Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana

:)


Download 499.51 Kb.
Page7/11
Date conversion29.03.2017
Size499.51 Kb.
1   2   3   4   5   6   7   8   9   10   11

THUTHLUNG BAWM

BUNG 4
ISUA KRISTA HMING TUI BAPTISMA: -


  1. “Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u. A ringa baptisma chang chu chhandamin an awm anga; a ringlo erawh chu thiamloh changin an awm ang” {Marka 16:16}.

  2. “Mi tupawh tuiah leh Thlarauva an pian nawn (pian thar) loh chuan Pathian ramah an lut thei lovang” {Johana 3:5}.

  3. “Sim ula in sual {sualte} ngaihdam nan Isua Krista Hmingin baptisma chang theuh rawh” {Tirhkohte 2:38}.

  4. “Tho la Ama Hming lam chungin Baptisma chang la, I sualte tlengfai ta che” {Tirhkohte 22:16}.

Isua hian a thisen chauh hi chhandamna famkim kan chan theih nan a tawkah ngai ta sela chuan, “Mi tupawh tuiah leh Thlarauvah an pian nawn leh loh chuan Pathian ramah an lut thei loving” tih thu hi a sawi lo vang. (Johana 3:5).

Elija maichamah khan a tak taka thisen leh tui leh Thlarau mei a ngai ang chiah khan Thuthlung Thar hunah pawh hian:- Thisen chauh chu a mal chauh chuan a tawk loh avangin, chhandam nan TUI hmang turin thu min pe a, chubakah Thlarau Thianghlim pawh chang ngei turin thu min la pek belh cheu a ni.

Isua zirtir Petera khan “Sim ula in sual ngaihdam nan Isua Krista hmingin baptisma chang theuh rawh u” a ti a. (Tirhkohte 2:38). “Kei mahni ang bawka Thlarau Thianghlim chang ve te hi Baptisma an chanloh nan miin Tui hman an khap thei em ni?” tiin, ThlarauThianghlim chang tawhte hnenah khan Isua Hminga baptisma chan tur thu a pe bawk a. [Tirhkohte 10:47-48].

Tui hi Thlarau Thianghlim tehkhin nan Johana 7: 37-39 thuah hian Isuan a hmang a; mipui tamtak sawi nan Thupuan 17:1-15 thu-ah hian tui hi hman a ni bawk a. Chandamna atan erawh chuan entir nana hmang lovin atak ngeia hman a ngai tih Petera thusawi atang hian a lang a; tui Baptisma leh Thlarau Thianghlim baptisma hi a hran ve vea chan tur a ni tih a lang bawk a; baptisma channa tui hi Thlarau Thianghlim sawina angah ngaih loh tur a ni tih a lang nghal bawk a ni.

Petera hian tu thupekin nge Isua hming baptisma hi a sawi mai le? Ama thu thuin a phuahchawp anga, chu chu a sawi mai em ni ang? Ziah lan kher nilo mahse Isuan thu a pek loh chuan ama thuin a phuah chawp ringawt lovang tih hi I ring ngei ang tih ka ring. Chanchin Tha hi lo ziak ve ta hram sela chuan:- “ ‘Sual sim ngaihdam nan ka hmingin baptisma chantir ang che u’ a ti a” tiin Petera hian a ziah duh hmel hle. “In sual ngaihdam nan Isua Krista hmingin baptisma chang theuh rawh u” a ti si a. Isuan thu a lo pek tawh avang chauhvin Isua Krista hminga baptisma chan thu a pe-ah kan ngai ta a ni.

Aizawl khawlaia Sign Board intar pakhat hi han chhiar teh :
TIMAI KHAN ISUAN A CHHANDAM CHE !

He thu hi Aizawl Chanmari atanga chhohva, Chaltlang Dawrkawn chhuah chhoh dawna kawngsira intar thin a ni. Timai khan Isuan a chhandam che tih thu tar Kohhran hian Marka 16: 16 thu leh Johana 3:5 leh Tirhkohte 2:4-41 thute hi an hnawl nge an pawm ni ang le? Tui leh Thlarauva piang nawn lovin, Isua thisen chauh ringin Vanram kai theih tho an inzirtir a nih chuan Kohhran ngaihtuahawm tak a ni ngei mai. Thuthlung Thar Kohhran Biblea kan hmuhte khan Isua Krista Hmingin sual simin, sual ngaihdam nan tuiah hnim phumin Baptisma an chang a ni.




  1. Jerusalem Kohhran:- ThuthlungThar Kohhran lo dinna hmasaber khua chu Jerusalem a ni. Thlarau Thianghlim baptisma an chang a, Thlarauvin a tawngtir ang zelin tawng dangin an lo tawng ta a. Chumi zawhah chuan “Sim ula, in sual ngaihdam nan Isua Krista Hmingin baptisma chang theuh rawh u; tichuan Thlarau Thianghlim pek (gift) hi in hmu ang” tih thu pek angin mi 3120 te chuan Isua Krista Hmingin baptisma an chang a ni (Tirhkohte 2:1-41).
  2. Pentecost Ni-a Kohhran dintute chu an lo darh zau zel a, Kohhran an phun belh zel a. Ephesi 4:5 thuin a sawi angin:- Lalpa Isua pakhat (one Lord), rinna pakhat (one faith), baptisma pakhat (one baptism,) Pentecost Ni-a baptisma kha an kalna apiangah inang tlangin an puang tel zel bawk a. “Mi dang tuma hnenah chhandamna a awm lova, Van hnuaia mihring sak zingah min chhandam thei Hming dang, Isua Krista Hming chauh lo chu a awm lo” tih thu keng tel zelin, baptisma pawh Isua Krista hmingin an chantir zel a. Isua Krista Hming chauh hi baptisma inchantir nan an hman thin avangin baptisma an chantirna reng rengah Isua Krista Hming chu sawi lan ni vek lo mahse, Isua Krista Hmingin baptisma an chang vek a ni tih Bible leh Kohhran hmasa chanchin ziakna lehkhabu tamtak tlawhchhanin kan sawi ngam a ni. A hnuaiah hian Isua Krista Hmingin tih sawilan kherlohna chu Italic hawrawp-awnin leh bold type-in kan tilang bik bawk anga. Philipa’n mi tilreh chu Pathian thu a hrilhfiah lai mekin tui awmna hmun luikawr an thleng ta a. Mi tilreh chuan:- “En teh, heta hi tui a awm baptisma channa tur engin nge mi dal kher? a ti a. Philipa’n “I thinlung zawng zawnga Isua I rin chuan I chang thei e” a ti a. Philipa chuan Isua Krista hmingin baptisma a chantir ta a. (Tirhkohte 8:36).


  3. Samari khuaa Kohhrante pawh hian Isua Krista Hmingin Baptisma an chang leh ta bawk a; Thlarau Thianghlim baptisma pawh an chang bawk a ni. (Tirhkohte 8:14-17).

  4. Tirhkoh Paula ngei pawh hian Isua Krista hmingin baptisma a chang bawk a. (Tirhkohte 9:17; 22:16)

  5. Kaisari khuaa Kohhrante pawh hian Thlarau Thianghlim an chang a; chumi zawh-ah Isua Krista hmingin Baptisma an chang bawk a. (Tirhkohte 10:1-48).

  6. Thuatira khua mi puan sen duk zuartu Ludi leh a chhungte pawh khan Lalpa Isua Krista Hmingin baptisma an chang leh ta bawk a (Tirhkohte 16:13-15).

  7. Philipi Kohhrante pawh khan Lalpa Isua Krista Hmingin baptisma an chang bawk a (Tirhkohte 16:16-34).

  8. Korinth Khuaa Kohhranhote pawh khan Lalpa Isua Krista Hmingin baptisma an chang leh ta bawk a. (Tirhkohte 18:8).

  9. Ephesi Khuaa Kohhranhote pawh khan Lalpa Isua Krista hmingin baptisma an chang a; Thlarau Thianghlim baptisma pawh tawnghriatloh tel ngeiin an chang bawk a. (Tirhkohte 19:1-7).

  10. Rome khuaa mite pawh hian Lalpa Isua Krista hmingin baptisma an chang bawk a. (Rome 6:1-4).

  11. Galatia khuaa Kohhrante pawh hian Lalpa Isua Krista hmingin baptisma an chang bawk a (Galatia 3:27).

  12. Kolossa khuaa Kohhranhote pawh hian Lalpa Isua Krista hmingin baptisma an chang bawk a. (Kolossa 2:9-12).
  13. Ponto rama Kohhran te, Kappadokia rama Kohhran te, Bithunia (Ethiopia) rama Kohhran te, Asia ram, Asia minor: Turkey rama Kohhran te:-Ephesi, Smurna, Pergamos, Thuatira, Sardis, Philadelphia, Laodikei, Thupuana Kohhran pasarihte pawh hian Isua Krista Hmingin Baptisma an chang vek a ni. “Chumi anpui- Nova lawng, baptisma chuan Isua Krista thawh lehna avamngin tunah a chhandam che u a ni” tia Petera’n a hrilhte hian Isua hmingin baptisma an chang tih a chiang a; Pentecost Ni-a Isua Krista hming ngeia baptisma chan thu petu ngei khan heng Kohhrante hi lehkha a thawn a nih avangin chu chu kan sawi ngam a ni. Chung mite chu a chunga kan sawi takte khi an ni. Thupuana Kohhran 7 te pawh khi Asia Minor Turkey rama mi vek an ni bawk a. (1 Petera 1:1-2; 3:20-21; Thupuan 2-3).


  14. Israelho, Hebrai mite, Paulan lehkha a thawnte pawh hian Isua Krista Hmingin baptisma an chang bawk a. Hebrai 10:22 thu “Kan taksa pawh tuifima buala awmin” tih hi baptisma an chang tih sawina chu a ni. Hebrai hi Paula lehkha thawn a ni tih finfiahna chu, 11Thessalonika 3:17-18 thu leh Hebrai 13:25 thute hi an ni. Paula hian a lehkhathawn chhinchhiahna bik mi dangin an hman ve ngai loh tawngkam a nei a, “Kan Lalpa Isua Krista khawngaihna chu in zaa hnenah awm rawh se” tih hi. 11Thessalonika 3:17-18 . Chu thu chu a lehkhathawn zawng zawng hmawr bawk nan a hmang ziah a, Hebrai lehkhathawn hnu khar nan pawh hian a hmang a ni.


Tui Atanga Piang Awmzia:-

Tui chhul atangin kan piang ve ang tihna a ni. “Mi tupawh tuiah leh Thlarauva an pian loh chuan Pathian ramah an lut thei lovang” tih a ni a. [Johana 3:5]. Piang awmzia chu “A chhung atanga lo chhuak” tihna a ni mai lovem ni? Nu pum chhung atanga kan lo chhuah hian kan piang a ni. Nu pum chhung atanga kan lo pian hnuah tuiah leh Thlarauvah piang nawn leh turin Isuan thu min pe a ni. Nu pum chhunga kan awmlaiin tuiah kan awm a; chuta tanga kan lo piang chhuak tawh hnu chu Tuiah piang nawn leh turin Isuan thu min pe a nih chu. Piang thar tia lehlin ‘born again’ hi piang nawn tiin letling ta se, Nu pum chhung atanga piang tawh hnu ngei hi tui atanga piang nawn leh turin Isuan thu min pe a ni tih hriatthiam a awl deuh zawk ngei ang.

Tui atanga piang nawn tur chuan tui chhung atanga kan lo chhuah a ngai tihna a ni phawt a. Tui chhung atanga lo chhuak tur chuan tui chhungah kan luh a ngai tihna a ni bawk. Piang nawn tura Isuan a sawi avangin Nikodema pawh khan “ Mi a tar hnuin a Nu pumah lutin vawi hnih a piang thei dawn em ni?” a tih reng kha. Tui atanga kan pian nawn dan tur chu Tuia hnim phuma baptisma chan hi a ni tih Isua hming meuh chhalin kan sawi ngam e. Tuiah hnim phuma baptisma kan chan hian tui chhung atangin kan lo piang chhuak ta a, tui chhul atangin kan lo piang chhuak ta a, tuiin min hring ta a, tui atangin kan lo piang nawn ta a, tui atanga piang nawn, piang thar kan lo ni ta a ni. Tui atanga pian nawn pawimawhna chu ngainep suh. Isua zirtirte khan tui atanga pian nawnna hi an kalkan hauhlo a ni tih hria la, Isua thusawi ngaineptute zingah chhiartel I nih loh nan fimkhur rawh.

Tui atanga pian nawnna thu hi a ni- Isuan, “A ringa Baptisma chang chu chhandamin an awm ang a, a ringlo erawh chu thiamloh changin an awm ang!” a tih chu a ni. Isua sawi awmzia tak chu “Tuiah hnimphuma Ama Hminga Baptisma chang chu chhandamin an awm ang” a tihna a ni a, a neplo hle. “Tuiah hnim phuma Baptisma changlo chu thiamloh changin an awm ang” a tihna a ni nghal bawk a, a hlauhawm hle.

Baptisma Awmzia Chu Phum Tihna A Ni:-
Baptisma awmze diktak I hre duh a nih chuan, Isua Krista baptisma chan dan en mai rawh. Baptisma hi pawm dan hrang hrang a awm a; inhnialna tawp theilo a lo awm ta ringawt mai a, a pawi hle a ni. Engangpawhin buai mahse, Isua Krista baptisma chan dan hi baptisma chan dan tur dik tak chu a ni mai. Isua Krista chuan Jordan luiah hnimphumin baptisma a chang a ni. Chu thu chu Greek mi zawng zawngin an pawm a, khawvela Kristian zawng zawngin an pawm bawk.

Hriat chianloh thil a lo awmin, inhnialna a lo chhuak thin a; chutih hunah chuan thudik hriatna tehfung diklo thei lo chu Isua Krista tihdan leh sawidan hi a ni zel dawn a ni. Baptisma chan dan tur dik taka I chang duh a nih phawt chuan Isua Krista baptisma chan angin tuiah ngei hnim phumin chang la, chu chu diklo thei a ni tawh lo. Isua chandan ang lovin baptisma chu chang ta la, I ngaih a tha tho dawn a nih chuan Isua zirtirna kalpel I ni a, Isua thu ni lovin nangma thu thuin I nung mai ang.

Tui thlawra baptisma inchantir zawng zawngte pawh hian Isua chuan Jordan luiah hnim phumin baptisma a chang tih an pawm vek a; tumahin an hnial thei lo. “Tin, Isua baptisma a chan veleh tui ata a chhuak ta nghal a” tih a ni a; “Tui ata” tih hi “Tui chhung ata - out of water” tia dah tur a ni. [Mathaia 3:16].

Baptisma thlawra in chantir zawng zawngte hian thlawr chu phum aiin a dik zawk tih tan ngam pakhat mah an awm lo. Thlawra chan chu phum aiin a dik zawk an tih avanga inthlawr an ni hauh lova; an tih laklawh thil a ni a, phuma han tih leh hnuhnawh chu tlawmthlakah an ngaih avanga in thlawr zuizel mai an ni. Englaipawhin thlawr aiin phum chu a dik zawk an ti reng tho a ni.


Mizo tawng ang maia kan hman ‘baptisma’ kan tih hi hming (Noun) anga hmanna-ah chuan Greek tawngin ‘baptisma’ tiin a ri a ni. Strong’s Greek Dictionary leh Thayer’s Greek Definitions chuan ‘baptisma’ tiin an dah ve tawp mai. Kan Bible letlingtute hian heihi an lo hre fuh pawh a ni mai thei. Baptisma tih hi Greek tawnga a rik dan a ni nghal a ni. ‘Baptizo’ tih hi chu thiltih sawina (verb) a ni thung a, ‘baptisma-phum chantir rawh’ tihna a ni. Lehkhabu hrang hrangin baptisma awmzia an sawite chu hengte hi an ni:-



  1. Greek-English Lexicon By Liddel, Scott & Thayer:- “Baptisma hi Greek thumal baptizo tih atanga lak a ni a: tuia chiah pil, hnim pil (to dip, immerse) tihna a ni.

  2. Classic Greek-English Dictionary By Poller:- Greek tawnga baptizo awmzia chu hnimpil tihna a ni.

  3. Greek- English Dictionary by Pollet:- Greek thumal baptizo chu- hnim pil tihna a ni.

  4. Emphatic Diaglott-a Original Greek Text angin:- Eng thil thu-ah pawh Greek thumal baptizo chu chiah pil tia lehlin zel a ni thin.

  5. Strong’s Greek Dictionary sawi dan chuan baptis, baptisma awmzia chu : to immerse, submerge, to make whelmed (fully wet) tih a ni a. Pu Remkunga Dictionary chuan ‘immerse’ chu tuia hnimpil tiin a dah a. ‘Submerge’ chu tuia chiahpil tiin a dah bawk a. To make whelmed (fully wet) chu a puma huh vek tihna a ni.

  6. Isuan, “Ka no in tur chu in-in thei em ni?” a tih hi ‘A thihna No’ sawina a ni kan ti theuh mai a. A dik ang,lungngaihnain a khuh pil thu sawina a ni. Chumi zawm chiahah chuan “Ka baptisma chan tur pawh in chang thei em ni?” a ti leh a.(Marka 10:38). Lungngaihnain a chimpil thu a sawina a nih theih rualin; a kawh tak zawk chu thlan thimah phuma a awm tur thu sawina a ni tawh zawk. A thihna lungngaihna kha chu “Ka No in tur” a tih hi a ni. Hei hi Jordan luia baptisma a chan zawh hnua a sawi anih avangin, thlan khura phuma a awm tur thu a sawina a ni tih a lang nghal mai a. Baptisma kan chanin Isua thlana an phum angin tuiah hnim phumin kan awm ve a, thlana an phumna chu tuia hnimphumin kan lo tawmpui ve a, tui thlanah Isua kianga phumin kan awmve a ni.
  7. Chu thu chu Kolossa 2:12 thu hian a sawi chiang a, “Baptismaah chuan a hnena phum in lo ni ve tawh si a” tih a ni. Saptawng Bible King James Version, Greek Interlinear hi sawi lang ve kher ila a fiah lehzual nan : “Buried with (Sunthapto) him (autos) in (en) baptism (baptisma)” tiin Greek thumal nen a dah a. Sunthapto (Soon-thap-to tihtur) tih laitak khi Strong’s Greek Dictionary chuan “to inter in Company with i.e. (figuratively) to assimilate spiritually (to Christ by a Sepulture as to sin) :- bury with” tiin a dah a. Sepulture hi Pu Remkunga Dictionary chuan “thlana phumna” tiin a dah a. ‘Inter’ tih hi ‘mithi phum’ tiin a dah bawk a. Chmi awmzia chu baptisma kan chanin sual thihsanna taksa chu mithi angin Isua hnenah phumin kan awm tihna a ni.


  8. Rom 6:4 thuah “Chuvangin a thihnaah (thihna thlanah) baptisma kan chanin a hnena phum vein [mithi anga phum sunthapto-in] kan awm” tih kan hmu bawk a. King James Version, Greek Interlinear tilang leh ila : “Therefore (oun) we are buried with (sun-thap-to) him (autos) by (dia) baptism (baptisma) into (eis) death (thanatos)” tih a ni. Baptisma kan chan loh chuan a hnena phumkan ni ve thei lova, baptisma kan chan chauhvin a hnena phumkan ni thei tih I hmufiah thei em le?

  9. Catholic Biblical Encyclopedia meuh pawhin Rom 6:4 thu la chhuakin:- “baptisma chantir dan hluiber, hmasaber chu hnim-phum a ni. Baptisma-ah hnim phum a ni” a ti ve thlawt a ni.

  10. Scaff- Herzog Religious Encyclopedia, Volume-1, phek 451-na-ah chuan:- “Baptisma chu phum a ni thin. Baptis tura thupek awmzia chu hnimphum tura thupek tihna a ni” a tiin a dah tawp mai.

  11. World Book Encyclopedia, Volume 1, phek 70-naah chuan:- “Kohhran lo ding hmasate khan baptisma chu hnimpilin, tui chhunga chiahpilin an chantir thin” tiin a ziak bawk.

  12. Encyclopedia of Lutheran Church, Volume 1, phek 188-naah chuan :- “Martin Luthera khan hnimpila baptisma chan hi a duhber thin a, a tira an tihdan-ah pawmin a thlang a ni” a ti bawk. Heng bakah hian lehkhabu rintlaka ngaih tamtakin baptisma chu hnimphum a ni tih an sawi vek bawk.

Chutichuan baptisma chu Isua thlan anpui a ni a, Isua chu an phum a, tuiah hnim phuma baptisma kan chan hian, mithi phumna thlanah, sual tawhlo tura sual thihsantu taksa, mihring -hlui chu, nunna thara tho leh turin kan phum a, tui thlan khur baptisma-ah chuan kan sunthapto thin a ni. Tui thlan baptisma atanga kan lo thawh leh hian, mithi tho leh angin, thlan piah lam ramah, nunna thar neiin kan lo tho leh a ni.
Greek Tawng Sunthapto Hman Dan:
Baptisma hi phum sawina a ni lova phumna sawina chu sunthapto a ni tih angin tui thlawr chantirtuten an sawi bawk thin a. A dikna chu hei hi a ni: baptisma chu phumna sawina a ni a, phum tihna chu baptizo tih hi a ni. Sunthapto chu mithi phum tihna a ni. Baptizo nen inhnaih tak, hman pawlh theih a ni. Baptisma hi phum sawina a nilo tih tanchhan atan sunthapto hman chu chhuanlam tlinglo chhuanlam puitlinga ngaih chawp ang a ni.

Kolossa 2:12 thu sawi leh ila: “Baptismaah chuan a hnena phum in lo ni ve tawh si a” tih hi: “Buried with (Sunthapto) him (autos) in (en) baptism (baptisma)” tih a ni a.

Rom 6:4 thuah hian:-“Chuvangin a thihnaah (thihna thlanah) baptisma kan chanin a hnena phum vein [mithi anga phum sunthapto-in] kan awm” tih hi: “Therefore (oun) we are buried with (sun-thap-to) him (autos) by (dia) baptism (baptisma) into (eis) death (thanatos)” tih a ni.

Sunthapto Greek tawng hman dan khi lo sawifiah dawn ila:- Rom 6: 4 thu-ah “baptismaah chuan a hnenah sunthapto-in kan awm (phum vein kan awm)” tih a ni. Tui-ah baptisma kan chan chauhvin tui thlana awm Isua hnenah, Isua kiangah, phum-sunthapto kan ni thei. Baptisma tel lovin sunthapto a awm thei lo. Baptisma hi phum sawina a nih avang chauhvin sunthapto chu hman theih chauh a ni tih I hmuthiam em? Sunthapto hi mithi phum sawina a ni a. Baptisma hi mithi thlankhur chu a ni. Tichuan mithi thlan baptismaah chuan sual thihsantu taksa chu mithi angin kan phum-sunthapto ta a ni. Sual thihsantu chu mithi anga ngaih a ni a. Mithi chu an tho leh tawh ngailo ang hian sual chu thawhpui leh tawhloh turin baptisma sual thlanah chuan kan phum bo sunthapto hlen vang vang tur a ni.

Isuan “Buhfang leiah a tlak lohva a thih phawt loh chuan a mal chauhvin a awm reng thin a, a thih erawh chuan tamtakin a rah thin” tia a sawi pawh kha mihring hlui thihna sual simna bakah mihring hlui sual pu taksa phumna baptisma tui thlan hi a huap tel a ni. Buhfang chu a lo to chhuah theih nan phum a ngai thin si a. (Johana 12:24). Isua hian mihring chu buhfang nen min tehkhin a ni. Chu Isua tehkhin thu chu tuia phum baptisma-ah chauh hian kan tidik famkim thei a ni. Ngaihtuahna emaw, suangtuahna emaw, rinthua phum anga inngaih mai theih thil a ni lo.
Baptizo Hmanna Dang Te:
Lu chunga tui thlawr thin ten ‘baptizo’ tih hian theh emaw thlawr emaw a huap theih nan baptizo hmanna dangte an sawi lang bawk thin a. Baptisma awmzia an sawi dala, awmze dang neih tir an tuma, mite an hruai pen theih hian Isua pawhin a pawm ve zel theih an ring zui mai thin a. An thil tih danglam chu Isua pawmtir an tum zel mai thin a ni. Nimahsela Isua hi a thuah a ding nghet thin a ni. Thlawr emaw theh emaw chu baptizo hian engti kawngmahin a kawk theilo tih tlemin kan en zui lawk ang a. A teuh thei ber chu sil tih nan a hman ve theih a; chutah pawh chuan hnim pila chiahpil chunga sil a ni a kawh zel ni. Sil tih chuan lu chunga tui thlawr chu a la hlat hle mai a ni. Luchunga tui thlawr emaw theh emaw sawi nan a hman theih teh reng em tih tlemin kan enfiah dawn a ni. Marka 7:2-4 thu la chhuak ila: chang 3 thu-ah hian kut sil (wash) tih nan Greek tawng ‘nipto’ hman a ni a; chang 4 thu-ah hian kut sil(wash) tih nan tho ‘baptizo’ hman a ni leh a, chang 4-ah tho hian bungbel sil (washing) tih nan ‘baptismos’ hman a ni ta a. Hemi ang chi-ah tho hian Hebrai 9:10-ah sil (washing) tih nan ‘baptismos’ hman a ni leh a. Mathaia 15:2-ah hian Isua zirtirte’n chaw an ei dawnin kut an sil lova, hetah hian kutsil tih nan ‘nipto’ hman a ni leh a. Johana bung 9ah hian Isuan mitdel a tihdam thuah khan Siloam dila a mit va sil tura a tirh thu kal zelah khan ‘sil’ tih nan ‘nipto’ hi vawi 5 a lang a. Johana bung 13 thua Isuan a zirtirte ke a sil chungchangah khan ‘sil’ tih nan ‘nipto’ hi vawi 11 hman a ni bawk a. Sil tihna pangngai atan chuan ‘nipto’tih hi an hmang thin tih finfiah nan chuan heng hi a tawk tawh e. Isuan zanriah hnuhnung an kil laia chhang a chiah sawi nan kha chuan ‘bapto’ hman a ni thung a [Johana13:26].

Baptizo chu ‘sil’ tih nan a hman theih an tih hian an sawi tum chu thlawr emaw, theh emaw leih emaw pawh a huap thei anga a lan theih nan ‘phum’ tihna atangin mi rilru hruaipen a, ‘phum’ tih chu sawidal an tum a ni ber. Judaten kut an sil thinna chhan chu an kutah khan thlarau sual ‘Shipta’ zanah a bet palh ang tih an hlau va, chu chu tuiah khan a lut ve thei lovang tih ringin an kut chu tuiah an chiahpil thin a; silbo an duh a ni. Tichuan tui tamtawka chiahpilin an kut an sil thin a ni. Hetianga an sil fo loh chuan Judate chuan chhandamna emaw felna chu chang zolo turah an inngai a ni. [Dake’s Annotated Reference Bible Marka 7:3 hrilhfiahna]. Bungbel silfai pawh an hnim bawrh bawrh thin a, chutiang sawi nan chuan baptizo leh thiltih kalmek ve angin baptismos chu an hmang ve ngei mai. Chungte chuan theh emaw thlawr emaw chu a hlat hle si a ni. Chutichuan baptizo chu engtikawng mahin luchunga thlawr emaw theh emaw leih emaw kawk zawngin a hman theih chuang loh a ni. Baptisma awmze khaikhawmna dik lo theilo chu “Isua Krista chuan hnim phumin baptisma a chang” tih hi a ni. He thu chauh hi baptisma awmzia sawifiah nan a tawk em em a ni. Isua baptisma chan dan anga lungawi thei nih hi a tha tawk em em a ni.



Kross-thlan-ah Isuan Baptisma A Chang:-
Kross-ah Isuan Baptisma a chang nawn leh kan ti leh lawk ang a. Kross tih thu hian thing kawkalh chauh a sawi lova, thihna leh thlana phumna leh thlan atanga thawhlehna a keng tel vek a. “Ka baptisma chan tur pawh in chang thei em ni?” Isuan a tih kha Jordan luia baptisma a chan zawh hnua a sawi a nih avangin thlana phuma a awmna tur thu a sawina a ni tih a lang chiang mai a. Thih lungngaihnain a tlakbuaka; lungngaihna chuan a khuh pil tak meuh mai a; chu mi sawi nan chuan “Ka No in tur chu in inthei em ni?” a ti a, “a thihna No” kan tithin a. Lungngaihnain a vurpil sawi nan baptizma chu hman pawh nise, a dik chiah a, baptisma awmzia a tichhe lova, a sawh sawn hek lo, phum tihna lo chu engmah a kawk thei chuang lo. Thihna No a sawi zawh hnuah “Ka baptisma chan tur in chang thei em ni?” a tih hi thihna sawina ni tawh lovin thlan khur thima phumna baptisma a sawi a ni. [Marka 10:38-39]. Tui baptisma hi Isua thlanah kan inphum vena a ni a ni.

Baptisma kan chan laiin Isua ruang an phum angin, a zangthal zawngin, kut leh ke thluangin, Isua an phum ang zanin phumin kan awm ve tur a ni. Hei hian ding chunga tuia inchiahpil mai chu a dik tawklo tih a tilang a, tuiin a chimpil vek rikngawt kha a la dik lo fo tih a tilang a ni. Isua kha thlanah an zalh zan ang khan baptisma changtu chu tui thlanah zalh zan tur a ni a; chu chu Kross-ah baptisma kan chan ve dan tur dik tak a ni.

Tuiah ding a, thut pil mai hi a dik lova, Isua ruang chu an thuttir si lova. Thupila baptisma in chantir hi Isua phumna anpui a tling zo lo a ni. Thu pila in chantir awmzia nithei awm chu: mithi lo phum, sual thihsan lo phum, sual sim tak tak lo, a nung chunga phum a entir thei ang. Chu aia diklo nasa zawk leh pawi em em zawk chu: a Bul leh a Tawp Isua Krista hming hnawl a, “Pa leh Fapa leh Thlarau Thianghlim hmingin ka baptis a che” tih hi a ni.
Trinity Hminga Baptisma Hi A Pawimawh Lo:
Lu chunga tui thlawr ‘rantizo’ hi chu a chantirtute ngei hian phum ‘Baptisma’ a nilo tih an hrechiang hle a. “Baptisma in chhunglam thlarau thatna a pe theilo” an tithlawt reng a ni. “Pa leh Fapa leh Thlarau Thianghlim hmingin ka baptis a che” tih chhama, thlawr emaw, phum emaw chuan, chhunglam thlarau thatna a pe theilo tih chu a chantirtute ngei hian an hrechianga an sawi a, an ziak bawk a ni. Chutiang baptisma chu chhandam nan a pawimawhlo an ti bawk. A dik ang. Trinity hminga baptisma chuan, thlawr emaw phum emaw pawh nise, sual a tlengfai thei lova; sual ngaihdamna a ni bawk hek lova, Pathian thiltihtheihna engmah kentel reng reng a nei lova, ramhuai pawhin an hlau hek lova, ramhuaiho sawi dan chuan “Pa leh Fapa leh Thlarau Thianghlim hmingin baptisma kan chang ve thei; Isua Krista hming erawh chuan kan chang thei lo” an ti a ni. [Suangsang khuaa pa pakhat leh ramhuai inkawmna]. Hemi hian ramhuai tihve theih loh chu thain a ring ta tlata Isua Krista hmingin baptisma a chan phah ta a ni. Trinity hminga baptisma chan hi tih laklawh thil mai a ni. Baptisma Isua Zirtirte chantir danin an chantir velo tih an inhria a, mipui tamtak an bum a ni tih an inhre bawk a. “Kan inthlawr hian Lalpan a pawm ve tho kan beisei” an tilek fang a ni.

“Nangni Dan hretute u, in chung a pik e! Finna chabi in kawl a, in kalbo pui daih a, nangni lah in lut duh si lova; mi lut tur in khap bawk si a” (Luka 11:52) tia Isuan a hau te nen khan thuhmun an ni. Hei hi thil ho mai mai a ni lova, ngaih tih thatluih maina tur chi a ni lo. Hre reng chunga tisual lui an ni si a. Isua Krista ringtu diktak chuan a thupek zawmin Isua Krista hming lamin baptisma a chang ngei tur a ni.

Mi tupawh Isua Krista hminga tuia hnim phum baptisma chang duhlotu chu engtikawngmahin Isua ringtu dik tak a ni thei lo. Pathian thu pek aia mihring thupek ring zawktu a ni a; Pathian thupek pawisa lo a ni si a. Zawlnei Isaian “ An zirtirnaah mihring thu pek an zirtir a vangin an mi biak thin hi a thlawn a ni” ti a a sawi kha an dinhmun chu a ni. [Mathaia 15:7-9].




1   2   3   4   5   6   7   8   9   10   11
:)


The database is protected by copyright ©hestories.info 2017
send message

    Main page

:)