Bungkhatna trinity trinity a awm lo trinity thurin hmang hian isua krista hming sual ngaihdamna baptisma chu setana



Download 499.51 Kb.
Page9/11
Date conversion29.03.2017
Size499.51 Kb.
1   2   3   4   5   6   7   8   9   10   11

Thihna Khawp Nilo Sual:-
Bible-in thihna khawp sual a tih zinga mi nilo, tihhlumna tham ni em silo, lung Ina khunga capital punishment pekna thama ngaih siloh, Hremhmuna kalna tham sual ni si, Nitin sual zinga mi tam tak a awm a ni. Entir nan dawt sawi hi thihna khawp sual a ni lova; thinlunga huatna pawh hi thihna khawp sual a ni lova, chapona leh duhamna pawh hi thihna khawp sual an ni lova, mi ngaihdam theihlohna pawh hi thihna khawp sual a ni lova; mahse chutiang mi chu Pathianin a ngaidam dawn bik si lo a ni. Chulo pawh tihhlumna tham em nisilo, hremhmuna kalna tham sual nisi tamtak a awm. Chutiang sual chu sim loh chuan Vanram kai theih a ni dawn silo a ni.

Thihna khawp nilo sualte chu sual zawng zawng, Hremhmuna kalna khawp sual apiang sawina a ni. Sim loh pawha pawi lemlo sual tha deuh a awm tihna lam a ni love. Thihna khawp ni silo, hremhmun kalna khawp sual nisi hengah hian kan hmu thei ang: Matthaia 5:22; 5:28; 10:33; I Korinth 6:11; 6:9-10; Galatia 5:19-21; Thupuan 22:15; Kolossa 3:5-11.



Kan sawichhan chu hei hi a ni:- tihhlumna khawp sual chauh sim lovin, hremhmun kalna khawp sual zawng zawng simin, sual ngaihdam nan Isua Krista hmingin baptisma kan chang ngei tur a ni tih hi a ni.


Simna Tura ‘Thununna’ Isua Duhdan :-
Isua Krista hi khawngaihnaa khat a nih avangin a thusawite hian khawngaihna a pai tel zel thin thih hi hre hmasa ila. Sual simna tura Isua duhdan thununna hi a rapthlak hle mai a, a rumra hle a ni. Em em a, kan tih tur thil hi Isuan a duh tlat mai. “In sim loh chuan in boral vek ang” min ti a [Luka 13:1-5]. Sual hi sim duhlo ta ila enge Isua ngaih dan ni ang?

  1. Kut Hi Sim Tura Thupek A Ni:

Pathianin min ngaidam thei tiin I kut chuan sual khawih lui talh zel suh se. Kut hian ruk a ru a, a eiru a, a hlepru a, zu no a dawm a, ka-ah a tulh a, mi a beng a, a vua a, tual a that a, pawi nasa tak a khawih a. Ruihhlo tinreng a la a, indona-ah silai leh khandaih a lek a, sual rawngbawltu chu kut hi a ni a, sawisen a ni love. Aw nang kut, sual sim tura thupek i ni asin :-

“I kutin a tihtluk che chuan tan mai rawh; kut pahnih nei a, Gehenna-a mei mit thei lova kal ai chuan, piangsuala nunnaa luh i tan a tha zawk e, Gehenna-ah chuan an lungte (worm) chu a thiin an mei chu tihmihin a awm ngailo!” (Marka 9:43-44).

He thu Isua sawi hi kan sawi chhawn apiangin dodaltu an lo chhuak nghal ngei ngei thin a ni tih hi kan chhinchhiah tawh. Isua thusawi thutak hlang hi mihring ngaihdanin an pawlh dal thin a. Hmangaihna neilo thusawiah an ngai thin a; nimahsela hmangaihnaa khat Isua thinlung atanga lo chhuak a ni. He thu hi khawngaihna neilo leh khawngaihna hrethiamlo thusawiah an ngai bawk thin a; nimahsela khawngaihnaa khat Isua thu sawi a ni. He thu hian khawngaihna thu a keng tel reng zawk a ni. Chu khawngaihna chu simna tura thu pek hi a ni. Khawngaihna hian sual a zuah lian hauh lo a ni. Felnaa Vanram kaitum thusawiah an puh bawk thin a; nimahsela Isua rawngbawltu angin Isua Krista thusawi chu hlau leh khur chungin kan sawi chhawng zel zawk tur a ni.

Isua sawi chhan zawk chu hremhmun hi a tak a awm vang a ni a, a rapthlak tih a hre chiang em a, chuta kal pumpelhna tur awmchhun a nih phawt chuan thil rapthlakbera kan ngaih kut tan hial pawh sual khawih tawhlo tura tan mai chu Khawngaihnaa khat Isua ngaih dan a ni. “Aw, nang kuta, tan ngai lovin I sual sim rawh!”. Kut tan chu a na dawn em a; eizawnna atan hnathawhna tur kut a nei dawnlo leh nghal a; kutdawh leh riltama thih mai a hmabak dawn a ni tih Isuan a hre em em a; nimahsela, kut hian sual khawih a sim duh nganglo a nih chuan hremhmunah a kal dawn si avangin manganna tawpin “I kut vanga meidila I kal ai chuan tan mai la meidil I pumpelh phahna tur a nih chuan a tha zawk” tih hi Isua hmangaihna tawp tawngkam a ni. Meidila chatuana rawh chawrh chawrh ai chuan tuna kut tan chu a dai hiai hiai zawk ang. Sual hi kan thlah zalen ta em a ni!!. Isua zirtirna chuan kut tan ngai lo turin “sim rawh u” min ti hmasa daih tawh a; sual sim theilote tan kut tan pawh a la tha zawk a tihna a ni. Isua aia fing nih tumahin tum suh se. Kut hian tan ngai lovin sual sim se a va tha em! Kut tan ai chuan sual sim kan thlang zawk mai tur a ni. Kut hian sual sim sela sual ngaihdam nan Isua Krista hmingin baptisma chang mawlh rawh se!




  1. Ke Hi Sim Tura Thupek A Ni Asin !

Ke hian sual lam kawng a zawh luih tlat reng chuan engtikah emaw taksa pumpui hi meidilah a la hruai lut ngei dawn a ni. Sual kawng zawhtu chu ke hi a ni alawm! Pawikhawih tura ngalchak chu ke hi a ni. Thil thalo ti tura taksa hruaitu chu Ke hi a ni.

“I ke-in a tihtluk che chuan tan mai rawh; ke pahnih neia gehenna-a paih ai chuan ke baia nunna luh i tan a tha zawk e!” Isuan a tih chu ngaihtuah chian a va tul tehlul em! Ke hian tan ngai lovin sual sim sela sual ngaihdam nan Isua Krista hmingin baptisma chang rawh se!


  1. Mit Hian Sim Tur A Ngah Hle:-

“Ka mithmuh leh benga ka hriatte hian sualah mi hruai lut!” tih hla hi a dik a ni. Khawvel kan chenna khawpui leh khawtea kan thil hmuh thin tamtakte hi Sodom leh Gomorra khuaa thil bawlhhlawh ang mai kha a lo ni zo ta!. Television, computer, internet, mobile hand set, lehkhabu, chanchinbu-ahte hian Pathian duhzawng thinlung tithianghlim tur thil aiin thinlung tibawlhhlawh thei thil a tam zawk. Chungte chu kan thil mamawh nia kan hriatte an ni zel bawk si. Sodom leh Gomorra chhiat dawna mihringte awmdan hur tak ang khan khawvel a luahkhat zota!.

“I mit-in a tihtluk che chuan kher chhuak mai rawh; mit khing hnih neia Gehenna an lung thih ngai lohna leh an mei mih ngai lohna-a paih ai chuan mit khingkhat neia Pathian rama luh i tan a tha zawk e!” tih thu Isua sawi chu thu chuangtlai leh mi finglo thusawi angmaiah a chang zo ta. Isua thusawi hi tunge ngai pawimawha pawm thei awm ta le? (Marka 9:47-48). Mit hian mit chakna sual bansanin sual ngaihdam nan Isua Krista hmingin baptisma chang ve rawh se. Chutiang bawkin Taksa peng dang, inngaihna sual, uirena, hmeichhia leh hmeichhia inkawpte, mipa leh mipa inkawpte, hurna chi hrang tamtak te hi Pathianin a en reng a, a hmu reng a, a ngawi reng dawn lo. Chutiang taksa thiltih sual thinte chu simin sual ngaihdam nan Isua Krista hmingin baptisma chan tur a ni a sin le.

4. Beng Hian Sual SimTur A Nei Ve Lo Em Ni?:
11Timothea 4: 3-4: “Zirtirna dik an ngaihpeihloh hun a la thleng dawn si; an bengte a zat avangin an mahni duh zawng angin, zirtirtute an hnenah an khawm zawk ang a, an bengte chu thutak lamah an chhungawng anga, thawnthu lam panin an peng tawh ang” tia Paula thusawi kha a lo thlenna a rei tawh em avangin thil thalo pawh ngaiah kan nei thei ta hial mai a; ngaihtuah nawn leh a tul thin mang e.

Beng za awmzia:- “Bible chhiar peih lova lehkhabu dang chhiar peih zawkna, Pathian thu aia thu danga tui zawkna, Isua thu aia thu dang ngaihthlak peih zawkna hi beng za chu a ni”. Heng zawng zawng hi Pathian hnen atang kan kalbo hlat tawhzia tilangtu chu an ni. Thil danga kan tuina hi Isua Krista kebula kan awmlohzia tilangtu a ni. Beng hian Pathian hnen atangin hlatakah min hruaibo thei nameuh mai. Thil tha aiin thil thalo ngaihthlak chakin beng a za a, thu tak a ning a, ho mai mai lam a ngaithla a. Pathian lam hla aiin khawvel atanga chhuak hla thianghlimlo a ngaithla chak zawk a. “Chung thu chu in bengah lut rawh se” Isuan a tih kha chu Kross-ah hrehawm a tuar tur thu leh ama hminga kan tawrh vena tur thu daih kha a ni a sin le. Beng hian a sual simin sual ngaihdam nan Isua Krista hmingin baptisma chang rawh se.


  1. Kan Tawngna Lei Hian Sual Sim Tur A Ngah:-

Kan taksa pengah hian lei hi a sual ber mai. Jakoban kan tawngna lei hi thil tikang thin mei a ni, a ti tawp mai a; “Lei hi mei a ni. Meisi te takte-in thil ava tikang nasa em! Kan taksa pengte zinga khawlohna hlawm chu lei hi a ni. Chu chuan taksa chu a pumin a tibawlhhlawh a, pianpui tawlailir chu a tikang a, amah chu hremhmun tihkan a ni!” tiin. (Jakoba 3:1-2). Thil thalo, sual a sawihnem thin em avangin lei hi khenbeh a ngai a ni. Lei verh tlanga, tawng lo tura hmawlha thil tlanga, lei thunun pawh an awm. Pathian duhloh zawng sawi an hlauh vang a ni. Thil sual sawi aichuan tawng duh lova ngawi renga, tawng nachang hre talo hial pawh an awm bawk.

Lei hian Pathian duhloh zawng ava sawi tam thin teh lul em! Nang, lei, mi bumhmang, engin nge an thungrulh dawn che? Thinlunga ngaihtuahna sual chu lei hian a sawichhuak zel a. Mi a rel a, a sawichhia a, mi a hauva, mi dang thiamloh a chantir a, mahni thiam a inchantir a, cancer anga sual natna mi thinlungah a dah a, chhia a chham a, a chhechham ti puitling turin taksa pumpui a hruai a, a tihtir a; anchhia a lawh a, dawt a sawi a, thian a inhuat tir a, a tithen a, nupa a inhautir a, an inthen a, chhungkua a thendarh a, Kohhran a tichhia a, thenawm a indotir a, hmangaihna a tichhia a, bumna thu a sawi a, Ram leh Ram a indotir a, pawikhawih turin kut a tir a, ke a tir bawk a, lei aia buaina siam nasa thei hi enge awm?

Lei hian a sual simin a sual ngaihdam nan Isua Krista hmingin baptisma a chang tur a ni. Lei hian Isua hming a put tawh chuan Isua duh zawng chauh sawiin tawng tawh rawh se.



  1. Thinlung Hian Sual Sim Rawh Se:

“Thinlung hi thil zawng zawng aiin bum hmang ber, chhe lailet der a ni a; tuin nge hrethiam thei ang?” [Jeremia17:9]. “Thinlung thar ka pe ang che u a; in chhungah thlarau thar ka dah ang” [Ezekiela 36:26]. Taksa thiltih sual zawng zawng te kha thinlung atanga lo chhuak vek an ni. Thinlung hian sual zawng zawng sim sela taksa chuan sual zawng zawng a sim a ni nghal mai. Thinlungin sual a sim chuan thinlung thar Pathian pek chu kan lo nei thei dawn a ni. Taksa peng zawng zawngte hian thinlung atangin sual sim sela, sual ngaihdam nan kan Lalpa Isua Krista hmingin baptisma chu chang rawh se, Amen ! Heng taksa peng hrang hrangte hian a mal tetein baptisma chang rawh se kan ti lova; baptisma kan chanin kan taksa peng zawng zawngte hian sual an sim a ngai vek a ni thih thu kan sawi zawk a ni.



Sual Simna Chuan Hmalam Hun Atan Sim Lawkna A Keng Tel:

Baptisma chan zawhah hmalam huna thlemna lokal tur sual hi a sim lawk theih a, sim lawksa diam tur a ni. Sual simna chuan hun liam tawha thiltihsual simna leh hmalam huna sual lokal tur sim lawkna a kengtel a ni. Thlemna sual i hmachhawn hmaa i sim lawk loh chuan sualah tluk a awl hle dawn a ni. Sual simtu diktak pawhin a tisual palh thei a, simlo chuan a tisual lui thin. Sual chu sim lawk tur a ni tih entir nan, Nu pakhatin sual a sim lawk theih em ni? a ti a. “Aw le pasal nei i ni a, i pasal tan i rinawm a, mipa dang lakah i uire duh dawn lo tih i hre lawk thei em? Uire ai chuan thih thlenga tan ral raih pawh i duh zawk em?. Tichuan uirena sual chu i sim lawk thei em” tih zawhna chu sim lawk theih a ni tih a pawm ta a. Sual dang reng reng hi chutiang vek chu a ni. Sual kan hmachhawn hmain kan sim lawk loh chuan sualna hneh turin kan inpeihsa lova, sual chu do hneh loh a awl hle ang. Hma lam hun atana sual kan sim lawk chuan thlemna leh sual reng reng chu in ralring sain kan hneh thei zel ang. Isua Krista hminga baptisma chang apiangte chu sim hmingpu tlaka nung zui zel tura ruat kan nih kha.
Krista Isuaa Baptisma Chang Awmzia:
Thlarau Thianghlim baptismaah chuan kan taksa In chhungah Isua Thlarauvin a lo awm a; Kristaa baptismaah erawh chuan, Isua taksa In chhungah keimahni kan awm ve thung a ni. Isua hming Tui baptisma leh Thlarau Thianghlim baptisma hmang hian mihring leh Isua Krista chu kan inchenchilh tawn a ni.

Isua Krista hminga tuiah hnimphum baptisma kan chan hian Krista Isua-ah chuan baptisma kan chang nghal a ni. Tuiah baptisma kan chang ang hian Kristaah baptisma kan chang bawk a ni. Kristaa baptisma chang tih hi Kristaa inphum tihna a ni si a, Isua Krista chhunga awm tihna a ni. Tuiah baptisma kan chanin engtinnge Kristaah baptisma kan chan nghal theih?. Kawng khat chauh a awm, Isua Krista hming kher khera baptisma kan chan chauh hian Kristaah baptisma kan chang thei a ni. Krista Isuaa baptisma chang tih chu Bibleah vawi hnih chiah kan hmu a; Rom 6:3-4 leh Galatia 3:26-29 thute hi an ni. Heng mite hian Isua Krista hminga baptisma an chan avangin Kristaah baptisma an chang a ni. Isua Krista-Krista Isua hminga tui baptisma chang velo tan Krista Isuaa baptisma a awm ve thei lo.

Isua Krista chhungah I awm dawn chuan khawiah nge Isua Krista chu a awm tih zawng phawt rawh. Krista chu heta hi a awm: A thutiamah hian. A thu rochhiahah hian Krista chu a awm a. Ama aiawh atan a thu rochhiah kan hnena awm reng turin a dah a. Chu chu a ni Hebrai 9:16-17 thu hian a sawi ni: “Thu rochhiah awmna apiangah a chhiahtu thihna awm ve lo thei a ni silo. Mi an thih hnuin thu rochhiahin thu a nei si thin. A chhiahtu damlai erawh chuan thurochhiah chuan thu reng a nei lo” tih thu hi.

Isua Krista hminga tuia baptisma kan chan hian Krista Isua, Isua Krista hming khera kan chan avang hian Isua Krista hming chuan min chhung khung nghal avangin, Isua Krista chhungah chuan kan lut a; Krista Isuaah phumin kan awm nghal a, Kristaah chuan baptisma kan chang nghal a ni.

A thu rochhiahah chuan Isua chu a awm tih ring la; Vanah a lawn dawn khan Tui leh Thlarauva pian nawnna tur thu chu kawng dangin a sawi a, a ma aiawha Khawvelah awm turin thu rochhiah min hnutchhiah ta a, a thu rochhiahah chuan Isua chu a awmzui bawk a, chu chu hei hi a ni: “A ringa baptisma chang chu chhandamin an awm anga, a ringlo erawh chu thiam loh changin an awm ang” tih leh “Thlarau Thianghlim nei rawh u” tih thute kha. [Marka 16:16; Johana 20:22]. A thu rochhiahah Isua chu a awm reng avangin baptisma kan chan hian Isua Krista hnenah kan inphum ve ta chiah a ni. Chu chu a ni Paula hian a sawi ni: “Baptisma kan chanin, a thihnaah, a hnenah phum vein kan awm” a tih kha. [Rom 6:4].

Krista Isuaa baptisma tih chu Rom 6: 3 thu leh Galatia 3:27 thu chauh hian an sawi a, heng Bible thu pahnih ang hian Krista Isua, Isua Krista hming ngeiin tuiah hnim phumin baptisma chang la, tichuan Krista Isuaah baptisma I chang tihna a ni ang. Tirhkohte 2: 38 thu anga Isua Krista hming ngeia baptisma I la chan loh chuan Kristaah baptisma I la changlo a ni. Biblea Kristaa baptisma changte chuan Isua Krista hming ngeiin tuiah baptisma an chang vek a ni.
Rilru maia Krista Isuaa awm anga inngaih vanga awm theih mai a ni lo. A tak ngeia tui baptisma Isua Krista hminga chan chauhvin Kristaah baptisma a chan theih a ni. Kristaa baptisma a lo nih theih nan Isua Krista hming lam tel ngei a lo ngai ta a ni. Isua Krista hminga tui baptismaah lo chuan Kristaa baptisma a awm thei reng reng lo. Isua Krista hming baptisma hmanrua atan hmangin Krista Isua chhungah chuan kan lut ta a, Isua Krista hming chuan silhfen puan anga min tuam hnan vek avangin Krista Isuaah chuan baptisin kan awm ta a ni. Chu chu a ni Paula hian a sawi ni “In zinga Kristaa baptisma chang apiangte kha Krista chuan in inthuamtawh si a” tiin.[Galatia 3:27].
Thlarau Baptisma Hi Krista Isuaa Baptisma A Nilo:
Mi tamtakin Thlarau Thianghlim baptisma an chanin Krista Isuaah baptisma ka chang tawh tiin Isua hming tui baptisma an hnawl mai thin. Thlarau baptisma leh Kristaa baptisma an ngaih pawlh vang a ni thin. Nimahsela Thlarau baptisma leh Kristaa baptisma hi thil inanglo an ni. “Keimahah awm reng rawh u, kei pawh nangmahniah ka awm reng ang” tih thu ang chi hmang hian Isuan Thlarau baptisma leh Kristaa baptisma a thliar hrang a ni. (Johana 15:4).

Thlarau Thianghlim baptisma chu kan taksa In chhungah Isua Krista, Thlarauva a lo awm thu sawina a ni a; Kristaa baptisma erawh chu, Krista Isua taksa In chhungah leh Ama Hming chhungah mihring kan awm thu sawina a ni. Krista Isua hminga Tui baptisma leh Thlarau Thianghlim baptisma hmang hian mihring leh Isua Krista chu kan inawmchilh tawn theia, kan inluhkhung tawn thei a, kan inchenchilh tawn thei ta a ni.

Isuaah kan awm reng dan chu tui baptisma hmang tho hian a ni.

Isua Krista hminga tui baptisma kan chan atang khan kumkhuain Isua Krista hming chu kan pu hlen tawh dawn a; englai pawhin Krista Isuaah taksa In leh A hming chhungah chuan baptisin kan awm hlen ta reng a, Isua hming chuan silhfen puan ang mai hian kan taksa pumpui hi min tuam chhuak vek a, min chhungkhung tak tlat avangin Isua-ah [Isua kawchhungah] kan awm reng thei ta mai a ni. Chutiang bawk chuan Isua Krista thuah kan awm reng thei bawk ta a; kan awm reng tur pawh a nita a ni. “Nangni keimaha in awm renga, ka thu nangmahnia a awm reng bawk chuan, in duh apiang dil rawh u; in tan tihin a awm zel ang” a ti leh nghal a, a va lawmawm the lul em. [Johana 15:7].


Isua keimahniah a awm reng theih dan ve thung chu Thlarau Thianghlim baptisma hi a ni.

Thlarau Thianghlim kan chan atang chiah khan Isua Krista chu kan kawchhungah a awm ve ta thunga, keimahniah englai pawhin a awm ve ta reng mai a ni. “Nangmahniah [kan kawchhungah tihna] Isua Krista chu a awm tih in hrefiah lo em ni?” tiin Thlarau Thianghlim kan kawchhunga awm hi Isua Krista a ni tih Paulan a sawi kha. [11 Korinth 13:5]. Thlarauva kan hnenah a awmna hi chu Kristaa baptisma a ni lova, keimahniah, kan kawchhungah Krista a inbaptis vena zawk a ni. Hmeichhia pawhin mipa pawhin kan kawchhungah Krista Isua chu Nuin naute a pai ang hian kan pai ta a, kan kalna apiangah Krista chu kan kalpui zel a; malin kan awm ngai love. Hei tak hi “Kei pawh nangmahniah ka awm reng ang” a tih kha a ni.

Maktakin Isua nen kan in luhkhung tawn a, kan in awmchilh tawn a, kan in chenchilh tawn thei ta a; Isua kawchhungah kan awm a, Isua pawh kan kawchhungah a awm a, kan in hnaih em em reng a ni. Chuvangin Thlarau Thianghlim I chan tawh chuan nangmaha awm reng Isua Krista chu be mai zel ang che.

Baptisma Hmangin Thilsiam Thar Kan Ni:
Sual sim vek a Isua Krista hming baptisma kan chan chuan, Eden bawhchhiatna sual fa kan nihna kha a lo hlui tawh anga, thil hlui sual kha a boral tawh ang a, Pathian fa mi thar, thil siam thar {new creature } kan lo ni leh dawn ta a ni. Isua Krista hminga baptisma kan chan veleh khan Isua Kristaah chuan kan awm ta a; kan nihna thar a lolang ta a:- “Tupawh Kristaa a awm chuan thil siam thar [ new creature] a lo ni a; thil hlui [sual] a ral ta a; ngai teh u, a lo thar ta!” tih thu hi. [11Korinth 5:17].

Tin, hei hi kan theihnghilh hlauh a nge:- Isua Krista hminga baptisma kan chan hi Isua Krista zirtirna zawng zawng Nitin zawm zel tura Isua hnena thutiam kan tiamna a ni a tih leh Isua hnena kan in pumpekna a ni tih hi. Chu chu Isua Kristaa baptisma kan chan chhan pawimawh ber chu a ni. Isua hming baptisma chuan Isua zirtirna zawng zawng a keng tel vek a ni tih hriain baptisma kan chang tur a ni. Luka bung 6 thu chauh pawh kha I Nitin nun kawng hruaituah hmang ta la, Pathian mithmuhah mi thafamkim I ni thei ang. Chu chu I zawm chuan I lo tha famkim tial tial dawn a ni. I dinhmun chu hei hi a ni ang: Mihring thar, Isua ta I ni tawh anga:-



“Chu mihring thar chu hriatfamkimna nei turin, a siamtu [Pathian] anpui anga siamtharin a awm mek a ni” tih hi nangmah ngei kha I lo ni tawh dawn a ni. [Kolossa 3:10].

Thlarau Thianghlim thuamna chu I lo chang leh anga Tui leh Thlarauva hrin thar, piang nawn, piang thar I lo ni anga, Rorelna Ni I hlau ngai tawh lovang. Chumi a chinah chuan hei hi I nunna thar a lo ni ang:-


“Chutichuan tunah zawng Krista Isuaa awmte tan chuan thiamloh chantirna reng a awm tawh lo. Krista Isuaa Nunna Thlarau dan chuan sualna leh thihna dan ata chu mi tichhuak tawh si a”.tih thu hi. [Rom 8:1-2].

Chhuanlam dang siam lovin, tlanchhiatna zawng hek lovin mihring hlui siam tharlehna Tui leh Thlarau baptisma hi chang hmasa la, thil dang chu Lalpan a rem tih chuan a hnuah I bawh zui chauh dawn nia. Tui leh Thlarauva piang tharin, thil siam thar I nih hmasak phawt loh chuan I nun pumpui kha a thlawn mai a lo ni hlauh dah ang e.


“Siam thar lehna [new creature] lo chu serhtan [Thuthlung Hlui dan anga tisa serh vun hmawr tan ] hi engmah a ni lova; serhtan loh pawh engmah a ni hek lo” [Galatia 6:15].
Isua Hming Baptisma Hi Serh Tan Dan Thar a Ni:
Thuthlung Hluiah khan Pathian mite chuan Pathian thupek zawmin tisa serh vun hmawr an tan a. Hnam dang zawng zawng pawh Pathian mi an lo nih dawn chuan serh vun hmawr an rawn tan ve ngei ngei tur a ni. Serh tan loh chu Pathian mi a nih theih loh a ni. Serhtante khan serh tan velohte chu nupaah insiam pui Pathianin a phal hauhlo bawk a. Hmeichhe tana serhtan tlukpui a awm a; “Rinna leh hmangaihna leh thianghlimna neiin, rilru fel tak nena an awm fo chuan, fa hrin avangin chhandamin an awm ang” tih a ni. [1Timothea 2:15].

“Aw Jerusalem, khawpui thianghlim, tun achinah chuan serh tan loh leh mi bawlhhlawh chu I chhungah an lut dawn tawh silo” tih hi serhtanloh tan Vanramah a luh theih dawn loh tihna a ni ang.[Isaia 52:1].

Serhtan dan thar chu Isua Krista hminga baptisma chan hi a ni. Isua Krista hminga baptisma changlo tan Jerusalem tharah chuan a luh theih dawn loh tihna a ni ang. Serh tan dan thar chu hei hi a ni: “Krista serh tannaah chuan tisa taksa hlip vekin amah vekah chuan kuta serh tan ni lovin serh tan in nih kha; baptismaah chuan a hnena phum in lo ni ve tawh si a” tih hi [Kolossa 2:11-12].
Nausen Baptisma Leh Serh Tan Inanlohna:

Bible-ah Nausen hi baptisma an chantir ngai hauhlo va. A.D. 416 kumah Holy Roman Empire an tih leh Roman Catholic Kohhran inkawp chuan Nausen baptisma [baptisma ni lovin thlawr rantiju chu baptisma an tita mai a] chu an tichhuak tan ta a ni. {Infant baptism, It’s History and It’s Harm; by William Pettingill}. Baptisma chu tuia hnimpil tur a nih avangin, Nausen baptisma I chantir dawn chuan nausen chu tuiah I hnimphum a ngai tihna a ni. Nausen nih vanga thlawr chu baptisma a ni si lova. Nausen baptisma leh Naupang baptisma hi thuhmun a nilo. Naupang hian Pathian thu nguntaka kan hrilh chuan kum 10 an tlin hmain puitling angin Pathian an ring thei a ni. Pathian rin theih leh rin theihloh tehna hi kum [chronological age] a ni lova; rilru kum [mental age] hmanga teh zawk tur a ni. Puitling aiin naupang hian Pathian an ring zawk fo bawk.

Serhtan chu nausen lai, pian Ni atanga Ni riat Nia mipa serh vun hmawr tan a ni a; chumi entawna nausen laiin baptisma kan chantir dawn chuan Nausen chu Ni riat Niah tuiah hnimphum [baptis tur] tur a ni ang. Kan thlawr chuan baptisma an chang chuang si lova. Thlawr rantiju an chang mai a ni a; thlawr tura thupek Bibleah a awm heklo. Nausen tui thlawr hi Kohhran hna chuangtlai, thil tullo ni mai lovin, ringtu baptisma hnawlbona hmanrua a ni a, Servetus-a phei chuan ramhuai atanga chhuak a tihial a ni. Nausen baptisma hi a dik lova, ringtu baptisma zawk a ni e tia hnialtu Anna Baptist an lo chhuah khan Michael Servetus chauhvin a thih phah lova, mi maktaduaih 40 zetin an thih phah tawh a ni. Nausen chuan amahin Pathian a la ring thei lova, “A ringa baptisma chang chu chhandamin an awm ang” tih thu leh, “I thinlung zawng zawnga I rin chuan I chang thei e” tih thute hian Nausen nih laia baptisma chan chu a tullo tih a sawi nghal a ni, Pathianin a phut lo tih a lang a ni. [Marka 16:16; Tirhkohte 8:37].

Ringtu Nu leh Pa rinnaah chuan nausen chu an him a, Thlarau Thianghlim an chan theih nan an luchungah kut nghata tawngtaiin Thlarau Thianghlim chu nausen laiin an chang thei a; nausen laia baptisma chantira inngaite hian Thlarau Thianghlim chan aiin tui baptisma an ngaipawimawh zawk tih alang. Nimahsela baptisma pawh an ngai pawimawh tak tak chuang lo; ngaipawimawh an nih chuan Isua Krista hmingin tuiah hnim phumin an chantir tur a nisi a. Chu erawhchu an rilrem zawng a ni leh chuang bawk silo.

Nu pumchhunga awmlai pawhin Thlarau Thianghlima khat an awm thei a; [[Luka 1:15]; chu chu kan ngaih pawimawh zawk tur chu a ni. Nu leh pa Thlarauvin khat se; nausen chu Thlarauvin a lo khat thei ang; Baptistu Johana chu a nu leh pa Thlarauvin an khat a; Johana chu a nu pum chhungah a awm laiin Thlarauvin a khat thei ta a ni. Chu chu kan entawn zawk tur a ni ang. [Luka :41, 67].

Nova lawng anpui chu Isua Hminga tui baptisma hi a ni a [1Petera 3:20]; Chhandamna lawngah kan chuang duh a; thingin [gopher thing] hmangin lawng kan tuk kherlo ang bawk hian nausen laia serhtan anpui baptisma chu, rinna nei thei kan nih hunah Lalpa Isua Krista rinna avangin kan chang mai tur a ni. Bibleah nausenin baptisma an channa reng reng a awm lo. Chhungkuaa baptisma an chan pawhin Isua Krista ringtheitu an ni vek tihna mai a ni.




1   2   3   4   5   6   7   8   9   10   11


The database is protected by copyright ©hestories.info 2017
send message

    Main page