkhua tawh dawn a ni. [Thupuan 1:8. Thupuan 1:18. Thupuan 22:13:]

Unau duh tak Trinity rinna I phatsan hma loh chuan Thuan bung 22 chang 13 thu hi I pawm thei ngai lovang. Trinity rinna paih bo la, Thupuan 1:8 leh 1:18 leh 22:13 thute hi thinlung damtakin mam thlapin I hrethiam ang a; Isua Krista chauh hi Pathian awm chhun chu a ni tih hlim takin I pawm thei ang.

“Kei Alpha leh Omega ka ni” LALPA PATHIAN, Awmmeka leh Awmtawha leh Lolaawmtura, Engkimtitheia Isua Krista chuan a ti a. Thupuan 1:8.

Fapa a nihna kha a lang tlem tial tial tawh dawn a, Vanah a lawn hnuin, Pa a nihna ropuinain a inthuam tawh a, Rorelna hnuhnungber zawh hunah chuan chatuan atan Tlanna hna a thawhna taksa khan ropuina a sin kumkhua tawh ang.

A chatuan hmel tur chu Johana hmuh atan reilote a in lantir chhin a:- A lu leh a sam chu beram hmul angin a var a, vur ang maiin; a mit chu meialh ang a ni ta daih mai a, a aw chu tui tamtak ang maiin a ri hum hum a, a hmel chu Ni sat vanglai angin a eng a; tunge hai thei tawh anga, tunge khengbet nawn leh ngam tawh ang? Johana pawh Isua ropuina hmaah chuan thi ang derin a tlu a. Mahse Isua chuan : “Hlau suh, kei Hmasabera leh Hnuhnungbera leh Mi Nunga chu ka ni, ka lo thi a, nimahsela ngai teh kum khua atan ka lo nung leh ta a ni. Thihna leh Mithi khaw chabite chu ka nei bawk a” a rawn ti a. [Thupuan 1:17-18].

Khawvel hian kan hre lovang tih a hlauthawng a ni mahna; Vana atangin a rawn inpuang nawn leh a, zawlnei Isaia hnena a inpuanna ang chiah kha a ni:- “Kei Alpha leh Omega, a Hmasaber leh a Hnuhnungber, a Bul leh a Tawp ka ni” tiin. [Thupuan 22:13]. Isua Krista chauh lo chu Pathian dang reng reng an awm lo.

13.Isua Krista Hnenah Tawngtai Rawh:-

I Pathian hnenah tawngtai rawh. Pathian chu Thlarau ni mahse I thian mihring I biak anga nel taka I biak theih nan mihringah a lo chang tawh a; a mihring hmingin be mawlh mawlh tawh mai rawh. Alpha leh Omega, Lalpa Pathian Awmtawha leh Awmmeka leh Lolaawmtura, a Hmasaber leh a Hnuhnungber, a Bul leh a Tawp: Isua Krista hnenah chauh chuan tawngtai rawh.

“I Fapa Isua Hmingin ka dil a che” I tih chuan I rilruah Pathian pahnih I bia a ni ang. Pa pakhat Fapa pahnih. “Isua hmingin ka dil a che” I tih rikngawt chuan I rinna ang takin I lang ngam lo tih a langa; mahse I langfiah khawp: Pa leh Fapa mihrang angin I ngaihtuah tih a lang. Hetianga tawngtai thinte hi Pathian pathum awm ringtute an ni thin a, hetianga an tawngtai hian Thlarau Thianghlim chu an be ve thin lo. Pathian pathum hrang theuh awmin an ring si a.

Lalpa Pathian, Awmtawha leh Awmmeka leh Lolaawmtura Isua Krista hnenah chuan tawngtai la “Lalpa Isu, I hnenah ka dil a che” tiin emaw “Lalpa Isu Krista I hnenah ka dil a che” tiin Isua Krista hnenah chauh tawngtai mai thin rawh.



THUTHLUNG BAWM
BUNG 3
ISUA KRISTA THISEN : SUAL NGAIHDAMNA

Hemi bungah hian Isua Krista Thisen hi sual ngaihdamna a ni tih kan sawi dawn a. Kohhran hi Thisen chauh hmanga din a ni lova; Tui leh Thlarau Thianghlim tel lovin a ding thei lo. “Tin , nang Petera (Petros) i ni tih ka hrilh bawk a che; he Lungpui (Petra) chungah hian Ka Kohhranho (Church) ka remchho anga, Mithi-Khawkulh-kawngkharte chuan, chu chu an ngam lovang. Van Ram chahbite ka pe ang che a, Lei chungah engpawh i phuar apiang Vanah phuar a ni anga; Lei chungah engpawh i phelh apiang Vanah phelh a niang” Isuan a ti a. (Mathaia 16 :18-19).

Isuan, a zirtirte hmangin Kohhran pakhat a phun a, Lalpa pakhat, Rinna hmun khat, Baptisma hmun khat (One Lord, One Faith, One Baptism) vuanin Kohhran diktak chu a ding a ni. Thuthlung Thar Kohhran Member diktak ni tur hian Pathian leh mihringin tihtur kan insem a. Pathian tihtur leh mihring tihve tur hi ngun takin kan en ang a, chhandamna chan loh palh hlau em em, mi fimkhur leh inngaitlawmte tan chuan Pathian chhandamna kalkawng hi a lang fiah em em a ni.

Chhandamna kan chan theih nan kan thiltihtheih miah loh Pathianin min tihsak a, chubakah kan tihve theih, kan zawm tur thupek min pe bawk a ni. Pathianin a tihtur a ti ang a, mihringin kan tih tur kan tive ang. Tichuan Isuan min chhandam ang.

Pathian chuan feltakin rem a ruat a. Nang leh kei hi chhandama kan awm theihna turin thil pathum min pe a. Thil pathum min tihsak kan ti thei bawk a. Thil pathum hmangin min chhandam kan tithei bawk a. Nang leh kei hian Pathian chhandamna famkim ngei diktaka kan chan theihna tura Pathianin thil pathum min pek leh min ruat sakte chu hengte hi an ni :- THISEN, TUI, THLARAU te hi (I Johana 5:8).

ELIJA MAICHAM :
Heng thil pathumte hi Thuthlung Hlui ah khan a hlimthlain, a tak ni bawk siin an lo hmang tawh thin a. Entir nan Elija maichamah khan:- Thisen, [Isua Krista Thisen entirna] ran thisen kha a tak ngeiin a chhuak a, a luang a. Tui {Isua Krista hming sual ngaihdamna Baptisma Tui entirna} pawh, entirna mai ni lovin a tak ngeiin Maichamah khan luang dul dul khawpin tui an leih tling a nih kha. Mei {Thlarau Thianghlim Baptisma entirna} pawh Pentecost Ni aia nasa zawkin Mei alh angin a rawn in lara, Maichama sa leh tui tamtak kha a rawn kang ral vek a nih kha. Elija maichamah khan Kross hlimthla kan hmu a ni.
A TAK TAK CHU A LO THLENG TA A:

Thuthlung Thar hunah hian Thisen leh Tui leh Thlarau Thianghlim hi a tak tak kan lo hmua, kan chang ta bawk a, kan vannei em em a ni. Heng thil pathum hmang hian Isuan chhandamna thuah thum emaw chhandamna kulh thuah thum emaw angin min chhandam a, hei hi chhandamna kulh chhung chu a ni. Chhandamna famkim neih tumin Bible i han chhiar ta a:- Isua Krista Thisen chanchin leh a hnathawh i chhiar lai chuan Isua Krista Thisen chauh hi Chhandam nan a tawk a nih hi tih mai tur a ni. Thisen chauh hi chhandamna famkim angin a lang a ni.

Mahse Rome bung 8-ah Krista Thlarau neilo chu Amaha mi a ni lo tih i han chhiar leh ta a. Johana 3:5-ah tuiah leh Thlarauva pian thar a ngai tih I chhiar leh ta bawk a. Isuan “Thlarau Thianghlim nei rawh u” a tih thu Johana 20:22-ah I han chhiar leh ta a. Thlarau chu Thisen a ni tawh hauh lo tih i hre bawk si a, Chhandamna famkim chan nan Thlarauva pian thar angai tih i lo hmu chhuak leh ta a.

Chutih lai mek chuan:- Marka 16:16-ah “A ringa baptisma chang chu chhandamin an awm anga; a ringlo chuan thiam loh an chang nag” tih thu leh, Tirhkohte 2:38-ah:- “Sim ula in sual ngaihdam nan Isua Krista Hmingin Baptisma chang theuh rawh u” tih i chhiar leh ta a. Tui baptisma pawh a tul a ni tih i hmuchhuak leh ta a. Thisen a tawk, Thlarauva pian thar a tawk, i tih mai chuan Baptisma chu i hnawl ta bik a. Baptisma pawh Isua Krista Thupek tho a ni si a, hnawl bik neih chu a diklo tih I hmuchhuak leh ta a. Heng thil pathumte hi hruithuam hrual anga inbelhbawm leh thawk tlang an ni tih I lo hmuchhuak thei ta a ni.

Heng thil pathumte zingah hian duhloh bik I neih chuan, mahni inthiam chawpin Baptisma tel lovin, Thisen ringtu chauh pawh ni ila chhandamna chu ka chang tho ang ti mah la, I Nun chhungril lamah thlamuanna kim i neilo tih i inhmu mai ang. Ka thla a muang i tih pawhin thlamuang lui, thlamuanna kim nei phaklo, thlamuang lui hram hram i ni mai ang.

Chutichuan Chhandamna famkim chang tur chuan Thisen leh Tui leh Thlarau Thianghlim te hi pakhatmah hnawl lovin changkim la, thihna pawh i hlau lo vang a, Setana leh ramhuaiho pawh I hlau lo vanga, Rorelna Ni pawh i hlau lo vang a, khawi hmunah pawh thlamuangtakin i awm reng thei tawh ang.

Heng thil pathumte hi ngaihfin lo turin fimkhur hle mai teh. Heng thil pathumte hi Pathianin a pe che a, pakhat mah hi hmaih nei lovin i chang kim ngei ngei tur a ni a; i neikim thap tur a ni. Heng thil pathumte hi i neihkim loh chuan Pathian chhandamna chu a famkimin i chang thei lovang. Nangma ngaihdan leh i remruatnain Pathian inchhandamtir i tum tur a ni lova, Pathian thu ang zel zawmin Pathian chu inchhandamtir zawk ang che.

Pathian chhandamna hmanrua pathumte hi a mal te-tein, tawi te-tein sawifiah kan tum ang. THISEN leh TUI leh THLARAU te hian mihring chhandam turin mihringah hian mawh phurhna lai bik leh hnathawhna hmun chanpual bik, ram chan an insem theuh a ni. Thisen chuan thinlung atangin taksa chhunglam pumpui a chang a. Tui hian Taksa pawn lam pumpui, taksa peng zawng zawng a chang leh a. Thlarau hian kan thlarau pumpui a chang leh a ni. An chhandam tur chanpual a hrang hlawm a ni. Feltaka ramri kham sak theih nilo mahse, a mal theuh hian taksa pumpui an chan theuh laiin, chhandama tihthianghlim tur lai bik, mawhphurhna lai bik an nei hlawm a ni. Tirhkoh Paula’n heti hian a sawi kha :-

Isua Thisen avang chuan...kan thinlunga chhia leh tha hriatna thalo chu, (Isua Thisena) thehfaisaka awm a, kan taksa pawh tuifima (baptisma channa tui fim tihna) buala awmin, rinna famkim nei a, thinlung takzet puin i hnaih ang u!” tiin. (Hebrai 10:19-22).

Tirhkoh Paula hian thinlunga sual thehfaitu chu Isua Krista Thisen a nih thu a sawi a; Chatuan Puithiam a nihna anga Isua Puithiamna hnathawh a sawi a ni. Kan taksa pawnlam sual tlengfaitu chu Thisen nitawh lovin, Tui, Isua Krista Hminga Baptisma channa Tui chu a ni tih a sawi a ni. Chutih lai chuan Isua thisen chuan kan thlarau a silfai lova, Tui baptisma pawhin kan thlarau chu a silfai thei lo. Kan thlarau chhandam tur chuan Thlarau Thianghlim chu a tawk a; kan chang ngei tur a lo ni leh ta a ni. Thlarau Thianghlim chuan kan thlarauah ngei hian a ni hna a thawh a, min awmchilh thin ni.

Chutichuan Thisen, Tui leh Tharau Thianghlimte hian chhandamna thuah thumin min chhandam a. Chhandamna Kulh thuah thumin min hung bawk a. Inthurualin leh thawkhovin mihring pumpui hi min chhandam a ni. Chu chu Pathianin chhandamna famkim kan chan theihna tura a remruat dan chu a ni. A mal chauh lak a, kan duh tawk mai chuan, Pathian Thu-ah hnawl lai leh duhloh lai bik kan nei tihna a ni a; a pathum ngei hian kan pawma, kan chankim vek a ngai a ni. Chungte chu a mal te-te-in lo sawifiah dawn ila:-


ISUA KRISTA THISEN : SUAL NGAIHDAMNA:-
Pathian remruatnaah chuan THISEN tellovin, sual ngaihdamna a awm thei lova. (Hebrai 9:22). Pathian chuan Ama thisen ngei hmanga min chhandam a duh a. Nimahsela Pathian chu THLARAU a nisi a (Johana 4:24). THLARAU a nihnaah chuan PATHIAN chuan thisen a nei bawk si lova (Johana 1:13; Luka 24:39). Chuvangin Thisena min chhandam turin Mihring-ah a lo chang ta a, taksa min buatsaihsak ta a ni (Hebrai 10:5).

Pathian thilsiam zawng zawng, thisen nei chi-a a siam tawh phawt chu, an thisenah Pathianin nunna a dah a. “Thisen chu eilo turin fimkhur rawh u; thisen chu nunna a ni si a; Nunna chawpin sa in ei tur a ni lo. In ei hauhlo tur a ni; tui angin lei-ah in leihbaw mai tur a ni. In ei tur a ni lo!” (Deuteronomy 12:23-25). Thisenah chuan nunna a awm avangin ran thisen takngial pawh Pathianin Thuthlung Hlui hunah khan in a phal ngai lova. Thuthlung Thar hunah pawh Jentail ringtute hnenah pawh ran thisen in chu khap zui zel a ni bawk a. Sa eithiangte pawh hian thisen an nei vek a, a sa leh a thisen chu an hrehrang thiam a, sa chu an ei a, thisen chu tui angin leiah an leihbua a, an ei-in lova.

Sa thisen ei-in khapna thu chu Jentailte tana ruat Tirhkoh Paulate khan Jentail Kohhrante hnenah an keng kual a, an hnungzuitu Barsaba leh Sila te hian an kengkual a. Kohhranho hnenah an chhiarchhuak a, Paula te pawh an awm ve reng zel a, an hriatpui vek a. Chung thu avang chuan Jentail ringtu Antiokei, Syria, Kilikia rama awmte chu an lo lawm hle a nih kha.(Tirhkohte 15 :1-35). Thuthlung Thara Jentail Kohhrante hian sa rehhlum sa ei te, milem biakna sa ei te, sa thisen ei te, inngaih te an hnawl a ni.

Mihring thisen chu sawi loh ran thisen pawh a zahawm em em a. Thisen chu nunna anih avangin ran thisen pawh zah em em turin Pathianin thu min pe a. Chung ran thisen te chu nunna awmna anih avangin, sual thupha chawina atan Pathianin a pawm a, mihringten sual thupha chawi nan leh sual thawi nan ran thisen an hman chu Pathian remruat a ni thin tawh a ni.

“Nimahsela, chung inthawina-ah chuan kum tinin sualte hriat lehna alo awm fo zawk thin. Bawngpate leh Kelte thisen chu SUALTE tibo thei rual a ni silo” (Hebrai 10:3-4).“Tin, puithiam tinrengin Kawla ni-chhuak chhiara rawngbawlin, SUALTE engtikmaha tibo theilo inthawina pangngai hlan fovin an ding thin” tih a ni bawk a (Hebrai 10:11).

Ran thisen chuan sual ngaihdam hlenna min pe thei lova, sual a tlengfai hlen thei hek lova, nunna a pe hlen thei lova, kumkhaw chhandamna min pe thei si lo. Nimahsela, Pathianin ran thisen takngial pawh zah em em tura thu min pekna chhan ber chu ran thisen aia hlu zawk Ama Thisen ngei min pek a tum vang leh, Ama Thisen meuh chu kan ngaihhlut a; a ropuizia kan hriat theihna turin a ni ngei ang.

Chutichuan Ran thisen in khaptu Pathian chuan Ama THISEN min in-tir a duh ta a; A Thisenah chuan Nunna, Nunna, Chatuana Nunna chu a awm avangin leh sual ngaihdamna chu a awm avangin nang leh kei hi min intir ngei a duh a ni. Kan sualte a ngaihdam theih nan leh chatuan nunna chu kan lo chan theih nan Ama Thisen chu Pathianin min tulh a duh a, kan kawchhungah hian a Nunna Thisen chu lo luanglut sela a duh a, kan thinlung zawng zawng leh kan taksa zawng zawng chu AMA THISEN chuan luahkhat vek se, fan chhuak vek se , BUAL FAI VEK SE A DUH A NI.

Ran thisen ei phallotu khan Ama Thisen in tura min pek a tum tlat si chu a mak ta a ni. A Thisen kan in-loh chuan chatuan nunna kan nei dawn si lova, sual ngaihdamna pawh kan nei dawn si lova, min hmangaihna a nat em avangin Pathianin a thil neih hlu ber Nunna Thisen chu min pek a tum tlat a ni.

A hlutna kan hriat lehzual theih nan ENTIRNA HAN PE ILA: Mihring hliam tuar mek, thisen nasa taka chhuak a awm a. Nunna thisen a neih tlem avangin a thi dawn ta a. “Thisen pek belh chuan alo nung leh thei ang”, Doctorin a ti a. Nula leh tlangval pian tha deuhte , tlawmngaia nunna thisen petu tur an zawng ta a. An lokal khawm a. Blood Group A, B, AB, O te an han endik a. Thisen Unit khat theuh an pe a . Hliam tuar thisen mil chu hliam tuar thi mai tur taksaah chuan an han thun lut a. Hliam tuar chuan nunna thisen a lo nei tamtawk ta a. A lo dam leh ta a. Tunge lawmlo awm ang. Mihring thisen chuan sual ngaihdamna keng tello mahse dam chhung ni engemawzat chu a pek belh thei a a hlu e. Isua Krista Thisen erawh chuan damchhung Nite a tisei a, Chatuan chatuana Dam chhung Ni min pe a; chu bakah kan thinlunga sual bet tlat, sahbawna silfai theih loh, tui hmanga silfai phakloh chu luh chilhin hmun leh hmunah a zuk silfai ta a; chu chu a hlu kan ti lo vang em ni? Isua chuan Ama Thisen chu Vein-ah thun lovin, Ka-ah in turin min pe ta a.

“Hei hi Ka Thisen, sualte ngaihdam nana mi tamtak tana chhuak tur Thuthlunna chu a ni, in za-in in rawh u” a ti a. (Mathaia 26:27-28).

“Tupawh ka tisa eia, ka thisen in chuan chatuana nunna a nei tawh, tin, Nikin Ni-ah chuan Amah chu ka kaitho ang” a tita mai a ni.(Johana 6: 54).

PATHIAN chu Thlarau anih avangin thisen a nei si lova. Thisen min pek a duh si avangin Amah ngei chu Thisen nei turin mihringah a lo changta a ni. Bawngpate leh Kelte thisen chuan sualte tibo thei rual a ni silo. Chutichuan Khawvela a lo luh laiin: “In thawina leh thil hlan i duh lova, Kan tan taksa mi buatsaih sak ta zawk a” (Hebrai 10:4-5) tih a nih reng kha.

“Pathian chu tisa-ah a lo chang a” ( KJV) Paulan a ti bawk a. (I Timothea 3:16). Chatuan Pa Pathian kha kan hnenah thisen nei turin tisa-ah alo chang ta a ni. (Isaia 9:6; Matthaia 1:22-23).

Rilru mai ni lovin, ngaihruatna mai ni hek lovin, suangtuahna mai ni hek lovin, tuisik anga kawchhunga luang lut turin, a tak ngeiin a Thisen chu in turin min pe ta a. Ralkhat leh ral thlira ngaihruata Thisen ringtu kan nih loh nan A Thisen in dan tur rem min ruatsaka; chu chu Lalpa zanriah sacrament kan tih hi a ni.

“Tin, no a la a, lawmthu a sawi a, an hnenah a pe a, “In za-in in rawh u; hei hi ka thisen, SUALTE ngaihdam nana mi tamtak tana chhuak tur thuthlunna chu a ni” a ti a. (Matthaia 26:27).

Tin Isuan an hnenah, “Tihtak meuhvin tih tak meuhvin ka hrilh a che u, Mihring Fapa tisa in ei a, a thisen in in bawk loh chuan nangmahniin nunna nei heklo che u. Tupawh ka tisa eia ka thisen in chuan chatuana nunna a nei tawh, tin, nikin ni-ah chuan amah chu ka kaitho vang. Ka tisa hi chaw tak a ni a, ka thisen hi in tur tak a nisi a. Tupawh ka tisa ei a, ka thisen in chu keimahah a awm reng thin, kei pawh amahah ka awm reng thin” a ti a. (Johana 6:53-56).

Tui uain-a chantirtu khan Grape tui a Thisenah a chantir a, an in ta a ni. Lalpa zanriah Sacrament kan kil hian, Puithiam (Pastor) chuan Isua aiawhin Grape tui chu Isua Thisenah a chantir ve anga; “Hei hi Isua Thisen a ni in rawh u” min ti tur a ni lo vem ni ? Isua thisen chu sual ngaihdamna atan leh nunna atan kan in tur a nisi a. Grape tui Isua thisenah chantir thu kan sawi hian Thisen Blood Group A, B, AB, O-ah te a lo chang ang kan tihna kher a nilova; Isuan “Ka Thisen a ni” a tih ang khan tih ve mai tur kan tihna a ni. Tun laia Kohhranten Isua Thisen kan in tak tak em? Kan Pastorte hian Grape tui chu Isua Thisenah an chantir phak tak tak em? Nunna kan neih phah tak tak em? Sual ngaihdamna kan chang tak tak em? Engah nge Isua Krista Nunna Thisen in na-na-na-a Isua Krista Nunna chu kan chan loh teh lul ang le? Sual ngaihdamna Isua Krista Thisen kan in chuan kan thinlunga sual bet tlat thin pawh silfai a ni ngei ang. A fai ta tih pawh hriatna nungin rinthu ni lovin kan hre thei bawk tur a ni ang. Pastor-ten Sacrament an sem dawn hian Chawngheia tawngtaina an neih thin a tul mang e. “Amahah chuan A thisen vanga tlanna chu kan nei a, kan sualte ngaihdamna chu” tih a ni zui zel bawk a. (Kolossa 1:14 KJV).

Dawrah thil kan leiin, a man atan pawisa kan pe a, kan thil lei chu kan nei ta thin ang hian, Isua pawhin a Thisenin, Ama tan min lei a, min nei ta a ni. (Thupuan 5:9-10). Kan man atan pawisa aiah a Thisen a pe a, Ama tan min lei a ni. Ran thisen leh mihring thisen-ah hian kan puante su ta ila, thisen chu kan puanah chuan a lo kai ang a, a bawlhhlawh anga, hak tlak lohvin a lo bawlhhlawh zawk ang. Isua Thisen-ah erawh chuan sual bawlhhlawh kai chu a lo fai zawk anga, a lo var thianghlim dawn a ni. Hrehawm nasa tak (Great Tribulation) atanga lo chhuakte chuan an puante Beram No thisenah an su a, an sufai var sar zawk a ni. (Thupuan 7:14).

Chutichuan Isua Krista Thisen chu kan sual ngaihdamna a ni a, kan nunna a ni bawk a, kan thinlunga sual bet tlat chu kan simna avangin a silfai bawk a; l pawisa aia hlu min leina man a ni bawk a ni. Isua Krista Thisen hi sual ngaihdam nan leh Chhandam nan a tling zan a; nimahsela, Thisen chauh chu a kimlo a ni.

Mi tam takin chhandamna tak tak chu Isua Thisen hi a ni a, Tui Baptisma a ngai tello. Tui Baptisma chu chhandamna atan a tul kher lo. Isua Thisen a tawk, an ti thin. Baptisma tuia hnim phum pawh Isuan chhandamna atan min pek nimahse an hnawl tel bawk.

Tui Baptisma an chan dan a dik loh vangin Isua Thisenah tan an khawh a, inhumhim nan Isua Thisen bak a tullo, an ti mai a ni. Isua Thisen a tawk an tihna chhan dang leh chu, Thlarau Thianghlim Baptisma an chan loh vang a ni fo bawk. Thlarauva piantharna diktak nei phak lovin Pathian hrin ni theiin an inngai bawk thin.

Isua Krista Thisen tello chuan chhandamna chu a famkim theilo. Nimahsela, Thisen chauh chuan chhandamna famkim min pe hauh lo a ni. Isua Thisenah rinna nghat duhlotu chu engtikawng mahin chhandam an ni thei lovang. Isua Thisen hi mihringte ngen chhuah leh dil chhuah a nilo. Ama duhdanin, kan tihve tel lovin, a thlawnin min pe a. Thisen min pekna thu-ah hian tihve theih reng kan neilo. Mihringten chhandamna kan chan theihna tura Pathian hna chanpual chu THISEN min pek hi a ni. Thisen min pek chauh lo pawh chhandamna famkim kan chan theih nan Pathian mawhphurhna liau liau, a tellova chhandamna famkim kan chan theih miah lohna tur thil pawimawh lutuk pahnih a la awm cheu a; Chungte chu Tui leh Thlarau an ni.

Thisen kha sawi nawn leh lawk ila:- Lung (Heart) hi thisen awmna a ni a, Lung-ah thisen a luang lut a, a luang chhuak leh a, a luang lut leh a. Thisen bawlhhlawhte a lo siam thianghlim leh a, taksaah a pump chhuak leh a, chutiang reng reng chuan Lung hian hnathawh chawlhsan lai reng reng a nei lova, Lung chuan a hna a chawlhsan chuan, mihring chu a thi a ni mai.

PATHIAN Mihring Isua Thisen mihringah a lo luan-luh hian, mihring Lung (Heart) chu Pathian thisen chuan a luah a, chuvangin Isua thisen chu mihring thinlung tithianghlimtu a ni a. Pathian Thisen kan tih hian Isua nihna chihnih a, mihring a nihna zawk Thisen chu kan sawi a ni.

Mihringa Isua Thisen hnathawhna hmun chu Heart - Thinlung a ni. Thinlung chu Thluak, ngaihtuahna awmna nilo mahse, Thluak nen inthlunzawm a ni a, rilru leh ngaihtuahna sawi nan, ‘Thinlung’ tiin kan sawi thin. Thinlung sual, ngaihtuahna sual, suangtuahna sual, rilru sualte tithianghlimtu chu Isua Thisen a ni. Thinlung hi mihring rorelna hmun a ni a; remruatna, finna, chapona, sualna zawng zawng awmna hmun a ni.

PATHIAN RINNA leh RINLOHNA awmna hmun pawh Thinlung a ni. Chu tak chu Isua Thisen chuan a luhchilh ta a, Hman laia Thuthlung Hlui huna puithiamin thisen a theh thawt thawt thin ang khan Isua Thisen chuan chhunglamah min luh chilhin kan thinlunga sual awm chu a theh ta thawt thawt a; a luan a, a silfai a, a tithianghlim ta a. Thinlung thianghlim leh rilru thianghlim kan lo nei thei ta a ni.

SUAL SIMNA TUR HMUN pawh hi Thinlung a ni. Thutak hlawm tha leng lawng, “Sim rawh u!” tih thu hmang hian mihring Thinlung laitak hi Isuan a vawm dawt mai a ni.

“Thinlung hi thil zawng zawng aiin

Bum hmang ber, chhe lailet der a ni a;

Tuin nge hrethiam thei ang?” (Jeremia 17:9).

Isuan “Mihring kawchhung ata lo chhuak chuan, chu ngei chuan mihring a tibawlhhlawh thin a ni. Kawchhunga mi, mihring thinlung atangte chuan ngaihtuahna sualte a lo chhuak si thin; Inngaihna te, rukrukna te, tualthahna te, uirena te, awhna te, sualna te, bumna te, hurna te, itsikna te, sawichhiatna te, chapona te, itna te hi; chung thil sual zawng zawngte chu kawchhung atangin a lo chhuak a, mihring chu a tibawlhhlawh thin” a ti a. (Marka 7:20-23). Hetiang hi mihring pianpui thinlung chu a ni. Hei hi mihring pianthar hma-a mihring mizia chu a ni a.

He thinlung hi thlak tawp a ngai a, tihthianghlim a, silfai a nih loh chuan Vanram a lut dawnlo a ni. Thinlunga sual awm zawng zawng hi tihhlum vek a, sim vek a ngai a ni. “Thinlung thar ka pe ang che u, in chhungah Thlarau thar ka dah ang” Pathianin a tih reng kha. (Ezekiela 36:26).Thinlung Thar Pathian Thinlung ang, kan lo neih hunah chuan Pathian duhzawng chu kan duhzawng a lo ni ve tawh ang a; Pathian duhloh zawng chu kan huatzawng leh duhloh zawng alo ni ve tawh ang. Chu chu Thinlung Piantharna chu a ni a, ‘Sim hmingpu’ a lo ni tawh ang. He mihring thinlung bawlhhlawh takah hian Isua Krista thisen chu a lo luanglut tur a ni ta a, Mihring Thinlung chu Isua Thisen chuan a bualfai ngei tur a ni. Nimahsela, Isua Thisen chu a pawng-a-takin i thinlungah a lo luanglut ringawt thei lova. A lo luanluh i phal a ngai a ni. Isua Thisen chu Nunna thar atan i hman duh a ngai a. Adama thlah thisen kha Isua Thisen hian a luahlan vek tur a ni a, a thuahfai vek tur a ni a, mihring hlui thisen kha Isua Thisenin thlak i phal a ngai a ni.

Rul, rul thlah, rul thisen thlah, Setana fa i nihna thisen kha Isua Krista Thisen Thianghlima thlak ngei ngei a ngai a ni. Rul thisen tuihalna kha tisa chakna sual siamtu chu a ni a. Isua Krista Thisena thlak alo nih hunah, sual lam awn tlat Thinlung kha Pathian hnen lam chakna leh Pathian duhzawng tih chaknain a lo khatliam tawh zawk ang. Chutah chuan Sual simna diktak chu a awm a ni. Chu chu Isua Thisena inbualna chu a ni.
Isua Thisen Nunna atan kan hman dan tur kha lo sawi nawn leh lawk ila :

Pathian Thisen, Isua Thisen chu mihringah a lo luan luhin, kan thlarauvah a luang lut lova, kan thlarauvah hna athawk bawk hek lo. Kan thlarauva hnathawktu tur chu Thlarau Thianghlim a ni. Kan taksa tuifima buala taksa thiltihsual tlengfaitu tur pawh Isua Thisen ni lovin Tui, inbualfaina tuisik kan hman thin ngei hmang hian Baptismaah Isuan kan taksa thiltihsual a tlengfai a ni. Kan thinlunga sual zawng zawng erawhchu silfai leh tlenfai leh tihthianghlim a lo nih theih nan, kan thinlungah ngei chuan Isua Thisen chu a lo luang lut ta a.

Mihring hlui thisen, Adama thlah thisen luanna kawr, thisen dawt te reuh te te-ah khan Isua Thisen chu Lung, Thinlung bawk chuan a semkual leh ta a. Tichuan Isua Thisen chuan kan taksa pumpui, taksa peng zawng zawng chu a fan chhuak ta vek a. Adama hmasa thlah thisen chu Adama hnuhnung zawk Isua thil tisual ve lo, bawhchhe velo Thisen chuan a luah lan ta a. A luah lan ringawt lova, Isua Thisenah rinna kan nghah chauhvin a luah lan a.

Thisenah chuan Nunna a awm kan tih kha. Tichuan Isua Nunna Thisen chu Nunna thar atan kan lo hmang thei ta a ni.Lalpa zanriah Sacrament kan kila Grape tui Isua Thisenah chantir tur hian Pastor mawhphurhna a sang hle. Isua hian a Thisen entirna angin a sawi lova. A Thisen entirna in turin min pe lova, A Thisen intur min pe mai a ni. Thisen ‘entirna’ tih tawngkam hian Isua duhdan a phawk phak lo hle mai.Isuan “Hei hi Ka Thisen” a ti si a. Rinnain Isua Thisen ngei kan in thei. Isua Thisen ngei kan in chuan kan nung ang.

Isua Thisen ngei a ni tih kan rin chuan kan thinlunga sual zawng zawng chu Thisen chuan a theh ta thawt thawt mai a. Hmanah puithiamten thisen chuan Maicham leh mipuite an theh thin ang khan kan thinlung chu thisen chuan a phuh ta thawt thawt mai a. Ran thisen nen inanglo takin Isua Thisen chuan sual a labo thei ta a. A tlengfai a. A tithianghlim a, a silfai a. A silfai var sar a. Tichuan Isua Thisen avang chuan vur angin kan thinlung chu a lo var thei ta a ni. Sual simna tur hmun chu Thinlungah a ni a, Isua Krista Thisena tihthianghlim Thinlung neitu chuan sual chu a sim dawn ngei a ni.

Heng hi Isua Thisen kan pawm avanga lo awm thei a ni. Sual chu Isua Thisen avang chuan avaiin kan sim thei a ni. Adama thisenah khan sual a awm a. Isua Thisenah chuan sual a awm lova. Isua Thisen chu kan taksa peng zawng zawngah luang chhuak vek se, kan taksa pengteah chuan Isua Thisen chuan ro rel se, Adama thisen chuan rorel tawhlo se, sual pu taksa chu tihboralin awm se, sualnain rorel tawh lo se, Isua Thisen chuan kan thinlung atangin kan taksa pumpuiah thisen luankawr zawhin rorel se Isua Nunna Thisen chu kan Nunna thar a lo ni ang.

Isua Thisen chu thil thalo chakin a tuihal ve ngai lova, sual lamah a tuihal ve ngai lo a ni. Keini pawh Isua Thisen kan in chuan, kan mihring hlui thisen chu Isua Thisenin a thlak chuan kan Thisen thar avang chuan sual leh thil thalo chakin kan tuihal tawhlo thei dawn a ni.

Isua thisen chu Lung (Heart) ah a luh avangin thinlunga ngaihtuahna kilkhawrbera sual awm pawh a luhchilh a, a theh thawt a. Sim duhna avangin sual zawng zawng chu a thi ta a, “Krista Isua mite chuan tisa chu a sual ngaihtuahnate leh a chaknate chawpin an khengbet ta” tih thu kha kan lo nei thei ta a ni. (Galatia 5:24).

Chutiang chuan Beram No Thisena insufai, Thisena silfai, Thisena lei, Thisen ringtu, Thisena sual ngaihdam kan lo ni thei ta a, thinlunga sual simna avangin chung zawng zawng chu kan lo chang thei ta a ni. ‘Ka man Thisen a ni Van Lal ta ka lo ni’ tih Hla ang khan.




1   2   3   4   5   6   7   8   9   10   11


The database is protected by copyright ©hestories.info 2017
send message

    Main page