Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana


Isua Krista Hming Baptisma Hi Sual Ngaihdamna a ni



Download 499.51 Kb.
Page8/11
Date conversion29.03.2017
Size499.51 Kb.
1   2   3   4   5   6   7   8   9   10   11

Isua Krista Hming Baptisma Hi Sual Ngaihdamna a ni:
Sual ngaihdamna atan leh chhandamna atan a pawimawhlo a nih chuan baptisma hi Kohhranhote hian inchantir loh a tha zawk ang. A chhan chu thil tullo kan buaipui mai mai tihna a ni dawn si a. Chhandamna atan a pawimawh kan tih vanga baptisma hi inchantir kan nih erawh chuan Bible-a an inchantir ang kher kher a kan inchantir chu kan tihdan tur dik tak a ni ang. Bible-a an tihdan anga kan tihve loh chuan Bibleah rinna kan nghatlo tihna a ni bawk si ang. Bible-a baptisma an inchantir dan chu Isua Krista hmingin tuiah an inhnimpil thin a ni. Baptisma hi Isua thupek a nih vanga in chantir kan nih rau rau chuan, Isua thu ang law lawin, chhandamna atan chan tur a ni. Isua sawidan chu hei hi a ni:-
“A ringa Baptisma chang chu chhandamin an awm ang a, A ringlo erawhchu thiamloh changin an awm ang a,” tih a ni (Marka 16:16).

He thu hi engtihna nge? Isua chu rin tlakah ngaia, “A thu pek zawma Ama hminga Baptisma chang chu chhandamin an awm ang” tihna a ni phawt a; “A ringlo erawh chu thiam loh changin an awm ang” tih thu awmzia chu:- “Isua ringlo chuan Isua hmingin baptisma chu an chang duhlo anga, chhandamna pawh an chang lovang” tihna a ni. Isua ringtu dik nisi, Isua thu pek zawm silo a awm theih loh tihna a ni. Marka 16:16 thu hi Tui Baptisma hnawltu tan chuan a hlauhawm hle a ni.

Tui Baptisma hi sual ngaihdamna atan Pathianin min pe a ni. “Sim ula in sual ngaihdam nan Isua Krista hmingin baptisma chang theuh rawh u!” tih a ni. (Tirhkohte Thiltih 2:38). Isua Hming Tui Baptisma chu chhandamna a ni a, sual ngaihdamna a ni bawk a, sual tlenfaina a ni bawk a ni. “Tho la, Ama hming lam chungin baptisma chang la, i sualte tlengfai ta che” tih thu hi chhandamna zawngtu tan chuan hlu tak a ni. (Tirhkohte 22:16). Isua thisen chauh hi sual tlenfaina a ni titu tan chuan thil hnawk tak a ni bawk.

Tui baptisma hnawltute leh baptisma chandan dik lova changtuten “A ringa baptisma chang chu chhandamin an awm ang” tih thu leh “Sim ula, in sual ngaihdam nan Isua Krista hmingin baptisma chang theuh rawh u!” tih thu hi an pawm hreh hle mai a. Baptisma an chan dan leh Biblea Isua Zirtirte chantir dan a in-anloh avangin, Biblea baptisma thu an chhiar apiangin an tih dikloh lai an hre thin a; “kan tihdan a dik hauhlo mai, Biblea an tih dan hian I tive leh zawk mai teh ang u” tih tum talo chuan, baptisma sawichhiat dan tur leh sawi pawimawhloh dan tur an zawng ta zawk thin a, mahni inthiam chawpin “Isua thisen hi chhandam nan a tawk, tui baptisma chu chhandam kan nih tawh avangin, changlo mah ila chhandam kan ni tho vang” an ti thin. Chutiang mite chu ‘ring tikhawng lui’ an ni.

“Chhandam kan nih tawh avangin, chang ve mai mai mah ila a pawi lova, changlo mah ila a pawi chuang heklo, chhandamna chu kan chang tawh tho a ni” an tihna a ni.

Chhandamna chan tawh avang chauhvin baptisma chu chan tur tih an zirtir ta a. Chhandamna chan tawh avanga baptisma chu chan tur tih sawifiah nan Greek thumal “eis” tih hi an hmang thin a ni. He thumal (preposition) hian “Nih tawh avangin” tih a kawk an ti a ni. A kawk lo tih sawi kan tum a ni. Taima taka chhui chiang duh tan Mizo tawng nilo lai pawh hi tilang hram zel ila a tha ang.

Saptawng Bible, King James Version, Greek Interlinear leh Strong’s Greek Dictionary kan en anga, “eis” chuan “nih tawh avangin” tih a kawklo tih kan hmu dawn a ni. Chhandamna atan ngei Isua Krista hming baptisma chu chan tur a ni tih kan enfiah dawn a ni.

Then (de) Peter (Petros) said (phemi) unto (pros) them (autos), repent (metanoeo) and (kai) be baptised (baptizo) everyone (hekastos) of you (human) in (epi) the name (onoma) of Jesus (lesous) Christ (Christos), for (eis) the remission (aphesis) of sins (hamartia) and (kai) ye shall receive (lambano) the gift (dorea) of the Holy (hagios) Ghost (Pneuma).


“For the remission of Sins” tih lai tak hi a ni a. “eis” tih hi “for” tiin Greek tawng thiamin an letling ta a ni. “For” tih chu Pu Remkunga Dictionary chuan, tan, atan, nan, chutiang atan etc. ti te-in a dah a ni.

“eis” (ice tia lam rik) chu Strong’s Greek Dictionary chuan hetiang hian a dah a: A primary preposition; to or into (indicating the point reached or entered) of place, time, or (figuratively) purpose (result etc) also in adverbial phrases: (abundant-)ly, against, among, as at, (back)-ward, before, by, concerning, +continual, +far more exceeding, for (intent, purpose), fore, + forth, in (among, at unto, -So much that, to) to the intent that, +of one mind +never, of, (up-)on +perish +set at one again, (So) that, therefore, (-unto), throughout, til, to (be, the end, -ward), (here) -until (-to)....ward, (where-) fore, with often used in composition with the same general import, but only with verbs (etc) expressing motion (literally of figuratively).

“eis” hmanna hrang hrang hi han en ila, sual ngaihdam tawh nihna avanga baptisma chan tur tihna awm ang tanchhan tur reng reng a awm lo. Chandam nih tawh avangin chan tur tia ‘eis’ an hrilhfiah dan ber chu ‘eis’ chu ‘because of’ tih nan pawh a hman theih an ti a. Strong’s Greek Dictionary chuan ‘eis’ hrilhfiah nan ‘because of’ tih chu a pai tello phawt mai a. ‘because of’ han tih theih mai tur lah a pai tel hek lo. A pai tel pawh nise, ‘ngaihdam tawh’ tihlam a la kawk chuang lova, sual ngaihdam nan tih chu a la thiat chuang hek lo. A pui zawk leh nghal a.

Greek tawng atanga Saptawnga Bible letlingtuten “eis” chu “for” tiin an letling a. ‘eis’ chuan kawh dang nei ve bawk mahse, ‘for’ tiin an dah hnem ber a; ‘for’ tiin vawi 140 an letling a ni [Dake’s Annotated Reference Bible]. For tih kawk thei Strong’Greek Dictionary atanga lolang chu kan tih dum deuh bikte [bold] khi ni awm tak an ni. ‘for’ tihna ngei a ni tih kan chhiar bawk a. ‘for’ chu ‘on account of’ tih hawiin an dah lui hram a nih pawhin “on account of” chuan “sual ngaihdam a nih tawh avangin” tih ai chuan “sual ngaihdamna turin, atan” tihlam a la kawk zawk a ni. Engtikawngmahin “sual ngaihdam tawh vanga baptisma” lam a la kawk thei chuang lo.

Greek tawng atanga Saptawnga Bible letlingtute hi Greek tawng thiam an ni a; tum lam neisa rana letling an ni lovang. “eis” chu “for” tiin an dah a ni. For tih chu Mizo tawng ang maia kan hman a ni tawh a:-‘nan’ tih te, ‘atan’ ‘tan’ tihna a ni tam ber ang. ‘For the remission of sins, sual ngaihdam nan’ tia mam taka an lehlin chu baptisma sawinep tumtuten ‘sual ngaihdam a nih tawh avangin’ tihna angin sawi mahse, hun liam hret ‘tawh’ tih lam a kawk thei lo. ‘Tawh’ tih zawnga sawi duh zawktute pawh hian an rilru takah chuan dik zawkah an ngai tak takin rin a harsa thin a, sual ngaihdam nan Isua hming baptisma an chanloh vanga an sawiselna mai niin a lang lo thei lo. Nimahsela, mawltein thil dikna hi chu a lang mai thin a; Mizo tawnga Bible letlingtute lehlin hi a dik ang tih kan ring ngam a ni. ‘sual ngaihdam nan’ tih mai chu a dik ber a ni.

Isua Krista hminga baptisma chan hi sual ngaihdamna nih lohtir dan kawng an zawnna mai niin a lang lo thei lo a ni.

Isua hming tui baptisma hnawltute sawidan hi dik nita se, sual ber ngaihdam a nih tawh chuan baptisma chan chu thil chuang tlai, thil tullo, thil pawimawhlo a ni nghal ang. Thil tul lemlo chu Kohhranin tihloh a tha mai thin. Nimahsela baptisma chu pawimawh an tih em em vanga inchantir an ni a; an chan dan diklo chu dik anga lantir an tum vangin a dik zawk chu an sawi nep ta mai a ni ang.

Thil tullo a nih chuan Pentecost Ni-a Petera thusawi pawh kha thil tullo a ni ang a; Paula hnena Anania thusawi:- “Engatinge i la awm reng le, tho la ama hming lam chungin baptisma chang la i sualte tlengfai ta che” tih pawh kha thil tullo a ni bawk ang.[Tirhkohte 22:16].

Nimahsela Isua chuan, tul a ti a:- “A ringa Baptisma chang chu chhandamin an awm ang” a ti a, “A ringlo erawhchu thiamloh changin an awm ang!” a ti zui bawk a. A hlauhawm hle. Peteran thahnem ngai em emin:-“Sim ula, in sual ngaihdam nan Isua Krista hmingin baptisma chang theuh rawh u” a ti tak tawk tawk a; a hlutna leh pawimawhna hmutu tan chuan thahnem ngaih a na em a ni.

Thil lolang fiah ta chu tui baptisma hi chhandamna atan leh sual ngaihdamna atan leh sual tlenfaina atan ngei min pe a ni tih hi a ni. Isua Hminga Tui Baptisma chang lovin chhandam ka ni thovang tih sawitu leh ringtu chu mi tupawh ni rawh se - Isua Krista dodaltu a ni a, Isua Zirtirte dodaltu a ni bawk. Isua hminga tui baptisma chan hnawltu chu inlamlet sela, inngaitlawmtakin a sual ngaihdam nan ngei Isua Krista hmingin baptisma chang ve hram zawk rawh se.

Johana Baptisma Kha Sual Ngaihdamna A Ni:
Johana Baptisma pawh kha sual ngaihdamna atan ngei an chang thin a ni. An thil tihsual an sim a, an sualte thupha an chawi a, an sualte chu an sim loh chuan ngaihdamna an chang thei dawn lova, chuvang chuan an sualte thupha an chawi a, an sim a, thil tisual tawhlo turin an sim a, thiltihsual ngaihdam nan Simna Baptisma an chang thin a ni. “Johana, thlalera Baptistu kha, thiltihsual ngaihdam nan Simna Baptisma thu hrilin a lo chhuak a. Chumi lai chuan Jerusalem khuaa mite, Judai rama mi zawng zawngte, Jordan lui dung vela mi zawng zawngte an chhuak a, a hnen lamah an kal a, an sualte thupha chawiin Jordan luiah chuan ama hnenah baptisma an chang ta hlawm a” tih a ni. (Marka 1:4-5; Matthaia 3:5-6).

Johana baptisma kha, sual an sim theih nan an chang anih pawhin pawmawm tak a ni a: Simna baptisma awmzia tak erawh chu an sual an sim a, an sim avangin ngaihdam theih an lo nita a, an sual ngaihdamna atan baptisma chu an chang thin, tih hi a dik dan ber chu a ni.

Johana baptisma kha Pathian thupek a ni a, “Thlalera baptis tura mi tirtu khan ” tih thu Johanan a sawi a. Juda Sakhaw hruaitu tamtakten Johana baptisma kha an lo ngaipawimawhlo em em a, Isuan, “Johana baptisma kha Vana-mi thu nge mihring thu?” tiin a zawt a, a chhuahchhal duh tlat mai a ni. (Matthaia 21:25) Pathian miten “An tana Pathian remruat chu an duh lo thei tlat mai a ni” .
Isua Hming Tui Baptisma Hi Taksa Thiltih Sual Tlenfaina A Ni:

Thinlunga sual awmte hi tui baptisma hian a silfai phak lova, tuisik chu thinlungah a luanglut thei lo. Thinlunga sual kai-dum chu Isua Thisenin a silfai thei kan tih tawh kha. Taksa thiltihsual tlengfaitu hi chu Isu Hming Tuisik Baptisma hi a ni tih kan sawi leh mek a ni.

Mihring hi thil pathum hmanga siam famkim kan nih kha. (1) Thinlung-rilru (2) Thlarau (3) Taksa-tisa te hmang hian mihring famkima siam kan ni. Heng thil pathumte hi pakhatmah lakhran theih an ni lova, an in zawm vek a; nimahsela a hran theuh an ni bawksi a ni.

Kan thinlunga Eden sual zungkaih silfai nan Isua Thisen a tawk a, kan thlarau chu Thlarau Thianghlim chuan a chhandam a. Tui baptisma chuan kan taksa thiltih sual a tlengfai a, kan taksa a chhandam a ni. Kan thih hunah kan taksa chu tawih ral mahse, baptisma-ah Isua hming a put tlat avangin boral hlen thei a ni lova, tawihtheihlohna neia kaih thawh leh tur a ni a; kan taksa nen ngei hian Vanramah kan kai dawn a ni. Chuvangin kan taksa ngei hi chhandam a ngai a ni.

Tui sikin kan insilfai thin a, kan inbualfai thin bawk a. Chutiang chiah chuan Isua Krista Hminga tuia baptisma kan chan chuan, kan taksa peng thiltihsual chu tui hmangin Isua Krista Hming chuan a tlengfaiin a silfai a, a tithianghlim ta a ni. Chutichuan tui baptisma Isua Krista hminga kan chan hi, kan tisa leh kan taksa thiltihsual ngaihdamna tur bik a ni.
Taksain Vanram Kan Kai Dawn:

Mihring kan thih hian Vanram kai turte thlarau chu Paradis-ah, Pathian hnenah, Jerusalem Tharah an lo han chawl lai lawk a ni. (Luka 23:43; Thupuan 2:7; 22:2). Jerusalem Tharah chuan Nunna Thing chu a awm a (Thupuan 22:2), Nunna Thing chu Paradis-ah chuan a awm a (Thupuan 2:7), Isua taksa chu thlanah an phum laiin, a Thlarau chu Paradis-ah chuan a awm a (Luka 23:43), chu chu Vanram a ni. Vanram kaiturte thlarau chu Paradisah an chawl ve ngei ang. A tak takah chuan Nunna Thing leh Nunna Tui hi Isua Krista a ni. Nunna thing tih te, Nunna tui lui tihte hi A tak tak kan mitthla thiam theihna tura leia thil awm hmanga a tak tak min kawhhmuhna hmanrua mai an ni.

Isua Krista chu Thlarau chauh ni lovin a taksa nen ngei a lo tho leh ta a. Hmuh theih khawih theih, a ni a, a eiin a in thei a sangha pawh tho leh taksa khan a ei a. A hliam leh ser pawh a la pu vek a; Thoma hnenah min khawih la, rawn zen rawh, keimah pangngai diktak kha ka ni tih ring lovin awm suh a ti a ni. Taksa nen ngei a ni a thawh leh ni. Mahse a inlar thei ta thunga, a ral leh mai a, a duhna hmun hmunah a lo lang leh hlawl thin. Vana mi a nihna bakah Leia siam mi nihna a puhlen a ni. Nihna chihnih a sin thuah a ni. Chutiang chiah chuan keini pawh taksa thi thei tawhlo, tawih thei tawhlo neiin kan tho leh dawn a; Van mi nihna leh lei mi nihna kha kan nei kawp dawn a ni. Taksa nen ngei hian Vanramah kan kai dawn a ni. [Luka 24:36-43; 1Korinth 15:35-54].

ISUA lokal hunah chuan, Ama hnena thlarau muhilte chu Ama rualin a rawn hruai thla anga, thlaraute chuan anmahni taksa theuh an luah leh vek anga, an taksa ngei chu Vanram kai turin ISUAN a kaitho dawn a ni. (I Thessalonika 4:13-18). Tichuan kan thinlung leh kan thlarau chu, he kan taksa-ah hian kumkhuain an awm hlen dawn a ni.

Isua Krista chu taksa chhandamtu a ni bawk a. (Ephesi 5:23). Mithianghlim muhilte chu kan taksa leh thlarau chu lo inthen rih mahsela, Isua hminga thuam tawh taksa, leia tawihral tawh chu, baptisma avang khan Isua hming kan put tlat tawh avangin boral hlen thei a ni dawn lova, Isua hming kan put avang chauh chuan kan lo tho leh anga, Isua hming kha la pu reng chungin kan lo tho leh anga kumkhuain Isua Krista hming chu baptisma kan chan atang khan kan pu hlen dawn a ni. Kan taksa ngei chu chhandamin a awm dawn a ni.(Luka 24:37-43). Taksa hian Isua Krista hming a put theih dan tur Pathian remruat kawngkhat chauh awm chu hei hi a nih kha: “In zinga Kristaa baptisma chang apiangte chu Krista chuan in inthuam tawh si a” tih hi. Baptisma min chantirtu Pastor-in “Isua Krista hmingin ka baptis a che!” a tih veleh a, tuia min hnim phum chiah hian kan taksa chuan Isua Krista hming chu a pu nghal nawlh mai a ni. (Galatia 3:27).


Baptisma Chan Dawnin Sual Sim A Ngai:

Baptisma hi sual sim ngaih damna a nih avangin baptisma chan hmain sual sim a ngai a ni. Simna tello chuan sual ngaihdamna a awm lo.

Baptisma chan dawna sim tura thupek hi eng sual nge? Sual zawng zawng:- Eden bawhchhiatna sual, Nitin sual ni bawk hi a ni. Sual chu enge ni? Thil engpawh Isua Krista duhloh zawng reng reng chu sual a ni vek mai. Isua Krista hi sual leh tha tehna fung diklo theilo chu a ni. Isua hmangin thil engkim endik zel la, engtikahmah sual chu I hai ngai lovang.

Thinlungah hian Isua Krista duhloh zawng ngaihtuahna sual tam tak a awm thin. Pathian rinlohna sual, Pathian hmangaihlohna sual, Pathian beiseilohna sual. Huatna, chapona, khakna, mahni hmasialna, duhamna, thikna, itsikna, sawichhiatna, kan sawi senglo, kan hre seng hek lo. Bawlhhlawhna zawng zawng hi sual a ni. Isua duhloh zawng leh duh zawng chu kan hre zel ang a, Isua duhloh zawng reng reng chu sual a ni.

Sawi chipchiar leh lawk ila: thinlunga ngaihtuahna sual chu lei hian a sawichhuak leh ta a; Isua duhloh zawnga tawng chhuah reng reng chu sual a ni. Isua Krista duhloh zawnga taksa thiltih zawng zawng chu sual an ni vek bawk.

Vanrama luhpui theihloh tur sual reng reng chu Isua Hminga baptisma chang apiangte chuan sim a ngai ta vek mai a ni. Baptismaah Isua hming kan put dawn avangin Isua ang kan loni dawn ta mai a, Isua hming kan put miau avangin Isua anga nung tura ruat kan lo ni ta. Chuvangin baptismaah hian Isua duhloh zawng apiang chu kan phumbo a ngai a ni.

Sual ngaihdamna chu sual simna avang chauhvin alo awm a. Sual simna tello chuan sual ngaihdamna reng reng a awm lo. Isua Krista hming sual ngaihdamna baptisma meuh pawh sual simna tello chuan sual ngaihdamna a ni lo. Sual simna nen erawh chuan sual ngaihdam ngei ngeina a ni. Isua Hming baptisma chang tur tan sual sim hi a pawimawh em avangin lo sawi chipchiar leh deuh ila a tha ang:-

Eden Sual Chu Thinlunga Sual Awm Hi A Ni:

Eden bawhchhiatna sual, original sin, kan nihna sual, kan pianpui sual, mihringa beibet tlat chu mihring thinlung chhunga ngaihtuahna sual awmte chu an ni. Thinlung sual, rilru sual, ngaihtuahna sual chu sual bul chu a ni a, chumi nilo Eden sual dang mihringah hian a awm lo. Thinlunga ngaihtuahna sual ni lo Eden sual mihringah hian zawng chiam mahla I hmu lovang.

Heta thil lo langfiah ta chu hei hi a ni: Baptisma hi Eden sual ngaihdamna a ni tih hi a dik a. Baptisma chan dawn hian “Sim rawh u” tih a nih avangin Eden bawhchhiatna sual chu sim theih a ni tih a chiang ta bawk. Eden sual hi kan sim theih a nilo tih thusawi an awm thin a; chu chu a diklo, kan sim theih avangin simna thu min pe a ni. Eden sual bak sim tur sual dang kan nei lo zawk a ni. Eden sual hi thil danglam tak a ni lova, hriatfiah phakloh leh sual ril tak a nilo, pholeng anga langsar, sual mualpho tak, nitin sual hi a ni Eden sual chu a ni. Pathian fate nun dan phung tura Pathian relsa a awm a; chutiang chu sual a ni silo. Mihring hi sual simin Pathian duh zawngin a nung thei a ni.


Nitin sual {daily sins} chu Eden Sual Hi A Ni :-

Thinlunga ngaihtuahna sual chu taksa peng hrang hrang ten nitin an tipui tling thin a; nitina mihringin thil a tihsual thinna chhan chu a thinlungah Eden sual a awm vang a ni. Chuvangin nitin sual chu mihring thinlung chhunga Eden sual awm ngei chu a ni. Eden sual kha nitinin mihring pawnlam nunah a lo inlar chhuah thin avangin nitin sual chu Eden bawhchhiatna sual tho kha a ni. Chutichuan Eden sual leh nitin sual hi thuhmun a ni. Heng thu khaikhawmna hi ila ngai thla teh ang:- Isua Krista hminga baptisma changtu tur chuan nitin sual Eden sual ni bawk chu sim a ngai tih thu hi.

Eden bawhchhiatna sual leh Nitin sual hi thliar hran tur reng reng a awm lova, sual inthuk hleih an ni lova, sual chihnih an ni lova, sual hrang an ni lo. Thil pakhat, sual pakhat, sual inzawm, thing nise kung khat a ni.


Thingkung Tehkhin Thu Hmangin Simna Sawifiah A Ni:
Mihring sawifiah nan Baptistu Johana leh Isua Krista khan thingkung tehkhin thu an hmang a. Thing chhia hi sual simlo sawi nan an hmanga; thing tha hi sual sim sawi nan an hmang bawk.
Thing Chhia A Rah Tha Thei Lo:
Vawmbal thing hi Eden sual leh nitin sual tehkhin nan hmang ve ila:- Vawmbal hi a chi a zung hi Eden sual ni ta sela, a lo tova, rah hrihlo mahse a rah hunah rah thain a rah dawn lo. A lo rah ta a, thlum tui hle mahse, vawmbal rah ei chu nasataka panna a ni. Vawmbalah thalai reng reng a awm lo. A chi, a zung, a kung leh a rah chu an inzawm vek ang hian Eden sual leh nitin sual chu an inzawm vek a ni. Tichuan Eden sual leh nitin sual hi thil inzawm, thliar hran tur awm lo a ni. Chungte chu baptisma chang turte hnenah sim tura thu pek a ni.

Thing Tha A Rah Chhe Thei Lo:
Thei hai chu a chi a tangin rah thain a rah dawn tih beiseina a awm. A lo tova, hnah a nei a, kung a siam a, rah mai lo mahse, a rah hunah rah thain a rah dawn tih beisei a ni. A rah ta ngei a, a rim a tui a, han ei ila a tui em em mai a ni. Vawmbal kungah theihai a rah lovang a, theihai kungah Vawmbal a rah hek lovang.

Vawmbal thing chu a zung chawpa a thih vek loh chuan [thinlungah sual zawng zawng chu sim a nih loh chuan] a rah leh thin ang [ a sual leh thin ang]. Chu chu sual thihsanlo mihring ang chu a ni. Marphu tawp silo hian sual hi a thihsan theih a. Thinlung sual hi a thih chuan taksain thil a tisual tawh thin lo. Chu chu sual sim awmzia chu a ni.

Theihai kha erawh chu rah thain a lo rah ngei dawn a ni. Tetakte a nih lai pawhin a hnah rim a tui phawt a, a lo par a, a lo rah a, a lo hmin a, a tui em em a, chu chu mihring sual sim rah thaa rah ang chu a ni.

Kross-a Kan Thihve Dan Chu Sual Sim Hi A Ni:
Baptisma chan hmain sual zawng zawng sim a ngai tih sawi nan Kross thu kan sawi leh ang. Hei hi a pawimawh a; dawhtheitakin han chhiar leh teh. Isua chu a thi phawta, chumi hnuah an phum chauh a ni. A nung chungin an phum lo. Kei ni pawh mithiin khawvel tan tih theih an nei tawhlo ang hian, sual zawng zawng kan thihsan ve chuan khawvel tan kan nung thei tawh lo. Khawvel kan thihsan tawh. Khawvel mi nihna kan la thihsan loh chuan sual kan la simlo tih hi chiangtaka kan hriat tur chu a ni.

Kross-ah Isua a thih dawn khan lungngaiin a khat a, lungngai leh thlaphangin a rum a, a lungngaihna chuan a thlan pawh thisen hlawm lian tak angin a sawr chhuak a. Khawvel sualna a phurh avangin misualberah a inruat a; chuvangin thiam thu a sawi theilo a ni, thiamloh chang a ni miau va. Misual ka ni tih inhre tan chuan thiamthu sawi theih a ni si lova. Tihduhdahna thih thlenga tuar tlakah a inruat a; an vua a, chil an chhak a, hling lukhum a khum a, an kheng bet a, a nakah an chhun a, a thi ta a, an phum ta a. Ama thihna tur Kross a pu miau va. “Tupawh a Kross pu-a mi zui lo chu ka mi ni tlak a nilo” a ti ta a; tunge Kross chu pu ngam ta ang le?.

Sual simna, Khawvel thihsanna tak tak chu Kross-a thihna a nih avangin a rapthlak a, lungngaia chauh loh theih a nilo. Thihna rapthlak tak nen hian a inang reng a ni.

Mi tha, tha nia inhriate ten Kross an pu thei lo. Mi fel, fel inti ten Kross an pu thei hek lo. Mite dang nun endika sawiseltu, relrorelsaktu, midang thiamloh chantirtu ten Kross an pu thei heklo. Thiam thu sawi a thiam changten Kross put tur an nei hek lo. Misual chauhvin Kross an pu thin. Thiam loh chang chauhvin Kross an pu thin. Isua Kross put hi mitha Kross a ni lova, mi sual Kross a ni. A mak a ni. Mi sual ber ka ni tih kan in hmuh chhuah hunah Kross-ah kan thi ve thei chauh a ni. Mahni sualna hmu lova nun hi a va hlauhawm teh lul em!

Kross daihlim hnuaia chawl turin min zirtir lova, kan mihring hlui sual khenbeh nan mahni khenbehna tur ngei atan Kross pu turin min zirtir zawk a ni. Mahni sualna kan hmuhchhuah hma loh chuan, midangte chu sual kan ti a, thiamloh kan chantir a, misualte chu kan khengbet leh chawrh chawrh mai thin. Nung tlaklo thi tlak ka ni tih kan in hriatchhuah hma loh chuan khenbehin kan awm ngam lova; mi dangte chu kan khengbet a; kan thi ngam thlawt lova, kan thih ai midang kan thihtir leh mai thin.

Vanrama luh hi awlsam taka sawi an tam mang e. Nimahsela a har em em a, “Mi tamtakin Vanrama luh an tum anga; nimahsela an thei hauh lovang!” Isuan a ti. Sual thihsanna Kross-a thi lo hian mi tamtakin Vanram luh mai kan inring thin a; nimahsela, sual simna tak tak neilo tan Vanramah a luh theih dawn loh a ni. “Krista Isua mite chuan tisa chu a sual ngaihtuahna leh a chaknate chawpin an khengbet ta” tih thu hi Baptisma chan hmaa sual simna dinhmun sawifiahna dik ber a ni.[Galatia 5:24].

Nimahsela Isua Krista thihnaa thi ve tawh chuan Isua phumna pawh a tawmpui ve thei tawh e! Chu chu Isua hminga tuia hnim phum baptisma a chang thei tawh tihna a ni. Isua hminga tuia hnimphum baptisma hi a chan dan tur dik taka kan chan chuan sual ngaihdamna a ni a, chhandamna a ni a, sual tlenfaina a ni a, Isua hnena awmna a ni. A hlu e.

Thihna Khawp Sual:-
“Thihna khawp sual a awm a, thihna khawp nilo sual pawh a awm” Johanan a ti a. (I Johana 5:16-17). He thu hian thihna khawp nilo sual hi sual tha deuh angin a lantir thei a ni mai thei a; chutiang sual chu simlo mah ila a pawi lutuk lemlo, Vanram ka kai thei tho vang kan ti rilru a; a ruktea sual pawitihlohna a siam a, a ruktein sual kawngka min hawn sak a, chutiang ngaihtuahna ruk nei chung chuan mi tamtak kan nung mek reng a ni. Thihna khawp nilo sual hi sim loh chuan hremhmun kalna ngei ngei tur sual a ni a; Isua Krista hminga baptisma changtute chuan thihna khawp nilo sual, sim, ngaihdam nan baptisma kan chan a ngai zawk a ni tih hi kan sawi tum chu a ni.
Thihna Khawp Sual Chu Engnge Ni?

Thuthlung Hlui leh Thar huna Pathian Thuthlunga awmloh chu ngaihdamna awm theilo sual a ni ngei a; mahse chu chu thihna khawp sual a tih hi a nilo. Thuthlunga awm tawhsate zingah thihna khawp sual hi a awm thei a ni zawk. Thlarau Thianghlim sawichhiatna hi thihna khawp sual chu a nichiang khawp mai. Mathaia 12:31leh Marka 3:28-29 thua kan hmuh ang hian sual ang chi zawng zawng bakah Pathian sawichhiatna sual thlengin sim chuan ngaihdamna a awm thei a ni. Fapa a nihna dinhmun hriatchian tawklohna avanga sawichhiat pawh a ngai dam thei a, Kross-ah pawh khan khengbettute ngei pawh “Ka Pa anni hi ngaidam rawh an thiltih hi an hrelo a ni” a la ti hial a; Paula pawh khan “Ringtute a tihduhdah khan hre lova ti a nih avang khan Isuan a ngaidam a; zahngaihna a hmu a nih kha”. Pathian inpuanchhuahna hnuhnungber Thlarau Thianghlim leh a hnathawh sawichhiatna chu ngaihdam theih a nilo tih Isuan a sawi a ni. Tun dam chhung leh chatuanin ngaihdam theih a ni lovang tih Isuan a sawi a, he sual hi a rapthlak hle mai. Tawnhriatna atanga kan hriat pakhat chu tawnghriatloh sawi chhiatna hi Thlarau Thianghlim hmuhsitna leh sawi chhiatna a ni a; Pathian phatsanna a ni bawk a, chutiang mi chuan Pathianin a ngaidam theilo tih rilru leh thlarauva inhriatna an nei a, dinhmun rapthlak tak a ni; Thlarau Thianghlim hnathawh dodal lo turin mi zawng zawng hi fimkhur hle mai rawh se!

Sual ngaihdam theihloh thuah hian Setana a rawn inrawlh vat a, sual ngaihdamtheih la nireng si, ngaihdamna chang thei tawhlo angin mi tamtak a ngaihtuahtir bawk a, nun beidawngin khawvel an chhuahsan thin bawk a, chutiang mite chu Pathian khawngaihna thuk tak chuan a ngaidam thei tih hrilh an ngai bawk a. Chu lo pawh chu Setana rawn inrawlhna a la awm thei a: Thlarau Thianghlim sawichhiatna la ni phaklo, mahse Thlarau Thianghlim sawichhia nita ngeia inngaihna a neihtir bawk thin. Simna pawimawhzia leh Khawngaihna thuk zia hi kan sawifiah phak love.

Thlarau Thianghlim sawichhiatna sual nilo, thihna khawp sual Biblein a sawi dan kawng dang a la awm leh a. Chutiang chi sual chu 42 lai a awm thei a ni. Entir nan pahnih tar lang ila: “A Nu emaw a Pa emaw anchhe lawh apiang chu tihhlum ngei tur a ni” [Leviticus 20:9]. Puithiam fanu nawhchizuar chu hal hlum bawk tur a ni [Leviticus 21:9]. Hengte hi thihna khawp sual an ni. Tunlai Khawvel dan angin thihna khawp sual hi hrilhfiah dawn ila, hremna pui tling, Capital punishment kan tih ang hi a ni. Court rorelnain thi tura misual chunga rorelna tiang an lek ang hi a ni. Damchhung lung in tang tura thutlukna an siam thin hi chu an khaihlum em lova, an tihlum em lova, thihna khawp em sualah an ngai lova, sual hle mahse tihlum em lovin damchhung lung In tang [lifer] turin an chung thu an rel thin a ni. Khaihlum emaw, chiu hlum emaw, silaia kahhlum tur emaw-a Khawvel ram danin ro a relsak thin ang hi thihna khawp sual chu a ni. Tihhlum ngei ngeina khawp sual khawihtu chungchang sawina a ni. Tichuan thihna khawp nilo sual hian Sual nep deuh, sim loh pawha pawilo a awm tihna lam awzawng a kawk lo. He thu hian sual a thlah zal hauh lo a nia.

Tunlaia capital punishment tlukpui chiah chu Bible-ah chuan, lunga den hlum emaw, hal hlum, Kross-a khenbeh emaw an ni thin. Chutiang sual lian tham, misual damlai an tihhlumna tham sual sawina chu a ni. Thihna tham sual, tihhlumna tham sual hi thuthlung hluiah khan 42 lai a awm a ni. Dake’s Annotated Reference Bible phek 95-na (Indian Edition). Thuthlung tharah pawh heng Bible changte hi thihna khawp sual hriatfiah nan han en teh : Tirhkohte Thiltih 13:28; 23:29; 25:11; 25:24-25; 26:31; 28:18 leh Rom 6:16; 7:5 te hi.




1   2   3   4   5   6   7   8   9   10   11


The database is protected by copyright ©hestories.info 2017
send message

    Main page